U Chumayele Vadyondzi-kulobye

XANA u nga tsakela ku pfuna vadyondzi-kuloni leswaku va ti twisisa ku antswa tidyondzo leti u ti pfumelaka, leti sekeriweke eBibeleni? Magdalena wa malembe ya 18 hi vukhale, loyi a nga xichudeni xa le xikolweni xa le henhla le Poland, u tala ku chumayela vadyondzi-kulobye malunghana ni tidyondzo leti a pfumelaka eka tona tanihi Mbhoni ya Yehovha. Hikwalaho, u tala ku vutisiwa swivutiso swo fana ni lexi nge, ‘Xana swi vula yini ku va Mbhoni ya Yehovha?’ ni lexi nge ‘Xana ma pfumela eka Yesu Kreste?’ Xana a a ta va pfuna njhani lava a dyondzaka na vona? Magdalena u kombele nkongomiso eka Yehovha hi xikhongelo kutani a endla swilo hi ku pfumelelana ni swikhongelo swa yena.—Yakobo 1:5.

Siku rin’wana, Magdalena u kombele mudyondzisi loyi a xiximaka vukhongeri bya yena leswaku a n’wi pfumelela ku kombisa tlilasi vhidiyo leyi nge Jehovah’s Witnesses—The Organization Behind the Name. * Mudyondzisi u n’wi pfumelerile. Kutani Magdalena u byele vadyondzi-kulobye a ku: “Ndzi le ku hleleni leswaku mupfumeri-kulorhi a ta vulavurisana ni tlilasi ya hina eka nongonoko lowu hetaka timinete ta 90. Wu ta katsa nkombiso wa vhidiyo xikan’we ni bulo malunghana ni Timbhoni ta Yehovha. Xana mi ta tsakela ku va kona?” Hinkwavo va pfumerile. Magdalena na Wojciech, muvuri wa evhangeli wa nkarhi hinkwawo va sungule ku lunghiselela nongonoko lowu.

A ku kunguhatiwe leswaku ku sunguriwa hi rungula ra timinete ta 20 leri sekeriweke eka broxara leyi nge Timbhoni Ta Yehovha—I Vamani Xana? Ti Pfumela Yini Ke? * leri a ri ta landzeriwa hi bulo ra swivutiso ni tinhlamulo. Endzhaku a ku ta kombisiwa vhidiyo elayiburari ya le xikolweni. Xichudeni xin’wana ni xin’wana etlilasini a xi ta nyikiwa nyiko—mvhilopho leyikulu leyi nga ni tibroxara ti nga ri tingani, buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, * ni swiphephana ni timagazini.

Hi siku ra nkombiso, vayingiseri va kona a ku ri vadyondzi-kulobye va 14, mudyondzisi un’we, swin’we ni mune wa swichudeni swin’wana leswi a swi ri elayiburari hi nkarhi wolowo. Wojciech u rhange hi ku hlamusela leswaku vatlhokovetseri ni vatsari vo tala va le Poland va tirhise vito ra Xikwembu, ku nga Yehovha etibukwini ta vona. U tlhele a boxa swibukwana swin’wana swa khale swa Khatoliki leswi a swi ri ni vito ra Xikwembu. Loko a hlamusela ntirho wa manguva lawa wa Timbhoni ta Yehovha, u kombise tibroxara ta marhavi yo hambana-hambana ni swifaniso swa Tiholo ta Tinhlengeletano to hlayanyana.

Ku landzele mbulavurisano lowu tsakisaka. Magdalena na Wojciech va tirhise Bibele loko va hlamula swivutiso. Leswi swi tsakise vayingiseri swi tlhela swi va khorwisa leswaku Timbhoni ta Yehovha a ti nga chumayeli mianakanyo ya tona. Xana a swi ri swihi swin’wana swa swivutiso swa kona, naswona swi hlamurisiwe ku yini?

Xivutiso: Bibele yi ni swiga swo tala leswi nga twisisekiki ni swigego leswi nga hlamuseriwaka hi tindlela to tala. Xana swi kotekisa ku yini ku hanya hi ku pfumelelana ni leswi Bibele yi swi vulaka?

Nhlamulo: Vanhu van’wana va vula leswaku Bibele yi fana ni vhayolini leyi u nga yi chayaka hi mpfumawulo wihi ni wihi lowu u wu lavaka. Kambe anakanya: Loko u lava ku kumisisa leswi mutsari a vulaka swona eka leswi a swi tsaleke, xana a swi nge vi swinene ku vutisa yena? Ku hambana ni  vatsari va tibuku lava se va feke, Mutsari wa Bibele, Yehovha Xikwembu, wa hanya. (Varhoma 1:20; 1 Vakorinto 8:5, 6) Mongo wa tsalwa wu nga kombisa leswi ri vulaka swona. Ku tlula kwalaho, Bibele yi tala ku vulavula hi mhaka leyi fanaka etindzimaneni tin’wana to hlayanyana, kutani ku ti kambisisa swi nga pfuna. Xisweswo hi nga pfumelela Xikwembu leswaku xi kongomisa miehleketo ya hina, onge hi loko xona hi xoxe xi ri eku hi hlamuseleni ka tsalwa. Hi ku endla tano, hi nga kota ku tiva ni ku hanya hi ku pfumelelana ni ku rhandza ka xona hilaha ku hlamuseriweke hakona eBibeleni, a swi tano ke?

Xivutiso: Ku hambana ku kwihi exikarhi ka Vakreste ni Timbhoni ta Yehovha?

Nhlamulo: Hi Vakreste! Kambe ematshan’weni yo tivula Vakreste ntsena, Timbhoni ta Yehovha ti lwela ku hanya hi ku ya hi leswi ti swi pfumelaka ni leswi Xikwembu xi ti dyondzisaka swona hi xikongomelo xa ku ti pfuna. (Esaya 48:17, 18) Tanihi leswi tidyondzo ta tona hinkwato ti sekeriweke eBibeleni, ta swi tiva leswaku ti le ntiyisweni.—Matewu 7:13, 14, 21-23.

Xivutiso: Ha yini mi ya eka vanhu lava mi nga va tiviki mi tlhela mi phikelela eku vulavuleni na vona? Xana sweswo a hi ku sindzisa vanhu van’wana ku amukela tidyondzo ta n’wina?

Nhlamulo: Xana u anakanya leswaku swi hoxile loko munhu un’wana a vulavula na wena hi xichavo exitarateni kutani a lava ku tiva vonelo ra wena eka swin’wana? (Yeremiya 5:1; Sofaniya 2:2, 3) (Kutani Wojciech na Magdalena va kombise ndlela leyi va vutisaka vahundzi va ndlela ha yona loko Xikwembu xi khathala hi vanhu lava weriweke hi khombo ra ndhambhi leyi ya ha ku vaka kona le Poland.) Loko hi twe vonelo ra munhu yoloye, hi n’wi komba leswi Bibele yi vulaka swona. Loko munhu a nga swi lavi ku vulavula na hina, hi n’wi lela kahle kutani hi tiyela emahlweni. (Matewu 10:11-14) Xana sweswo i ku sindzisa vanhu ku vulavula? Kumbe, xana vanhu a va ha fanelanga va vulavurisana?

Xivutiso: Ha yini mi nga tlangeli tiholideyi?

Nhlamulo: Hi tlangela xiendlakalo xin’we ntsena lexi Bibele yi hi lerisaka leswaku hi xi tlangela—Xitsundzuxo xa rifu ra Yesu Kreste. (1 Vakorinto 11:23-26) Malunghana ni tiholideyi, mi nga kumisisa masungulo ya tona hi ku kambisisa minsonga-vutivi ni tibuku tin’wana to tshembeka. Loko mo endla tano, mi ta swi vona hi ku olova leswaku ha yini hi nga swi tlangeli swiendlakalo swo tano.—2 Vakorinto 6:14-18.

Ku hlamuriwe swivutiso swin’wana swo tala leswi vutisiweke. Ku vulavurisaniwe nkarhi wo leha lerova nkombiso wa vhidiyo wu boheka ku vekeriwa siku rin’wana.

Xana swichudeni swi angule njhani? Magdalena loko a hlamusela u ri: “Ndzi hlamarisiwe hi ku vona swichudeni leswi rhandzaka ku endla swilo swa vuphukuphuku ni ku hlekula van’wana swi vutisa swivutiso swa nkoka. Hambileswi a va vula leswaku a va pfumeli leswaku Xikwembu xi kona, loko hi ri karhi hi vulavula a va kombisa ripfumelo eka Xikwembu!” Lava a va ri kona va amukele tinyiko hi ntsako—ku fambisiwe tibuku to ringana 35, tibroxara to ringana 63, ni timagazini to ringana 34.

Xiavelo xa le xikolweni xi tise vuyelo lebyi hlamarisaka hakunene! Magdalena u pfune lava a dyondzaka na vona xikolo ku tiva ni ku twisisa Timbhoni ta Yehovha ku antswa a tlhela a khutaza vantshwa vo tala leswaku va anakanya hi xikongomelo xa vutomi. Ha yini u nga endli matshalatshala yo pfuna vadyondzi-kuloni leswaku va dyondza leswi engetelekeke malunghana ni leswi u swi pfumelaka?

[Tinhlamuselo ta le hansi]

[Xifaniso lexi nga eka tluka 31]

Magdalena na Wojciech va ri karhi va lunghiselela bulo ra vona