Papila Leri Tsaleriweke Nowa

“EKA Nowa la rhandzekaka, se ndzi hlaye ha wena ko tala eBibeleni ni ndlela leyi u akeke ngalava ha yona, leyi yi poniseke wena ni ndyangu wa wena hi nkarhi wa Ndhambi.”

Ri sungurisa sweswo papila ra Minnamaria, nhwanyana wa malembe ya 15 hi vukhale loyi a ngheneleke mphikizano wo tsala xitsalwana wa swichudeni swa malembe ya 14 ku ya ka 21 hi vukhale. Mphikizano lowu a wu hleriwe hi ndzawulo ya poso ya le Finland, Vandla ra Vadyondzisi Lava Hluvukisaka Ririmi ra le Finland ni Vandla leri Kandziyisaka Tibuku hi Ririmi ra le Finland. Vana lava ngheneleke mphikizano lowu a va fanele va tsala papila leri vulavulaka hi buku. A va fanele va ri kongomisa eka mutsari wa buku ya kona kumbe munhu loyi yi vulavulaka ha yena. Vadyondzisi va hlawule mapapila yo hundza 1 400 ya switsalwana swa swichudeni kutani va ma yisa eka vaavanyisi va mphikizano. Hiloko vaavanyisi va hlawula xitsalwana xin’we lexi tsariweke kahle ku tlula hinkwaswo, va tlhela va hlawula khume leswi nga eka xiyimo xa vumbirhi ni swin’wana swa khume leswi welaka eka xiyimo xa vunharhu. Minnamaria a a tsakile ku vona papila ra yena ri hoxiwe eka ntlawa wa vunharhu.

Hikwalaho ka yini Minnamaria, xichudeni xa kondlo-a-ndzi-dyi a tsale papila leri yaka eka Nowa, wanuna la hanyeke malembe ya kwalomu ka 5 000 lama hundzeke? U ri: “Bibele yi ve buku yo sungula leyi teke emianakanyweni ya mina. Ndzi tiva vanhu vo tala lava Bibele yi vulavulaka ha vona. Ndzi hlaye ngopfu ha vona lerova eka mina va vonaka va ri lava hanyaka. Ndzi hlawule ku vulavula hi Nowa hikuva vutomi bya yena a byi tsakisa byi tlhela byi hambana swinene ni bya mina.”

Papila leri Minnamaria a ri tsaleleke Nowa ri gimeta hi marito lama nge: “Ni sweswi wa ha ri xikombiso lexinene xa ripfumelo ni ku yingisa. Vutomi bya wena byi khutaza hinkwavo lava hlayaka Bibele leswaku va hanya hi ku landza ripfumelo ra vona.”

Papila leri ra xichudeni lexi lexitsongo xa Bibele ri swi kombisa kahle leswaku hakunene Bibele ya “hanya naswona [yi] ni matimba” eka vanhu lavatsongo ni lavakulu.—Vaheveru 4:12.