Leswi Ku Titsongahata Ka Yehovha Ku Vulaka Swona Eka Hina

DAVHIDA a a swi tiva kahle leswaku maxangu i yini. U khomiwe hi tihanyi hi Hosi Sawulo, tata wa nsati wa yena, loyi a a tele mavondzo. Sawulo u ringete kanharhu ku dlaya Davhida hi fumu, naswona u hete malembe a lavana na yena hi mahlo-ngati, lerova Davhida a kala a boheka ku baleka a ya kun’wana. (1 Samuwele 18:11; 19:10; 26:20) Kambe Yehovha u ve na Davhida. Yehovha u n’wi ponisile eka Sawulo ni le ka valala van’wana. Hikwalaho, hi nga twisisa marito lawa Davhida a ma phofuleke eka risimu leri nge: “Yehovha i ribye ra mina ni khokholo ra mina ni Muponisi wa mina. [Wena Yehovha] u ta ndzi nyika xitlhangu xa wena xa ku ponisa, ku titsongahata ka wena ku ndzi endla ndzi va lonkulu.” (2 Samuwele 22:2, 36) Davhida u ve ni xikhundlha xa le henhla eIsrayele. Kutani ke, xana ku titsongahata ka Yehovha ku katseke njhani?

Loko Matsalwa ma vulavula hi Yehovha tanihi loyi a titsongahataka, a ma vuli swona leswaku u tsandzeka ku endla swo karhi, kumbe u le hansi ka vulawuri bya van’wana. Ematshan’weni ya sweswo, mfanelo leyi leyinene yi kombisa leswaku u ni ntwela-vusiwana lowukulu eka vanhu lava lwelaka ku amukeleka eka yena hi mbilu hinkwayo, kutani hi ndlela yoleyo a va kombisa tintswalo. Eka Pisalema 113:6, 7, ha hlaya: “[Yehovha] wa korhama a languta etilweni ni le misaveni, a pfuxa la nga le hansi entshurini.” Ku “korhama” ka yena swi vula leswaku “wa hleyama leswaku a languta” kumbe “u Tiyisa ehansi leswaku a languta.” (Today’s English Version; Young’s Literal Translation of the Holy Bible) Kutani Yehovha a ri ematilweni ‘u hleyamile’ kumbe ‘a tiyisa ehansi,’ leswaku a ta kota ku yingisa Davhida, munhu la nga hetisekangiki kambe la titsongahataka ni la rhandzaka ku tirhela Xikwembu. Hikokwalaho, Davhida wa hi tiyisekisa: “Yehovha u tlakukile, hambiswiritano wa n’wi vona la titsongahataka.” (Pisalema 138:6) Tintswalo, ku lehisa mbilu ni ku anakanyela loku Yehovha a ku kombiseke Davhida ku fanele ku khutaza hinkwavo lava lavaka ku endla ku rhandza ka Xikwembu.

Hambileswi Yehovha tanihi Mulawuri a nga ni xikhundlha lexikulu ku tlula hinkwaswo evuakweni, u tiyimiserile ku tirhisana ni un’wana ni un’wana wa hina. Leswi swa hi tiyisekisa leswaku u ta hambeta a hi pfuna hambiloko hi langutane ni swiyimo swo tika swinene. A ku na xivangelo xo chava leswaku u ta hi rivala. Malunghana ni  vanhu vakwe va le Israyele wa khale, Yehovha u vuriwa “loyi a [va] tsundzukeke loko [va] ri exiyin’weni xa le hansi: hikuva musa wakwe wa rirhandzu i wa hilaha ku nga riki na makumu.”—Pisalema 136:23.

Tanihi malandza ya manguva lawa ya Yehovha, hi nga langutana ni maxangu ku fana na Davhida. Swi nga ha endleka hi hlekuriwa hi lava va nga xi tiviki Xikwembu kumbe hi tikuma hi hanya rihanyo ro lomba kumbe hi feriwe hi loyi hi n’wi rhandzaka. Ku nga khathariseki xiyimo lexi hi langutaneke na xona, loko timbilu ta hina ti basile, hi nga tshinelela Yehovha hi xikhongelo, hi kombela tintswalo ta yena. Yehovha u ta ‘hleyama’ a hi languta kutani a yingisa swikhongelo swa hina. Mupisalema la huhuteriweke u tsarile: “Mahlo ya Yehovha ma le henhla ka lavo lulama, ni tindleve takwe ti yingisa xirilo xa vona xo kombela mpfuno.” (Pisalema 34:15) Xana mbilu ya wena a yi khumbeki loko u anakanyisisa hi mfanelo leyinene ya Yehovha ya ku titsongahata?

[Swifaniso leswi nga eka tluka 30]

Yehovha u tiyimisele ku yingisa swikhongelo swa hina namuntlha, tanihi leswi a yingiseke swikhongelo swa Davhida