Ndlela Yo Langutana Ni Ku Hela Matimba

XANA u hele matimba? Eminkarhini leyi, laha swilo swi endlekaka swi nga rindzeriwanga, ni laha ku teleke madzolonga, vanhu vo tala va titwa va hele matimba. Van’wana va titwa va hele matimba hikuva a va na ntirho wa ku tihanyisa. Van’wana va langutana ni vuyelo bya mhangu leyi veke kona. Van’wana va lwisana ni swiphiqo swa ndyangu, vuvabyi lebyikulu, kumbe xivundza.

Xana u nga wu kuma kwihi mpfuno loko u hele matimba? Namuntlha vanhu va timiliyoni va kuma nchavelelo hi ku hlaya Rito ra Xikwembu, Bibele. Va tiyisiwa hi marito ya muapostola Pawulo loyi a nga te: “A ku dzunisiwe Xikwembu tlhelo Tata wa Hosi ya hina Yesu Kreste, Tatana la nga ni tintswalo letikulu tlhelo Xikwembu xa nchavelelo hinkwawo, lexi hi chavelelaka enhlomulweni wa hina hinkwawo.” (2 Vakorinto 1:3, 4) Hikwalaho ka yini u nga hlayi ndzimana leyi ni tin’wana eBibeleni ya wena? Ku endla tano swi ta ‘chavelela mbilu ya wena ni ku ku tiyisa.’—2 Vatesalonika 2:17.

Ndlela yin’wana leyi u nga pfunekaka ha yona i ku hlangana ni lava va tirhelaka Yehovha. Swivuriso 12:25 yi ri: “Ku vilela embilwini ya munhu hi kona loku nga ta yi tshova, kambe rito lerinene ra yi tsakisa.” Loko hi va kona eminhlanganweni ya Vukreste, hi twa “rito [rero] lerinene,” leri “tsokombela[ka] eka moya-xiviri naswona ri hanyisa marhambu.” (Swivuriso 16:24) Hikwalaho ka yini u nga yi enhlanganweni wun’wana eHolweni ya Mfumo ya Timbhoni ta Yehovha leswaku u tivonela hi wexe ndlela leyi minhlangano yo tano yi nga ku tiyisaka ha yona?

Nakambe u nga pfuniwa hi matimba ya xikhongelo. Loko u titwa u tikiwa hi mintshikilelo ya vutomi, boxa mivilelo ya wena eka “Mutwi wa xikhongelo.” (Pisalema 65:2) Muvumbi wa hina, Yehovha Xikwembu, u hi twisisa ku antswa ku tlula ndlela leyi hi titwisisaka ha yona. Hi nga titshega hi yena leswaku a hi pfuna. Rito ra yena ra hi tshembisa ri ku: “Lahlela ndzhwalo wa wena eka Yehovha, u ta ku seketela. A nge pfuki a pfumerile leswaku la lulameke a tsekatseka.” (Pisalema 55:22) Ina, “lava tshembaka Yehovha va ta tlhela va kuma matimba.”—Esaya 40:31.

Yehovha Xikwembu u hi nyike malunghiselelo ya risima swinene lama nga hi pfunaka ku hlula xiphiqo xa ku hela matimba. Xana u ta ma tirhisa?