“Tshamani Mi Rindzile”

EMINKARHINI ya khale, valanguteri va tinyangwa a va rindza tinyangwa to nghena emutini ni le tempeleni naswona minkarhi yin’wana a va rindza tinyangwa to nghena emakaya ya vanhu. Ntirho wa valanguteri va tinyangwa a ku ri ku tiyisekisa leswaku ti tshama ti pfariwile nivusiku va tlhela va rindza muti. Xiavelo lexi a xi nga ri xa matlangwana, hikuva muti hinkwawo a wu titshege hi vona leswaku va wu bela nyandayeye loko ku ta khombo rihi kumbe rihi.

Yesu Kreste a a wu tiva kahle ntirho wa valanguteri va tinyangwa. Siku rin’wana u fanise vadyondzisiwa vakwe ni valanguteri va tinyangwa kutani a va khutaza leswaku va tshama va xalamukele makumu ya mafambiselo ya swilo ya Vayuda. U te: “Tshamani mi langutile, tshamani mi hitekile, hikuva a mi swi tivi leswaku nkarhi lowu vekiweke wu fika rini. Swi fana ni munhu la endzelaka etikweni ra le kule, a siya yindlu yakwe naswona . . . a lerisa mulanguteri wa nyangwa leswaku a tshama a rindzile. Hikokwalaho tshamani mi rindzile, hikuva a mi swi tivi leswaku n’wini wa yindlu u ta rini.”—Marka 13:33-35.

Hilaha ku fanaka, magazini lowu wa Xihondzo xo Rindza se wu ni malembe yo tlula 125 wu ri karhi wu twarisa xikhutazo xa Yesu lexi nge “tshamani mi rindzile.” Njhani? Hilaha ku hlamuseriweke hakona eka tluka 2 ra magazini lowu, “[Xihondzo xo Rindza] xi xiya swiendlakalo swa misava tanihi leswi swi hetisisaka vuprofeta bya Bibele. Xi chavelela vanhu hinkwavo hi mahungu lamanene ya leswaku Mfumo wa Xikwembu wu ta hatlisa wu lovisa lava tshikilelaka vanhu-kulobye ni leswaku wu ta hundzula misava yi va paradeyisi.” Tanihi leswi ku fambisiwaka tikopi to tlula 26 000 000 hi tindzimi ta 150 emisaveni hinkwayo, Xihondzo xo Rindza i magazini lowu kumiwaka hi vanhu vo tala ku tlula timagazini letin’wana ta vukhongeri. Hi ku tirhisa xona, Timbhoni ta Yehovha, ku fana ni valanguteri va tinyangwa va le minkarhini ya khale, ti khutaza vanhu hinkwako-nkwako leswaku va ‘tshama va hitekile’ emoyeni, hikuva N’wini wa hina, Yesu Kreste, u le kusuhi ni ku vuya a ta avanyisa mafambiselo lawa ya swilo.—Marka 13:26, 37.