Xixima Nyiko Ya Wena Ya Vutomi Hi Ndlela Leyi Faneleke

“Ngati ya Kreste [yi ta] basisa mapfalo ya hina emintirhweni leyi feke leswaku hi ta endlela Xikwembu lexi hanyaka ntirho wo kwetsima.”—VAHEVERU 9:14.

1. Hi byihi vumbhoni lebyi kombisaka leswaku hi xixima vutomi swinene?

LOKO a wo komberiwa ku veka nxavo wa vutomi bya wena, xana a wu ta ku i mali muni? Vutomi bya hina ni bya vanhu van’wana hi byi teka byi ri bya nkoka swinene. Sweswo hi swi vona hi ku va loko hi vabya hi ya eka dokodela leswaku a ya hi tshungula kumbe hi tshama hi ri karhi hi kamberiwa hi yena. Hi lava ku tshama hi hanye kahle. Ni vanhu vo tala lava dyuhaleke kumbe lava lamaleke a va swi lavi ku fa; va lava ku tshama va ri karhi va hanya.

2, 3. (a) Swivuriso 23:22 yi kandziyisa vutihlamuleri byihi? (b) Xikwembu xi katseka njhani eka vutihlamuleri lebyi boxiweke eka Swivuriso 23:22?

² Mpimo lowu u xiximaka vutomi ha wona wu khumba vuxaka bya wena ni vanhu van’wana. Hi xikombiso, Rito ra Xikwembu ri ri: “Yingisa tata wa wena la ku velekeke, naswona u nga n’wi languteli ehansi mana wa wena hileswi a kuleke.” (Swivuriso 23:22) Ku “yingisa” a swi vuli ku twa marito ntsena; xivuriso lexi xi vula ku twa swo karhi kutani u swi endla. (Eksoda 15:26; Deteronoma 7:12; 13:18; 15:5; Yoxuwa 22:2; Pisalema 81:13) Rito ra Xikwembu ri ri u fanele u yingisa hikwalaho ka xivangelo xihi? A wu yingisi hikwalaho ka leswi tata wa wena ni mana wa wena va nga vakulu eka wena kumbe hileswi va nga ni ntokoto lowukulu evuton’wini ntsena. Xivangelo lexi vuriwaka hileswi va “ku velekeke.” Vuhundzuluxeri byin’wana byi veka ndzimana yoleyo hi ndlela leyi: “Yingisa tata wa wena la ku nyikeke vutomi.” Hilaha ku twisisekaka, loko u xixima vutomi bya wena, u titwa u kolota xihlovo xa vutomi byebyo.

³ Ina, loko u ri Mukreste wa ntiyiso, u teka Yehovha a ri yena Xihlovo xa vutomi bya wena. Ha yena u “ni vutomi”; u kota ku “famba,” u endla swilo ku fana ni xivumbiwa lexi nga ni switwi; kasi sweswi u “kona” naswona u nga anakanya kumbe u kunguhata vumundzuku, ku katsa ni vutomi lebyi nga heriki. (Mintirho 17:28; Pisalema 36:9; Eklesiasta 3:11) Hi ku pfumelelana na Swivuriso 23:22, swi fanerile ku “yingisa” Xikwembu hi ku titsongahata, u navela ku twisisa langutelo ra xona hi vutomi kutani u kongomisiwa hi rona ematshan’weni yo lava ku teka vutomi hi ndlela yin’wana.

Xixima Vutomi

4. Eku sunguleni ka matimu ya vanhu, xana ku xixima vutomi ku ve mhaka ya nkoka hi ndlela yihi?

⁴ Eku sunguleni ka matimu ya vanhu, Yehovha u swi veke erivaleni leswaku a nga pfumeleli vanhu leswaku va tihanyela ku rhandza. Hikwalaho ka vukarhi lebyi nga ni mavondzo, Kayini u herise vutomi lebyi nga riki na nandzu bya makwavo wakwe Avele. Xana u anakanya leswaku Kayini a a ri ni mfanelo yo endla xiboho xo tano malunghana ni vutomi? Xikwembu a xi nga n’wi teki a ri na yona mfanelo yoleyo. Xi tengise Kayini xi ku: “Xana u endle yini? Yingisa! Ngati ya makwenu yi huwelela eka mina yi ri emisaveni.” (Genesa 4:10) Xiya leswaku ngati ya Avele leyi a yi ri emisaveni a yi yimela vutomi byakwe, lebyi herisiweke hi tihanyi, kutani a yi huwelela eka Xikwembu leswaku yi rihiseriwa.—Vaheveru 12:24.

5. (a) Hi wihi nawu lowu Xikwembu xi wu vekeke enkarhini wa Nowa, naswona a wu tirha eka vamani? (b) Xana nawu lowu a wu ri goza ra nkoka hi ndlela yihi?

⁵ Endzhaku ka Ndhambi, vanhu va nhungu va ve ni masungulo lamantshwa. Eka nawu lowu tirhaka eka vanhu hinkwavo, Xikwembu xi paluxe swo tala malunghana ni ndlela leyi xi xiximaka vutomi ni ngati ha yona. Xi vule leswaku vanhu va nga dya nyama ya swiharhi, kambe xi veke nawu lowu: “Xiharhi xin’wana ni xin’wana lexi famba-fambaka lexi hanyaka xi ta va swakudya swa n’wina. Hilaha ku fanaka ni hi swimila swa rihlaza, hinkwaswo ka swona ndzi mi nyika swona. Ntsena nyama leyi nga ni moya-xiviri wa yona—ngati ya yona—mi nga tshuki mi yi dya.” (Genesa 9:3, 4) Vayuda van’wana va ri marito wolawo ma vula leswaku vanhu a va  nga pfumeleriwanga ku dya nyama kumbe ngati ya swiharhi leswa ha hanyaka. Kambe hi ku famba ka nkarhi swi kombisiwe kahle leswaku leswi Xikwembu a xi swi yirisa laha a ku ri ku dyiwa ka ngati hi xikongomelo xo antswisa rihanyo. Ku tlula kwalaho, nawu lowu Xikwembu xi wu nyikeleke hi Nowa a wu ri goza ra nkoka ro fikelela xikongomelo xa xona lexi tlakukeke lexi katsaka ngati—xikongomelo lexi a xi ta endla leswaku vanhu va kuma vutomi lebyi nga heriki.

6. Xikwembu xi ri kandziyise njhani langutelo ra xona malunghana ni ku xixima vutomi, hi ku tirhisa Nowa?

⁶ Xikwembu xi ye emahlweni xi ku: “Ngati ya mimoya-xiviri ya n’wina ndzi ta yi lava. Ndzi ta yi lava evokweni ra xivumbiwa xin’wana ni xin’wana lexi hanyaka; ni le vokweni ra munhu, evokweni ra un’wana ni un’wana loyi a nga makwavo, ndzi ta lava moya-xiviri wa munhu. Un’wana ni un’wana la halataka ngati ya munhu, ngati yakwe yi ta halatiwa hi munhu, hikuva Xikwembu xi endle munhu hi xifaniso xa xona.” (Genesa 9:5, 6) U nga swi vona eka nawu lowu wu nyikiweke vanhu hinkwavo leswaku Xikwembu xi teka ngati ya munhu tanihi leyi yimelaka vutomi bya yena. Muvumbi hi yena a nyikaka munhu vutomi, kutani a ku na munhu la faneleke a herisa vutomi byebyo lebyi yimeriwaka hi ngati. Loko munhu un’wana o dlaya munhu ku fana na Kayini, Muvumbi u ni mfanelo ya ku “lava” vutomi bya munhu yoloye eka mudlayi wa kona.

7. Ha yini hi fanele hi khathala hi nawu lowu Xikwembu xi wu nyikeke Nowa malunghana ni ngati?

⁷ Hi nawu wa xona, Xikwembu a xi lerisa vanhu leswaku va nga tirhisi ngati hi ndlela yo biha. Xana u tshame u tivutisa leswaku ha yini? Ina, a xi ri xihi xivangelo xa ku va Xikwembu xi va ni langutelo ro tano malunghana ni ngati? Kahle-kahle, nhlamulo yi fambisana ni yin’wana ya tidyondzo ta nkoka swinene eBibeleni. Dyondzo yoleyo i ya nkoka swinene eka rungula ra Vukreste, hambileswi tikereke to tala ti hlawulaka ku yi honisa. Hi yihi dyondzo ya kona, naswona vutomi bya wena, swiboho swa wena ni swiendlo swa wena swi khumbeka njhani?

Ngati—Xana A Yi Ta Tirhisiwa Njhani Hi Ndlela Leyi Faneleke?

8. Ehansi ka Nawu, hi wihi nawu lowu Yehovha a wu vekeke malunghana ni ku tirhisiwa ka ngati?

⁸ Yehovha u nyikele vuxokoxoko byo tala malunghana ni vutomi ni ngati loko a nyika Vaisrayele Nawu. U tlhele a teka goza rin’wana leswaku a hetisisa xikongomelo xa yena. Kumbexana wa tsundzuka leswaku Nawu a wu lava leswaku Xikwembu xi endleriwa magandzelo, yo tanihi ya mavele, ya mafurha ni ya vhinyo. (Levhitika 2:1-4; 23:13; Tinhlayo 15:1-5) Nakambe a ku ri ni magandzelo ya swiharhi. Malunghana na wona Xikwembu xi te: “Moya-xiviri wa nyama wu le ngatini, kutani mina ndzi mi vekele yona ealitarini leswaku yi kombela ku rivaleriwa ka mimoya-xiviri ya n’wina, hikuva i ngati leyi kombelelaka ku rivaleriwa hi moya-xiviri lowu nga eka yona. Hi yona mhaka leyi ndzi nga byela vana va Israyele ndzi ku: ‘Ku hava moya-xiviri wa n’wina lowu faneleke wu dya ngati.’” Yehovha u engetele hileswaku loko munhu un’wana, wo tanihi muhloti kumbe murimi, o dlaya xiharhi leswaku a ta xi dya, a a fanele a humesa ngati ya xona a yi seletela hi misava. Misava i vunavelo bya Xikwembu, naswona loko munhu a halata ngati emisaveni, a a kombisa leswaku vutomi a byi tlheriseriwa eka Munyiki wa Vutomi.—Levhitika 17:11-13; Esaya 66:1.

9. Xana Nawu a wu lerise leswaku ngati yi fanele yi tirhiseriwa yini ntsena, naswona a xi ri xihi xikongomelo xa leswi?

⁹ Nawu wolowo a wu nga ri mukhuva wa vukhongeri lowu nga pfuniki nchumu. Xana u swi xiyile leswaku ha yini Vaisrayele a va nga fanelanga va dya ngati? Xikwembu xi te: “Hi yona mhaka leyi ndzi nga byela vana va Israyele ndzi ku: ‘Ku hava moya-xiviri wa n’wina lowu faneleke wu dya ngati.’” Xivangelo xa kona a ku ri xihi? “Mina ndzi mi vekele [ngati] ealitarini leswaku yi kombela ku rivaleriwa ka mimoya-xiviri ya n’wina.” Xana wa swi xiya leswaku leswi swi endla hi twisisa xivangelo xa ku va Xikwembu xi byele Nowa leswaku vanhu a va nga fanelanga va dya ngati? Muvumbi u hlawule ku teka ngati yi ri ya nkoka swinene, a lava leswaku yi tirha hi ndlela yo hlawuleka leyi a yi ta ponisa vanhu vo tala. A yi ta hetisisa xiphemu xa nkoka eku funengeteni ka swidyoho (ku rivaleriwa swidyoho). Hikwalaho ehansi ka Nawu, ndlela yin’we ntsena leyi a yi amukeleka emahlweni ka Xikwembu ya ku tirhisa ngati a ku ri ku yi tirhisa ealitarini leswaku ku kombeleriwa Vaisrayele lava a va lava ku rivaleriwa hi Yehovha.

10. Ha yini ngati ya swiharhi a yi nga endli leswaku vanhu va rivaleriwa swidyoho hi ku helela, kambe xana magandzelo lawa a ma endliwa ehansi ka Nawu a ma ri xitsundzuxo xa yini?

¹⁰ Mhaka leyi yi tirha ni le ka Vukreste. Loko a vulavula  hi xiphemu xexo xa Nawu wa Xikwembu, muapostola Pawulo la nga Mukreste u tsarile: “Swilo swo tala swi basisiwa hi ngati hi ku ya hi Nawu, naswona loko ngati yi nga halatiwi, ku hava ku rivaleriwa.” (Vaheveru 9:22) Pawulo u swi veke erivaleni leswaku magandzelo lawa a ma laveka a ma endlanga leswaku Vaisrayele va va vanhu lava hetisekeke lava nga riki na xidyoho. U tsarile: “Hi switlhavelo leswi ku ni ku tsundzukiwa ka swidyoho lembe ni lembe, hikuva a swi koteki leswaku ngati ya tinkunzi ni ya timbuti yi susa swidyoho.” (Vaheveru 10:1-4) Nilokoswiritano, magandzelo lawa a ma ri ya nkoka. Ma tsundzuxe Vaisrayele leswaku a va ri vanhu lava nga ni xidyoho, naswona a va lava nchumu lowu engetelekeke leswaku va ta rivaleriwa swidyoho hi ku helela. Kambe loko ku ri leswaku ngati leyi a yimela vutomi bya swiharhi a yi nga swi funengeti hi ku helela swidyoho swa vanhu, xana a ku ri ni ngati yin’wana leyi a yi ta swi funengeta?

Ntlhantlho Wa Munyiki Wa Vutomi

11. Hi swi tivisa ku yini leswaku magandzelo lawa a ma endliwa hi ngati ya swiharhi a ma kombetela eka nchumu wun’wana?

¹¹ Nawu kahle-kahle a wu kombetela eka nchumu wun’wana lowu a wu pfuna swinene eku hetisiseni ka ku rhandza ka Xikwembu. Pawulo u vutisile: “Kutani, ha yini ku ve ni Nawu?” U hlamurile: “Wu engeteriwile leswaku ku tlula nawu ku kombisiwa, kukondza ku fika mbewu leyi xitshembiso xi endliweke eka yona; naswona wu hundzisiwe hi tintsumi hi voko ra muhlanganisi [Muxe].” (Vagalatiya 3:19) Hilaha ku fanaka, Pawulo u tsarile: “Nawu wu . . . ni ndzhuti wa swilo leswinene leswi nga ta ta, kambe leswi ku nga riki swilo swa kona hi xiviri.”—Vaheveru 10:1.

12. Malunghana ni ngati, hi nga ku twisisa njhani ku paluxiwa ka xikongomelo xa Xikwembu?

¹² Hi ku komisa, tsundzuka leswaku enkarhini wa Nowa Xikwembu xi lerise leswaku vanhu va nga dya nyama ya swiharhi leswaku va ya emahlweni va hanya, kambe a va nga fanelanga va dya ngati. Hi ku famba ka nkarhi, Xikwembu xi vule leswaku “moya-xiviri wa nyama wu le ngatini.” Ina, xi hlawule ku teka ngati tanihi leyi yimelaka vutomi kutani xi ku: “Mina ndzi mi vekele [ngati] ealitarini leswaku yi kombela ku rivaleriwa ka mimoya-xiviri ya n’wina.” Hambiswiritano, xikongomelo xa Xikwembu a xa ha ta paluxeka hilaha ku engetelekeke hi ndlela leyi hlamarisaka. Nawu a wu fanekisela swilo leswinene leswi a swa ha ta. A ku ri yini swilo swa kona?

13. Ha yini rifu ra Yesu a ri ri ra nkoka?

¹³ Ku hetiseka ka swona a ku fambisana swinene ni ku fa ka Yesu Kreste. Wa swi tiva leswaku Yesu u xanisiwile a tlhela a beleriwa emhandzini. U fe ku fana ni xigevenga. Pawulo u tsarile: “Loko ha ha tsanile, Kreste, u fele vanhu lava nga xiximiki Xikwembu hi nkarhi lowu vekiweke. . . . Xikwembu xi tiyisekisa rirhandzu ra xona n’wini eka hina, hileswi Kreste a hi feleke, loko ha ha ri vadyohi.” (Varhoma 5:6, 8) Kreste u nyikele nkutsulo lowu funengetaka swidyoho swa hina hi ku hi fela. Nkutsulo wolowo i xisekelo xa rungula ra Vukreste. (Matewu 20:28; Yohane 3:16; 1 Vakorinto 15:3; 1 Timotiya 2:6) Xana leswi swi fambisana njhani ni ngati ni vutomi, naswona vutomi bya wena byi katseka njhani?

14, 15. (a) Vuhundzuluxeri byin’wana bya Vaefesa 1:7 byi ri kandziyisa njhani rifu ra Yesu? (b) I yinhla yihi malunghana ni tsalwa ra Vaefesa 1:7 leyi nga honisiwaka?

¹⁴ Tikereke tin’wana ti kandziyisa rifu ra Yesu, vanhu lava nghenaka eka tona va vula marito yo tanihi lama nge “Yesu u ndzi ferile.” Xiya ndlela leyi vuhundzuluxeri byin’wana bya Bibele byi yi hundzuluxelaka ha yona Vaefesa 1:7: “Hi ponisiwa hikwalaho ka yena ni hikwalaho ka rifu rakwe, ku nga ku susiwa ka swidyoho swa hina.” (The American  Bible, hi Frank Scheil Ballentine, 1902) “Ha ntshunxiwa hi rifu ra Kreste, naswona swidyoho swa hina swa rivaleriwa.” (Today’s English Version, 1966) “Hi ponisiwile ha Kreste na hi gandzelo ra vutomi byakwe, ku ponisiwa loku vulaka ku rivaleriwa swidyoho.” (The New Testament, hi William Barclay, 1969) “Swidyoho swa hina swi rivaleriwa hikwalaho ka rifu ra Kreste naswona ha ntshunxiwa.” (The Translator’s New Testament, 1973) Wa swi xiya eka vuhundzuluxeri lebyi leswaku ku kandziyisiwa rifu ra Yesu. Van’wana va nga ha ku, ‘Kambe rifu ra Yesu i ra nkoka hakunene. Kutani, i yini leswi vuhundzuluxeri lebyi byi swi siyeke?’

¹⁵ Hakunene, loko a wo va ni vuhundzuluxeri byebyo ntsena, a wu ta honisa yinhla ya nkoka swinene, naswona leswi a swi ta endla leswaku u nga ri twisisi hi ku hetiseka rungula ra le Bibeleni. Vuhundzuluxeri lebyi byi tumbeta mhaka ya leswaku tsalwa ro sungula ra Vaefesa 1:7 ri ni rito ra Xigriki leri vulaka “ngati.” Hikwalaho, Tibibele to tala, tanihi Vuhundzuluxeri Bya Misava Leyintshwa, ta yelana ni vuhundzuluxeri byo sungula: “Ha yena hi ni ku ntshunxiwa hi nkutsulo hi ngati ya yena, ina, ku rivaleriwa ka swivi swa hina, hi ku ya hi rifuwo ra musa wa xona lowu nga faneriwiki.”

16. Xiga lexi nge “ngati ya yena” xi fanele xi dzikisa yini emianakanyweni ya hina?

¹⁶ Nhlamuselo leyi nge “ngati ya yena” i ya nkoka swinene naswona yi fanele yi vula swo tala emianakanyweni ya hina. A ku laveka nchumu wa nkoka swinene ku tlula rifu, hambi ri ri rifu ra Yesu loyi a a ri munhu la hetisekeke. U hetisise leswi a swi fanekiseriwa eNawini, ngopfu-ngopfu hi Siku ra ku Rivaleriwa Swidyoho. Hi siku rolero ro hlawuleka, a ku nyikeriwa swifuwo leswi hlawuriweke. Kutani muprista lonkulu a a teka yin’wana ya ngati ya swona a ya na yona eNdhawini yo Kwetsima Ngopfu etabernakeleni kumbe etempeleni, a fika a yi nyikela emahlweni ka Xikwembu, onge hiloko xi ri kona kwalaho.—Eksoda 25:22; Levhitika 16:2-19.

17. Yesu u swi hetisise njhani leswi a swi fanekiseriwa hi Siku ro Kombela ku Rivaleriwa?

¹⁷ Yesu u hetisise leswi a swi fanekiseriwa hi Siku ro Kombela ku Rivaleriwa, hilaha Pawulo a hlamuseleke hakona. U rhange a vula leswaku muprista lonkulu wa le Israyele a a nghena eNdhawini yo Kwetsima Ngopfu kan’we hi lembe a ri ni ngati leyi a yi “nyikel[a] yi va yakwe, yi tlhela yi va ya swidyoho leswi vanhu va swi endlaka hi ku ka va nga tivi.” (Vaheveru 9:6, 7) Hi ku pfumelelana ni sweswo, endzhaku ka ku pfuxiwa ka yena tanihi xivumbiwa xa moya, Yesu u tlhelele etilweni. Leswi se a a ri xivumbiwa xa moya lexi a xi nga ha ri na miri lowu nga ni nyama ni ngati, a a ta swi kota ku ya humelela emahlweni ka “Xikwembu hi xiviri hikwalaho ka hina.” Xana u fike a xi nyika yini Xikwembu? A nga xi nyikanga nchumu wa nyama kambe u xi nyike nchumu wa nkoka swinene. Pawulo u ye emahlweni: “Loko Kreste a ta a ri muprista lonkulu . . . , a nga nghenanga ni ngati ya timbuti ni ya swinkunzana, kambe u nghene ni ngati yakwe, kan’we swi helela kwalaho endhawini yo kwetsima kutani a hi kumela ku kutsuriwa loku nga heriki. Hikuva loko ngati ya timbuti ni ya tinkunzi . . . swi kwetsimisa lerova va basa enyameni, ku vuriwa yini hi ngati ya Kreste, loyi hi moya lowu nga heriki a tinyikeleke a nga ri na xisolo eka Xikwembu, a basisa mapfalo ya hina emintirhweni leyi feke leswaku hi ta endlela Xikwembu lexi hanyaka ntirho wo kwetsima?” Ina, Yesu u nyike Xikwembu nkoka wa ngati ya vutomi bya yena.—Vaheveru 9:11-14, 24, 28; 10:11-14; 1 Petro 3:18.

18. Ha yini swiga swa le Bibeleni leswi vulavulaka hi ngati swi fanele swi va swa nkoka eka Vakreste namuntlha?

¹⁸ Ntiyiso lowu wa Xikwembu wu hi endla hi twisisa mhaka yo hlamarisa leyi Bibele yi yi vulaka hi  ngati—ku nga xivangelo xa ku va Xikwembu xi yi languta hi ndlela leyi xi yi langutaka ha yona, langutelo leri hi faneleke hi va na rona ha yona, ni xivangelo xa ku va hi fanele hi yingisa milawu leyi Xikwembu xi yi vekeke malunghana ni ku tirhisiwa ka ngati. Loko u hlaya tibuku ta Matsalwa ya Vukreste ya Xigriki, u ta kuma tindhawu to tala laha ku vulavuriwaka hi ngati ya Kreste. (Vona bokisi.) Leswi swi swi kombisa kahle leswaku Mukreste un’wana ni un’wana u fanele a va ni ripfumelo “engatini ya [Yesu].” (Varhoma 3:25) Hi nga rivaleriwa swidyoho swa hina hi tlhela hi va ni ku rhula na Xikwembu “hi ngati leyi [Yesu] a yi halateke” ntsena. (Vakolosa 1:20) Sweswo swi kotekile eka lava Yesu a endleke ntwanano wo hlawuleka na vona leswaku va ya fuma na yena etilweni. (Luka 22:20, 28-30; 1 Vakorinto 11:25; Vaheveru 13:20) Swi tano ni le ka “ntshungu lowukulu” namuntlha, lowu nga ta pona ‘nhlomulo lowukulu’ lowu taka kutani wu ya kuma vutomi lebyi nga heriki emisaveni leyi nga paradeyisi. Va ta va va ‘hlantswe tinguvu ta vona to leha hi ngati ya Xinyimpfana’ hi ndlela yo fanekisela.—Nhlavutelo 7:9, 14.

19, 20. (a) Ha yini Xikwembu xi hlawule ku veka nawu malunghana ni ku tirhisiwa ka ngati, naswona hi fanele hi titwa njhani malunghana ni mhaka yoleyo? (b) Kutani hi fanele hi tsakela ku tiva yini?

¹⁹ Swi le rivaleni leswaku ngati i ya nkoka swinene emahlweni ka Xikwembu. Ni le ka hina yi fanele yi va ya nkoka swinene. Muvumbi u ni mfanelo yo veka milawu malunghana ni leswi vanhu va faneleke va swi endla hi ngati, hikuva wa khathala hi vutomi. Leswi a khathalaka swinene ni hi vutomi bya hina, u lava leswaku ngati yi tirhisiwa hi ndlela yin’we ntsena ya nkoka swinene, ndlela leyi nga ta endla leswaku swi koteka ku kuma vutomi lebyi nga heriki. Ndlela yoleyo a yi katsa ngati ya risima ya Yesu. Ha nkhensa swinene leswi Yehovha Xikwembu a endleke leswaku hi vuyeriwa hi ku tirhisa ngati—ngati ya Yesu—hi ndlela leyi yi ponisaka vutomi!  Naswona hi fanele hi n’wi tlangela swinene Yesu hileswi a halateke ngati yakwe tanihi gandzelo hikwalaho ka hina! Kunene, hi nga twisisa marito lama vuriweke hi muapostola Yohane: “Eka yena loyi a hi rhandzaka naswona a hi ntshunxeke eswidyohweni swa hina hi ngati yakwe—loyi a hi endleke mfumo wa vaprista eka Xikwembu tlhelo Tata wa yena—ina, ku vangama ni matimba a swi ve eka yena hi masiku. Amen.”—Nhlavutelo 1:5, 6.

²⁰ Xikwembu xa hina lexi tlhariheke ku tlula vanhu hinkwavo tlhelo Munyiki wa Vutomi, i khale xi ri karhi xi anakanya hi mhaka leyi yo ponisa vutomi. Kutani hi nga ha vutisa, ‘Xana leswi swi fanele swi swi khumba njhani swiboho swa hina ni swiendlo swa hina?’ Xihloko lexi landzelaka xi ta hlamula xivutiso xexo.

A Wu Ta Hlamurisa Ku Yini?

• Hi nga dyondza yini malunghana ni ndlela leyi Xikwembu xi yi langutaka ha yona ngati eka mhaka leyi katsaka Avele na Nowa?

• Ehansi ka Nawu, Xikwembu a xi lava leswaku ngati yi tirhisiwa njhani, naswona ha yini?

• Yesu u swi hetisise njhani leswi a swi fanekiseriwa hi Siku ro Kombela ku Rivaleriwa?

• Ngati ya Yesu yi nga byi ponisa njhani vutomi bya hina?

[Swivutiso Swa Dyondzo]

[Bokisi leri nga eka tluka 18]

I NGATI YA MANI LEYI PONISAKA VUTOMI?

“Nyikelani nyingiso eka n’wina vini ni le ka ntlhambi hinkwawo, lowu moya lowo kwetsima wu mi vekeke ku va valanguteri va wona, ku risa vandlha ra Xikwembu, leri xi ri xaveke hi ngati ya N’wana wa xona.”—Mintirho 20:28.

“Hikokwalaho, leswi se hi vuriweke lava lulameke hikwalaho ka ngati ya yena, hakunene hi ta ponisiwa evukarhini hikwalaho ka yena.”—Varhoma 5:9.

“A mi nga ri na ntshembo naswona a mi nga ri na Xikwembu emisaveni. Kambe sweswi evun’weni na Kreste Yesu n’wina lava mi tshameke mi va ekule ngopfu mi le kusuhi hi ngati ya Kreste.”—Vaefesa 2:12, 13.

“Xikwembu xi vone swi ri swinene leswaku ku tala hinkwako ku tshama eka yena, ni leswaku ha yena xi tlhela xi vuyelelanisa swilo swin’wana hinkwaswo hi ku endla ku rhula hi ngati leyi a yi halateke emhandzini ya nxaniso.”—Vakolosa 1:19, 20.

“Hikokwalaho, vamakwerhu, . . . hi . . . ni vurhena eka ndlela yo nghena endhawini yo kwetsima hi ngati ya Yesu.”—Vaheveru 10:19.

“Swilo leswi onhakaka . . . a mi kutsuriwanga ha swona endleleni ya ku tikhoma ka n’wina loku nga vekiki mihandzu loku mi ku kumeke hi ndhavuko eka vatata wa n’wina. Kambe a ku ri hi ngati ya risima, leyi fanaka ni ya xinyimpfana lexi nga solekiki, lexi pfumalaka xivati, yi nga ya yena Kreste.”—1 Petro 1:18, 19.

“Loko hi famba eku vonakaleni tanihi laha na xona xi nga eku vonakaleni, hi na xona xinakulobye eka un’wana ni un’wana, naswona ngati ya Yesu N’wana wa xona ya hi basisa eswidyohweni hinkwaswo.”—1 Yohane 1:7.

“Swa ku fanela ku teka buku-nsongwa u pfula swilemo swa yona, hikuva u tlhaviwile naswona hi ngati ya wena u xavele Xikwembu vanhu lava humaka eka tinyimba hinkwato ni tindzimi hinkwato ni vanhu hinkwavo ni matiko hinkwawo.”—Nhlavutelo 5:9.

“Muhehli wa vamakwerhu u lahleriwe ehansi . . . Va n’wi hlule hikwalaho ka ngati ya Xinyimpfana ni hikwalaho ka rito ra ku nyikela ka vona vumbhoni.”—Nhlavutelo 12:10, 11.

[Xifaniso lexi nga eka tluka 16]

Hi ku tirhisa Nawu, Xikwembu xi swi veke erivaleni leswaku ngati yi nga tirha eku rivaleleni ka swidyoho

[Xifaniso lexi nga eka tluka 17]

Vutomi byo tala byi nga ponisiwa hi ngati ya Yesu