Swivutiso Swa Vahlayi

Xana Yesu a a vula yini loko a byela vadyondzisiwa vakwe a ku: “Ndzi vone Sathana a wile hi le tilweni tanihi rihati”?

Yesu a a ha ku hlawula vadyondzisiwa va yena va 70, kutani a va “rhuma ha vambirhi-mbirhi emahlweni ka [yena], emutini ni le ndhawini yin’wana ni yin’wana leyi a [a] ta ya eka yona hi xiviri.” Loko lava va 70 va vuya, a va tsakile hikwalaho ka ntirho wa vona lowu fambeke kahle. Va te: “Hosi, hambi ku ri madimona ma titsongahata eka hina loko hi tirhisa vito ra wena.” Kutani Yesu a ku eka vona: “Ndzi vone Sathana a wile hi le tilweni tanihi rihati.”—Luka 10:1, 17, 18.

Eku sunguleni, swi nga ha vonaka onge Yesu a a vulavula hi xiendlakalo lexi se a xi humelerile. Kambe, endzhaku ka malembe ya 60 Yesu a vule marito lama nga laha henhla, muapostola Yohane la dyuhaleke u tsale mhaka leyi yelanaka na leyi a ku: “Hiloko dragona leyikulu yi lahleriwa ehansi, nyoka ya khale, leyi vuriwaka Diyavulosi na Sathana, leyi xisaka misava hinkwayo leyi akiweke; yi lahleriwa ehansi emisaveni, ni tintsumi ta yona ti lahleriwa ehansi na yona.”—Nhlavutelo 12:9.

Loko Yohane a tsala marito wolawo, Sathana a a ha ri etilweni. Hi swi tivisa ku yini? Phela, Nhlavutelo i buku ya vuprofeta ku nga ri ya matimu. (Nhlavutelo 1:1) Hikwalaho, hi nkarhi wa Yohane, Sathana a a nga si lahleriwa emisaveni. Entiyisweni, vumbhoni byi kombisa leswaku sweswo swi endleke endzhakunyana ka loko Yesu a vekiwe ku va Hosi ya Mfumo wa Xikwembu hi 1914. *—Nhlavutelo 12:1-10.

Kutani, ha yini Yesu a vulavula hi ku hlongoriwa ka Sathana etilweni onge hiloko se ku endlekile? Swidyondzi swin’wana swi ringanyeta leswaku Yesu a a tshinya vadyondzisiwa va yena hikwalaho ko tibuma swi nga fanelanga. Va anakanya leswaku a a vula leswaku: ‘Mi hlule madimona kambe mi nga tinyungubyisi hi swona. Sathana u titlakusile, kutani sweswo swi endle leswaku a wa hi ku hatlisa.’

A hi nge vuli mhaka ya xiheri ehenhla ka leswi. Hambiswiritano, swi vonaka onge Yesu a a tsaka ni vadyondzisiwa va yena naswona a a vulavula hi ndzoviso lowu rindzeleke Sathana. Yesu a a ri tiva kahle rivengo ra Diyavulosi, ku tlula vadyondzisiwa va yena. Anakanya hi ntsako lowu Yesu a veke na wona loko a twa leswaku madimona lama nga ni matimba a ma titsongahatela vadyondzisiwa va yena lava nga hetisekangiki! Ku hluriwa ka madimona hi ndlela leyi, a ku kombisa leswi nga ta endleka enkarhini lowu taka loko Yesu, tanihi Mikayele ntsumi leyikulu, a lwa na Sathana kutani a n’wi hlongola etilweni a n’wi lahlela emisaveni.

Loko Yesu a vula leswaku u vone Sathana “a wile,” kahle-kahle a a tiyisekisa ku wa ka Sathana. Leswi swa fana ni hi vuprofeta byin’wana bya le Bibeleni lebyi vulavulaka hi swiendlakalo swa nkarhi lowu taka onge hiloko se swi hetisekile. Hi xikombiso, xiya vuprofeta lebyi vulavulaka hi Mesiya eka Esaya 52:13–53:12 laha kun’wana byi vonakaka onge byi hetisekile kasi kun’wana byi vonaka onge bya ha ta hetiseka. Laha swi tikomba onge Yesu a a kombisa ntshembo lowu a nga na wona wa leswaku ku hlongoriwa ka Sathana etilweni a ku ta endleka hi ku ya hi xikongomelo xa Tata Wakwe. Yesu a a tlhela a tiyiseka leswaku hi nkarhi lowu faneleke wa Xikwembu, Sathana ni madimona yakwe a va ta lahleriwa ekheleni ro enta kutani endzhakunyana va loviseriwa makumu.—Varhoma 16:20; Vaheveru 2:14; Nhlavutelo 20:1-3, 7-10.

[Nhlamuselo ya le hansi]