“Mi Fanele Mi Khongela Hi Ndlela Leyi”

XANA wa ma tiva marito ya Xikhongelo xa Hosi? I xikhongelo xa xikombiso lexi dyondzisiweke hi Yesu Kreste. Loko a dyondzisa Dyondzo ya yena leyi dumeke ya le Ntshaveni, Yesu u te: “Kutani mi fanele mi khongela hi ndlela leyi.” (Matewu 6:9) Tanihi leswi xi sunguriweke hi Yesu, hakanyingi xi vitaniwa Xikhongelo xa Hosi, nakambe xi tiviwa tanihi xikhongelo xa Tata wa Hina.—Latin, Paternoster.

Vanhu va timiliyoni emisaveni hinkwayo va nhlokohate Xikhongelo xa Hosi naswona va xi phindha-phindha minkarhi yo tala, kumbexana siku ni siku. Emalembeni ya sweswinyana, vo tala va khongele xikhongelo lexi eswikolweni ni laha ku hlanganeke kona vanhu vo tala. Hikwalaho ka yini Xikhongelo xa Hosi xi tekiwa xi ri xa nkoka hi ndlela leyi?

Cyprian, mufundhisi wa lembe-xidzana ra vunharhu u tsarile a ku: “Hi xihi xikhongelo xin’wana lexi nga vaka ni nhlamuselo leyi enteke ya moya swinene ku tlula lexi hi nga nyikiwa xona hi Kreste . . . ? Hi xihi xikhongelo lexi yaka eka Tatana lexi nga vaka xa ntiyiso swinene ku tlula lexi hi nyikiweke xona hi N’wana loyi a nga Ntiyiso?”—Yohane 14:6.

Eka xibukwana lexi hlamuselaka tidyondzo ta yona, Kereke ya Rhoma Khatoliki yi teka xikhongelo xa Tata wa Hina tanihi “xikhongelo xa xisekelo xa Vukreste.” The World Book Encyclopedia ya pfumela leswaku xikhongelo lexi i xa nkoka eka vukhongeri hinkwabyo bya Vujagana, yi xi vula man’wana ya “marito ya xisekelo ya ripfumelo ra Vukreste.”

 Hambiswiritano, ku fanele ku pfumeriwa leswaku vo tala lava khongelaka Xikhongelo xa Hosi a va xi twisisi hi ku helela. Phepha-hungu leri vuriwaka Ottawa Citizen ra le Canada, ri ri: “Loko u ri ni vutivi byo karhi hi Vukhongeri swi nga ha endleka wa swi kota ku vula Xikhongelo xa Hosi hi ku hatlisa u nga yimi u koka moya, kambe swi nga ha ku tikela ku xi vula hi ku nonoka naswona u kombisa leswaku wa xi twisisa.”

Xana i swa nkoka leswaku hi twisisa swikhongelo leswi hi swi yisaka eka Xikwembu? Hikwalaho ka yini Yesu a hi nyike Xikhongelo xa Hosi? Xana xi vula yini eka wena? A hi hlamuleni swivutiso leswi.