Xana Ndzayo Leyinene Ya Laveka?

NAMUNTLHA, vanhu vo tala va vona onge va swi kota ku hambanisa leswinene eka leswo biha, ni leswaku va ni mfanelo yo endla xin’wana ni xin’wana lexi va xi lavaka. Van’wana va vula leswaku nchumu wun’wana ni wun’wana i wunene ntsena loko wu tsakisa n’wini wa wona. Vukati ni vutomi bya ndyangu, leswi khale a swi tekiwa swi ri lunghiselelo ra risima evuton’wini bya vanhu, se swi le khombyeni.—Genesa 3:5.

Ehleketa hi Verónica, * la tshamaka eMexico. Wa vika: “Loko hi ri kusuhi ni ku hlanganisa malembe ya 15 hi tekanile, nuna wa mina u ndzi byele leswaku se u na xigangu. U vule leswaku leswi xigangu xakwe xa ha tsakamaka naswona xi n’wi tiselaka ntsako, a nge hambani na xona. Ndzi tsemeke nhlana loko ndzi lemuka leswaku munghana wa mina lonkulu a nge he ndzi seketeli ni ku ndzi vonisa ta vusiku ni nhlikanhi. Khale a ndzi ehleketa leswaku ku fa ka vanhu lava hi va rhandzaka hi kona ku vavaka ngopfu. Kambe eka mina, lexi a xi vava ngopfu a ku ri vuoswi hikuva a ndzi nga lahlekeriwanga ntsena hi munhu loyi a ndzi n’wi rhandza swinene kambe u ye emahlweni a endla swilo leswi a swi ndzi twisa ku vava.”

Kutani ku ni xiyimo xa jaha ra malembe ya 22 leri ana se ri dlayeke vukati naswona ri nga ni n’wana wa mufana, kambe ri nga swi laviki ku byarha vutihlamuleri bya rona tanihi tata wa n’wana loyi. Ri lava leswaku mana wa rona a khathalela rona ni n’wana wa rona. Loko mana wa rona a ala ku endla swin’wana leswi ri swi koxaka, ra hlundzuka kutani ri n’wi rhuketela, ku fana ni n’wana la tsemeke mubya. Mana wa rona u kala ni vuyo loko n’wana loyi wa mahanyelo yo biha a n’wi hlasela hi ndlela leyi.

Xiyimo lexi a xi lo humelela eka lava vambirhi ntsena. Ku hambana ka vatekani ni ku dlaya vukati swa andza emisaveni hinkwayo. Vana vo tala va vone un’wana wa vatswari va vona a huma hi gede a ya sungula vutomi kun’wana. Vantshwa  van’wana a va ha xiximi munhu, hambi ku ri vatswari va vona, kutani va tikhoma hi ndlela leyi a wu nga ta yi ehleketa ni ku yi ehleketa enkarhini lowu hundzeke. Ku hlanganyela eka vuxaka bya rimbewu, ku tirhisa swidzidzirisi, ku hlaseriwa hi vantshwa ni ku dlayiwa ka vadyondzisi kumbe vatswari, se swi tolovelekile ematikweni yo tala. Swi nga ha endleka u swi lemukile leswaku emisaveni ya namuntlha vanhu lava nga ni swiphiqo a hi lava kurisaka vana ni lava nga evukatini ntsena.

Loko hi vona swilo leswi, hi nga ha tivutisa leswaku ku endleke yini emisaveni. Loko vanhu va swi tiva hakunene ku hambanisa leswinene eka leswo biha, ha yini ku ri ni swiphiqo swo tala swonghasi leswi nga tlhantlhiwiki? Xana ku laveka ndzayo leyinene? Xana xi kona xihlovo lexi tshembekaka xa ndzayo yo tano leyinene? Hambileswi vo tala va vulaka leswaku va pfumela eka Xikwembu ni le ka Rito ra xona leri tsariweke, kambe swi vonaka onge sweswo a va swi ehleketi nikatsongo loko va endla swiboho. Xana hi nga pfuneka njhani loko hi amukela ndzayo leyi humaka eka Xikwembu? A hi tlhuvutseni mhaka leyi exihlokweni lexi landzelaka.

[Nhlamuselo ya le hansi]