Yehovha I Mupfuni Wa Hina

“Mpfuno wa mina wu huma eka Yehovha, Muendli wa tilo ni misava.”—PISALEMA 121:2.

1, 2. (a) Ha yini ku nga vuriwaka leswaku hinkwerhu hi lava mpfuno minkarhi yin’wana? (b) Xana Yehovha i Mupfuni wa njhani?

I MANI eka hina la nga laviki mpfuno? Entiyisweni, hinkwerhu ha wu lava mpfuno minkarhi yin’wana—leswaku hi ta kota ku langutana ni xiphiqo lexikulu, hi ta tiyiselela maxangu ya ku lahlekeriwa hi murhandziwa ni ya ku chongorisiwa hi miringo yo tika. Hakanyingi vanhu va ya eka munghana la khathalelaka loko va lava mpfuno. Loko u byela munghana wo tano xiphiqo xa wena, swi nga ha ku olovela ku xi tiyiselela. Kambe, munhu wo fana na wena a nge swi koti ku ku pfuna eka hinkwaswo. Hi hala tlhelo, van’wana va nga ha tsandzeka ku ku pfuna hi nkarhi lowu u lavaka mpfuno ha wona.

² Kambe, ku ni Mupfuni un’wana la nga ni matimba ni swilo swo tala swinene leswi a nga ku pfunaka ha swona. Tlhandlakambirhi, wa hi tiyisekisa leswaku a nge pfuki a hi lahlele mavoko. Hi Yena loyi mupisalema a n’wi boxeke hi vito loko a vula hi ku tiyiseka hinkwako a ku: “Mpfuno wa mina wu huma eka Yehovha.” (Pisalema 121:2) Ha yini mupisalema loyi a a tiyiseka leswaku Yehovha u ta n’wi pfuna? Leswaku hi hlamula xivutiso xexo, a hi kambisiseni Pisalema 121. Hi ku endla tano, hi ta swi vona leswaku ha yini na hina hi nga tekaka Yehovha tanihi Mupfuni wa hina.

Xihlovo Xa Mpfuno Lowu Nga Heriki

3. Xana mupisalema a nga ha va a tlakusele mahlo yakwe etintshaveni tihi, naswona ha yini?

³ Mupisalema u sungule hi ku vula leswaku leswi Yehovha a vumbeke swilo hinkwaswo, hi ni xivangelo xo n’wi tshemba: “Ndzi ta tlakusela mahlo ya mina etintshaveni. Xana mpfuno wa mina wu ta huma kwihi? Mpfuno wa mina wu huma eka Yehovha, Muendli wa tilo ni misava.” (Pisalema 121:1, 2) Mupisalema a nga tlakuselanga mahlo yakwe entshaveni hambi yi ri yihi. Loko marito lawa ma tsariwa, tempele ya Yehovha a yi ri eYerusalema. Muti wolowo, lowu a wu ri ehenhla ka tintshava ta Yuda, a wu ri ndhawu yo fanekisela leyi Yehovha a tshamaka eka yona. (Pisalema 135:21) Swi nga ha endleka mupisalema a tshame a tlakusela mahlo yakwe etintshaveni ta Yerusalema laha tempele ya Yehovha a yi akiwe kona, a swi tiva kahle leswaku Yehovha u ta n’wi pfuna. Ha yini mupisalema a a tiyiseka swonghasi leswaku Yehovha u ta n’wi pfuna? Hikuva hi Yena “Muendli wa tilo ni misava.” Entiyisweni, mupisalema a a ku, ‘A xi kona lexi nga sivelaka Muvumbi la nga ni matimba hinkwawo ku ndzi pfuna!’—Esaya 40:26.

4. Xana mupisalema u swi kombise njhani leswaku Yehovha u tshama a xalamukele swilaveko swa vanhu vakwe, naswona ha yini sweswo swi chavelela?

⁴ Mupisalema u ya emahlweni a hlamusela leswaku  Yehovha u tshama a swi xalamukerile swilaveko swa malandza yakwe: “A nge wu pfumeleli nenge wa wena leswaku wu tsekatseka. Loyi a ku rindzaka a nge khudzeheli. Waswivo! A nge khudzeheli kumbe ku etlela, loyi a rindzaka Israyele.” (Pisalema 121:3, 4) A swi nge endleki leswaku Xikwembu xi pfumela leswaku lava xi tshembaka va “tsekatseka” kumbe va wa va nga ha pfuki. (Swivuriso 24:16) Ha yini? Hikuva Yehovha u fana ni murisi la xalamukeke swinene, la rindzeke tinyimpfu takwe. Kunene swa chavelela ku tiva sweswo! A nge pfuki a honise swilaveko swa vanhu vakwe. U tshama a va rindzile vusiku ni nhlikanhi.

5. Ha yini ku vuriwa leswaku Yehovha u le ‘vokweni ra xinene’?

⁵ Hi ku tiyiseka leswaku Yehovha i Musirheleri la tshembekeke wa vanhu vakwe, mupisalema u tsale a ku: “Yehovha wa ku rindza. Yehovha i ndzhuti wa wena evokweni ra wena ra xinene. Dyambu a ri nge ku tlhavi ninhlikanhi, hambi n’weti nivusiku.” (Pisalema 121:5, 6) Eka munhu loyi a a teka riendzo a famba hi milenge le Vuxa Xikarhi, ndzhuti a wu ri xisirhelelo lexikulu eka dyambu leri a ri humesa ni ngwenya ematini. Yehovha u fana ni ndzhuti eka vanhu vakwe, wa va sirhelela eka miringo leyi fanaka ni ku hisa ka dyambu. Xiya leswaku ku vuriwa leswaku Yehovha u le ‘vokweni ra xinene.’ Etinyimpini ta khale, xitlhangu a xi nga ri sirheleli ngopfu voko ra xinene ra socha, tanihi leswi socha a ri xi khoma hi voko ra ximatsi. Munghana lonene a nga ha sirhelela socha hi ku lwa a yime etlhelweni ra rona ra xinene. Ku fana ni munghana wo tano, Yehovha u yima etlhelo ka vagandzeri vakwe hi vutshembeki, a tshama a lunghekele ku va pfuna.

6, 7. (a) Xana mupisalema u hi tiyisekisa njhani leswaku Yehovha a nge pfuki a tshikile ku pfuna vanhu vakwe? (b) Hi ni xivangelo xihi xa ku va ni moya wa ku tiyiseka lowu mupisalema a a ri na wona?

⁶ Xana Yehovha u ta kala a tshika ku pfuna vanhu vakwe? Sweswo swi nga fana niloko dyambu ro pela evuxeni. Mupisalema u gimetise xileswi: “Yehovha u ta ku rindza emakhombyeni hinkwawo. U ta rindza moya-xiviri wa wena. Yehovha u ta rindza ku huma ka wena ni ku nghena ka wena, ku sukela sweswi ku ya fika enkarhini lowu nga riki na makumu.” (Pisalema 121:7, 8) Xiya leswaku mutsari u kombisa leswaku u ta hi rindza ni le nkarhini lowu taka. Eku sunguleni, eka ndzimana 5, mupisalema u te: “Yehovha wa ku rindza.” Kambe eka tindzimana leti, mupisalema u tsale a ku: “Yehovha u ta ku rindza.” Xisweswo, vagandzeri va ntiyiso va tiyisekisiwa leswaku Yehovha u ta va pfuna ni le nkarhini lowu taka. Ku nga khathariseki leswaku va ya kwihi, ku nga khathariseki khombo leri va langutanaka na rona, a nge tsandzeki ku va pfuna.—Swivuriso 12:21.

⁷ Kunene, mutsari wa Pisalema 121 a a tiyiseka leswaku Muvumbi wa matimba hinkwawo u langutela malandza yakwe hi ndlela leyi murisi la khathalaka a langutelaka ntlhambi wakwe ha yona. Hi ni xivangelo lexi twalaka xo tshemba Yehovha hilaha mupisalema a a n’wi tshemba hakona, hikuva a nga cinci. (Malakiya 3:6) Xana leswi swi vula leswaku minkarhi hinkwayo hi ta rindzela leswaku a hi sirhelela hi tlhelo ra nyama? Doo, kambe loko hi n’wi tshemba tanihi Mupfuni wa hina, u ta hi sirhelela eka hinkwaswo leswi nga hi vavisaka hi tlhelo ra moya. Hikwalaho swi fanerile ku tivutisa xivutiso lexi nge, ‘Xana Yehovha u hi pfuna njhani?’ A hi kambisiseni tindlela ta mune leti a hi sirhelelaka ha tona. Exihlokweni lexi, hi ta bula hi ndlela leyi a ma pfuneke ha yona malandza yakwe eminkarhini ya Bibele. Exihlokweni lexi landzelaka, hi ta kambisisa ndlela leyi a pfunaka vanhu vakwe ha yona namuntlha.

Ku Pfuniwa Hi Tintsumi

8. Ha yini swi nga hlamarisi leswi tintsumi ti khathalaka ngopfu hi vuhlayiseki bya malandza ya Xikwembu ya laha misaveni?

⁸ Yehovha u ni timiliyoni ta timiliyoni ta tintsumi ehansi ka yena. (Daniyele 7:9, 10) Vana vakwe va moya va endla ku rhandza kakwe hi ku tshembeka. (Pisalema 103:20) Va swi tiva kahle leswaku Yehovha wa va rhandza swinene vanhu lava n’wi gandzelaka nileswaku u lava ku va pfuna. A swi hlamarisi leswi tintsumi ti khathalaka ngopfu hi vuhlayiseki bya malandza ya Xikwembu ya laha misaveni. (Luka 15:10) Kunene, tintsumi ti fanele ti tsaka loko Yehovha a ti tirhisa ku pfuna vanhu. Yehovha u ti tirhise hi tindlela tihi tintsumi ku pfuna malandza yakwe eminkarhini ya khale?

9. Nyikela xikombiso xa ndlela leyi Xikwembu xi nyikeke tintsumi matimba ha yona leswaku ti sirhelela vanhu lavo tshembeka.

⁹ Xikwembu hi xona lexi nyikeke tintsumi matimba yo sirhelela ni ku kutsula vanhu va xona  lavo tshembeka. Tintsumi timbirhi ti pfune Lota ni vana vakwe va vanhwanyana ku balekela ku lovisiwa ka Sodoma na Gomora. (Genesa 19:1, 15-17) Ntsumi yin’we yi dlaye masocha ya Vaasiriya ya 185 000 lawa a ma xungeta Yerusalema. (2 Tihosi 19:35) Loko Daniyele a hoxiwe ekheleni ra tinghala, Yehovha u ‘rhume ntsumi yakwe leswaku yi pfala nomu wa tinghala.’ (Daniyele 6:21, 22) Ntsumi yi ntshunxe muapostola Petro ekhotsweni. (Mintirho 12:6-11) Bibele yi boxa swikombiso swin’wana swo tala swa nsirhelelo wa tintsumi, yi tiyisekisa leswi Pisalema 34:7 yi swi vulaka: “Ntsumi ya Yehovha yi aka nxaxa ku rhendzela hinkwavo lava n’wi chavaka, naswona ya va ponisa.”

10. Xana Yehovha u yi tirhise njhani ntsumi leswaku yi khutaza muprofeta Daniyele?

¹⁰ Minkarhi yin’wana Yehovha u tirhise tintsumi ku khutaza ni ku tiyisa vanhu vakwe lavo tshembeka. Xikombiso lexinene xi kumeka eka Daniyele ndzima 10. Hi nkarhi wolowo, kumbexana Daniyele a a ri kusuhi ni ku hlanganisa malembe ya 100. Muprofeta loyi a a hele matimba swinene, kumbexana hikwalaho ka leswi muti wa Yerusalema a wu sale wu ri marhumbi naswona a swi teka nkarhi ku pfuxa tempele. U tlhele a sala a karhatekile endzhaku ko vona xivono lexo chavisa. (Daniyele 10:2, 3, 8) Hi rirhandzu Xikwembu xi rhumele ntsumi leswaku yi ya n’wi khutaza. Ntsumi yi tsundzuxe Daniyele hi ku phindha-phindha leswaku Xikwembu xa ‘n’wi tsakela swinene.’ Sweswo swi ve ni vuyelo byihi? Muprofeta yoloye la kuleke u byele ntsumi a ku: “U ndzi tiyisile.”—Daniyele 10:11, 19.

11. Hi xihi xikombiso xin’we xa ndlela leyi tintsumi ti tirhisiweke ha yona ku kongomisa ntirho wa ku chumayela mahungu lamanene?

¹¹ Yehovha u tlhele a tirhisa tintsumi ku kongomisa ntirho wo chumayela mahungu lamanene. Ntsumi yi kongomise Filipi ku chumayela hi ta Kreste eka mutsheniwa wa Muetiyopiya, loyi a khuvuriweke hi nkarhi wolowo. (Mintirho 8:26, 27, 36, 38) Ku nga ri kungani, Xikwembu xi lave leswaku mahungu lamanene ma chumayeriwa eka Vamatiko lava nga yimbangiki. Exivonweni, ntsumi yi humelele eka Korneliyo, munhu wa Matiko loyi a a chava Xikwembu, yi n’wi byela leswaku a vitana muapostola Petro. Loko vanhu lava rhumiweke hi Korneliyo va kuma Petro, va te: “Korneliyo . . . u nyikiwe swiletelo swa Xikwembu hi ntsumi yo kwetsima leswaku a ku vitana u ya endlwini yakwe ni leswaku a ta twa swilo leswi u nga ta swi vula.” Petro u amukele xirhambo xakwe, kutani vanhu va Matiko vo sungula lava nga yimbangiki va ve swirho swa vandlha ra Vukreste. (Mintirho 10:22, 44-48) Ehleketa ndlela leyi a wu ta titwa ha yona loko u xiya leswaku ntsumi yi ku pfunile leswaku u hlangana ni munhu la lavaka ntiyiso!

Ku Pfuniwa Hi Moya Lowo Kwetsima

12, 13. (a) Ha yini vaapostola va Yesu a va ri ni xivangelo lexi twalaka xo kholwa leswaku moya lowo kwetsima a wu ta va pfuna? (b) Xana moya lowo kwetsima wu va nyike matimba hi ndlela yihi Vakreste va lembe-xidzana ro sungula?

¹² Emahlweninyana ka ku fa kakwe, Yesu u tiyisekise vaapostola vakwe leswaku a va nge sali va ri hava mpfuno. Tatana a a ta va nyika “mupfuni, la nga moya lowo kwetsima.” (Yohane 14:26) Vaapostola a va ri ni xivangelo lexi twalaka xo kholwa leswaku moya lowo kwetsima wu ta va pfuna. Phela, Matsalwa lama huhuteriweke ma ni swikombiso swo tala swa ndlela leyi Yehovha a wu tirhiseke ha yona moya lowo kwetsima, ku nga nchumu lowu nga ni matimba ku tlula hinkwaswo, leswaku a pfuna vanhu vakwe.

¹³ Eswiyin’weni swo tala, moya lowo kwetsima wu tirhisiwe ku tiyisa vanhu leswaku va endla ku rhandza ka Yehovha. Moya lowo kwetsima wu nyike Vaavanyisi matimba ya ku kutsula Israyele. (Vaavanyisi 3:9, 10; 6:34) Moya wolowo wu nyike Vakreste va lembe-xidzana ro sungula matimba yo ya emahlweni va chumayela hi xivindzi hambiloko va kanetiwa hi tindlela to hambana-hambana. (Mintirho 1:8; 4:31) Ndlela leyi va humeleleke ha yona entirhweni wa vona wo chumayela yi nyikela vumbhoni bya ndlela leyi moya lowo kwetsima wu tirhaka ha yona. Ku hava ndlela yin’wana yo hlamusela xivangelo xa ku va “vanhu lava nga dyondzekangiki, lava tolovelekeke,” va kote ku twarisa rungula ra Mfumo emisaveni hinkwayo ya nkarhi wolowo!—Mintirho 4:13; Vakolosa 1:23.

14. Xana Yehovha u wu tirhise njhani moya wakwe lowo kwetsima ku voningela vanhu va yena?

¹⁴ Yehovha u tlhele a tirhisa moya wakwe lowo kwetsima leswaku a voningela vanhu vakwe. Hi ku pfuniwa hi moya wa Xikwembu, Yosefa u swi kotile  ku hlamusela milorho ya Faro ya vuprofeta. (Genesa 41:16, 38, 39) Hi ku tirhisa moya wakwe, Yehovha u endle leswaku swikongomelo swakwe swi paluxeriwa lava titsongahataka kambe swi fihleriwa lava tikukumuxaka. (Matewu 11:25) Hikwalaho, malunghana ni swilo leswi Yehovha a swi nyikaka “lava [n’wi] rhandzaka,” muapostola Pawulo u te: “Xikwembu xi swi hlavutele hina hi moya wa xona.” (1 Vakorinto 2:7-10) Munhu a nga ku twisisa kahle ku rhandza ka Xikwembu ntsena loko a pfuniwa hi moya lowo kwetsima.

Ku Pfuniwa Hi Rito Ra Xikwembu

15, 16. Yoxuwa a a byeriwe ku endla yini leswaku a ta endla hi vutlhari?

¹⁵ Rito ra Yehovha leri huhuteriweke ri “pfuna ku dyondzisa,” naswona ri endla leswaku malandza ya Xikwembu ma “faneleka hi ku helela, [ma] hlomisiwa hi ku helela eka ntirho wun’wana ni wun’wana lowunene.” (2 Timotiya 3:16, 17) Bibele yi tamele swikombiso swo tala leswi kombisaka ndlela leyi vanhu va Xikwembu va khale va pfuniweke ha yona hi Rito ra xona leri ana se a ri tsariwile.

¹⁶ Matsalwa ma nyikele nkongomiso lowunene eka vagandzeri va Xikwembu. Loko Yoxuwa a nyikiwe vutihlamuleri byo rhangela Israyele, u byeriwe marito lawa: “Buku leyi ya nawu [lowu tsariweke hi Muxe] yi nga suki enon’wini wa wena, naswona u fanele u yi hlaya hi rito ra le hansi nhlikanhi ni vusiku, leswaku u ta hisekela ku endla hi ku landza hinkwaswo leswi tsariweke eka yona; hi kona u nga ta endla ndlela ya wena yi humelela kutani u endla hi vutlhari.” Xiya leswaku Xikwembu a xi tshembisanga ku nyika Yoxuwa vutlhari hi singita. Ematshan’weni ya sweswo, loko Yoxuwa a hlaya “buku leyi ya nawu” a tlhela a anakanyisisa ha yona, a a ta endla hi vutlhari.—Yoxuwa 1:8; Pisalema 1:1-3.

17. Daniyele na Hosi Yosiya va pfuniwe njhani hi leswi a swi tsariwe eMatsalweni lawa a va ri na wona?

¹⁷ Rito ra Xikwembu leri tsariweke ri tlhele ri pfuna ku paluxa ku rhandza ka xona ni xikongomelo xa xona. Hi xikombiso, Daniyele u swi vonile hi ku ya hi matsalwa ya Yeremiya leswaku Yerusalema a yi ta va marhumbi ku fikela rini. (Yeremiya 25:11; Daniyele 9:2) Nakambe, ehleketa hi leswi endlekeke hi nkarhi wa ku fuma ka Hosi Yosiya wa le Yuda. Hi nkarhi wolowo, tiko a ri fularhele Yehovha, naswona swi tikomba onge tihosi a ti tsandzekile ku tiendlela kopi ya tona vini ya Nawu ni ku wu landzelela. (Deteronoma 17:18-20) Kambe, loko tempele yi ri karhi yi lunghisiwa, “buku leyi ya nawu,” kumbexana leyi tsariweke hi Muxe, yi kumekile. Kumbexana leyi hi yona leyi a a yi tsale hi voko ra yena n’wini, leyi a yi hetiwe emalembeni ya kwalomu ka 800 lama hundzeke. Endzhaku ka loko a twe ku hlayiwa leswi nga endzeni ka yona, Yosiya u xiye ndlela leyi tiko a ri hambuke ha yona eku endleni ka ku rhandza ka Yehovha, naswona hosi yi teke magoza lama tiyeke yo endla leswi tsariweke ebukwini leyi. (2 Tihosi 22:8; 23:1-7) Swi lo dla, leswaku vanhu va Xikwembu va khale va pfuniwe hi leswi a swi tsariwe eMatsalweni yo Kwetsima lawa va ma kumeke!

Ku Pfuniwa Hi Vapfumeri-kulorhi

18. Ha yini hi nga vulaka leswaku Yehovha hi yena a endlaka leswaku vagandzeri va ntiyiso va pfunana?

¹⁸ Hakanyingi Yehovha u hi pfuna hi ku tirhisa vapfumeri-kulorhi. Entiyisweni, Xikwembu hi xona xi endlaka leswaku vagandzeri va ntiyiso va pfunana. Ha yini hi vula tano? Hikwalaho ka swivangelo swimbirhi. Xo sungula, moya lowo kwetsima wa Xikwembu wa katseka. Moya wolowo wu tswala mihandzu yo tanihi rirhandzu ni vunene eka lava va landzelaka nkongomiso wa wona. (Vagalatiya 5:22, 23) Hikwalaho, loko un’wana wa malandza ya Xikwembu a susumeteleka ku pfuna van’wana, leswi swi kombisa leswaku moya wa Yehovha wa tirha. Xa vumbirhi, hi endliwe hi xifaniso xa Xikwembu. (Genesa 1:26) Leswi swi vula leswaku hi nga swi kota ku kombisa timfanelo ta  xona, to tanihi musa ni ntwela-vusiwana. Hikwalaho, nkarhi wun’wana ni wun’wana loko nandza wa Yehovha a pfuna van’wana, Xihlovo xa xiviri xa mpfuno wolowo hi loyi a tekeleleke timfanelo teto eka yena.

19. Hi ku ya hi rhekhodo ya Bibele, Yehovha u nyikele mpfuno hi ndlela yihi hi ku tirhisa vapfumeri?

¹⁹ Eminkarhini ya Bibele, Yehovha u va pfune njhani van’wana hi ku tirhisa vapfumeri-kulobye? Hakanyingi Yehovha u endle leswaku un’wana wa malandza yakwe a tsundzuxa un’wana, ku fana niloko Yeremiya a nyika Baruku ndzayo leyi poniseke vutomi byakwe. (Yeremiya 45:1-5) Minkarhi yin’wana, vagandzeri va ntiyiso va susumeteleke ku pfuna vapfumeri-kulobye hi swilo leswi vonakaka, ku fana niloko Vakreste va le Makedoniya ni va le Akaya va hisekele ku pfuna vamakwavo lava pfumalaka eYerusalema. Muapostola Pawulo u kombise leswaku malwandla wolawo ma vange “marito ya ku nkhensa eka Xikwembu.”—2 Vakorinto 9:11.

20, 21. Xana vamakwerhu va le Rhoma va n’wi tiyise njhani muapostola Pawulo?

²⁰ Rungula leri tsakisaka ngopfu hi leri kombisaka ndlela leyi malandza ya Yehovha ma endleke matshalatshala ha yona leswaku ma tiyisana ni ku khutazana. Ehleketa hi xikombiso lexi khumbaka muapostola Pawulo. Loko a ri endleleni ya ku ya eRhoma a ri mubohiwa, Pawulo u fambe hi gondzo lerikulu ra le Rhoma leri vuriwaka Appian Way. Kambe eka xiphemu lexo hetelela xa riendzo rakwe, se a swi tika swinene, hikuva gondzo leri a ri hundza hi le nhlangasini, endhawini leyi nga nkova. * Vamakwerhu va le vandlheni ra le Rhoma a va swi tiva leswaku Pawulo wa ta. Xana a va ta endla yini? Xana a va ta ku mbaa, emakaya ya vona kukondza Pawulo a fika ivi ku va kona va n’wi xewetaka?

²¹ Luka, mutsari wa Bibele loyi a a famba na Pawulo eriendzweni leri, u hi byela leswi humeleleke: “Ku suka kwalaho [eRhoma], loko vamakwerhu va twa mahungu lama khumbanaka na hina, va ta va ta hi hlangaveta eNdhawini ya ku Xavisela ya Apiyo ni le Tihotela Tinharhu.” Xana wa swi vona hi mahlo ya mianakanyo leswi endlekeke?  Hi ku tiva leswaku Pawulo wa ta, vamakwerhu va suke eRhoma va ya n’wi hlanganisa. Van’wana a va n’wi rindze eNdhawini ya ku Xavisela ya Apiyo, ku nga xitichi lexi dumeke lexi a xi ri empfhukeni wa kwalomu ka 74 wa tikhilomitara ku suka eRhoma. Kasi vamakwerhu lavan’wana a va yime eTihotela Tinharhu, ku nga ndhawu ya vuwiselo leyi nga empfhukeni wa kwalomu ka 58 wa tikhilomitara ku suka edorobeni ra Rhoma. Xana Pawulo u titwe njhani? Luka wa vika: “Loko a va vona, Pawulo a nkhensa Xikwembu, a tiya nhlana.” (Mintirho 28:15) Ehleketa—ku vona ntsena vamakwavo volavo lava tikarhateke va teka riendzo ro leha hi ndlela yoleyo swi tiyise Pawulo swi tlhela swi n’wi chavelela! Xana Pawulo u nkhense mani hi nseketelo lowu? U nkhense loyi a va susumeteleke ku endla tano, ku nga Yehovha Xikwembu.

22. Hi rihi tsalwa ra hina ra lembe ra 2005, naswona hi yihi mhaka leyi nga ta tlhuvutsiwa exihlokweni lexi landzelaka?

²² Rungula leri tsariweke eBibeleni ri kombisa kahle leswaku Xikwembu xa pfuna. I Mupfuni lonkulu ku tlula hinkwavo. Hikwalaho, swa fanela leswi tsalwa ra lembe ra 2005 ra Timbhoni ta Yehovha ri kumekaka eka Pisalema 121:2: “Mpfuno wa mina wu huma eka Yehovha.” Kambe, Yehovha u hi pfuna njhani namuntlha? Mhaka leyi yi ta tlhuvutsiwa exihlokweni lexi landzelaka.

[Nhlamuselo ya le hansi]

Wa Tsundzuka Xana?

Xana Yehovha u nyikele mpfuno hi ndlela yihi—

• hi ku tirhisa tintsumi?

• hi ku tirhisa moya wa yena lowo kwetsima?

• hi ku tirhisa Rito rakwe leri huhuteriweke?

• hi ku tirhisa vapfumeri-kulorhi?

[Swivutiso Swa Dyondzo]

[Marito lama tshahiweke exihlokweni lama nga eka tluka 15]

Tsalwa ra lembe ra 2005 ri ri: “Mpfuno wa mina wu huma eka Yehovha.”—Pisalema 121:2.

[Xifaniso lexi nga eka tluka 16]

Pawulo u nkhense Xikwembu hi mpfuno lowu a wu kumeke eka vamakwerhu va le Rhoma