“I Nchumu Lowunene Ngopfu Lowu U Nga Wu Endlaka”

ALEXIS i mufana wa malembe ya ntlhanu hi vukhale la tshamaka edorobeni ra Morelia, le Mexico, loyi vatswari vakwe va dyondzaka Bibele naswona va yaka eminhlanganweni ya Timbhoni ta Yehovha. Loko a ri enhlengeletanweni ya xifundzha ni ndyangu wa ka vona, u vone nkombiso wa ku chumayela hi yindlu ni yindlu. Xikan’we-kan’we u hundzukele eka tata wakwe, kutani a vutisa a ku, “Papa, Papa, ha yini wena u nga yi eku chumayeleni?” Tata wakwe u te, “Ndza ha dyondza leswaku ndzi ta kota ku chumayela.” Alexis u hlamule hi nkhinkhi a ku, “Papa, i nchumu lowunene ngopfu lowu u nga wu endlaka.”

N’wana loyi u vone swi fanerile leswaku a endla leswi a swi tivaka hi Yehovha. Tanihi leswi vana va mhani-nkulu wakwe va tshamaka eka vona, u rhange a khongela eka Yehovha kutani a sungula ku va byela leswi a swi dyondzeke hi ku pfuniwa hi vatswari vakwe eka Buku Yanga Ya Timhaka Ta Bibele. Hambileswi Alexis a a nga si swi tiva ku hlaya, a a swi tiva kahle leswi nga ebukwini leyi loko a vona swifaniso leswi kombisaka mhaka ya kona. U tlhele a vula leswaku u lava ku endzela vanhu emakaya ya vona leswaku a ya va byela leswi a a swi dyondza malunghana ni swikongomelo swa Xikwembu.

Hakunene, lavatsongo ni lavakulu va nga hanya hi ku pfumelelana ni leswi Yehovha “Mukwetsimi” a swi languteleke eka vona, xisweswo va va ni lunghelo lerikulu ro chumayela ha yena eka vanhu va matiko. (Esaya 43:3; Matewu 21:16) Handle ko kanakana, wolowo i nchumu lowunene ngopfu lowu munhu a nga wu endlaka.