Siku Ro Thwasa—Siku Ro Saseka

“HI KATEKISIWE hi siku ro saseka. Dyambu ri tlhave kahle. Exibakabakeni ku pfumala ni mapapa. Byanyi i bya rihlaza. Swinyenyana swa yimbelela. Hi ni siku ro saseka naswona a hi nge khomisiwi tingana. Yehovha a hi Xikwembu lexi khomisaka tingana. I Xikwembu xa mikateko.”

Makwerhu Samuel Herd, xirho xa Huvo leyi Fumaka ya Timbhoni ta Yehovha, u sungule nongonoko wa ku thwasa wa ntlawa wa vu-117 wa Xikolo xa Bibele xa Giliyadi xa Watchtower hi marito wolawo. A ku ri hi September 11, 2004. Enongonokweni lowu lowunene a ku ri ni ndzayo leyi akaka leyi sekeriweke eBibeleni swin’we ni mintokoto ya swichudeni loko swi ri exikolweni ni mintokoto ya varhumiwa lava se va nga ni ntokoto. Hakunene, a ri ri siku lerinene eka vanhu hinkwavo va 6 974 lava a va ri kona eNtsindza wa Dyondzo wa Watchtower le Patterson, eNew York, ni le miakweni ya le Brooklyn ni le Wallkill, laha nongonoko lowu wu hlaleriweke eka vhidiyo.

Marito Yo Khutaza Swichudeni

John Kikot, loyi a nga xirho xa Komiti ya Rhavi ya le United States, u vule marito lama khutazaka eka nhloko-mhaka leyi nge “Hlayisani Ntsako Tanihi Varhumiwa.” U kombise leswaku swichudeni swa le Giliyadi swi tiveriwa ku tsaka ka swona, hilaha a swi ri hakona eka ku thwasa loku. Ndzetelo lowu humaka eMatsalweni lowu swichudeni swi wu kumeke loko swa ha dyondza wu swi tisele ntsako, naswona sweswi a swi leteriwe ku ya pfuna van’wana leswaku na vona va va ni ntsako lowu fanaka. Njhani? Hi ku tinyikela evutirhelini tanihi varhumiwa. Yesu u te: “Ku nyika swi tisa ntsako lowukulu ku tlula ku amukela.” (Mintirho 20:35) Loko varhumiwa lavantshwa va tekelela Yehovha Xikwembu, “Xikwembu lexi tsakeke” ni lexi hananaka, lexi nyikaka van’wana ntiyiso, va ta swi kota ku hlayisa ntsako wa vona.—1 Timotiya 1:11.

Endzhaku enongonokweni ku landzele xirho xin’wana xa Huvo leyi Fumaka, David Splane, loyi nhloko-mhaka ya yena a yi ku “Xana U Ta Hanyisana Njhani Ni Van’wana?” A swi kanakanisi leswaku i swinene swi tlhela swi tsakisa ku tshama hi vun’we, hambileswi leswi swi nga ha lavaka leswaku mi va “swilo hinkwaswo eka vanhu va mixaka hinkwayo.” (1 Vakorinto 9:22; Pisalema 133:1) Makwerhu Splane u boxe leswaku swichudeni leswi thwasaka swi ta ya hlangana ni vanhu vo tala entirhweni wa swona wa vurhumiwa—vanhu va le nsin’wini, varhumiwa-kulobye, vamakwerhu va le vandlheni ra vona lerintshwa ni vamakwerhu va le hofisini ya rhavi leri kongomisaka ntirho wo chumayela ni wo dyondzisa. U nyikele swiringanyeto leswi tirhaka malunghana ni ku hlakulela vuxaka lebyinene ni vanhu van’wana: Tiva ririmi ra ndhawu, xiyisisa mikhuva ya kona, xixima varhumiwa-kuloni naswona u yingisa lava rhangelaka.—Vaheveru 13:17.

Ku landzele Lawrence Bowen, muleteri wa le Giliyadi, hi xivutiso lexi nge, “Xana U Anakanya Ku Fana Na Mani?” U tsundzuxe  swichudeni leswaku lava a va ‘avanyisa hi ku landza ku languteka ka munhu’ a va n’wi amukelanga Yesu tanihi Mesiya. (Yohane 7:24) Tanihi vanhu lava nga hetisekangiki, hinkwerhu hi fanele hi papalata ku “ehleketa miehleketo ya vanhu” ematshan’weni ya “miehleketo ya Xikwembu.” (Matewu 16:22, 23) Hambi ku ri vanhu lava wupfeke hi tlhelo ra moya va fanele va hambeta va lulamisa mianakanyo ya vona. Ku fana ni xikepe lexi nga elwandle, ku endla mindzulamiso sweswi swi nga endla leswaku u fikelela pakani kumbe u tshovekeriwa hi xikepe xa moya. Ku hambeta hi dyondza Bibele hi vuenti swi hi pfuna ku ehleketa “miehleketo ya Xikwembu.”

Wallace Liverance, muleteri un’wana wa le Xikolweni xa le Giliyadi, u gimete xiyenge lexi xa nongonoko. Nhloko-mhaka yakwe leyi a yi sekeriwe eka Esaya 55:1 a yi ku, “Xana U Ta Xava Yini?” U khutaze swichudeni leswaku swi “xava” ku phyuphya, ntsako ni swakudya leswi humaka eka rungula ra Xikwembu ra vuprofeta ra le nkarhini wa hina. Vuprofeta bya Esaya byi fanise rito leri ra Xikwembu ni mati, vhinyo ni ntswamba. Xana ri nga xaviwa njhani “handle ka mali, handle ka nxavo”? Makwerhu Liverance u hlamusele leswaku ri xaviwa hi ku nyikela nyingiso eka vuprofeta bya Bibele ni ku tshika mianakanyo ni tindlela leti nga riki ta moya ivi u landzela mianakanyo ni tindlela ta Xikwembu. (Esaya 55:2, 3, 6, 7) Hi ku endla leswi, varhumiwa lavantshwa va nga  tiyisela eswiavelweni swa vona swa le matikweni mambe. Hakanyingi vanhu lava nga hetisekangiki va anakanya leswaku ntsako wu titshege hi ku hlongorisa vutomi bya vulovolovo. Xivulavuri xi khutazile: “Mi nga xavi sweswo. Mi nga yi pfumeleli mianakanyo yo tano. Tiyisekani leswaku mi vekela etlhelo nkarhi wa dyondzo leyi dzikeke ya Rito ra Xikwembu ra vuprofeta. Ri nga mi phyuphyisa, ri mi tiyisa ri tlhela ri mi tisela ntsako exiavelweni xa n’wina xa vurhumiwa.”

Mintokoto Ni Mimbulavurisano Leyi Tsakisaka Ya Swichudeni

Swichudeni a swi hlanganyela nkarhi na nkarhi entirhweni wo chumayela. Mark Noumair, ku nga muleteri un’wana wa le Giliyadi, u burisane ni swichudeni swo hlayanyana leswi a swi endla minkombiso ya mintokoto leyi a yi kandziyisa nhloko-mhaka leyi nge, “Ku Nga Khomiwi Hi Tingana Hi Mahungu Lamanene.” (Varhoma 1:16) Vayingiseri va tsakele ku twa ndlela leyi vatirheli lava va nga ni ntokoto va nyikeleke vumbhoni ha yona hi yindlu ni yindlu, exitarateni ni le tindhawini to xava eka tona. Swichudeni leswi tivaka tindzimi tin’wana swi teke goza ro vulavula ni vanhu lava vulavulaka tindzimi teto ensin’wini ya le vandlheni ra swona. Swichudeni swin’wana swi ti tirhise kahle tibuku leti sekeriweke eBibeleni leti humesiweke hi Timbhoni ta Yehovha, swi ti tirhisa loko swi endla maendzo yo vuyela ni loko swi sungula tidyondzo ta le kaya ta Bibele. A swi nga “khomiwi hi tingana” eku chumayeleni ka mahungu lamanene.

Makwerhu William Nonkes, loyi a tirhaka eNdzawulweni ya Ntirho, u vulavurisane ni varhumiwa lava nga ni ntokoto lava humaka eBurkina Faso, Latvia ni le Rhaxiya. Va nyikele xitsundzuxo lexi tirhaka eka nhloko-mhaka leyi nge “Yehovha U Va Hakela Hi Rirhandzu Lava Tshembekaka.” Makwerhu un’wana loyi ku vulavuriweke na yena u khutaze swichudeni leswaku swi tsundzuka vuthu ra Gidiyoni ra masocha ya 300. Socha ha rin’we a ri ri ni xiavelo lexi pfuneke leswaku tsima ra Gidiyoni ri humelela. (Vaavanyisi 7:19-21) Hilaha ku fanaka, varhumiwa lava tshamaka eswiavelweni swa vona va hakeriwa.

“Mi Va Swilo Hinkwaswo Eka Vanhu Va Mixaka Hinkwayo,” a ku ri nhloko-mhaka leyi kandziyisiweke eka mimbulavurisano leyi landzeleke leyi a yi fambisiwa hi Samuel Roberson, loyi a nga muleteri le Patterson. U vulavurisane na mune wa swirho swa Komiti ya Rhavi leswi humaka eSenegal, Guam, Liberia ni le Madagascar. Ematikweni lawa ku ni varhumiwa va 170. Eka mbulavurisano lowu, swichudeni leswi thwasaka swi twe ndlela leyi Tikomiti ta Rhavi ti pfunaka varhumiwa lavantshwa ha yona leswaku va tolovela swiavelo swa vona. Hakanyingi sweswo swi vula ku dyondza mikhuva leyi nga ha vaka yi nga tolovelekanga ematikweni ya le Vupela-dyambu. Hi xikombiso, ematikweni man’wana swi tolovelekile ku vona vavanuna, ku katsa ni lava nga evandlheni ra Vukreste, va famba va khomane hi mavoko ku fana ni vanghana. Etindhawini tin’wana leti nga ehansi ka rhavi ra le Guam, ku dyiwa swakudya leswi nga tolovelekangiki. Kambe van’wana va kote ku swi tolovela, ni varhumiwa lavantshwa va nga swi tolovela.

Guy Pierce, xirho xa Huvo leyi Fumaka, u vulavule hi nhloko-mhaka leyi nge “Tshama U Tshembekile Eka ‘Mfumo Wa Hosi Ya Hina.’” U tsundzuxe vayingiseri a ku: “Yehovha u vumbe swilo hi xikongomelo. A a ri ni xikongomelo hi ntumbuluko wakwe. Xikongomelo xakwe hi misava leyi a xi hundzukanga. Xi ya eku hetisekeni hakunene. A xi kona lexi nga swi hundzulaka sweswo.” (Genesa 1:28) Makwerhu Pierce u khutaze vanhu hinkwavo leswaku va titsongahata hi ku tshembeka eka vuhosi bya Xikwembu ku nga khathariseki swiphiqo leswi vangiweke hi xidyoho xa wanuna wo sungula Adamu. Makwerhu Pierce u khutazile: “Hi hanya enkarhini wa ku avanyisa. Hi saleriwe hi nkarhi wutsongo wo fikelela vanhu va timbilu letinene leswaku hi va pfuna va tiva ntiyiso. Wu tirhiseni kahle nkarhi lowu leswaku mi fikelela van’wana hi mahungu lamanene ya Mfumo.” Lava va seketelaka Mfumo wa Xikwembu hi ku tshembeka va nga tiyiseka leswaku xi ta va seketela.—Pisalema 18:25.

Loko mutshama-xitulu a gimeta nongonoko u hlaye marungula ni marito yo navelela leswinene lama humaka emarhavini ya le misaveni hinkwayo. Hiloko a nyika swichudeni leswi thwasaka tidiploma, kutani xichudeni xin’wana xi hlaya papila leri humaka eka ntlawa lowu, leri a ri kombisa ku tlangela loku humaka embilwini ka ndzetelo lowu swi wu kumeke. A ku ri marito ya kahle yo gimeta siku ro saseka swinene leri hinkwavo lava a va ri kona va nga ta ka va nga ri rivali.

[Bokisi leri nga eka tluka 23]

TINHLAYO TA NTLAWA

Nhlayo ya matiko lama yimeriweke: 11

Nhlayo ya matiko lawa va averiweke eka wona: 22

Nhlayo ya swichudeni: 48

Xiringaniso xa malembe: 34,8

Xiringaniso xa malembe entiyisweni: 18,3

Xiringaniso xa malembe evutirhelini bya nkarhi hinkwawo: 13,4

[Xifaniso lexi nga eka tluka 24]

Ntlawa Wa Vu-117 Lowu Thwasaka Wa Xikolo Xa Bibele Xa Giliyadi Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.