‘U Hi Dyondzise Ku Xixima Vukhongeri Bya Yena’

MBHONI yin’wana ya Yehovha leyi tshamaka exifundzheni xa Rovigo, le Italy, yi kume leswaku yi na tshumba naswona rihanyo ra yona a ri ri ekhombyeni. Endzhaku ko tshama exibedlhele hi minkarhi yo hlayanyana, laha a kombeleke ku tshunguriwa handle ko tirhisa ngati, xiyimo xi koxe leswaku a ya ongoleriwa ekaya hi vaongori va ndhawu ya ka vona lava va khathalelaka vanhu lava karhatiwaka hi vuvabyi bya khensa.

Ripfumelo leri tiyeke ra muvabyi loyi wa malembe ya 36 hi vukhale ri va tsakise swinene vaongori va yena tanihi leswi a a tirhisana na vona kahle. Loko vuvabyi bya khensa byi nga si n’wi dlaya, un’wana wa vaongori vakwe u tsale hi ta leswi a swi dyondzeke eka muvabyi loyi a n’wi vitaneke Angela, ivi rungula ra kona a ri rhumela eka magazini wa vaongori.

“Angela i munhu la tsakeke naswona u rhandza vutomi. Wa swi tiva leswaku u khomiwe hi vuvabyi lebyikulu naswona ku fana na mani na mani na yena u lava lexi nga n’wi hanyisaka. . . . Hina vaongori hi kote ku n’wi twisisa hi ku famba ka nkarhi. A a nga wu ali mpfuno wa hina. Ku hambana ni sweswo, Angela i munhu la tiphofulaka, hikwalaho swilo hinkwaswo a swi olova. A hi swi tlangela ku n’wi khathalela hi ku tiva leswaku hi ta vuyeriwa tanihi leswi a a ri munhu la vulaka leswi humaka embilwini. . . . Hi hatle hi swi xiya leswaku vukhongeri bya yena a byi ta hi sivela ku n’wi tshungula hi ndlela ya hina.” Leri a ku ri vonelo ra mutshunguri hikuva a a lava leswaku Angela a nyikiwa ngati, kambe yena a ala.—Mintirho 15:28, 29.

“Tanihi vaongori, hi byele Angela leswaku a hi pfumelelani ni xiboho xa yena, kambe yena u hi pfune ku twisisa leswi vutomi byi vulaka swona eka yena. Hi tlhele hi kota ku twisisa leswi vukhongeri byakwe byi vulaka swona eka yena ni le ka ndyangu wa ka vona. Angela a nga wanga mapa. Vuvabyi bya yena a byi n’wi hetanga matimba. U tshama a tiyimiserile. Wa swi lava ku hanya ni ku hambeta a hanya. U endle vanhu va tiva leswi a tiyimiseleke swona ni leswi a swi pfumelaka. U ni ku tiyimisela loku hakanyingi hi nga riki na kona, ripfumelo leri tiyeke leri hina hi nga riki na rona. . . . Angela u hi dyondzise nkoka wa ku xixima vugandzeri bya yena, ku nga nchumu lowu hambanaka ni ntirho wa hina. . . . Leswi Angela a hi dyondziseke swona ha swi tshemba leswaku i swa nkoka, tanihi leswi hi hlanganaka ni vanhu va mixaka hinkwayo, va swiyimo hinkwaswo ni va vukhongeri byo hambana-hambana naswona hi nga dyondza eka vona ni ku tlhela hi va pfuna hi ndlela yo karhi.”

Kutani xihloko xa magazini lowu xi vulavule hi Nawu wa Mahanyelo Lamanene ya Vaongori va le Italy lowu simekiweke hi 1999, lowu nge: “Muongori u ongola a ri karhi a anakanyela vukhongeri bya munhu loyi a n’wi ongolaka, mahanyelo, ndhavuko, swin’we ni rixaka ni rimbewu.” Minkarhi yin’wana, madokodela ni vaongori va nga ha tikeriwa hi ku xixima timhaka ta vukhongeri bya muvabyi, kambe lava va tiyimiseleke ku ti xixima ha va tlangela swinene.

Swiboho leswi endliwaka hi Timbhoni ta Yehovha malunghana ni ku khathalela rihanyo ra tona swi va swi anakanyisisiwe kahle. Ti kambisisa swinene leswi Matsalwa ma swi vulaka naswona hilaha swi kombisiweke hakona emhakeni ya Angela, a ti hisekeli etlhelo. (Vafilipiya 4:5) Emisaveni hinkwayo, vunyingi bya vanhu lava tirhanaka ni swa vutshunguri va tiyimisele ku xixima ripfalo ra vavabyi lava nga Timbhoni.