“I Yini Xihundla Xa Wena?”

XIVUTISO lexi xi vutisiweke Muriel, mana wa vana vanharhu, hi mukhalabye un’wana loyi a a nga n’wi tivi ekhefini, xi n’wi hlamarisile. Muriel a a yise vana vakwe eka dokodela, hiloko a biwa hi nkarhi. A ku nga ri na nkarhi lowu ringaneke wa leswaku va tlhelela ekaya va ya dya swakudya swo lalela loko va nga si ya eminhlanganweni ya vona ya Vukreste. Kutani u yise vana vakwe ekhefini ya le kusuhi leswaku va ta kuma swakudya.

Loko va heta ku dya, mukhalabye loyi u ye eka Muriel kutani a ku: “Ku sukela loko mi nghenile laha, a ndzi mi langutile. Naswona ndzi vone ku hambana lokukulu exikarhi ka vana va wena ni lava ndzi talaka ku va vona. U fanele u vona leswi vana va swi endlaka ematafuleni ni le switulwini. Va veka milenge ya vona etafuleni. Va susumeta-susumeta switulu. Kambe vana va wena va vulavulela ehansi naswona va tikhome kahle. I yini xihundla xa wena?”

Muriel u te: “Mina na nuna wa mina hi dyondza Bibele ni vana va hina, naswona hi ringeta ku tirhisa leswi hi swi dyondzaka evuton’wini bya hina. Hi Timbhoni ta Yehovha.” Hiloko mukhalabye loyi a ku: “Mina ndzi Muyuda naswona ndzi pone Ku Dlayiwa ka Vayuda va le Yuropa hi Manazi. Ndza tsundzuka ndzi vona Timbhoni ta Yehovha ti xanisiwa eJarimani. Ni hi nkarhi wolowo a ti hambanile ni vanhu lavan’wana. Ndlela leyi vana va wena va tikhomaka ha yona yi ndzi tsakisile hakunene. Ndzi fanele ndzi kambisisa vukhongeri bya n’wina hi vukheta.”

Bibele i buku leyi kongomisaka hi ndlela leyinene eku kuriseni ka vana. Timbhoni ta Yehovha ti swi tsakela swinene ku pfuna van’wana leswaku va vuyeriwa eka nkongomiso lowu kumekaka eMatsalweni. Ha ku rhamba hi mbilu hinkwayo leswaku u xi amukela xirhambo lexi.