“Mi Va Ni Xinakulobye Lexikulu”

“Mi va ni xinakulobye lexikulu erirhandzwini ra vumakwerhu.”—VARHOMA 12:10.

1, 2. Hi byihi vuxaka lebyi murhumiwa un’wana wa manguva lawa kun’we na muapostola Pawulo a va ri na byona ni vamakwavo?

EMALEMBENI ya 43 lawa a ma heteke a ri murhumiwa le Vuxa Mpfungwe, Don a a tiveriwa rirhandzu leri a a ri na rona eka vanhu lava a a va pfuna. Loko se a vabyela ku fa, van’wana lava a va dyondziseke ntiyiso va fambe magidi ya tikhilomitara va fika va ku eka yena, “Kamsahamnida, kamsahamnida!”—“Hi nkhensa hi vuyelela!” hi Xikoriya. Xinakulobye lexikulu xa Don a xi khumbe timbilu ta vona.

² Don a hi yena ntsena a endleke sweswo. Eka lembe-xidzana ro sungula, muapostola Pawulo u kombise xinakulobye lexikulu eka lava a a va pfuna. Pawulo u tinyiketele ku va pfuna. Hambileswi a a ri munhu wo vula mhaka a nga jikajiki, hi hala tlhelo a a ri munhu wo olova ni la khathalelaka van’wana “hi ndlela leyi manana la wundlaka a khathalelaka vana vakwe ha yona.” U tsalele vandlha ra le Tesalonika a ku: “Hikwalaho ko va ni xinakulobye xa rirhandzu eka n’wina, leswi hi swi tsakeleke swinene a hi ku hundzisela mahungu lamanene ya Xikwembu ntsena eka n’wina, kambe ni mimoya-xiviri ya hina, hikuva mi ve lava rhandzekaka eka hina.” (1 Vatesalonika 2:7, 8) Endzhaku, loko Pawulo a byele vamakwavo va le Efesa leswaku a va nga ha ta tlhela va n’wi vona, “ku ve ni ku rila lokukulu swinene exikarhi ka vona hinkwavo, kutani va wela enhan’wini ya Pawulo va n’wi ntswontswa hi rirhandzu.” (Mintirho 20:25, 37) Kunene, vuxaka bya Pawulo ni vamakwavo a ku nga ri bya ku va evupfumerini byin’we ntsena. A va kombisana xinakulobye lexikulu.

 Xinakulobye Ni Rirhandzu

3. Xana ma yelana njhani marito ya le Bibeleni lama vulaka xinakulobye ni rirhandzu?

³ EMatsalweni, xinakulobye lexikulu, ntlhaveko wa xinakulobye kun’we ni ntwela-vusiwana swi fambisana swinene ni mfanelo-nkulu ya Vukreste—ku nga rirhandzu. (1 Vatesalonika 2:8; 2 Petro 1:7) Ku fana ni swiphemu swa dayimani yo xonga, timfanelo teto letinene ti humesa vuyelo lebyinene loko ti tirhisiwa hinkwato ka tona. Ti endla leswaku Vakreste va va ni vuxaka hi xivona va tlhela va va ni vuxaka ni Tata wa vona wa le tilweni. Hikwalaho, muapostola Pawulo u khutaze vapfumeri-kulobye a ku: “Rirhandzu ra n’wina ri nga vi na vukanganyisi. . . . Mi va ni xinakulobye lexikulu erirhandzwini ra vumakwerhu.”—Varhoma 12:9, 10.

4. Xana ma vula yini marito lama nge “xinakulobye xa rirhandzu”?

⁴ Rito ra Xigriki leri Pawulo a ri tirhiseke leri vulaka “xinakulobye xa rirhandzu” ri vumbiwe hi marito mambirhi, laha rin’wana ri vulaka xinghana ivi lerin’wana ri vula rirhandzu ra ntumbuluko. Hilaha mukambisisi un’wana wa Bibele a hlamuselaka hakona, sweswo swi vula leswaku Vakreste “va fanele va lemukiwa hi ku tinyiketela ka vona loku hi ntolovelo ku vonakaka endyangwini lowu nga ni rirhandzu ni vun’we, ni lowu wu seketelanaka.” Xana yoleyo i ndlela leyi wena u titwaka ha yona hi Vakreste-kuloni? Vandlha ra Vukreste ri fanele ri rhandzana ri tlhela ri va ni vun’we. (Vagalatiya 6:10) Hikwalaho, Bibele—Mahungu Lamanene yi hundzuluxela Varhoma 12:10, yi ku: “Mi rhandzana tanihi vamakwavo.” Kasi A Biblia Go Basa yi ri: “Ranzanani hi liranzo la wumakabye.” Ina, ku rhandzana ka Vakreste a hi mhaka ya ku lava ku hetisisa nawu kumbe ku tisusa nandzu. “[Hi] xinakulobye xa vumakwerhu lexi nga riki na vukanganyisi,” hi fanele hi “[rhandzana] swinene ku suka embilwini.”—1 Petro 1:22.

‘Hi Dyondzisiwa Hi Xikwembu Leswaku Hi Rhandzana’

5, 6. (a) Yehovha u yi tirhise njhani mintsombano ya matiko leswaku a dyondzisa vanhu vakwe xinakulobye xa Vukreste? (b) Vuxaka bya vamakwerhu byi tiya njhani hi ku famba ka nkarhi?

⁵ Hambileswi “rirhandzu ra vo tala” ri yaka ri hola emisaveni leyi, Yehovha u dyondzisa vanhu vakwe va manguva lawa leswaku va “rhandzana.” (Matewu 24:12; 1 Vatesalonika 4:9) Mintsombano ya matiko hinkwawo ya Timbhoni ta Yehovha yi endla leswaku ku va ni tindlela to hlawuleka to tirhisa vuleteri byo tano. Emintsombanweni leyi, Timbhoni ti hlangana ni vamakwavo vo huma ematikweni ya le kule, naswona to tala ti amukela vapfhumba vo huma ematikweni mambe, emakaya ya tona. Eka ntsombano wun’wana lowu nga khomiwa ku nga ri khale, vapfhumba van’wana a va huma ematikweni lawa vanhu va kona hi ntolovelo va nga ni tingana. Mukreste loyi a pfuneteke ku rhurhela vapfhumba u te: “Loko vapfhumba lava va fika, a va nga ntshunxekanga nikatsongo. Kambe endzhaku ka masiku ya tsevu loko va lelana, vapfhumba lava ni vaendzeriwa va angarhanile va ri karhi va xiririka mihloti. Va tokote rirhandzu ra Vukreste leri va nga ta ka va nga ri rivali.” Ku kombisa malwandla eka vamakwerhu, ku nga khathariseki leswaku va davuke kwihi, swi nga va ni vuyelo lebyinene eka muendzi ni muendzeriwa.—Varhoma 12:13.

⁶ Mintokoto yo tano ya le mintsombanweni ya tsakisa swinene, kambe vuxaka bya kula swinene  loko Vakreste va tirhela Yehovha swin’we nkarhi wo leha. Loko hi va tiva kahle vamakwerhu, hi nga ti tlangela hi xitalo timfanelo ta vona letinene—ku vulavula ka vona ntiyiso, ku tshembeka, musa, ku hanana, ku anakanyela, ntwela-vusiwana ni ku pfumala vutianakanyi. (Pisalema 15:3-5; Swivuriso 19:22) Mark, loyi a veke murhumiwa eAfrika Vuxa u te, “Ku tirhisana swin’we ni vamakwerhu swi aka vuxaka lebyi nga hohlokiki.”

7. Ku laveka yini leswaku hi tsakela xinakulobye xa Vukreste evandlheni?

⁷ Leswaku hi fikelela vuxaka byo tano hi tlhela hi byi hlakulela evandlheni, swirho swa vandlha swi fanele swi va swin’we. Loko hi va kona nkarhi na nkarhi eminhlanganweni ya Vukreste, hi tiyisa vuxaka lebyi hi nga na byona ni vamakwerhu. Loko hi vulavurisana ni van’wana emahlweni ni le ndzhaku ka minhlangano, hi tlhela hi hlanganyela hi tinhlamulo eka minhlangano yoleyo, hi ta va hi khutazana “erirhandzwini ni le mintirhweni leyinene.” (Vaheveru 10:24, 25) Nkulu un’wana wa le United States u te: “A ndzi swi rivali leswaku loko ndza ha ri xihlangi, ndyangu wa ka hina minkarhi hinkwayo a wu ri wo hetelela ku huma eHolweni ya Mfumo, tanihi leswi a hi heta nkarhi wo leha hi ri karhi hi vulavurisana ni van’wana hi timhaka leti akaka.”

Xana U Fanele U ‘Ndlandlamuka’?

8. (a) Pawulo a a vula yini loko a khutaza Vakorinto leswaku va ‘ndlandlamuka’? (b) Hi nga endla yini leswaku hi hlanganyeta xinakulobye evandlheni?

⁸ Leswaku hi hlanganyela hi xitalo eka xinakulobye xo tano, swi nga lava leswaku hi ‘ndlandlamuxa’ timbilu ta hina. Muapostola Pawulo u tsalele vandlha ra le Korinto a ku: “Timbilu ta hina ti ndlandlamukile. A mi manyananga eka hina.” Pawulo u khutaze vandlha leri leswaku na rona ri ‘ndlandlamuka.’ (2 Vakorinto 6:11-13) Xana na wena u nga ‘ndlandlamuxa’ xinakulobye xa wena? U nga rindzi van’wana va teka goza ku sungula. Epapileni leri a ri tsaleleke Varhoma, Pawulo u hlanganise xilaveko xa ku va ni xinakulobye loko a nyikela xitsundzuxo lexi nge: “Vanani lavo rhanga eku xiximaneni.” (Varhoma 12:10) Leswaku u kombisa xichavo eka van’wana, u nga teka goza ro va xeweta eminhlanganweni. Nakambe u nga va rhamba leswaku va ya tirha swin’we na wena ensin’wini kumbe mi lunghiselela minhlangano swin’we. Sweswo swi endla leswaku xinakulobye xa rirhandzu xi kula hi ku olova.

9. Hi wahi magoza lawa van’wana va ma tekeke leswaku va va ni vunghana lebyikulu ni Vakreste-kulobye? (Katsa ni swikombiso swihi ni swihi swa le vandlheni ra ka n’wina.)

⁹ Mindyangu ni munhu ha un’we evandlheni va nga ‘ndlandlamuka’ hi ku endzelana, kumbexana va dya swin’we swakudya leswi lunghiseleriweke hi ndlela yo olova, ni hi ku hlanganyela swin’we eka swilo swin’wana leswinene. (Luka 10:42; 14:12-14) Minkarhi yin’wana Hakop u hlela mintlawanyana yitsongo va ya epikinikini. U ri: “Ndzi rhamba vanhu va malembe yo hambana, ku katsa ni vatswari lava nga riki na vanghana va vukati. Un’wana ni un’wana u tlhelela ekaya a phyuphyile emianakanyweni, naswona u titwa a ri ni vuxaka lebyikulu ni van’wana.” Tanihi Vakreste, hi fanele hi lwela leswaku hi nga vi vapfumeri-kulobye ntsena, kambe hi tlhela hi va vanghana va xiviri.—3 Yohane 14.

10. Hi nga endla yini loko vuxaka bya hina ni vamakwerhu byi va ni mahlwehlwe?

¹⁰ Kambe minkarhi yin’wana ku nga hetiseki ku nga kavanyeta matshalatshala ya hina ya ku hlakulela xinakulobye. Xana hi nga endla yini? Xo sungula, hi nga khongelela ku va ni vuxaka lebyinene ni vamakwerhu. Xikwembu xi rhandza leswaku malandza ya xona ma hanyisana hi ku rhula, naswona xi ta hlamula swikhongelo swo tano leswi humaka embilwini. (1 Yohane 4:20, 21; 5:14, 15) Nakambe hi fanele hi teka goza leri fambisanaka ni swikhongelo swa hina. Ric loyi a fambaka a endzela mavandlha le Afrika Vuxa, u tsundzuka makwerhu loyi a a n’wi tikisela vutomi hi ku sihalala ka yena. Ric u ri: “Ematshan’weni ya ku papalata makwerhu  loyi, ndzi ringete ku n’wi tiva ku antswa. Ndzi kume leswaku tata wa makwerhu loyi u n’wi kurise hi ku tirhisa voko ra nsimbi. Loko se ndzi twisise ndlela leyi makwerhu loyi a tikarhateke ha yona leswaku a phela swa mukhuva wa ka vona ehansi, ndzi sungule ku n’wi tlangela. Hi ve vanghana lavakulu.”—1 Petro 4:8.

Phofula Leswi Nga eMbilwini Ya Wena!

11. (a) Ku laveka yini leswaku xinakulobye xi kula evandlheni? (b) Ha yini ku lava ku fambela ekule ni van’wana swi nga vaka ni khombo hi tlhelo ra moya?

¹¹ Namuntlha vanhu vo tala va tihanyela vutomi bya vona va nga ri ni munghana ni un’we. A hi ku vavisa ka swona! Sweswo a swi fanelanga swi va tano evandlheni ra Vukreste. Ku rhandza vamakwerhu hi xiviri a swi kombisiwi hi ku vulavula na vona hi musa ni ku hanyisana na vona hi ndlela ya vumunhu ntsena; naswona a hi ku kombisa rirhandzu ra wena hi ku tekeka. Ku ri na sweswo, hi fanele hi tiyimisela ku phofula leswi nga embilwini, hilaha Pawulo a endleke hakona eka Vakorinto, hi kombisa vapfumeri-kulorhi leswaku ha khathala hakunene hi vuhlayiseki bya vona. Hambileswi van’wana hi ntumbuluko va nga nghenekiki hi ku olova naswona va nga vulavuliki ngopfu, ku tihambanisa ni van’wana swi nga va ni khombo. Bibele ya lemukisa yi ku: “Loyi a tihambanisaka ni van’wana u tilavela swa yena ntsena; u ta hambana ni vutlhari hinkwabyo lebyi pfunaka.”—Swivuriso 18:1.

12. Ha yini ku vulavurisana lokunene ku ri ka nkoka leswaku ku va ni vuxaka lebyikulu evandlheni?

¹² Ku vulavurisana lokunene i nchumu wa nkoka evugandzerini bya ntiyiso. (Yohane 15:15) Hinkwerhu hi lava vanghana lava hi nga tiphofulaka eka vona. Ku tlula kwalaho, loko hi tivana ku antswa, swi ta hi olovela ku enerisa swilaveko swa van’wana. Loko hi kombisa hi ndlela yoleyo leswaku ha khathala hi swilaveko swa van’wana, hi ta va hi hlakulela xinakulobye xa rirhandzu, naswona hi ta vona ku hetiseka ka marito ya Yesu lama nge: “Ku nyika swi tisa ntsako lowukulu ku tlula ku amukela.”—Mintirho 20:35; Vafilipiya 2:1-4.

13. Hi nga endla yini ku kombisa leswaku hi ni xinakulobye xa ntiyiso eka vamakwerhu?

¹³ Leswaku xinakulobye xa hina xi pfuna van’wana, hi fanele hi xi kombisa. (Swivuriso 27:5) Loko xinakulobye xa hina xi huma embilwini, nghohe ya hina yi ta swi kombisa, naswona sweswo swi nga susumeta ni van’wana leswaku va xi kombisa. Wanuna wo tlhariha u tsarile a ku: “Ku vangama ka mahlo ku tsakisa mbilu.” (Swivuriso 15:30) Swiendlo swa ku anakanyela van’wana na swona swi hlanganyeta xinakulobye xa rirhandzu. Hambileswi ku nga riki na munhu loyi a nga xavaka xinakulobye xa ntiyiso, nyiko leyi humaka embilwini yi nga vula swo tala. Khadi, papila ni “rito leri vuriweke hi nkarhi wa kona”—hinkwaswo  ka swona swi nga kombisa xinakulobye xo huma embilwini. (Swivuriso 25:11; 27:9) Loko hi kote ku endla xinghana ni van’wana, hi fanele hi xi hlakulela hi ku hambeta hi kombisa rirhandzu ro pfumala vutianakanyi. Ngopfu-ngopfu hi fanele hi lwela ku seketela vanghana va hina loko ku tangunuka xiyimo lexi lavaka leswaku hi va seketela. Bibele yi ri: “Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.”—Swivuriso 17:17.

14. Hi nga endla yini loko un’wana a vonaka a nga lavi ku amukela xinakulobye lexi hi n’wi kombaka xona?

¹⁴ Kunene, a hi nge swi koti ku va ni xinghana lexikulu na mani na mani evandlheni. Swi le rivaleni leswaku hi ta va ni xinghana lexikulu ni van’wana ku tlula van’wanyana. Kutani loko un’wana a tikomba a nga lavi ku tshinela ngopfu eka wena hilaha wena u navelaka hakona, u nga hatliseli ku tibyela leswaku ku ni leswi hoxeke hi wena kumbe hi yena. Naswona u nga ringeti ku n’wi sindzisa kunene leswaku a va ni xinghana lexikulu na wena. Loko u n’wi kombisa xinghana lexikulu hilaha swi nga kotekaka hakona, u ta va u pfula ndlela ya leswaku mi va ni vuxaka lebyikulu enkarhini lowu taka.

“Ndzi Ku Amukerile”

15. Xana ku va ni vuyelo byihi eka van’wana loko va bumabumeriwa kumbe va nga bumabumeriwi?

¹⁵ Yesu u fanele a tsakile swinene loko eku khuvuriweni kakwe a twa rito ro huma etilweni ri ku: “Ndzi ku amukerile”! (Marka 1:11) Marito wolawo ma fanele ma tiyisekise Yesu swinene leswaku Tata wakwe a a ri ni xinakulobye eka yena. (Yohane 5:20) Lexi vavisaka, van’wana a va kali va twa marito yo tano ya xibumabumelo ma huma eka lava va va xiximaka ni ku va rhandza. Ann u ri: “Vantshwa vo tala vo fana na mina a va na swirho swa ndyangu evandlheni ra Vukreste. Ekaya hi tshamela ku soriwa ntsena. Leswi swa hi vavisa swinene.” Kambe loko va va swirho swa vandlha, va kuma rirhandzu lerikulu ra ndyangu wa moya—leri kombisiwaka hi vatatana na vamanana, kun’we ni vamakwavo va xinuna ni va xisati lava nga vapfumeri-kulobye.—Marka 10:29, 30; Vagalatiya 6:10.

16. Ha yini ku tshamela ku sola van’wana swi nga pfuni?

¹⁶ Etindhawini tin’wana, vatswari, vanhu lava kuleke ni vadyondzisi a va tali ku bumabumela vana, hi ku anakanya leswaku vana va nga tibyela leswaku se va thwasile kumbe va sungula ku mila makatla. Mianakanyo yo tano yi nga khumba ni mindyangu ya Vakreste kun’we ni vandlha. Loko va vulavula hi nkulumo leyi n’wana a yi nyikeleke kumbe swin’wana leswi a swi endleke hi ku tikarhata, vanhu lavakulu va nga ha ku: “Ku ringeta u ringetile, kambe u nga endla swo antswa!” Kumbe va nga kombisa ni leswaku a swi va tsakisanga nikatsongo leswi a nga endlisa swona. Vo tala va anakanya leswaku loko va endla tano va khutaza vana leswaku va tikarhata swinene. Kambe mukhuva wolowo hakanyingi wu tisa vuyelo lebyi hambaneke, hikuva vana va nga lan’wa kumbe va tivona va nga ri nchumu.

17. Ha yini hi fanele hi lava tindlela ta ku bumabumela van’wana?

¹⁷ Hambiswiritano, a swi fanelanga ku bumabumela munhu loko u lava ku n’wi nyika ndzayo ntsena. Xibumabumelo xo huma embilwini xi hlanganyeta xinakulobye xa rirhandzu endyangwini ni le vandlheni, xisweswo xi khutaza vana leswaku va ya eka vamakwerhu lava vupfeke loko va lava xitsundzuxo.  Ematshan’weni ya ku hanyisana ni van’wana hi ku ya hi ndhavuko wa ndhawu, hi fanele hi “ambala vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.” Bumabumela van’wana hilaha Yehovha a endlaka hakona.—Vaefesa 4:24.

18. (a) N’wina vantshwa, xana mi fanele mi yi teka njhani ndzayo yo huma eka vanhu lava kuleke? (b) Ha yini vanhu lava kuleke va va ni vukheta malunghana ni ndlela leyi va nyikelaka ndzayo ha yona?

¹⁸ Hi hala tlhelo, n’wina vantshwa, mi nga anakanyi leswaku loko vanhu lava kuleke va mi lulamisa kumbe ku mi nyika xitsundzuxo, swi vula leswaku a va mi rhandzi. (Eklesiasta 7:9) A swi tano nikatsongo! Hakanyingi sweswo va swi endla hileswi va khathalaka hi n’wina ni leswi va nga ni xinakulobye lexikulu eka n’wina. Loko a swi nga ri tano a va nga ta tikarhata va vulavula na n’wina hi swona. Hi ku tiva vuyelo lebyi marito ma nga vaka na byona, vanhu lava kuleke—ngopfu-ngopfu vakulu va vandlha—hakanyingi va heta nkarhi wo leha va anakanya va tlhela va khongela va nga si nyikela ndzayo, tanihi leswi va lavaka ku pfuna ntsena.—1 Petro 5:5.

“Yehovha U Ni Xinakulobye Lexikulu Swinene”

19. Ha yini lava va tshameke va khomisiwa tingana va fanele va titshega hi Yehovha leswaku a va seketela?

¹⁹ Van’wana va nga ha anakanya leswaku ku kombisa xinakulobye xa rirhandzu swi nga va siya va khomiwe hi tingana, hileswi va tshameke va humeleriwa hi nchumu wo tano enkarhini lowu hundzeke. Leswaku va tlhela va kombisa xinakulobye xo tano eka van’wana swi lava xivindzi ni ripfumelo lerikulu. Kambe a va fanelanga va rivala leswaku Yehovha a nga le “kule ngopfu ni un’wana ni un’wana wa hina.” U lava leswaku hi tshinela eka yena. (Mintirho 17:27; Yakobo 4:8) Nakambe u twisisa mianakanyo ya hina ya ku chava ku khomisiwa tingana, kutani u hi tshembisa leswaku u ta va na hina, a hi pfuna. Mupisalema Davhida wa hi tiyisekisa a ku: “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.”—Pisalema 34:18.

20, 21. (a) Hi swi tivisa ku yini leswaku hi nga swi kota ku va ni vuxaka lebyikulu na Yehovha? (b) Ku laveka yini leswaku hi va ni vuxaka lebyikulu na Yehovha?

²⁰ Ku va ni vuxaka lebyikulu na Yehovha i nchumu wa nkoka swinene lowu hi faneleke hi wu hlakulela. Kambe xana swi nga koteka ku va ni vuxaka byo tano na yena? Swi nga koteka hakunene. Bibele yi paluxa ndlela leyi vavanuna ni vavasati vo lulama va titweke va ri ni vuxaka lebyikulu ha yona ni Tata wa hina wa le tilweni. Marito ya vona lama kombisaka rirhandzu lerikulu eka Yehovha ma tsaleriwe ku hi tiyisekisa leswaku na hina hi nga swi kota ku tshinela eka yena.—Pisalema 23, 34, 139; Yohane 16:27; Varhoma 15:4.

²¹ Swilaveko swa Yehovha swa ku va ni vuxaka lebyikulu na yena swi nga fikeleriwa hi mani na mani. “Oho Yehovha, i mani la nga ta va muendzi entsongeni wa wena?” ku vutisa Davhida. “Hi loyi a fambaka a nga ri na xihoxo naswona a hanyaka hi ku lulama la vulavulaka ntiyiso embilwini ya yena.” (Pisalema 15:1, 2; 25:14) Loko hi lemuka leswaku ku tirhela Xikwembu swi va ni vuyelo lebyinene eka hina naswona swi endla leswaku xi hi kongomisa ni ku hi sirhelela, hi ta swi vona leswaku “Yehovha u ni xinakulobye lexikulu swinene ni tintswalo.”—Yakobo 5:11.

22. Yehovha u lava leswaku vanhu va yena va va ni vuxaka bya muxaka muni?

²² Hi katekile hakunene leswi Yehovha a tsakelaka ku va ni vuxaka byo tano na hina vanhu lava nga hetisekangiki! Kutani, xana hina a hi fanelanga hi kombisa xinakulobye xa rirhandzu? Hi mpfuno wa Yehovha, un’wana ni un’wana wa hina a nga swi kota ku endla swo karhi leswaku a hlanganyeta a tlhela a tsakela xinakulobye xa rirhandzu ni Vakreste-kulobye. Ehansi ka Mfumo wa Xikwembu, un’wana ni un’wana emisaveni u ta vona xinakulobye xexo hilaha ku nga heriki.

U Nga Hlamusela Xana?

• I moya wa muxaka muni lowu faneleke wu va kona evandlheni ra Vukreste?

• Un’wana ni un’wana wa hina a nga endla yini leswaku a hlanganyeta xinakulobye xa rirhandzu evandlheni?

• Xibumabumelo xo huma embilwini xi xi hlanganyeta njhani xinakulobye xa Vakreste?

• Yehovha u hi seketela njhani hi xinakulobye xakwe xa rirhandzu?

[Swivutiso Swa Dyondzo]

[Xifaniso lexi nga eka tluka 15]

Rirhandzu ra Vakreste a hi ra ku tisusa nandzu

[Swifaniso leswi nga eka tluka 16, 17]

Xana u nga ‘ndlandlamuxa’ xinakulobye xa wena?

[Xifaniso lexi nga eka tluka 18]

Xana u rhandza ku xopaxopa van’wana swihoxo kumbe wa va khutaza?