“Mpfuno Wa Mina Wu Huma Eka Yehovha”

Loko Vudyuhari Byi Hundzuka “Harhi Ya Ku Saseka”

MURIEL wa malembe ya 101 hi vukhale u te: “A ku na vutomi byo tlula lebyi.” Theodoros wa malembe ya 70 hi vukhale u katsakanye mhaka leyi hi ndlela leyi: “I lunghelo hakunene!” Maria wa malembe ya 73 hi vukhale u te: “A ku na ndlela yin’wana yo antswa ku tlula leyi, leyi a ndzi ta va ndzi tirhise vutomi bya mina ha yona.” Vanhu lava hinkwavo va hete vutomi bya vona hinkwabyo va tirhela Yehovha Xikwembu.

Vadyuhari vo tano i swikombiso swa vagandzeri vo tala va Yehovha lava hisekaka emisaveni hinkwayo. Hambiloko va dyuharile va tlhela va karhateka hi rihanyo ni swiyimo swin’wana leswi nga tsakisiki, va ha tirhela Xikwembu hi mbilu hinkwayo. Vadyuhari vo tano lava tshembekaka i swikombiso leswi xiximiwaka swa vanhu lava tinyiketeleke eka Xikwembu evandlheni ra Vukreste. Yehovha u wu tlangela swinene ntirho wa vadyuhari, hambiloko swiyimo swa vona swi va sivela ku endla swin’wana. *—2 Vakorinto 8:12.

Buku ya Tipisalema yi vulavula hi ndlela leyi faneleke malunghana ni vutomi lebyi vadyuhari lava tshembekaka va nga langutelaka ku byi hanya. Va nga fana ni murhi wa khale lowukulu lowu tshamaka wu ri karhi wu tswala mihandzu. Mupisalema u yimbelerile malunghana ni vadyuhari lava tshembekaka: “Va ta hambeta va humelela niloko va ri timpunga, va ta hambeta va nyuhela va va vantshwa.”—Pisalema 92:14.

Van’wana va nga ha chava leswaku va ta tshikiwa ni ku honisiwa loko se va dyuharile va nga ha ri na matimba. Davhida u kombele Xikwembu a ku: “U nga ndzi cukumeti emalembeni ya vudyuhari; loko matimba ya mina ma hela, u nga ndzi siyi.” (Pisalema 71:9) I yini lexi endlaka ku va ni ku hambana exikarhi ka ku tsana ni ku humelela loko u dyuharile? I mfanelo leyinene ya ku lulama. Mupisalema u yimbelerile: “Lowo lulama u ta rhumbuka ku fana ni murhi wa ncindzu.”—Pisalema 92:12.

Lava va khomekeke hi ku tirhela Xikwembu hi ku tshembeka va tala ku hambeta va tswala mihandzu leyinene loko se va dyuharile. Entiyisweni, swo tala swa swilo leswi va swi endleke evuton’wini bya vona leswaku va tipfuna kumbe va pfuna van’wana swi tswale vuyelo lebyinene, ku fana ni swimilana leswi kulaka swi kala swi tswala mihandzu yo tala. (Vagalatiya 6:7-10; Vakolosa 1:10) Ina, vanhu lava tlangeke hi vutomi bya vona hikwalaho ko hlongorisa tipakani ta vutianakanyi va honisa tindlela ta Xikwembu, hakanyingi va va va nga ri na nchumu wa nkoka loko va dyuhala.

Ku lulama ku tlhela ku kandziyisiwa ebukwini ya Bibele ya Swivuriso tanihi ku saseka ka vudyuhari. Hi hlaya marito lawa ebukwini yoleyo: “Misisi ya mpunga i harhi ya ku saseka loko yi kumeka endleleni ya ku lulama.” (Swivuriso 16:31) Ina, ku lulama i xikombiso xa ku saseka ka le ndzeni. Ku famba hi ndlela yo lulama evuton’wini hinkwabyo swi endla leswaku u xiximiwa. (Levhitika 19:32) Loko munhu a ri ni misisi ya mpunga a tlhela a va ni vutlhari ni vunene, swi endla leswaku a fundzhiwa.—Yobo 12:12.

Yehovha u tsakisiwa hi vutomi bya munhu wo lulama la n’wi tirhelaka. Matsalwa ma ri: “Hambiloko munhu a ri emalembeni ya vudyuhari, ndza ha ri Mina [Yehovha]; ni loko a ri ni misisi ya mpunga, ndzi ta hambeta ndzi n’wi rhwala. Kunene mina ndzi ta teka goza, leswaku ndzi rhwala, ndzi tlakula ni ku ponisa.” (Esaya 46:4) Swa chavelela hakunene ku tiva leswaku Tata wa hina wa le tilweni la nga ni  rirhandzu u tshembisa leswaku u ta hlayisa ni ku seketela vanhu lava dyuhaleke lava tshembekaka eka yena!—Pisalema 48:14.

Leswi vutomi lebyi munhu a byi heteke a tirhela Yehovha hi ku tshembeka byi n’wi tsakisaka, xana ni van’wana a va fanelanga va byi xixima? Loko hi va ni langutelo ra Xikwembu, hi ta tlangela vapfumeri-kulorhi lava dyuhaleke. (1 Timotiya 5:1, 2) Hikwalaho a hi laveni tindlela leti tirhaka to kombisa rirhandzu ra Vukreste loko hi khathalela swilaveko swa vona.

Ku Nghena eNdleleni Ya Ku Lulama Loko Se U Dyuharile

Solomoni wa hi tiyisekisa: “Ku ni vutomi endleleni ya ku lulama.” (Swivuriso 12:28) Ku dyuhala a ku siveli munhu leswaku a nghena endleleni leyi. Hi xikombiso, le Moldova mukhalabye wa malembe ya 99 hi vukhale u kondletele timhaka ta Vukhomunisi ku sukela a ha ri muntshwa. A a tibuma hileswi a nga tshama a vulavula hi ku kongoma ni varhangeri va Makhomunisi lava dumeke, vo tanihi V. I. Lenin. Hambiswiritano, loko Vukhomunisi byi phupha ivi byi hohloka, vutomi bya mukhalabye loyi a bya ha vanga ni xikongomelo. Kambe loko Timbhoni ta Yehovha ti n’wi kombe leswaku Mfumo wa Xikwembu hi wona ntsena lowu nga ta tlhantlha swiphiqo swa vanhu, u amukele ntiyiso wa Bibele kutani a va xichudeni lexi hisekaka xa Matsalwa. Khombo ra kona u fe a nga si va nandza wa Yehovha la khuvuriweke.

Mukhegula un’wana wa malembe ya 81 hi vukhale wa le Hungary, endzhaku ka loko a dyondze hi swilaveko swa mahanyelo lamanene swa Xikwembu u swi xiyile leswaku a a fanele a tekana ni mukhalabye loyi se a a ri ni malembe yo hlayanyana a tshama na yena. Mukhegula loyi u kanye mbilu kutani a hlamusela mukhalabye loyi a a tshama na yena vonelo rakwe leri sekeriweke eBibeleni. Lexi n’wi hlamariseke xi tlhela xi n’wi tsakisa hileswaku mukhalabye loyi u pfumerile ku tekana na yena. Endzhaku ka loko va tekane hi nawu, u endle nhluvuko wa xihatla hi tlhelo ra moya. Ku nga si hela tin’hweti ta nhungu a sungule ku dyondza Bibele, u ve muhuweleri la nga khuvuriwangiki, kutani a khuvuriwa endzhakunyana ka kwalaho. I ntiyiso leswaku ku lulama ku nga rhwexa vadyuhari harhi ya ku saseka hakunene!

Ina, Vakreste lava dyuhaleke lava tshembekaka va nga tiyiseka leswaku Xikwembu xa va khathalela. Yehovha a nge va lahli lava tshamaka va tshembekile eka yena. Ku ri na sweswo, u va tshembisa ku va kongomisa, ku va pfuna ni ku va tiyisa hambiloko va dyuharile. Naswona va pfumelelana ni marito ya mupisalema: “Mpfuno wa mina wu huma eka Yehovha.”—Pisalema 121:2.

[Nhlamuselo ya le hansi]

[Marito lama tshahiweke exihlokweni lama nga eka tluka 9]

“Misisi ya mpunga i harhi ya ku saseka loko yi kumeka endleleni ya ku lulama.”—SWIVURISO 16:31

[Bokisi leri nga eka tluka 8]

YEHOVHA WA MA KHATHALELA MALANDZA YAKWE LAMA DYUHALEKE

“U fanele u suka u yima emahlweni ka la nga ni timpfu naswona u fanele u komba xichavo eka munhu la kuleke.”—Levhitika 19:32.

“Hambiloko munhu a ri emalembeni ya vudyuhari, ndza ha ri Mina; ni loko a ri ni misisi ya mpunga, ndzi ta hambeta ndzi n’wi rhwala.”—Esaya 46:4.