‘Ndza Tsaka Hikwalaho Ka Ndzetelo Wa Mina’

KAZUNA lontsongo a a hlamale ngopfu loko mudyondzisi wa yena a ringanyeta leswaku a nghenela mphikizano wa ku vulavula Xinghezi. Mphikizano lowu a wu ri wa swikolo hinkwaswo swa le henhla exihlaleni lexikulu xa le n’walungwini wa Japani lexi vuriwaka Hokkaido, kambe xikolo lexi a a nghena eka xona a xi nga si tshama xi wu nghenela mphikizano lowu. Hi siku ra mphikizano lowu, Kazuna a a chuhile hikuva a ta phikizana ni kwalomu ka 50 wa swichudeni. Nakambe u chuhe swinene loko a vona vaavanyisi vambirhi lava nga Manghezi.

Tinghwazi ti tivisiwile, ku sunguriwa hi loyi a kumeke sagwadi ro hetelela. Loko vito ra Kazuna ri tivisiwa eku heteleleni, a a hlamale ngopfu. Yena ni mudyondzisi wa yena loyi a a tshame ekusuhi na yena, va honolelane hi ku hlamala. Hambileswi a ha hlamarile, Kazuna u ye exitejini naswona u amukele khapu—ya xiyimo xo sungula!

Kazuna loyi a a tsakile u te: “Ndzi kote ku endla leswi hikwalaho ka ndzetelo lowu ndzi wu kumeke enhlengeletanweni ya Yehovha wa Xikolo xa Vutirheli bya le Tilweni. Ndza tsaka swinene hikwalaho ka leswi ndzi kumeke ndzetelo lowu.” Kazuna u tsarise exikolweni xexo a ha ri ntsongo, naswona hi wun’wana wa minhlangano ya vandlha ra Timbhoni ta Yehovha. Loko a ha lunghiselela mphikizano lowu, Kazuna u nyikele nyingiso swinene eka ndlela leyi swikurisa-marito swi tirhisiwaka ha yona, ku vulavula hi malwandla ni hi ku hiseka, ku tshukatshukisa miri, ku languta vayingiseri ni swin’wana leswi dyondzisiwaka eXikolweni xa Vutirheli bya le Tilweni.

Ha ku rhamba leswaku u ta u ta tivonela exikolweni lexi, lexi khomiwaka vhiki ni vhiki eHolweni ya Mfumo ya Timbhoni ta Yehovha ya le ndhawini ya ka n’wina. U ta tivonela hi ya wena ndlela leyi vanhu lavatsongo ni lavakulu va vuyeriwaka ha yona. A ku arisiwi munhu ku ta eka nhlangano lowu. Leswaku u kuma rungula leri engetelekeke malunghana ni xikolo lexi nga ekusuhi ni le ka n’wina, hi kombela u vonana ni Timbhoni ta Yehovha ta le ndhawini ya ka n’wina.