Nkarhi Wa Swakudya—A Hi Nkarhi Wa Ku Dya Ntsena!

MUNHU un’wana ni un’wana u tsakela swakudya swo xawula. Mabulo lama akaka kun’we ni xinakulobye lexinene ni vanhu lava u va rhandzaka swi endla leswaku nkarhi wa swakudya wu va lowu tsakisaka ni lowu enerisaka ematshan’weni yo va nkarhi wo tata makhwiri ntsena. Mindyangu yo tala yi tolovele ku hlangana hambi ko va kan’we ntsena hi siku yi dya swin’we. Nkarhi wa swakudya wu pfulela ndyangu ndlela ya ku vulavula hi swiendlakalo kumbe makungu ya siku. Vatswari lava yingiselaka loko vana va vona va vulavula va kuma vuthala bya leswi va swi ehleketaka ni ndlela leyi va titwaka ha yona. Hi ku famba ka nkarhi, ntsako lowu vaka kona hi nkarhi wa swakudya wu kondletela vuhlayiseki, ku tshembana ni rirhandzu, leswi tiyisaka ndyangu.

Namuntlha, leswi swirho swo tala swa ndyangu swi tshamaka swi khomekile, a swi swi oloveli ku kuma nkarhi wa ku dya swin’we. Etindhawini tin’wana, ndhavuko wu lwisana ni ku va ndyangu wu dya swin’we naswona wu vula leswaku swa yila ku dya u ri karhi u vulavula. Mindyangu yin’wana yi tolovele ku hlalela TV hi nkarhi wa swakudya, kutani sweswo swi yi tekela nkarhi wa bulo leri akaka.

Kambe vatswari lava nga Vakreste va tshama va xalamukele minkarhi ya ku aka mindyangu ya vona. (Swivuriso 24:27) Khale swinene, vatswari va byeriwe leswaku nkarhi wun’wana lowunene wo dyondzisa vana va vona rito ra Xikwembu hi ‘loko va titshamerile endlwini ya vona.’ (Deteronoma 6:7) Ku titoloveta ku dya swin’we swi nyika vatswari nkarhi wo hlawuleka wa ku dyondzisa vana va vona leswaku va va ni rirhandzu lerikulu eka Yehovha ni le ka misinya yakwe ya milawu leyi lulameke. Loko mi hlakulela moya wa ntsako ni lowu ntshunxekeke, mi nga endla leswaku nkarhi wa swakudya wu va lowu tsakisaka ni lowu akaka ndyangu wa n’wina. Ina, endlani leswaku nkarhi wa swakudya wu nga vi nkarhi wo dya ntsena!