Ntlhontlho Wa Ku Letela Vana Namuntlha

HI VUSIKU byin’wana, n’wini wa khefi a a lunghiselela ku pfala leswaku a ta muka. Hiloko ku nghena vavasati vambirhi ni n’wana wa mufana va oda swakudya. Leswi a a karhele ngopfu, n’wini wa xitolo a a lava ku va byela leswaku se u pfarile, kambe hiloko a va nyika swakudya leswi va swi odeke. Loko vavasati lavambirhi va ri karhi va vulavula hi hala tlhelo va ri ku dyeni, n’wana luya a a tsutsuma-tsutsuma ekhefini, a ri karhi a lahletela makokisi ehansi a tlhela a ma kandziyela. Ematshan’weni ya leswaku mana wa n’wana a n’wi holovela, u lo n’wayitela. Loko va heta ku dya kutani va famba, n’wini wa khefi loyi a a karhele, u boheke ku basisa thyaka leri vangiweke hi n’wana loyi.

Hilaha u swi tivaka hakona, mhaka leyi ya xiviri yi kombisa leswaku emindyangwini yo tala, vana a va leteriwi. Swivangelo swa kona swa hambana. Vatswari van’wana va pfumelela vana va vona ku endla leswi va swi lavaka, va anakanya leswaku vana va fanele va kurisiwa va ntshunxekile. Kumbe leswi vatswari va tshamaka va khomekile swinene, swi nga ha endleka va nga tinyiki nkarhi wa ku nyika vana va vona nyingiso lowukulu ni ndzetelo lowu lavekaka. Vatswari van’wana va anakanya leswaku xa nkoka swinene i ku va vana va vona va nghena xikolo, kutani va pfumelela n’wana ku endla xin’wana ni xin’wana ntsendze loko a pasa kahle exikolweni leswaku a amukeriwa ekholichi leyi dumeke.

Kambe, van’wana va vula leswaku minkongomiso ya vatswari ni ya vanhu swi fanele swi lulamisiwa. Va vula leswaku vana va ya va katseka swinene eka vugevenga byo hambana-hambana naswona madzolonga ya le xikolweni ma nyanya siku ni siku. Hikwalaho, nhloko ya xikolo xa le hansi xa le Seoul, le Riphabliki ra Korea, yi kandziyise leswaku i swa nkoka swinene ku dyondzisa vana hi ku antswisa vumunhu bya vona. Yi te: “U fanele u va ni vumunhu ku sungula, hi kona u nga ta kuma vutivi.”

Vatswari vo tala lava lavaka leswaku vana va vona va ya ekholichi swi tlhela swi va fambela kahle evuton’wini, va honisa switsundzuxo. Loko u ri mutswari, xana u lava leswaku n’wana wa wena a va munhu wa muxaka muni? Xana u lava leswaku a va munhu lonkulu la nga ni mahanyelo lamanene a tlhela a va ni vutihlamuleri? Xana u lava a va munhu la anakanyelaka van’wana, loyi a pfumelelanaka ni swiyimo ni loyi a nga ni langutelo lerinene? Loko swi ri tano, hi kombela u kambisisa xihloko lexi landzelaka.