Swivutiso Swa Vahlayi

Loko Yesu a lerisa valandzeri vakwe leswaku va ‘lombisa handle ka ntswalo, va nga languteli ku vuyiseriwa nchumu,’ xana a a vula leswaku a va fanelanga va yi lava hambi ku ri mali leyi va yi lombiseke?

Marito ya Yesu lama tsariweke eka Luka 6:35 ma twisiseka kahle loko u anakanya Nawu wa Muxe. Enawini wolowo Xikwembu xi lerise Vaisrayele leswaku va lombisa mali handle ko lava ntswalo eka Vaisrayele-kulobye lava lavaka mali kutani va lava ku pfuniwa. (Eksoda 22:25; Levhitika 25:35-37; Matewu 5:42) Mali yoleyo leyi lombiweke a yi nga ri yo pfula bindzu. Ku ri na sweswo, mali yoleyo leyi a yi lombisiwa handle ka ntswalo a yi fanele yi hunguta vusiwana kumbe makhombo yo karhi. Phela, a ku ta va ku ri nsele ku lava ntswalo eka muakelani la nga ni swiphiqo swa timali. Hambiswiritano, loyi a lombisaka mali a a fanele a vuyiseriwa mali yakwe, minkarhi yin’wana a ku tekiwa xitiyisekiso (xa leswaku u ta tlhela a kuma mali yakwe).—Deteronoma 15:7, 8.

Hambileswi Yesu a a wu hlayisa Nawu, u wu hlamusele hi vuenti, a vula leswaku loyi a lombisaka mali a nga fanelanga a langutela “ku vuyiseriwa nchumu.” Ku fana ni Vaisrayele, minkarhi yin’wana Vakreste va langutana ni swiphiqo swa timali kumbe swiyimo swin’wana leswi nga va siyaka evusiwaneni ni le vuswetini. Loko makwerhu la nga Mukreste la nga exiyin’weni xo tano a lava ku pfuniwa hi mali, xana a swi nga ta va swinene ku n’wi pfuna? Hakunene, rirhandzu ra xiviri ri ta endla leswaku Mukreste-kulobye a lava ku pfuna makwerhu loyi a nga tihoxangiki exiyin’weni lexi xo pfumala timali. (Swivuriso 3:27) Swi nga ha koteka ku nyika makwerhu yoloye la pfumalaka mali, hambileswi mali ya kona yi nga ha vaka ehansi ka leyi lombiwaka.—Pisalema 37:21.

Hi lembe-xidzana ro sungula C.E., muapostola Pawulo na Barnaba va rhumiwe ku fambisa minyikelo leyi humaka eka Vakreste va le Asia Minor va yi yisa eka vamakwavo va le Yudiya, lava a va hlaseriwe hi ndlala leyikulu. (Mintirho 11:28-30) Hilaha ku fanaka, ni namuntlha loko timhangu ti hlasela, Vakreste va tala ku rhumela tinyiko eka vamakwavo lava pfumalaka. Hi ku endla tano, va nyikela vumbhoni lebyinene eka vanhu van’wana. (Matewu 5:16) Ina, langutelo ni xiyimo xa loyi a lavaka mpfuno swi fanele swi kambisisiwa. Hikwalaho ka yini a lava mpfuno? Marito ya Pawulo i ya nkoka: “Loko munhu a nga lavi ku tirha, ni ku dya a nga tshuki a dya.”—2 Vatesalonika 3:10.

Loko makwerhu la lavaka ku lombiwa mali a nga ri exiyin’weni lexi tikaka ngopfu kambe a lava ku pfuniwa katsongo leswaku a vuyela exiyin’weni xakwe lexinene, swi nga va swi fanerile leswaku a lombiwa mali handle ka ntswalo. Ehansi ka swiyimo swo tano, ku lombisa mali hi xikongomelo xo lava ku tlheriseriwa mali ya wena yi helerile a swi nga ta lwisana ni marito ya Yesu lama kumekaka eka Luka 6:35. Loko mi twananile mi fanele mi tsala ehansi, naswona loyi a lombeke mali u fanele a ringeta hilaha a nga kotaka hakona leswaku a tlherisela mali hilaha mi twananeke hakona. Hakunene, rirhandzu ra Vukreste ri fanele ku susumetela loyi a lombiweke mali leswaku a hakela mali ya kona hilaha rirhandzu ri susumeteke munhu loyi a n’wi lombeke hakona.

Loyi a lavaka ku lombisa mali (kumbe ku humesa nyiko) u fanele a tlhela a languta xiyimo xa ndyangu wakwe. Hi xikombiso, xana u ta tiveka ekhombyeni ro khathalela ndyangu, ku nga xilaveko-nkulu xa Matsalwa? (2 Vakorinto 8:12; 1 Timotiya 5:8) Hambiswiritano, Vakreste va tshama va langutele tindlela to kombisana rirhandzu, va kombisana rirhandzu ro tano hi ku ya hi misinya ya milawu ya Bibele.—Yakobo 1:27; 1 Yohane 3:18; 4:7-11.