Leswi Hi Faneleke Hi Swi Hlaya Hi Ku Ya Hi Xitsundzuxo Xa Vutlhari Xa Solomoni

“KU ENDLIWA ka tibuku to tala a ku heli, naswona ku tinyiketela swinene eka tona swi karhalisa nyama.” (Eklesiasta 12:12) Loko Hosi Solomoni wo tlhariha wa le Israyele a tsala marito wolawo kwalomu ka malembe ya 3 000 lama hundzeke, a a nga ringeti ku tshikisa vanhu ku hlaya. Ku ri na sweswo, a a vulavula hi xilaveko xa ku hlawula leswi hi swi hlayaka. Namuntlha xitsundzuxo xexo xi le nkarhini, tanihi leswi ku endliwaka minkandziyiso ya tibiliyoni lembe na lembe!

Swi le rivaleni leswaku “tibuku to tala” leti Solomoni a vulavuleke ha tona a ti nga aki kumbe ku phyuphyisa. Hikokwalaho, u vule leswaku ku tinyiketela ngopfu eka tona swi “karhalisa nyama,” ematshan’weni yo pfuna muhlayi hilaha ku nga heriki.

Hambiswiritano, xana Solomoni a a vula leswaku a ti kona tibuku leti nyikaka nkongomiso lowunene ni lowu tshembekaka, lowu nga vuyerisaka muhlayi? Doo, hikuva u tlhele a tsala a ku: “Marito ya lavo tlhariha ma fana ni tinsungunu ta havi, ni lava va nghenaka hi nhloko eku hlengeleteni ka marito va fana ni swipikiri leswi gongondzeriweke; va nyiketiwe va huma eka murisi un’we.” (Eklesiasta 12:11) Hakunene, ku ni marito lama tsariweke lawa, ku “fana ni tinsungunu,” ma nga vaka ni nsusumeto lowunene. Ma nga khutaza munhu leswaku a hambeta a famba hi ndlela leyinene. Ku tlula kwalaho, ku “fana ni swipikiri leswi gongondzeriweke,” ma nga pfuna munhu ku namarhela xiboho xakwe ma tlhela ma n’wi tiyisa.

Xana hi nga ma kuma kwihi marito yo tano ya vutlhari? Hi ku ya hi Solomoni, marito lama nga ya nkoka swinene hi lama humaka eka Murisi un’we, ku nga Yehovha. (Pisalema 23:1) Hikokwalaho, munhu u ta va a endla kahle loko a hlawula buku leyi huhuteriweke hi Xikwembu—ku nga Bibele. Ku hlaya marito yo tano lama huhuteriweke nkarhi na nkarhi swi nga pfuna munhu leswaku a “faneleka hi ku helela, a hlomisiwa hi ku helela eka ntirho wun’wana ni wun’wana lowunene.”—2 Timotiya 3:16, 17.