Ndzhaka Leyi U Nga Yi Tshembaka

“LOKO u kuma papila ro huma eka munhu loyi a ku tivisaka leswaku ku ni loyi a nga ku siyela ndzhaka leyi u faneleke u yi kuma, tivonele. Swi nga endleka munhu wa kona a lava ku ku dya swirhendze.”

Xexo i xilemukiso lexi Ndzawulo ya Vukambisisi bya Poso le United States yi xi ngheniseke eka Internet. Ha yini? Hikuva vanhu va magidi va kume mapapila lama nga ni xitiviso lexi nge, ‘Xaka ra wena ri fe ri ku siyela ndzhaka.’ Hikwalaho, vo tala va rhumele mali yo ringana R210 kumbe ku tlula yo hakelela ‘xiviko xa ndzhaka’ lexi ku vuriwaka leswaku xi ta hlamusela laha yi nga kona ni ndlela leyi yi nga kumiwaka ha yona. Khombo ra kona, a ku vanga na nhlanga leyi balekeke ngati. Hinkwavo lava rhumeleke mali yoleyo va kume xiviko lexi fanaka xa ndzhaka—kutani a ku nga ri na ndzhaka leyi a va ta yi kuma.

Marhengu wolawo ma phasa vanhu lava hi ntumbuluko va navelaka ku kuma ndzhaka. Kambe Bibele yi bumabumela lava va siyelaka van’wana ndzhaka loko yi ku: “Loyi a nga lonene u ta siya ndzhaka eka vana va vana.” (Swivuriso 13:22) Ku vula mhaka ya xiheri, Yesu Kreste hi byakwe u vule marito lama tiviwaka swinene ni lama tsakeriwaka ngopfu, eDyondzweni yakwe ya le Ntshaveni: “Va tsaka lava nga ni moya wo rhula, hikuva va ta dya ndzhaka ya misava.”—Matewu 5:5.

Marito ya Yesu ma hi tsundzuxa leswi Hosi Davhida wa tiko ra khale ra Israyele a huhuteriweke leswaku a swi tsala eka madzana ya malembe emahlweni ka kwalaho: “Lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—Pisalema 37:11.

Ku “dya ndzhaka ya misava”—i ntshembo lowu tsakisaka hakunene! Kambe, xana hi nga tiyiseka leswaku sweswo a hi rhengu rin’wana ra ku kanganyisa vanhu? Ina, hi nga tiyiseka. Tanihi leswi misava yi nga xin’wana xa swilo leswi Yehovha a swi vumbeke hi ndlela yo hlamarisa, yena tanihi Muendli ni N’wini wa yona u ni mfanelo yo yi nyika mani na mani loyi a n’wi hlawulaka, leswaku yi va ndzhaka ya yena. Hi ku tirhisa Hosi Davhida, Yehovha u vule xitshembiso lexi xa vuprofeta eka N’wana wa Yena la rhandzekaka Yesu Kreste: “Kombela eka mina, leswaku ndzi ta ku nyika matiko ma va ndzhaka ya wena ni makumu ya misava ma va rifuwo ra wena.” (Pisalema 2:8) Hikwalaho, muapostola Pawulo u hlamusele leswaku Yesu hi yena “loyi [Xikwembu] xi n’wi vekeke ku va mudyandzhaka wa swilo hinkwaswo.” (Vaheveru 1:2) Kutani hi nga tiyiseka hi ku helela leswaku loko Yesu a vula leswaku lavo rhula “va ta dya ndzhaka ya misava,” u swi vule hi mbilu yo tshembeka, naswona u ni mfanelo leyi amukelekaka ya ku hetisisa xitshembiso xakwe.—Matewu 28:18.

Hikwalaho, xivutiso xa nkoka hi lexi nge, Xana xitshembiso xexo xi ta hetiseka njhani? Kwihi na kwihi laha hi langutaka kona namuntlha, swi tikomba onge vanhu va nsele ni lava tivonaka va humelela swinene naswona va teka  xin’wana ni xin’wana lexi va xi lavaka. Xana lavo rhula va ta sala na yini? Ku tlula kwalaho, misava yi hlakatiwa hi swiphiqo leswikulu swo tanihi nthyakiso, naswona rifuwo ra yona ri tirhisiwa hi ndlela yo biha hi vanhu va makwanga ni lava nga ehleketiki hi swa mundzuku. Xana swi ta koteka ku dya ndzhaka ya misava yo tano? Hi kombela leswaku u hlaya xihloko lexi landzelaka leswaku u kuma nhlamulo ya swivutiso sweswo ni swin’wana swa nkoka.

[Xifaniso lexi nga eka tluka 3]

Xana u ta fanelekela ku kuma ndzhaka ya xiviri?