Ku Tlanga A Hi Ku Hungasa Ntsena

VANA va rhandza ku tlanga. Kambe hi ku vula ka buku leyi nge The Developing Child, “loku a hi ku tlanga loku nga pfuniki nchumu. Ku pfuna vana leswaku va va ni vutivi hi swilo leswi va rhendzeleke.” Loko vana va tlanga, va dyondza ku tirhisa switwi swa vona, va twisisa laha va tshamaka kona ni ku va ni ntirhisano ni van’wana.

Ku sukela loko va ri ni malembe ya mune kumbe ya ntlhanu hi vukhale, vana va sungula ku tlanga hi ku encenyeta vanhu lavakulu. Yesu u tshame a vulavula hi vana lava nga eku tlangeni. Van’wana a va rhandza ku encenyeta “nkhuvo wa vukati,” kasi van’wana a va rhandza ku encenyeta “nkosi,” kutani, hilaha vana va talaka ku endla hakona, va holovisanile hikuva van’wana a va nga lavi ku tlanga. (Matewu 11:16, 17) Ku tlanga mintlango ya muxaka lowu swi nga dzikisa timhaka ta nkoka emianakanyweni ya n’wana la kulaka.

Vana lava nga eswifanisweni leswi, va tiendla mudyondzisi wa Bibele ni xichudeni. A va le ku fambiseni ka dyondzo ya xiviri ya Bibele, kambe mhaka yo byela van’wana hi rungula ra Bibele yi dzikile emianakanyweni ya vona. Naswona dyondzo leyi i ya nkoka, hikuva Yesu u lerise valandzeri va yena hinkwavo leswaku va endla vadyondzisiwa ni ku dyondzisa vanhu ku hlayisa swilo hinkwaswo leswi a va dyondziseke swona.—Matewu 28:19, 20.

Swa fanela leswaku vatswari lava vana va vona va rhandzaka ku encenyeta ku fambisa tidyondzo ta Bibele, ku nyikela tinkulumo, kumbe ku chumayela hi yindlu na yindlu va titwa va enerisekile. Hi ntolovelo, vana va tekelela leswi va swi vonaka eka vanhu lavakulu lava va tshamaka na vona. Loko vana va tlanga mintlangu leyi nga eBibeleni swi kombisa leswaku va kurisiwa “hi muxaka wa dyondzo ni ndzayo leyi amukelekaka eHosini.”—Vaefesa 6:4, Charles B. Williams.

Yehovha u lava leswaku vana va hlanganyela evugandzerini bya ntiyiso. U byele Muxe leswaku ni “vana” va va kona loko ku hlayiwa Nawu. (Deteronoma 31:12) Loko vana va titwa va katseka, swi ta vonaka eka mintlango ya vona. Naswona n’wana loyi a encenyetaka mutirheli wa Xikwembu u va a teka goza ro sungula ro va mutirheli hi yexe.