Ku Vengiwa Handle Ka Xivangelo

“Va ndzi vengile ku nga ri na xivangelo.”—YOHANE 15:25.

1, 2. (a) Ha yini van’wana va hlamala loko Vakreste va hehliwa, kambe ha yini sweswo swi nga fanelanga swi hi hlamarisa? (b) Hi yihi nhlamuselo ya rito “venga” leyi hi nga ta yi tlhuvutsa exihlokweni lexi? (Vona nhlamuselo ya le hansi.)

TIMBHONI TA YEHOVHA ti lwela ku hanya hi misinya ya milawu leyi kumekaka eRitweni ra Xikwembu. Hikwalaho ka sweswo, ti ni ndhuma leyinene ematikweni yo tala. Kambe, minkarhi yin’wana ti onhiwe vito. Hi xikombiso, mutirhela-mfumo un’wana wa le dorobeni ra St. Petersburg, eRhaxiya, u te: “Hi byeriwe leswaku Timbhoni ta Yehovha i mpambukwa lowu tirhelaka emunyameni naswona swirho swa wona swi dlaya vana swi tlhela swi tidlaya.” Kambe endzhaku ko tirha ni Timbhoni ta Yehovha loko ku lunghiseleriwa ntsombano wa matiko hinkwawo, mutirhela-mfumo yoloye u te: “Sweswi ndzi vona vanhu lava tolovelekeke, lava n’wayitelaka . . . Va rhurile naswona va rhandzana ngopfu.” U tlhele a ku: “A ndzi swi twisisi nikatsongo leswaku ha yini vanhu va va hembela swonghasi.”—1 Petro 3:16.

² Malandza ya Xikwembu a ma tsaki loko ma hehliwa tanihi vaendli va leswo homboloka, kambe a ma hlamali loko vanhu va ma hehla. Yesu u lemukise valandzeri vakwe a ku: “Loko misava yi mi venga, ma swi tiva leswaku yi ndzi vengile yi nga si mi venga. . . . Swi endla leswaku ku hetiseka rito leri tsariweke eNawini wa vona, ‘Va ndzi vengile ku nga ri na xivangelo.’” * (Yohane 15:18-20, 25; Pisalema 35:19; 69:4) Eku sunguleni a a byele vadyondzisiwa vakwe marito lawa: “Loko vanhu va vitane n’wini wa yindlu va ku i Belzebule, xana va nga ka va nga va vitani hilaha ku tlurisaka lavaya va ndyangu wakwe?” (Matewu 10:25) Vakreste va swi twisisa leswaku ku tiyiselela ndzhukano wo tano i xiphemu xa “mhandzi . . . ya nxaniso” leyi va yi amukeleke loko va va valandzeri va Kreste.—Matewu 16:24.

3. Xana vagandzeri va ntiyiso va xanisiwe ku fikela kwihi?

³ Ku xanisiwa ka vagandzeri va ntiyiso a ku sungulanga tolo, ku sungule le ndzhaku eka “Avele wo lulama.” (Matewu 23:34, 35) A ku lo xanisiwa vanhu va nga ri vangani ntsena. Yesu u vule leswaku valandzeri vakwe a va ta “vengiwa hi vanhu hinkwavo” hikwalaho ka vito rakwe. (Matewu 10:22) Tlhandlakambirhi, muapostola Pawulo u tsale leswaku malandza hinkwawo ya Xikwembu—ku katsa na hina ha un’we-un’we—ma fanele ma rindzela ku xanisiwa. (2 Timotiya 3:12) Ha yini va xanisiwa?

Xihlovo Xa Rivengo Leri Nga Fanelangiki

4. Xana Bibele yi ri i mani la vangaka ku vengiwa hinkwako loku nga fanelangiki?

⁴ Rito ra Xikwembu ri vula leswaku ku sukela eku sunguleni, a ku ri ni muhlohloteri la nga vonakiki. Ehleketa hi ku dlayiwa hi tihanyi ka wanuna wo sungula wa ripfumelo la vuriwaka Avele. Bibele yi vula leswaku makwavo wakwe la n’wi dlayeke, ku nga Kayini, ‘a a huma eka lowo homboloka,’ Sathana Diyavulosi. (1 Yohane 3:12) Kayini u kombise moya wa Sathana, naswona Diyavulosi u n’wi tirhisile leswaku a hetisisa swikongomelo swa yena swo biha. Bibele yi tlhela yi paluxa xiphemu lexi hetisisiweke hi Sathana loko Yobo na Yesu Kreste va hlaseriwa hi tihanyi. (Yobo 1:12; 2:6, 7; Yohane 8:37, 44; 13:27) Buku ya Nhlavutelo yi swi hlamusela kahle leswaku i mani muvangi wa ku xanisiwa ka valandzeri  va Yesu, yi ku: “Diyavulosi u ta tama a hoxa van’wana va n’wina ekhotsweni leswaku mi ringiwa hi ku helela.” (Nhlavutelo 2:10) Ina, Sathana hi yena a vangaka ku vengiwa ka vanhu va Xikwembu loku nga fanelangiki.

5. Ha yini Sathana a venga vagandzeri va ntiyiso?

⁵ Ha yini Sathana a venga vagandzeri va ntiyiso? Eka rhengu leri kombisaka ku tivona kakwe, Sathana u tlhontlhe “Hosi leyi nga riki na makumu,” Yehovha Xikwembu. (1 Timotiya 1:17; 3:6) U vule leswaku Xikwembu xi swi fuma hi voko ra nsimbi swivumbiwa swa xona, nileswaku a nga kona la tirhelaka Yehovha hi xikongomelo lexinene, kambe vanhu va n’wi tirhela ntsena leswaku va kuma swo karhi eka yena. Sathana u vule leswaku loko o pfumeleriwa ku ringa vanhu, a nga va hambukisa hinkwavo, va tshika ku tirhela Xikwembu. (Genesa 3:1-6; Yobo 1:6-12; 2:1-7) Hi ku hehla Yehovha leswaku i mutshikileri, i muhembi naswona u tsandzeka ku hetisisa switshembiso swakwe, Sathana u lava ku tiendla mufumi wa misava hinkwayo. Hikwalaho, lexi endlaka leswaku a karihela malandza ya Xikwembu, hileswi a navelaka ku gandzeriwa.—Matewu 4:8, 9.

6. (a) Xana hi katseka njhani emhakeni ya vuhosi bya Yehovha? (b) Xana ku twisisa ka hina mhaka leyi ku hi pfuna njhani leswaku hi tshama hi tshembekile? (Vona bokisi eka tluka 16.)

⁶ Xana wa swi vona leswaku mhaka leyi yi ku khumba njhani? Leswi u nga nandza wa Yehovha, kumbexana se u swi vonile leswaku hambileswi ku endla ku rhandza ka Xikwembu swi lavaka matshalatshala lamakulu, vuyelo bya kona i byikulu. Kambe ku vuriwa yini loko swiyimo leswi u langutaneke na swona swi ku tikela, hambi ku ri ku ku tshikilela, eka matshalatshala ya wena ya ku yingisa milawu ni misinya ya milawu ya Yehovha? Naswona ku vuriwa yini hi loko wena u vona u nga vuyeriwi hi nchumu eka sweswo? Xana u nga gimeta hileswaku ku tirhela Yehovha i ku tlanga hi nkarhi? Kumbe, xana ku rhandza ka wena Yehovha ni ku tlangela ka wena lokukulu ka timfanelo takwe leto hlamarisa swi ta ku susumetela ku ya emahlweni u famba hi tindlela takwe? (Deteronoma 10:12, 13) Hi ku pfumelela Sathana leswaku a hi tikisela vutomi, Yehovha u nyike un’wana ni un’wana wa hina lunghelo ra leswaku a tiangulela hi yexe eka ntlhontlho lowu Sathana a wu vekeke.—Swivuriso 27:11.

“Loko Vanhu Va Mi Rhukana”

7. Hi yihi ndlela yin’wana leyi Diyavulosi a yi tirhisaka leswaku a ringeta ku hi hambukisa eka Yehovha?

⁷ Sweswi a hi kambisiseni kahle xiendlo xin’wana xa vukanganyisi lexi Sathana a xi tirhisaka leswaku a ringeta ku tiyisekisa swihehlo swakwe—ku hemba. Yesu u vule leswaku Sathana i “tata wa mavunwa.” (Yohane 8:44) Vito leri n’wi hlamuselaka kahle ra Diyavulosi, leri vulaka “Mulumbeti,” ri kombetela eka yena tanihi mulumbeti lonkulu wa Xikwembu, rito ra xona lerinene ni vito ra xona lero kwetsima. Diyavulosi u tirhisa vukanganyisi, ku hehla ni mavunwa ya rihlaza loko a lwisana ni vuhosi bya Yehovha, naswona u tirhisa marhengu wolawo ku onha vito ra malandza layo tshembeka ya Xikwembu. Hi ku onha Timbhoni leti vito, a nga ha ti ringa hi ndlela leyi tikaka swinene ku yi tiyiselela.

8. Xana Sathana u sandze Yobo hi ndlela yihi, naswona ku ve ni vuyelo byihi?

⁸ Ehleketa hi leswi swi humeleleke Yobo, loyi vito rakwe ri vulaka “La Khomiwaka hi Tihanyi.” Ku tlhandlekela eka leswi a loviseke rifuwo ra Yobo ni vana vakwe a tlhela a hlasela ni rihanyo rakwe, Sathana u endle leswaku Yobo a vonaka onge i mudyohi la xupuriwaka hi Xikwembu. Hambileswi a a xiximiwa ngopfu, Yobo  u sungule ku sandziwa ni hi maxaka ni vanghana vakwe lavakulu. (Yobo 19:13-19; 29:1, 2, 7-11) Tlhandlakambirhi, hi ku tirhisa vachaveleri va mavunwa, Sathana a a lava ku ‘pfotlosa Yobo hi marito,’ a rhanga hi ku n’wi hehla hileswaku u fanele a endle xidyoho lexikulu kutani a n’wi avanyisa tanihi mudyohi. (Yobo 4:6-9; 19:2; 22:5-10) Xiya ndlela leyi sweswo swi faneleke swi n’wi hete matimba ha yona Yobo!

9. Yesu u endliwe a vonaka onge i mudyohi hi ndlela yihi?

⁹ Tanihi leswi N’wana wa Yehovha a a seketela vuhosi bya yena swinene, Sathana u n’wi venge bya ximanga ni kondlo. Loko Yesu a fika emisaveni, Sathana u lave ku n’wi endla a vonaka onge vumoya bya yena byi onhakile, hilaha a endleke hakona eka Yobo, a endla Yesu a vonaka onge i mudyohi. (Esaya 53:2-4; Yohane 9:24) Vanhu a va n’wi vula xidakwa tlhelo munhu wa makolo, va tlhandlekela hileswaku u “ni dimona.” (Matewu 11:18, 19; Yohane 7:20; 8:48; 10:20) U hehliwe hileswaku wa sandza. (Matewu 9:2, 3; 26:63-66; Yohane 10:33-36) Leswi swi n’wi tshikilerile Yesu, hikuva a a swi tiva leswaku sweswo swi tisa xisolo lexi nga fanelangiki eka Tata wakwe. (Luka 22:41-44) Eku heteleleni, Yesu u beleriwe ku fana ni xigevenga lexi rhukaniweke. (Matewu 27:38-44) Hi ku tshembeka hi ku helela, Yesu u tiyiselele “mavulavulelo yo [tala] yo kaneta ya vadyohi.”—Vaheveru 12:2, 3.

10. Xana masalela lama totiweke ma hlaseriwe njhani hi Sathana eminkarhini ya manguva lawa?

¹⁰ Eminkarhini ya manguva lawa, Diyavulosi u kombise rivengo lerikulu ni le ka masalela ya valandzeri lava totiweke va Kreste. Sathana u hlamuseriwa tanihi “muhehli wa [vamakwavo va Kreste], loyi a va hehlaka vusiku ni nhlikanhi emahlweni ka Xikwembu xa hina.” (Nhlavutelo 12:9, 10) Ku sukela loko Sathana a hlongoriwile etilweni kutani a ta laha misaveni, u engetele matshalatshala yakwe ya ku endla vamakwavo va Kreste va vonaka onge i swikangalafula. (1 Vakorinto 4:13) Ematikweni man’wana, va hehliwe hi ku va mpambukwa lowu nga ni khombo, hilaha Vakreste va lembe-xidzana ro sungula va hehliweke hakona. (Mintirho 24:5, 14; 28:22) Hilaha swi vuriweke hakona eku sunguleni, va phyarhekiwe swihehlo swa mavunwa. Kambe, “hi ku vangama ni ku khomisiwa tingana, hi xiviko xo biha ni xiviko lexinene,” vamakwavo va Kreste lava totiweke, lava seketeriwaka hi vanghana va vona lava nga “tinyimpfu tin’wana,” hi ku titsongahata va lwele ‘ku hlayisa swileriso swa Xikwembu ni ku endla ntirho wa ku nyikela vumbhoni mayelana na Yesu.’—2 Vakorinto 6:8; Yohane 10:16; Nhlavutelo 12:17.

11, 12. (a) Hi swihi swin’wana leswi nga vangelaka ku poyiriwa ka Vakreste? (b) Xana Mukreste a nga xanisiwa njhani a nga ri na nandzu hikwalaho ka ripfumelo rakwe?

¹¹ I ntiyiso leswaku a hi hinkwaswo leswi malandza man’wana ya Xikwembu ma hehliweke ha swona leswi a swi vangiwa “hikwalaho ka ku lulama.” (Matewu 5:10) Swiphiqo swin’wana swi nga ha va swi vangiwe hi ku nga hetiseki ka hina. A hi vuyeriwi hi nchumu loko ‘hi dyoha ivi hi makariwa, kutani hi tiyisela.’ Kambe, loko Mukreste “hikwalaho ka ripfalo eka Xikwembu, a tiyisela ehansi ka swilo leswi tisaka gome naswona a xanisiwa a nga ri na nandzu, sweswo hi leswi amukelekaka” emahlweni ka Yehovha. (1 Petro 2:19, 20) Xana leswi swi nga humelela ehansi ka swiyimo swa njhani?

¹² Van’wana va xanisiwile hikwalaho ka leswi va aleke ku hlanganyela eka mikhuva ya swilahlo leyi nga fambisaniki na Matsalwa. (Deteronoma 14:1) Vantshwa lava nga Timbhoni va tshamela ku poyiriwa hikwalaho ko namarhela mimpimanyeto ya Yehovha ya mahanyelo. (1 Petro 4:4) Hi xihoxo, ku vuriwe leswaku vatswari van’wana lava nga Vakreste “va honisa” kumbe “ku xanisa” vana va vona hikwalaho ka leswi va lavaka leswaku vana va vona va nga tshunguriwi hi vutshunguri lebyi katsaka ngati. (Mintirho 15:29) Vakreste va lahliwe hi maxaka ni vaakelani va vona hileswi ntsena va hundzukeke malandza ya Yehovha. (Matewu 10:34-37) Hinkwavo lava va landzela xikombiso lexi vekiweke hi vaprofeta na hi Yesu hi byakwe, xo xanisiwa va nga ri na nandzu.—Matewu 5:11, 12; Yakobo 5:10; 1 Petro 2:21.

Ku Tiyiselela Xisandzu

13. I yini lexi nga hi pfunaka leswaku hi tshama hi tiyile emoyeni loko hi sandziwa swinene?

¹³ Loko hi sandziwa swinene hikwalaho ka ripfumelo ra hina, hi nga ha hela matimba, hi vona  onge a hi nge swi koti ku ya emahlweni hi tirhela Xikwembu, hilaha swi veke hakona hi muprofeta Yeremiya. (Yeremiya 20:7-9) I yini lexi nga hi pfunaka leswaku hi tshama hi tiyile emoyeni? Ringeta ku languta timhaka hilaha Yehovha a ti langutaka hakona. Lava tshamaka va tshembekile loko va ringiwa u va teka va ri vahluri, ku nga ri vahluriwa. (Varhoma 8:37) Ehleketa hi lava va seketeleke vuhosi bya Yehovha hambiloko Diyavulosi a va tisela mindzhukano yo hambana-hambana—vavanuna ni vavasati vo kota Avele, Yobo, Mariya mana wa Yesu ni van’wana vo tshembeka va le minkarhini ya khale, swin’we ni malandza-kulorhi ya le minkarhini ya manguva lawa. (Vaheveru 11:35-37; 12:1) Anakanyisisa hi ku tshembeka ka vona. Papa rero lerikulu ra vanhu lava tshembekeke ra hi rhamba leswaku hi va joyina exitulwini xa vahluri lexi vekeriweke lava va hluleke misava hi ripfumelo ra vona.—1 Yohane 5:4.

14. Xana xikhongelo lexi humaka embilwini xi nga hi pfuna njhani leswaku hi tshama hi tshembekile?

¹⁴ Loko ‘miehleketo ya hina leyi hi karhataka yi tele endzeni ka hina,’ hi nga khongela hi mbilu hinkwayo eka Yehovha, kutani u ta hi chavelela ni ku hi nyika matimba. (Pisalema 50:15; 94:19) U ta hi nyika vutlhari bya ku tiyiselela ndzingo ni ku hi pfuna leswaku hi tshama hi ri karhi hi anakanya hi mphikamakaneta leyikulu, ya vuhosi bya Yehovha, leyi vangeke ku vengiwa ka malandza yakwe swi nga fanelanga. (Yakobo 1:5) Yehovha a nga tlhela a hi nyika “ku rhula ka Xikwembu loku tlulaka miehleketo hinkwayo.” (Vafilipiya 4:6, 7) Ku rhula loku ku humaka eka Xikwembu ku hi pfuna leswaku hi tshama hi rhurile naswona hi tshembekile hambiloko hi tshikileriwile swinene, hi nga kanakani kumbe ku chava. Hi moya wakwe, Yehovha a nga hi tiyisa loko hi langutane ni nchumu wun’wana ni wun’wana lowu a wu pfumelelaka leswaku wu hi wela.—1 Vakorinto 10:13.

15. I yini lexi nga hi pfunaka leswaku hi nga hlundzuki loko hi xanisiwa?

¹⁵ I yini lexi nga hi pfunaka leswaku hi nga va hlundzukeli lava va hi vengaka ku nga ri na xivangelo? Tsundzuka leswaku valala va hina lavakulu i Sathana ni madimona. (Vaefesa 6:12) Hambiloko van’wana va hi xanisa hi vomu, vo tala lava lwaka ni vanhu va Xikwembu a va swi endli hi vomu, kumbe va kuceteriwa hi van’wana. (Daniyele 6:4-16; 1 Timotiya 1:12, 13) Yehovha u rhandza leswaku “vanhu va mixaka hinkwayo” va nyikiwa nkarhi wa ku “ponisiwa naswona va fikelela vutivi lebyi kongomeke bya ntiyiso.” (1 Timotiya 2:4) Phela, van’wana lava a va lwa na hina se va hundzuke vamakwerhu lava nga Vakreste hikwalaho ko va va xiye ku tikhoma ka hina lokunene. (1 Petro 2:12) Tlhandlakambirhi, hi nga dyondza swo karhi eka xikombiso lexi vekiweke hi Yosefa n’wana wa Yakobe. Hambileswi vamakwavo va Yosefa hi tatana va n’wi xaniseke ngopfu, a nga va khomanga hi mbilu. Ha yini? Hikuva u swi vonile leswaku Yehovha u hoxe xandla eka ndlela leyi timhaka ti endlekeke ha yona leswaku a ta hetisisa xikongomelo Xakwe. (Genesa 45:4-8) Yehovha a nga ha endla leswaku ku xanisiwa loku hi hlangavetanaka na kona ku hetelela ku kwetsimise vito rakwe.—1 Petro 4:16.

16, 17. Ha yini hi nga fanelanga hi karhateka hi matshalatshala ya vakaneti yo sivela ntirho wo chumayela?

¹⁶ A hi fanelanga hi karhateka ngopfu loko nkarhi wun’wana vanhu lava hi kanetaka va vonaka onge va humelela eku siveleni ka ku twarisiwa ka mahungu lamanene. Sweswi Yehovha u ninginisa matiko hi vumbhoni lebyi nyikeriwaka emisaveni hinkwayo, naswona swilo leswi navelekaka swa nghena enhlengeletanweni yakwe. (Hagayi 2:7) Kreste Yesu, Murisi Lonene, u te: “Tinyimpfu ta mina ti yingisa rito ra mina, naswona ndza ti tiva, kutani ta ndzi landzela. Naswona ndzi ti nyika vutomi lebyi nga heriki, . . . naswona a nga kona loyi a nga ta ti wutla evokweni ra mina.” (Yohane 10:27-29) Tintsumi leto kwetsima na tona ti hoxa xandla entirhweni lowu lowukulu wo tshovela  hi tlhelo ra moya. (Matewu 13:39, 41; Nhlavutelo 14:6, 7) Kutani, ku hava lexi vakaneti va nga xi vulaka kumbe va nga xi endlaka lexi nga kavanyetaka xikongomelo xa Xikwembu.—Esaya 54:17; Mintirho 5:38, 39.

¹⁷ Loko swi ta eka vakaneti, hakanyingi muhloti wa tinyarhi ti vuya hi yena. Etikweni rin’wana ra laha Afrika, Timbhoni ta Yehovha ti mbyindliwe hi mavunwa yo tala, ku katsa nileswaku ti gandzela Diyavulosi. Hikwalaho ka leswi, nkarhi wun’wana ni wun’wana loko Timbhoni ti fika ekaya ka Grace, a a tsutsumela endzhaku ka yindlu yakwe a ya tumbela kukondza ti famba. Siku rin’wana mufundhisi wa kereke ya vona u tlakusele yin’wana ya tibuku ta hina ehenhla kutani a byela hinkwavo lava a va ri kwalaho leswaku va nga yi hlayi hikuva yi ta va tshikisa kereke ya vona. Leswi swi siye swivutiso swo tala eka Grace! Loko Timbhoni ti fika siku rin’wana, ematshan’weni yo tumbela u bule na tona kutani a kuma buku yoleyo. Ku sunguriwe dyondzo ya Bibele, naswona u khuvuriwile hi 1996. Sweswi Grace u tirhisa nkarhi wakwe ku lava van’wana lava nga ha vaka va xisiwile malunghana ni Timbhoni ta Yehovha.

Tiyisa Ripfumelo Ra Wena Sweswi

18. Ha yini hi fanele hi tiyisa ripfumelo ra hina sweswi loko hi nga si langutana ni miringo leyikulu, naswona hi nga ri tiyisa njhani?

¹⁸ Tanihi leswi nkarhi wun’wana ni wun’wana Sathana a nga vangelaka leswaku hi vengiwa swi nga fanelanga, i swa nkoka leswaku hi tiyisa ripfumelo ra hina sweswi. Hi nga swi endlisa ku yini sweswo? Xiviko lexi humaka etikweni leri vanhu va Yehovha va xanisiweke eka rona xi te: “Mhaka ya xiheri hi leyi: Lava va dyaka kahle hi tlhelo ra moya va tlhela va tlangela ntiyiso wa Bibele hi timbilu ta vona hinkwato, va swi kota ku yima va tiyile loko va langutana ni miringo. Kambe lava loko ku ri ‘nguva leyinene’ va xwaka etidyondzweni, va nga yiki nkarhi hinkwawo ensin’wini naswona va hlulekaka ku tshembeka  eka swilo leswitsongo, hakanyingi va wa loko va langutane ni ndzingo ‘lowukulu.’” (2 Timotiya 4:2) Loko u vona laha u faneleke u antswisa kona, u nga ha yima-yimi, endla matshalatshala yo antswisa.—Pisalema 119:60.

19. Xana ku tshembeka ka malandza ya Xikwembu loko ma vengiwa swi nga fanelanga swi hetisisa yini?

¹⁹ Ku tshembeka ka vagandzeri va ntiyiso loko va langutane ni rivengo ra Sathana i vumbhoni lebyi hanyaka bya leswaku vuhosi bya Yehovha byi fanerile naswona byi lulamile. Ku tshembeka ka vona ku tsakisa mbilu ya Xikwembu. Hambiloko vanhu vo va mbyindla hi xisandzu, loyi xindzhuti xakwe xi nga le henhla ka misava ni matilo “a [nga] khomiwi hi tingana ha vona, ku vitaniwa Xikwembu xa vona.” Kunene, malunghana ni vanhu volavo hinkwavo lava tshembekaka, swa fanela ku vula marito lawa: “Misava a yi nga va faneli.”—Vaheveru 11:16, 38.

[Nhlamuselo ya le hansi]

Xana U Nga Hlamusela?

• I yini lexi vangaka ku xanisiwa ka vagandzeri va ntiyiso swi nga fanelanga?

• Xana Sathana u xi tirhise njhani xisandzu leswaku a ringeta ku herisa ku tshembeka ka Yobo na Yesu?

• Xana Yehovha u hi nyika njhani matimba leswaku hi yima hi tiyile hambiloko Sathana a hi venga?

[Swivutiso Swa Dyondzo]

[Bokisi/Xifaniso lexi nga eka tluka 16]

Va Kume Nchumu Wa Risima

Mbhoni yin’wana ya Yehovha ya le Ukraine, laha ntirho wa ku chumayela hi ta Mfumo a wu yirisiwile malembe lama tlulaka 50 yi te: “Xiyimo xa Timbhoni ta Yehovha a xi nga lawuriwi hi leswi a ti endliwa swona hi vanhu. . . . Maphorisa yo tala a mo endla ntirho wa wona ntsena. Loko hulumendhe yi cinca, maphorisa a ma cinca na yona, kambe hina a hi cincanga. Hi swi xiyile leswaku xihlovo xa xiviri xa swiphiqo swa hina xi paluxiwile eBibeleni.

“A hi nga titeki hi ri vanhu lava xanisiwaka handle ka nandzu. Lexi hi pfuneke ku tiyisela a ku ri ku twisisa kahle mphikamakaneta leyi tangunukeke le Edeni—mphikamakaneta ya mfanelo ya Xikwembu ya ku fuma. . . . Hi yime hi tiyile eka mhaka leyi yi nga khumbiki hina ntsena, kambe ni Hosi ya vuako hinkwabyo. A hi swi twisisa kahle leswi vangaka ku xanisiwa ka hina. Leswi swi hi nyike matimba naswona swi hi pfunile leswaku hi tshama hi tshembekile hambiloko hi langutane ni swiyimo swo tika swinene.”

[Xifaniso]

Victor Popovych, u khomiwe hi 1970

[Xifaniso lexi nga eka tluka 13]

I mani la vangeke xisandzu lexi Yesu a langutaneke na xona?

[Swifaniso leswi nga eka tluka 15]

Yobo, Mariya ni malandza man’wana ya Xikwembu ya manguva lawa, yo tanihi Stanley Jones, ma seketele vuhosi bya Yehovha