Ku Hlanganisiwa Hi Ku Rhandza Xikwembu

LOKO vandlha ra Vukreste ri simekiwa hi lembe-xidzana ro sungula ra Nguva ya hina leyi Tolovelekeke, xin’wana xa swilo swa nkoka leswi ri hlawulekiseke—hambileswi a ri vumbiwe hi swirho swo hambana-hambana—a ku ri vun’we bya rona. Vagandzeri volavo va Xikwembu xa ntiyiso a va huma ematikweni ya le Asia, Yuropa ni le Afrika. A va ri vanhu va swiyimo swo hambana-hambana—vaprista, masocha, mahlonga, vabaleki, vaxavisi, swidyondzeki ni van’wamabindzu. Van’wana a va ri Vayuda kasi van’wana a va ri Vamatiko. Vo tala eku sunguleni a va ri vaoswi, vasodoma, swidakwa, makhamba kumbe vadyeleri. Kambe loko va va Vakreste, va phele mikhuva ya vona yo biha ehansi, kutani va va nyandza yin’we eripfumelweni.

I yini lexi endleke leswaku Vukreste bya lembe-xidzana ro sungula byi kota ku hlanganisa vanhu lava hinkwavo va va nyandza yin’we? Ha yini a va ri ni ku rhula exikarhi ka vona, va tlhela va hanyisana ni vanhu va le handle hi ku rhula? Ha yini va nga hlanganyelanga eku xandzukeleni ka mfumo ni le tinyimpini? Ha yini Vukreste byo sungula a byi hambanile swonghasi ni vukhongeri lebyi dumeke bya namuntlha?

I Yini Lexi Hlanganiseke Swirho Swa Vandlha Swi Va Nyandza Yin’we?

Nchumu lowukulu lowu hlanganiseke vapfumeri-kulobye eka lembe-xidzana ro sungula a ku ri ku rhandza Xikwembu. Vakreste volavo a va swi lemuka  leswaku va ni vutihlamuleri lebyikulu bya ku rhandza Yehovha Xikwembu xa ntiyiso hi timbilu ta vona hinkwato, hi moya-xiviri wa vona hinkwawo ni hi mianakanyo ya vona hinkwayo. Hi xikombiso, muapostola Petro loyi a a ri Muyuda, u lerisiwe leswaku a ya endlwini ya munhu wa tiko rimbe, loyi hi ntolovelo a a nga ta tihlanganisa ngopfu na yena. Ku rhandza Yehovha hi swona leswi ngopfu-ngopfu swi n’wi susumeteleke ku ya eka munhu loyi. Petro ni Vakreste van’wana vo sungula a va ri ni vuxaka lebyikulu na Xikwembu lebyi kondleteriweke hi ku va ni vutivi lebyi kongomeke malunghana ni vumunhu bya xona, leswi xi swi tsakelaka ni leswi xi nga swi tsakeliki. Hi ku famba ka nkarhi, vagandzeri hinkwavo va twisise leswaku Yehovha a a rhandza leswaku va “hlangana hilaha ku faneleke emianakanyweni yin’we ni le ndleleni yin’we ya ku ehleketa.”—1 Vakorinto 1:10; Matewu 22:37; Mintirho 10:1-35.

Xin’wana lexi hlanganiseke vapfumeri a ku ri ripfumelo leri a va ri na rona eka Yesu Kreste. Va tiyimisele ku landzelerisisa mikondzo yakwe. U va lerisile a ku: “Mi rhandzana; tanihi leswi ndzi mi rhandzeke . . . Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:34, 35) Rirhandzu ro tano a ri nga fanelanga ri va ra ku tekeka swa xinkarhana, kambe a ri fanele ri va rirhandzu ra ku tinyiketela. Xana vuyelo bya kona a byi ta va byihi? Yesu u khongerile malunghana ni lava va kombiseke ripfumelo eka yena a ku: “Ndzi kombelela . . . leswaku hinkwavo va va un’we, tanihi leswi wena, Tatana, u nga ni vun’we na mina ni leswi na mina ndzi nga ni vun’we na wena, leswaku na vona va va ni vun’we na hina.”—Yohane 17:20, 21; 1 Petro 2:21.

Yehovha u chulule moya wakwe wo kwetsima kumbe matimba yakwe lama tirhaka, ehenhla ka malandza yakwe ya ntiyiso. Moya wolowo wu hlanganyete vun’we exikarhi ka vona. Wu va pfune ku twisisa tidyondzo ta Bibele leti amukeriweke emavandlheni hinkwawo. Vagandzeri va Yehovha va chumayele rungula leri fanaka—ku kwetsimisiwa ka vito ra Yehovha hi ku tirhisa Mfumo wa Xikwembu lowu nga ehansi ka Mesiya, ku nga hulumendhe ya le tilweni leyi nga ta lawula vanhu hinkwavo. Vakreste vo sungula a va twisisa vutihlamuleri lebyi a va ri na byona bya ku nga vi “xiphemu xa misava leyi.” Hikwalaho, loko vanhu va pfukela mfumo kumbe loko ku va ni tinyimpi, Vakreste a va nga yimi na munhu. A va hanyisana hi ku rhula ni vanhu hinkwavo.—Yohane 14:26; 18:36; Matewu 6:9, 10; Mintirho 2:1-4; Varhoma 12:17-21.

Vapfumeri hinkwavo va amukele vutihlamuleri bya vona bya ku hlanganyeta vun’we. Njhani? Hi ku lwela ku endla leswaku mahanyelo ya vona ma fambisana na Bibele. Hikwalaho, muapostola Pawulo u tsalele Vakreste a ku: “Mi cukumeta vumunhu bya khale lebyi fambisanaka ni ndlela ya n’wina yo sungula ya ku tikhoma,” kutani “mi ambala vumunhu lebyintshwa.”—Vaefesa 4:22-32.

Ku Hlayisa Vun’we

Ina, vapfumeri va lembe-xidzana ro sungula a va nga hetisekanga, naswona a ku pfa ku tangunuka swiyimo leswi a swi xungeta vun’we bya vona. Hi xikombiso, Mintirho 6:1-6 yi hlamusela leswaku ku ve ni ku tshwukiselana mahlo exikarhi ka Vakreste va Vayuda lava vulavulaka Xigriki ni lava vulavulaka Xiheveru. Lava a va vulavula Xigriki a va anakanya leswaku va khirhiwa. Kambe xikan’we-kan’we loko vaapostola va tivisiwe hi xiphiqo lexi, va hatlise va xi ahlula va nga yi hi nghohe. Endzhaku, dyondzo yin’wana yi pfuxe njhekanjhekisano ya malunghana ni vutihlamuleri bya vanhu lava nga riki Vayuda evandlheni ra Vukreste. Ku endliwe xiboho hi ku tirhisa misinya ya milawu ya Bibele, naswona xiboho xexo xi amukeriwe hi swirho swa mavandlha hinkwawo.—Mintirho 15:1-29.

Swikombiso leswi swi yi veka erivaleni mhaka ya leswaku ku vona swilo hi ndlela yo hambana a swi vanganga ku avana kumbe ku namarhela mavonelo lama humeke endleleni evandlheni ra Vukreste ra lembe-xidzana ro sungula. Ha yini? Hikuva swilo  leswi kondletelaka vun’we—ku rhandza Yehovha, ku va ni ripfumelo eka Yesu Kreste, ku rhandzana hi xiviri, ku amukela vukongomisi bya moya lowo kwetsima, ku va ni matwisiselo lama fanaka hi tidyondzo ta Bibele ni ku tiyimisela ku tshika mahanyelo lama hoxeke—swi endle leswaku vandlha ro sungula ri tshama ri ri ni vun’we ni ku rhula.

Ku Gandzela Hi Vun’we Namuntlha

Xana vun’we byi nga fikeleriwa hi ndlela leyi fanaka namuntlha? Xana swilo leswi boxiweke laha henhla swi nga kota ku hlanganisa vanhu va vupfumeri byin’we, swi va pfuna ku va ni ku rhula ni vanhu va tinxaka hinkwato emisaveni hinkwayo? Ina, swi nga endla tano! Timbhoni ta Yehovha ti ni vun’we emisaveni hinkwayo, ematikweni, eswihlaleni ni le tindhawini to tlula 230. Naswona ti hlanganisiwa hi swilo leswi hlanganiseke Vakreste va lembe-xidzana ro sungula.

Nchumu lowu pfunetaka swinene eku kondleteleni ka vun’we bya Timbhoni ta Yehovha hileswi ti tinyiketeleke eka Yehovha Xikwembu. Sweswo swi vula leswaku ti lwela ku tshama ti tshembekile eka yena ehansi ka swiyimo hinkwaswo. Timbhoni ta Yehovha nakambe ti kombisa ripfumelo eka Yesu Kreste ni le ka leswi a swi dyondziseke. Vakreste volavo va kombisa rirhandzu ra xiviri eka vapfumeri-kulobye naswona va chumayela mhaka yin’we mayelana ni mahungu lamanene ya Mfumo wa Xikwembu ematikweni hinkwawo lawa va tirhaka eka wona. Va rhandza ku vulavula hi Mfumo wolowo ni vanhu va vupfumeri hinkwabyo, va tinxaka hinkwato, va matiko hinkwawo ni va mintlawa hinkwayo. Nakambe Timbhoni ta Yehovha a ti yimi na munhu etimhakeni ta misava, naswona sweswo swi ti pfuna ku lwisana ni mintshikilelo ya politiki, ndhavuko, tiko ni mabindzu, leyi vangaka ku avana lokukulu exikarhi ka vanhu. Timbhoni hinkwato ti amukela vutihlamuleri bya tona bya ku kondletela vun’we hi ku hanya hi ku pfumelelana ni vukongomisi bya Bibele.

Vun’we Byi Koka Van’wana Rinoko

Hakanyingi vun’we lebyi byi khumbe vanhu lava nga riki Timbhoni. Hi xikombiso, Ilse * a a ri nani ya Mukhatoliki leyi a yi tshama emuakweni wa tinani le Jarimani. I yini lexi n’wi tsakiseke eka Timbhoni ta Yehovha? Ilse u te: “I vanhu lavanene ngopfu. A va hlanganyeli enyimpini; va papalata ku twisa van’wana ku vava. Va rhandza ku pfuna vanhu leswaku va ta kota ku hanya hi ntsako emisaveni ya paradeyisi leyi nga ehansi ka Mfumo wa Xikwembu.”

Xikombiso xin’wana i Günther, loyi a a ri socha ra Mujarimani leri rhumeriweke eFurwa hi nkarhi wa nyimpi ya vumbirhi ya misava. Siku rin’wana mufundhisi wa Muprotestente u khongelele masocha ya vuthu leri Günther a a ri xirho xa rona. Eka xikhongelo xexo u kombele leswaku masocha wolawo ma katekisiwa, ma sirheleriwa ma tlhela ma hlula. Endzhaku ka xikhongelo, Günther u ye laha a a averiwe ku yima kona a languta valala. Hi ku tirhisa swivona-kule swakwe, u vone masocha ya valala na wona ma ri exikhongelweni lexi fambisiwaka hi mufundhisi. Endzhaku Günther u te: “Swi nga endleka leswaku mufundhisi luya na yena a a khongelela leswaku masocha ma katekisiwa, ma sirheleriwa ni ku hlula. Ndzi tivutisile leswaku ha yini tikereke ta Vakreste ti seketela masocha ya matiko lama nga enyimpini.” Swiendlakalo sweswo swi dzike swinene emianakanyweni ya Günther. Loko endzhaku a hlangana na Timbhoni ta Yehovha, Günther u ve xirho xa nhlengeletano ya tona ya misava hinkwayo, tanihi leswi a swi xiyeke leswaku a ti hlanganyeli enyimpini.

Ashok na Feema a va ri swirho swa vukhongeri bya le Vuxeni. Ekaya ra vona, a va ri ni tempele ya xikwembu xa vona. Loko ku nghene vuvabyi bya khombo endyangwini wa vona, va kambisise vukhongeri bya vona hi vuenti. Loko va vulavula ni Timbhoni ta Yehovha, Ashok na Feema va khumbiwe hi tidyondzo ta Bibele ni rirhandzu leri nga kona exikarhi ka Timbhoni. Sweswi i vahuweleri lava hisekaka va mahungu lamanene ya Mfumo wa Yehovha.

Ilse, Günther, Ashok na Feema va ni vun’we ni timiliyoni ta Timbhoni ta Yehovha enhlengeletanweni ya tona ya misava hinkwayo. Va kholwa xitshembiso xa Bibele xa leswaku swilo leswi va hlanganisaka evugandzerini namuntlha hi swona leswi nga ta hlanganisa vanhu hinkwavo lava yingisaka ku nga ri khale. Kutani a ku nge he vi na swiendlo swa nsele, nkwetlembetano ni ku avana loku vangiwaka hi vukhongeri. Misava hinkwayo yi ta va ni vun’we evugandzerini bya Yehovha Xikwembu xa ntiyiso.—Nhlavutelo 21:4, 5.

[Nhlamuselo ya le hansi]

[Swifaniso leswi nga eka tluka 4, 5]

Hambileswi a va huma emindhavukweni yo hambana-hambana, Vakreste vo sungula a va ri ni vun’we