Yehovha I ‘Xisirhelelo Xa Hina Hi Minkarhi Ya Maxangu’

“Ku ponisiwa ka lavo lulama ku huma eka Yehovha; i xisirhelelo xa vona hi nkarhi wa maxangu.”—PISALEMA 37:39.

1, 2. (a) Xana Yesu u va kombelele yini vadyondzisiwa vakwe? (b) Hi kwihi ku rhandza ka Xikwembu malunghana ni vanhu va xona?

YEHOVHA u ni matimba hinkwawo. U ni matimba ya ku sirhelela vagandzeri vakwe lava tshembekaka hi ndlela yin’wana ni yin’wana leyi a yi rhandzaka. A nga ha hambanisa vanhu vakwe ni va misava leyi kutani a va veka endhawini leyi hlayisekeke ni leyi nga ni ku rhula. Hambiswiritano, Yesu u khongele eka Tata wakwe wa le tilweni malunghana ni vadyondzisiwa vakwe, a ku: “Ndza ku kombela leswaku u nga va susi emisaveni, kambe u va rindza hikwalaho ka lowo homboloka.”—Yohane 17:15.

² Yehovha u hlawule ku ka a nga hi susi “emisaveni.” Ematshan’weni ya sweswo, u rhandza leswaku hi tshama ni vanhu va misava leyi leswaku hi ta va tivisa rungula rakwe ra ntshembo ni nchavelelo. (Varhoma 10:13-15) Kambe, hilaha Yesu a vuleke hakona exikhongelweni xakwe, leswi hi tshamaka emisaveni leyi, “lowo homboloka” u tshama a hi pikile. Nhlomulo lowukulu lowu hi wu vonaka wu vangiwa hi vanhu lava nga yingisiki kun’we ni mimoya leyo homboloka, naswona Vakreste na vona va tshikileleka.—1 Petro 5:9.

3. Vagandzeri vo tshembeka va Yehovha na vona va boheka ku langutana na yini, kambe hi wihi nchavelelo lowu hi wu kumaka eRitweni ra Xikwembu?

³ Loko munhu a ringiwa hi ndlela yoleyo, swi tolovelekile leswaku a hela matimba. (Swivuriso 24:10) Bibele yi tamele marungula yo hlayanyana ya vanhu vo tshembeka lava langutaneke ni maxangu. Mupisalema u ri: “Makhombo ya lowo lulama ma tele, kambe Yehovha wa n’wi kutsula eka wona hinkwawo.” (Pisalema 34:19) Ina, hambi ku ri “lowo lulama” u weriwa hi makhombo. Ku fana na mupisalema Davhida, minkarhi yin’wana hi nga ha ‘heleriwa hi matimba kutani hi pfotloseka ku tlula mpimo.’ (Pisalema 38:8) Kambe swa chavelela ku tiva leswaku “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.”—Pisalema 34:18; 94:19.

4, 5. (a) Hi ku pfumelelana na Swivuriso 18:10, xana hi fanele hi endla yini leswaku hi ta kuma nsirhelelo eka Xikwembu? (b) Hi wahi magoza lawa hi nga ma tekaka leswaku hi kuma mpfuno eka Xikwembu?

⁴ Ku pfumelelana ni xikhongelo xa Yesu, Yehovha wa hi hlayisa hakunene. I “xisirhelelo xa [hina] hi nkarhi wa maxangu.” (Pisalema 37:39) Buku ya Swivuriso yi tirhisa marito lama fanaka loko yi ku: “Vito ra Yehovha i xihondzo xo  tiya. Lowo lulama u tsutsumela eka xona naswona u kuma nsirhelelo.” (Swivuriso 18:10) Tsalwa leri ri boxa ntiyiso wa xisekelo malunghana ni ndlela ya rirhandzu leyi Yehovha a khathalelaka swivumbiwa swakwe ha yona. Xikwembu xi sirhelela ngopfu-ngopfu vanhu va xona lavo lulama lava xi lavaka hi timbilu ta vona hinkwato, onge hiloko va tsutsumela exihondzweni xo tiya leswaku va ta kuma nsirhelelo.

⁵ Loko hi langutane ni swiphiqo leswi tshikilelaka, xana hi nga tsutsumela njhani eka Yehovha leswaku a hi sirhelela? A hi kambisiseni magoza manharhu ya nkoka lawa hi nga ma tekaka leswaku hi ta kuma mpfuno eka Yehovha. Xo sungula, hi fanele hi khongela eka Tata wa hina wa le tilweni. Xa vumbirhi, hi fanele hi endla swilo hi ku pfumelelana ni moya wakwe lowo kwetsima. Xa vunharhu, hi fanele hi titsongahatela malunghiselelo ya Yehovha hi ku tihlanganisa ni Vakreste-kulorhi lava nga hungutaka ntshikilelo wa hina.

Matimba Ya Xikhongelo

6. Xana Vakreste va ntiyiso va xi teka njhani xikhongelo?

⁶ Vatshila van’wana va ta vutshunguri va bumabumela xikhongelo tanihi murhi wo tshungula ntshikilelo wa mianakanyo ni gome. Hambileswi ku nga ntiyiso leswaku ntshikilelo wu nga hunguteka hi nkarhi lowu ku rhuleke ku fana niloko munhu a khongela, mimpfumawulo yin’wana ya ntumbuluko kumbe ku thova munhu enhlaneni na swona swi nga hunguta ntshikilelo. Vakreste va ntiyiso a va xi tekeli ehansi xikhongelo onge hiloko xi ri vutshunguri bya mianakanyo ntsena. Hi teka xikhongelo tanihi ndlela ya xichavo yo vulavurisana ni Muvumbi. Xikhongelo xi khumba ku tinyikela ni ku tshemba ka hina Xikwembu. Ina, xikhongelo i xiphemu xa vugandzeri bya hina.

7. Xana swi vula yini ku khongela hi ri ni ntshembo, naswona ku khongela hi ndlela yoleyo swi hi pfuna njhani ku langutana ni ntshikilelo?

⁷ Loko hi khongela, hi fanele hi swi kombisa leswaku ha n’wi tshemba Yehovha. Muapostola Yohane u tsarile: “Ku tiyiseka loku hi nga na kona ha xona, i ka leswaku, ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa.” (1 Yohane 5:14) Yehovha, La-nge-henhla-henhla, Xikwembu xi ri xin’we xa ntiyiso, xa matimba hinkwawo, u swi yingisela hi ndlela yo hlawuleka swikhongelo leswi humaka embilwini swa vagandzeri vakwe. Ku tiva ntsena leswaku Xikwembu xa hina xa rirhandzu xa hi twa loko hi xi byela mivilelo ni swiphiqo swa hina, swa hi chavelela.—Vafilipiya 4:6.

8. Ha yini Vakreste vo tshembeka va nga fanelanga va va ni tingana kumbe va titwa va nga faneleki loko va khongela eka Yehovha?

⁸ Vakreste vo tshembeka a va fanelanga va va ni tingana, va titwa va nga faneleki kumbe va pfumala ntshembo loko va khongela eka Yehovha. I ntiyiso, loko hi endle swihoxo kumbe hi ri ni swiphiqo swo tala, swi nga ha endleka hi nga khongeli eka Yehovha minkarhi hinkwayo. Eswiyin’weni swo tano, hi fanele hi tsundzuka leswaku Yehovha ‘u ni ntwela-vusiwana eka vanhu vakwe lava xanisekaka’ nileswaku u “[chavelela] lava tsongahatiweke.” (Esaya 49:13; 2 Vakorinto  7:6) Loko hi funengetiwe hi papa ra ntima naswona hi ri emaxangwini, hi kona laha hi faneleke hi vulavula hi ri ni ntshembo ni Tata wa hina wa le tilweni loyi a nga khokholo ra hina.

9. Xana ripfumelo i ra nkoka ku fikela kwihi loko hi khongela eka Xikwembu?

⁹ Leswaku hi vuyeriwa hi ku helela eka lunghelo ra xikhongelo, hi fanele hi va ni ripfumelo ra ntiyiso. Bibele yi vula leswaku “la tshinelelaka Xikwembu u fanele a kholwa leswaku xi kona ni leswaku hi xona muhakeri wa lava va xi lavaka hi mbilu hinkwayo.” (Vaheveru 11:6) Ripfumelo a hi ku kholwa ntsena leswaku Xikwembu “xi kona.” Ripfumelo ra ntiyiso ri katsa ku kholwa hi mbilu hinkwayo leswaku Xikwembu xi ni vuswikoti naswona xi navela ku hi hakela hikwalaho ka leswi hi xi yingisaka. “Mahlo ya Yehovha ma le ka lavo lulama, naswona tindleve ta yena ti yingisela swikombelo swa vona.” (1 Petro 3:12) Loko hi swi lemuka nkarhi hinkwawo leswaku Yehovha wa hi khathalela hi ndlela ya rirhandzu, swikhongelo swa hina swi va swa risima.

10. Xana swikhongelo swa hina swi fanele swi va njhani loko hi ta kuma nseketelo wa moya lowu humaka eka Yehovha?

¹⁰ Yehovha u yingisa swikhongelo swa hina loko hi khongela hi mbilu hinkwayo. Mupisalema u tsarile: “Ndzi vitanile hi mbilu hinkwayo. Ndzi hlamule, Wena Yehovha.” (Pisalema 119:145) Swikhongelo swa hina a swi fani ni swa vanhu va vukhongeri byo tala lava va swi nhlokohataka kunene, kumbe va swi vula swi nga humi embilwini. Loko hi khongela eka Yehovha hi “mbilu hinkwayo,” marito lawa hi ma vulaka ma ni nhlamuselo ni xikongomelo. Endzhaku ka swikhongelo sweswo leswi humaka embilwini, hi sungula ku titwa hi ntshunxekile hileswi hi lahleleke “ndzhwalo wa [hina] eka Yehovha.” Hilaha Bibele yi tshembisaka hakona, yena “u ta [hi] seketela.”—Pisalema 55:22; 1 Petro 5:6, 7.

Moya Wa Xikwembu I Mupfuni Wa Hina

11. Hi yihi ndlela yin’wana leyi Yehovha a hi hlamulaka ha yona loko hi ‘hambeta hi kombela’ mpfuno wakwe?

¹¹ Yehovha a hi Muyingisi ntsena wa swikhongelo kambe u tlhela a va Muhlamuri wa swona. (Pisalema 65:2) Davhida u tsarile: “Esikwini ra maxangu ya mina ndzi ta vitana wena, hikuva u ta ndzi hlamula.” (Pisalema 86:7) Hikwalaho, Yesu u khutaze vadyondzisiwa vakwe leswaku ‘va hambeta va kombela’ mpfuno wa Yehovha hikuva “Tatana la nge tilweni” u ta “nyika moya lowo kwetsima . . . eka lava n’wi kombelaka!” (Luka 11:9-13) Ina, matimba ya Xikwembu ma tirha tanihi mupfuni kumbe muchaveleri eka vanhu va xona.—Yohane 14:16.

12. Xana moya wa Xikwembu wu nga hi pfuna njhani loko swiphiqo swi hi tshikilela?

¹² Hambiloko hi langutane ni miringo, moya wa Xikwembu wu nga hi nyika “matimba lama tlulaka lama tolovelekeke.” (2 Vakorinto 4:7) Muapostola Pawulo la tiyiseleke swiyimo swo tala swo nonon’hwa, u vule a tiyisekile a ku: “Eka swilo hinkwaswo ndzi ni ntamu hikwalaho ka loyi a ndzi nyikaka matimba.” (Vafilipiya 4:13) Hilaha ku fanaka, Vakreste vo tala namuntlha va titwa va pfuxelelekile emoyeni naswona va hlakarherile emintlhavekweni endzhaku ko khongela. Hakanyingi, swiphiqo a swa ha vonaki swi ri swikulu ngopfu endzhaku ka loko moya wa Xikwembu wu hi pfunile. Hikwalaho ka matimba lawa ma humaka eka Xikwembu, hi nga vula ku fana na muapostola loyi a nga te: “Hi kamanyetiwile hi tindlela hinkwato, kambe a hi manyiwanga lerova hi nga swi koti ni ku famba; hi pfilunganyekile, kambe a hi yi pfumali hi ku helela ndlela yo huma; ha xanisiwa, kambe a hi siyiwi eku kayakayeni; ha tlatlalatiwa ehansi, kambe a hi lovisiwi.”—2 Vakorinto 4:8, 9.

13, 14. (a) Xana Yehovha u swi kombise njhani eRitweni rakwe leswaku i khokholo ra hina? (b) Xana ku tirhisa misinya ya milawu ya Bibele swi ku pfune njhani?

¹³ Moya lowo kwetsima wu tlhele wu huhutela ni ku sirhelela Rito ra Xikwembu leri tsaleriweke ku pfuna hina. Xana Yehovha u swi kombise njhani leswaku i khokholo ra hina eminkarhini ya maxangu hi ku tirhisa Rito rakwe? Ndlela yin’wana leyi a swi kombiseke ha yona i ku hi nyika vutlhari lebyi tirhaka ni vuswikoti bya ku anakanya. (Swivuriso 3:21-24) Bibele yi letela matimba ya hina ya ku anakanya ni ku antswisa matimba ya hina ya ku ehleketa. (Varhoma 12:1) Hi ku hlaya ni ku dyondza Rito ra Xikwembu nkarhi hinkwawo, swin’we ni ku ri tirhisa, hi nga ‘letela matimba ya hina ya ku twisisa leswaku  ma hambanisa leswi lulameke ni leswi hoxeke.’ (Vaheveru 5:14) Swi nga ha endleka u swi vonile leswaku misinya ya milawu ya Bibele yi ku pfune njhani ku endla swiboho swa vutlhari loko u langutane ni swiyimo swo tika. Bibele yi hi nyika vutlhari lebyi nga hi pfunaka ku tlhantlha swiphiqo leswi tshikilelaka.—Swivuriso 1:4.

¹⁴ Rito ra Xikwembu ri hi nyika xihlovo xin’wana xa matimba—ntshembo wa ku ponisiwa. (Varhoma 15:4) Bibele yi hi byela leswaku swilo swo biha a swi nge yi emahlweni hilaha ku nga heriki. Nhlomulo wun’wana ni wun’wana lowu hi langutanaka na wona i wa xinkarhana. (2 Vakorinto 4:16-18) Hi ni “ntshembo wa vutomi lebyi nga heriki lebyi Xikwembu, lexi xi nga hembiki, xi byi tshembiseke emahlweni ka minkarhi leyi nga heriki.” (Tito 1:2) Loko hi tsaka hi ntshembo wolowo, hi ri karhi hi tsundzuka vumundzuku lebyinene lebyi Yehovha a byi tshembisaka, hi nga tiyisela loko hi ri enhlomulweni.—Varhoma 12:12; 1 Vatesalonika 1:3.

Vandlha—Xikombiso Xa Rirhandzu Ra Xikwembu

15. Xana Vakreste va nga pfunana njhani?

¹⁵ Lunghiselelo rin’wana leri humaka eka Yehovha leri nga hi pfunaka hi nkarhi wa maxangu i vanghana lava hi va kumaka evandlheni ra Vukreste. Bibele yi ri: “Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.” (Swivuriso 17:17) Rito ra Xikwembu ri khutaza hinkwavo evandlheni leswaku va xiximana ni ku rhandzana. (Varhoma 12:10) Muapostola Pawulo u tsarile: “Un’wana ni un’wana a a hambete a lava leswaku ku pfuneka un’wana, hayi yena n’wini.” (1 Vakorinto 10:24) Ku va ni langutelo ro tano swi nga hi pfuna leswaku hi khathala hi swilaveko swa van’wana ku nga ri hi miringo leyi hi langutaneke na yona. Loko hi tinyiketela ku pfuna van’wana, a ho va pfuna ntsena kambe hi kuma ntsako ni ku eneriseka lokukulu, leswi endlaka leswaku ndzhwalo wa hina wu tiyiseleleka.—Mintirho 20:35.

16. Mukreste ha un’we a nga va xikhutazo hi ndlela yihi?

¹⁶ Vavanuna ni vavasati lava wupfeke emoyeni va nga pfuna swinene eku tiyiseni van’wana. Leswaku va endla tano, va fanele va ngheneka naswona va tinyika nkarhi wa van’wana. (2 Vakorinto 6:11-13) Vandlha ra vuyeriwa hakunene loko hinkwavo va tinyika nkarhi wa ku bumabumela vantshwa, ku khutaza lava ha ku sungulaka ku hlanganyela ni ku khutaza lava tshikileriweke. (Varhoma 15:7) Ku rhandza vamakwerhu ku ta tlhela ku hi pfuna leswaku hi papalata moya wa ku ehleketelela van’wana swo biha. A hi fanelanga hi tsutsumela ku vula leswaku swiphiqo swa munhu wo karhi swi vangiwa hi ku tsana emoyeni. Hilaha ku faneleke, Pawulo u khutaze Vakreste leswaku va “[vulavula] hi ku chavelela eka mimoya-xiviri leyi karhatekeke.” (1 Vatesalonika 5:14) Bibele yi kombisa leswaku hambi ku ri Vakreste vo tshembeka va weriwa hi maxangu.—Mintirho 14:15.

17. Hi nga byi tiyisa njhani vuxaka bya hina bya Vukreste?

 ¹⁷ Minhlangano ya Vukreste yi hi nyika lunghelo ro hlawuleka ro chavelelana ni ku khutazana. (Vaheveru 10:24, 25) A hi khutazani eminhlanganweni ya vandlha ntsena. Ematshan’weni ya sweswo, vanhu va Xikwembu va tlhela va tinyika nkarhi wa ku hungasa hi ndlela leyi akaka hi minkarhi ya ku pepa. Loko ku va ni swiyimo leswi tshikilelaka, hi ta hatla hi pfunana hikuva ana se hi ta va hi ake vunghana lebyikulu. Muapostola Pawulo u tsarile: “Ku nga vi na ku avana emirini, kambe swirho swa wona swi khathalelana . . . Naswona loko xirho xin’we xi xaniseka, swirho leswin’wana hinkwaswo swi xaniseka na xona; kumbe loko xirho xin’wana xi vangamisiwa, swirho leswin’wana hinkwaswo swi tsaka na xona.”—1 Vakorinto 12:25, 26.

18. Hi wihi moya lowu hi faneleke hi lwa na wona loko hi titwa hi hele matimba?

¹⁸ Minkarhi yin’wana hi nga titwa hi hele matimba lerova hi nga swi lavi ku tihlanganisa ni Vakreste-kulorhi. Hi fanele hi lwa ni moya wolowo leswaku hi nga titsoni nchavelelo ni mpfuno lowu hi nga wu kumaka eka vapfumeri-kulorhi. Bibele ya hi lemukisa: “Loyi a tihambanisaka ni van’wana u tilavela swa yena ntsena; u ta hambana ni vutlhari hinkwabyo lebyi pfunaka.” (Swivuriso 18:1) Vamakwerhu va xinuna ni va xisati i xikombiso xa leswaku Xikwembu xa hi khathalela. Loko hi ri tlangela lunghiselelo rero ra rirhandzu, hi ta kuma ku rhula hi nkarhi wa maxangu.

Hlayisa Langutelo Lerinene

19, 20. Xana Matsalwa ma hi pfuna njhani leswaku hi papalata langutelo leri hoxeke?

¹⁹ Loko hi hele matimba naswona hi ri ni gome, swa olova ku ehleketa hi swilo leswi nga akiki. Hi xikombiso, loko van’wana va ri emaxangwini, va nga ha sungula ku kanakana vumoya bya vona, va gimeta hileswaku va langutane ni swiyimo swo tika hileswi Xikwembu xi va fularheleke. Kambe, tsundzuka leswaku Yehovha a nga ringi munhu hi “swilo swo biha.” (Yakobo 1:13) Bibele yi ri: “[Xikwembu a xi] xanisanga kumbe ku hlunamisa vana va vanhu swi huma embilwini [ya xona].” (Swirilo 3:33) Ematshan’weni ya sweswo, Yehovha u twa ku vava ngopfu loko malandza yakwe ma xaniseka.—Esaya 63:8, 9; Zakariya 2:8.

²⁰ Yehovha i “Tatana la nga ni tintswalo letikulu tlhelo Xikwembu xa nchavelelo hinkwawo.” (2 Vakorinto 1:3) Wa hi khathalela, naswona u ta hi tlakusa hi nkarhi lowu faneleke. (1 Petro 5:6, 7) Loko nkarhi hinkwawo hi swi xiya leswaku Xikwembu xa hi rhandza swi ta hi pfuna ku va ni langutelo lerinene, hambi ku ri ku tshama hi tsakile. Yakobo u tsarile: “Swi tekeni hinkwaswo swi ri ntsako, vamakwerhu, loko mi langutana ni miringo yo hambana-hambana.” (Yakobo 1:2) Ha yini? Wa hlamula: “Hikuva eku amukeriweni kakwe u ta kuma harhi ya vutomi, leyi Yehovha a yi tshembiseke lava hambetaka va n’wi rhandza.”—Yakobo 1:12.

21. Ku nga khathariseki swiyimo swo tika leswi hi langutanaka na swona, xana Xikwembu xi va tiyisekisa hi yini lava tshembekaka eka xona?

²¹ Hilaha Yesu a hi lemukiseke hakona, emisaveni hi ta va ni nhlomulo. (Yohane 16:33) Kambe Bibele yi tshembisa leswaku ku hava “nhlomulo kumbe maxangu kumbe nxaniso kumbe ndlala kumbe vusweti kumbe khombo” leswi nga ta hi hambanisa ni rirhandzu ra Yehovha ni ra N’wana wakwe. (Varhoma 8:35, 39) Swa chavelela hakunene ku tiva leswaku maxangu hinkwawo lama hi welaka a ma nge tlhaveriwi hi dyambu! Hi nkarhi lowu fanaka, loko ha ha rindzele makumu ya ku xaniseka ka vanhu, Tata wa hina la nga ni rirhandzu, Yehovha, wa hi khathalela. Loko hi tsutsumela eka yena leswaku hi kuma nsirhelelo, u ta va “xisirhelelo lexi tlakukeke eka un’wana ni un’wana la pfotlosiweke, xisirhelelo lexi tlakukeke hi minkarhi ya maxangu.”—Pisalema 9:9.

Hi Dyondze Yini?

• Vakreste va fanele va langutela yini loko va ha hanya emisaveni leyi yo homboloka?

• Swikhongelo swa hina leswi humaka embilwini swi nga hi chavelela njhani loko hi langutane ni miringo?

• Moya wa Xikwembu i mupfuni hi ndlela yihi?

• Hi nga endla yini leswaku hi pfunana?

[Swivutiso Swa Dyondzo]

[Xifaniso lexi nga eka tluka 18]

Hi fanele hi tsutsumela eka Yehovha onge hiloko hi tsutsumela eka xihondzo lexi tiyeke

[Swifaniso leswi nga eka tluka 20]

Lava wupfeke hi tlhelo ra moya va tirhisa nkarhi wun’wana ni wun’wana lowu va wu kumaka leswaku va bumabumela ni ku khutaza van’wana