‘Lavisisani Loyi A Fanelekaka’

DAMASKA a wu ri muti lowu fuweke hi lembe-xidzana ro sungula ra Nguva ya hina leyi Tolovelekeke. Leswi a wu rhendzeriwe hi mintanga ya mihandzu, a wu fana ni xihlovo-mananga xa ntlawa wa vanhu lowu fambaka ni swiharhi lowu humaka ematikweni ya le vuxeni bya wona muti lowu. Endzhakunyana ka rifu ra Yesu Kreste, ku ve ni vandlha ra Vukreste eDamaska. Swin’wana swa swirho swa vandlha rero a ku ri Vayuda lava swi nga ha endlekaka va ve valandzeri va Yesu hi nkarhi wa Nkhuvo wa Pentekosta eYerusalema hi 33 C.E. (Mintirho 2:5, 41) Swi nga ha endleka vadyondzisiwa van’wana va suke eYudiya va ya eDamaska loko ku sungula nxaniso endzhaku ka ku khandliwa ka Stefano hi maribye.—Mintirho 8:1.

Kumbexana hi 34 C.E., Mukreste la vuriwaka Ananiya wa le Damaska u kume xiavelo lexi nga tolovelekangiki. Hosi yi n’wi byele leswi: “Tlakuka, u ya exitarateni lexi vuriwaka Ndzulamo, kutani endlwini ya Yudasi u lava munhu la vuriwaka Sawulo, wa le Tarso. Hikuva, waswivo, wa khongela.”—Mintirho 9:11.

Xitarata lexi vuriwaka Ndzulamo a xi lehe kwalomu ka 1,5 wa tikhilomitara naswona a xi tsemakanya hi le xikarhi ka Damaska. Loko hi languta nkovotlo wa lembe-xidzana ra vu-19 lowu nga kwala ka tluka leri, hi nga swi vona leswaku xitarata xexo a xi ri njhani eminkarhini ya khale. Hikwalaho ka ndlela leyi xitarata lexi a xi endliwe ha yona, swi nga ha endleka Ananiya a boheke ku yi lava nkarhi wo leha yindlu ya Yudasi. Hambiswiritano, Ananiya u yi kumile naswona riendzo ra yena ri endle leswaku Sawulo a va muapostola Pawulo, mutwarisi wa mahungu lamanene la hisekaka.—Mintirho 9:12-19.

Yesu a a rhume vadyondzisiwa vakwe naswona a a va byele leswaku va ‘lavisisa lava va faneriwaka’ hi mahungu lamanene. (Matewu 10:11) Swi tikomba onge Ananiya u lave Sawulo hi ku kongoma. Ku fana na Ananiya, Timbhoni ta Yehovha hi ntsako ti lavisisa lava fanelekaka naswona ta tsaka loko vanhu va amukela mahungu lamanene ya Mfumo. Loko ti kume vanhu vo tano ti titwa ti nga tlanganga hi nkarhi wa tona.—1 Vakorinto 15:58.

[Xifaniso lexi nga eka tluka 32]

“Xitarata lexi vuriwaka Ndzulamo” xa namuntlha

[Laha Xifaniso Xi Humaka Kona eka tluka 32]

From the book La Tierra Santa, Volume II, 1830