Hulumendhe Ya Xikwembu I Ya Xiviri Namuntlha

“Xana swi nga kotekisa ku yini leswaku vanhu va matiko yo tala, lava nga ni mindhavuko yo hambana-hambana ni swiyimo leswi nga faniki, va twanana? Ku vuriwe leswaku nhlaselo lowu humaka eka pulanete yin’wana hi wona ntsena lowu nga ta hlanganisa tinxaka ta vanhu.”—The Age, phepha-hungu ra le Australia.

NHLASELO lowu humaka eka pulanete yin’wana? Hambileswi hi nga swi tiviki loko nhlaselo wolowo wu ta swi kota ku hlanganisa matiko hinkwawo ya misava kambe vuprofeta bya Bibele byi vulavula hi nyimpi leyi nga ekusuhi leyi nga ta hlanganisa matiko hinkwawo ya misava. Entiyisweni, nyimpi yoleyo yi ta lwiwa hi mavuthu ya le tilweni.

Hosi Davhida wa le Israyele wa khale u profete hi xiyimo lexi xa misava. Xikwembu xi n’wi huhutele ku tsala a ku: “Tihosi ta misava ta tserhama ni tindhuna leti tlakukeke ti vungane swin’we tanihi munhu un’we ku lwa na Yehovha ni mutotiwa wakwe, ti ku: ‘A hi tsemeni switsimbo swa vona hi ti cukumeta le kule na hina tintambhu ta vona!’” (Pisalema 2:2, 3; Mintirho 4:25, 26) Xiya leswaku vafumi va misava va ta vungana swin’we tanihi munhu un’we ku lwa na Yehovha, Muvumbi wa vuako hinkwabyo ni mutotiwa wa yena kumbe Hosi leyi a yi vekeke, Yesu Kreste. Xana sweswo swi ta endleka njhani?

Hi ku ya hi ntlhandlamano wa minkarhi ya le Bibeleni ni vuprofeta lebyi hetisekeke, hi lembe ra 1914, Mfumo wa Xikwembu wu simekiwile ematilweni laha Yesu Kreste a nga Hosi ya wona. * Hi nkarhi wolowo matiko ya misava a ma  ri ni mianakanyo yin’we. Ematshan’weni yo titsongahatela vulawuri bya Mfumo wa Xikwembu lowu a wa ha ku simekiwa, a ma lwela ku fuma—Nyimpi Leyikulu kumbe Nyimpi yo Sungula ya Misava.

Xana Yehovha Xikwembu u xi languta njhani xiendlo xexo xa vafumi va misava? “Yena la tshameke ematilweni u ta hleka; Yehovha hi byakwe u ta va hlekula. Hi nkarhi wolowo u ta vulavula na vona hi ku hlundzuka kakwe u ta va karhata hi vukarhi byakwe lebyikulu.” Kutani Yehovha u ta byela N’wana wakwe, Hosi leyi totiweke ya Mfumo a ku: “Kombela eka mina, leswaku ndzi ta ku nyika matiko ma va ndzhaka ya wena ni makumu ya misava ma va rifuwo ra wena. U ta ma faya hi nhonga ya nsimbi ya vuhosi, u ta ma faya ma va swiphemu-phemu ku fana ni xibya xa muvumbi.”—Pisalema 2:4, 5, 8, 9.

Ku herisiwa ko hetelela hi nhonga ya nsimbi ka matiko lama kanetaka ku ta va eArmagedoni kumbe Har–Magedoni. Buku yo hetelela ya Bibele ku nga Nhlavutelo, yi hlamusela ku chaputa ka xiendlakalo lexi tanihi “nyimpi ya siku lerikulu ra Xikwembu xa Matimba Hinkwawo,” laha ‘tihosi ta misava hinkwayo leyi akiweke’ ti nga le ku hlengeletiweni kona. (Nhlavutelo 16:14, 16) Hi ku hlohloteriwa hi madimona, matiko ya misava hinkwayo ma ta hlengeletana hi xikongomelo xin’we—ku lwa ni Xikwembu xa Matimba Hinkwawo.

Nkarhi lowu vanhu va nga ta vungana swin’we ku lwisana ni vuhosi bya Xikwembu wa tshinela hi ku hatlisa. Lexi hlamarisaka, “vun’we” bya vona byi nge va vuyerisi. Ematshan’weni ya sweswo, xiendlo xa vona xi ta va ku sungula ka ku rhula loku ku nga khale vanhu hinkwavo va ku languterile. Njhani? Eka nyimpi yoleyo yo hetelela, Mfumo wa Xikwembu “wu ta pfotlosa kutani wu herisa mimfumo leyi hinkwayo [ya misava], kambe wona wu ta tshama hilaha ku nga riki na makumu.” (Daniyele 2:44) Mfumo wa Xikwembu hi wona ntsena lowu nga ta hetisisa ku navela ka vanhu ka ku rhula ka misava hinkwayo, ku nga ri nhlangano wihi na wihi wa vanhu.

Mulawuri-nkulu Eka Hulumendhe Ya Xikwembu

Wolowo i Mfumo lowu vanhu vo tala lava nga ni timbilu letinene va wu khongeleleke va ku: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:10) Mfumo wa Xikwembu a hi xiyimo lexi ngo anakanyiwa xa mbilu, kambe i hulumendhe ya xiviri leyi endleke swilo swo hlamarisa ku sukela loko yi simekiwile etilweni hi 1914. A hi kambisiseni tinhla tin’wana ta nkoka leti kombisaka leswaku Mfumo wa Xikwembu hakunene wu le ku fumeni namuntlha.

Xo sungula, wu ni xiyenge lexi nga ni matimba ni lexi hlelekeke lexi kongomisaka timhaka hi ndlela leyinene naswona xi rhangeriweke hi Hosi leyi vekiweke, Yesu Kreste. Hi 33 C.E., Yehovha Xikwembu u endle Yesu Kreste leswaku a va Nhloko ya vandlha ra Vukreste. (Vaefesa 1:22) Ku sukela kwalaho, Yesu u tirhisa vunhloko byakwe xisweswo a kombisa vuswikoti bya yena byo kongomisa timhaka. Hi xikombiso, loko ndlala leyikulu yi hlasela eYudiya hi lembe-xidzana ro sungula, vandlha ra Vukreste ri teke goza hi ku hatlisa leswaku ri pfuna swirho swa rona. Ntirho wo phalala wu hleriwile kutani Barnaba na Sawulo va rhumeriwa ni swilo swo phalala ha swona va suka eAntiyoka.—Mintirho 11:27-30.

Sweswi hi nga langutela swo tala eka Yesu Kreste, tanihi leswi Mfumo wu simekiweke naswona wu nga le ku fumeni. Loko ku tshuka ku va ni timhangu—ku tsekatseka ka misava, tindlala, tindhambhi, swidzedze kumbe ku buluka ka tivholkheno—vandlha ra Vukreste ra Timbhoni ta  Yehovha ri hatla ri pfuna vapfumeri-kulobye ni vanhu van’wana lava nga etindhawini leti weriweke hi mhangu. Hi xikombiso, loko ku tsekatseka lokukulu ka misava ku hlasele tiko ra El Salvador hi January na February 2001, ntirho wo phalala wu hleriwile etikweni hinkwaro naswona Timbhoni ta Yehovha to huma eCanada, Guatemala ni le United States ti pfunetile. Tindhawu tinharhu ta tona to gandzela eka tona ti tlhele ti akiwa hi xinkarhana ku katsa ni makaya yo tlula 500.

Lava Nga Ta Fumiwa Hi Hulumendhe Ya Xikwembu

Ku sukela loko wu simekiwile hi 1914, Mfumo wa Xikwembu wa le tilweni wu le ku hlengeleteni ni ku hlela lava nga ta fumiwa hi wona eka vanhu va misava hinkwayo. Leswi swi hetisisa vuprofeta lebyi xiyekaka lebyi tsariweke hi Esaya: “Exiphen’wini xo hetelela xa masiku ntshava ya yindlu ya Yehovha [vugandzeri byakwe bya ntiyiso lebyi tlakukeke] yi ta simekiwa yi tiya ehenhla ka tintshava, . . . kutani matiko hinkwawo ma fanele ma khitikanela eka yona.” Vuprofeta byi kombisa leswaku “vanhu vo tala” va ta tlhandlukela entshaveni yoleyo va amukela swiletelo ni milawu ya Yehovha.—Esaya 2:2, 3.

Ntirho lowu wu endle leswaku ku va ni nhlangano wa nkoka swinene wa manguva lawa—vamakwerhu va misava hinkwayo lava nga Vakreste lava tlulaka 6 000 000 ematikweni lama tlulaka 230 emisaveni hinkwayo. Emintsombanweni ya matiko hinkwawo ya Timbhoni ta Yehovha, vanhu hakanyingi va hlamarisiwa hi ku vona rirhandzu, ku rhula ni vun’we exikarhi ka vanhu vo tarisa xileswi, swi hlula swihinga swa rixaka, ndhavuko ni ririmi. (Mintirho 10:34, 35) Xana a wu pfumeli leswaku loko hulumendhe yi ta kota ku hlanganisa tinxaka ta vanhu hi ku rhula ni vun’we, yi fanele yi hleleka, yi va leyi tiyeke—naswona yi va ya xiviri?

Mfumo Wa Xikwembu Ni Dyondzo

Hulumendhe yin’wana ni yin’wana yi ni milawu leyi vaaka-tiko va yona va faneleke va yi landzela, naswona un’wana ni un’wana loyi a lavaka ku hanya ehansi ka hulumendhe leyi u fanele a landzelela milawu leyi. Hilaha ku fanaka, Mfumo wa Xikwembu wu ni milawu leyi hinkwavo lava nga ta faneleka ku fumiwa hi wona va faneleke va yi landzelela. Hambiswiritano, leswaku vanhu vo tarisa xileswi lava nga ni mindhavuko yo hambana-hambana va swi kota ku amukela ni ku landzela milawu leyi fanaka i ntirho lowukulu hakunene. Ku ni yinhla yin’wana leyi tiyisekisaka leswaku Mfumo wa Xikwembu i wa xiviri—nongonoko wa wona wo dyondzisa lowu humelelaka lowu fikelelaka ni ku hundzula mianakanyo ni timbilu ta vanhu.

Xana Mfumo lowu wu wu hetisisa njhani ntirho lowu wo nonon’hwa? Hi ku tirhisa ndlela ya vaapostola yo chumayela “hi yindlu ni yindlu” ni ku dyondzisa munhu ha un’we-un’we Rito ra Xikwembu. (Mintirho 5:42; 20:20) Xana dyondzo leyi yi pfuna hi ndlela yihi? Jacques Johnson, mufundhisi wa Mukhatoliki, u tsarile eka phepha-hungu ra vhiki ni vhiki ra le Canada malunghana ni matshalatshala ya yena yo lava ku tshikisa wansati un’wana ku dyondza ni Timbhoni ta Yehovha. U te: “A ndzi pfilunganyekile naswona ndzi swi xiyile leswaku a ndzi nge humeleli. Ndzi  sungule ku xiya leswaku eka tin’hweti to hlayanyana leti hundzeke vavasati lava va Timbhoni ta Yehovha va endle vuxaka lebyikulu ni manana loyi a a nga swi koti ku huma ekaya. Va tiyise vuxaka hi ku n’wi pfuna, va va ni xinghana na yena naswona sweswo swi endle leswaku a titwa a ri ekaya. Hi ku hatlisa u sungule ku va xirho lexi hisekaka xa vukhongeri bya vona naswona a ku ri hava lexi a ndzi ta xi endla ku sivela sweswo.” Tanihi leswi mbilu ya khale ka Mukhatoliki loyi yi susumetiweke hi rungula ra Bibele leri dyondzisiwaka hi Timbhoni ta Yehovha ni hi mahanyelo ya tona ya Vukreste, kutani timbilu ta vanhu va timiliyoni emisaveni hinkwayo ta khumbeka.

Dyondzo ya muxaka lowu—dyondzo ya Mfumo—yi sekeriwe eBibeleni, yi seketela milawu ya yona emhakeni ya mahanyelo. Yi dyondzisa vanhu ku rhandzana ni ku xiximana, ku nga khathariseki mindhavuko ya vona. (Yohane 13:34, 35) Yi tlhela yi pfuna vanhu ku yingisa xitsundzuxo lexi: “Tshikani ku titwananisa ni mafambiselo lawa ya swilo, kambe mi hundzuka hi ku hundzula mianakanyo ya n’wina, leswaku mi ta tiyiseka hi ku rhandza ka Xikwembu loku nga kunene ni loku amukelekaka ni loku hetisekeke.” (Varhoma 12:2) Hi ku tshika mahanyelo ya vona ya khale kutani va hanya hi ku pfumelelana ni milawu ni misinya ya milawu ya Mfumo lowu, vanhu va timiliyoni va kume ku rhula ni ntsako sweswi naswona va ni ntshembo wa vumundzuku lebyi tsakisaka.—Vakolosa 3:9-11.

Magazini lowu wa Xihondzo xo Rindza hi wona wu pfunaka swinene leswaku ku fikeleriwa vun’we bya misava hinkwayo. Hikwalaho ka leswi wu hundzuluxeriwaka hi ndlela leyi hlelekeke ni hi tindzimi to hambana-hambana, swihloko-nkulu eka Xihondzo xo Rindza swi humesiwa hi nkarhi wun’we hi tindzimi ta 135 naswona vahlayi va xona vo tlula 95 wa tiphesente emisaveni hinkwayo va nga hlaya rungula leri hi tindzimi ta vona hi nkarhi lowu fanaka.

Mutsari un’wana wa Mumormon u endle nxaxamelo wa minkandziyiso leyi humelelaka swinene entirhweni wa vurhumiwa leyi nga riki ya kereke ya yena. U xaxamete Xihondzo xo Rindza ni Xalamuka!, leswi kandziyisiwaka hi Timbhoni ta Yehovha, tanihi timagazini letinene to dyondzisa ha tona kutani a ku: “A nga kona munhu loyi a nga vulaka leswaku timagazini ta Xihondzo xo Rindza ni Xalamuka! ti dyondzisa vanhu leswaku va nga khathali—kambe ematshan’weni ya sweswo ndzi kume leswaku ti dyondzisa vanhu leswaku va tshama va xalamukile, ku hambana ni tibuku ta vukhongeri byin’wana. Timagazini ta Xihondzo xo Rindza ni Xalamuka! ta phyuphyisa hi rungula ra tona leri sekeriweke entiyisweni, leri kambisisiweke kahle ri tlhela ri va ra xiviri.”

Ku ni vumbhoni byo tala bya leswaku Mfumo wa Xikwembu i wa xiviri naswona wu le ku fumeni. Timbhoni ta Yehovha ti dyondzisa vaakelani va tona “mahungu lamanene lawa ya mfumo” hi ntsako na hi ku hiseka, ti va rhamba leswaku va ta fumiwa hi wona. (Matewu 24:14) Xana ntshembo wo tano wa ku tsakisa? U nga tiphina hi mikateko leyi vaka kona loko u tihlanganisa ni lava dyondzisiwaka ku hanya hi milawu ya Mfumo va tlhela va tikarhatela ku hanya ha yona. Nakambe u nga va ni ntshembo wa ku hanya ehansi ka Mfumo lowu emisaveni leyintshwa leyi tshembisiweke leyi ku nga “ta va ni ku lulama eka [y]ona.”—2 Petro 3:13.

[Nhlamuselo ya le hansi]

[Xifaniso lexi nga eka tluka 4, 5]

Hi 1914 matiko ma lwe nyimpi ya misava

[Swifaniso leswi nga eka tluka 6]

Ntirho wo phalala lowu endliwaka hi ku tirhandzela i vumbhoni bya rirhandzu leri Vakreste va nga na rona

[Xifaniso lexi nga eka tluka 7]

Timbhoni ta Yehovha emisaveni hinkwayo ta vuyeriwa eka nongonoko lowu fanaka wa dyondzo