Yehovha U Endla Leswi Faneleke Minkarhi Hinkwayo

“Yehovha u lulamile etindleleni takwe hinkwato.”—PISALEMA 145:17.

1. Xana u angurisa ku yini loko munhu a gimeta swilo leswi hoxeke hi wena, naswona hi nga dyondza yini eka sweswo?

XANA ku ni munhu loyi a tshameke a gimeta swilo leswi hoxeke hi wena, kumbexana a ku ehleketelela swo biha kambe a nga ri na vumbhoni? Loko swi ri tano, u fanele u sale u vavisekile—naswona sweswo a swi fanerile. Leswi swi hi dyondzisa mhaka ya nkoka: I vutlhari ku papalata ku hatlisela ku gimeta swo karhi hi munhu loko hi nga tivi mhaka hi xitalo.

2, 3. Xana van’wana va angurisa ku yini eka swiviko swa le Bibeleni leswi nga riki na vuxokoxoko lebyi kotaka ku hlamula swivutiso swa vona hinkwaswo, kambe, xana Bibele yi hi byela yini malunghana na Yehovha?

² Hi fanele hi tsundzuka mhaka leyi loko hi gimeta swo karhi malunghana na Yehovha Xikwembu. Ha yini? Hikuva ku ni swiviko swin’wana swa le Bibeleni leswi eku sunguleni swi nga ku pfindlusaka mianakanyo. Swiviko sweswo—kumbexana swa swiendlo swa vagandzeri van’wana va Xikwembu kumbe swa vuavanyisi bya Xikwembu bya le nkarhini lowu hundzeke—swi nga endleka swi nga ri na vuxokoxoko lebyi kotaka ku hlamula swivutiso swa hina hinkwaswo. Lexi vavisaka, van’wana va namba va sola-sola swiviko swo tano, va kala va tivutisa loko Xikwembu xi lulamile hakunene. Kambe Bibele yi hi byela leswaku “Yehovha u lulamile etindleleni takwe hinkwato.” (Pisalema 145:17) Nakambe Rito rakwe ri hi tiyisekisa leswaku a nga “endli hilaha ku hombolokeke.” (Yobo 34:12; Pisalema 37:28) Kutani ke, anakanya ndlela leyi a titwaka ha yona loko van’wana va gimeta swilo leswi hoxeke ha yena!

³ A hi kambisiseni swivangelo swa ntlhanu leswi ha swona hi faneleke hi amukela vuavanyisi bya Yehovha. Kutani hi ku tsundzuka swivangelo sweswo, hi ta kambisisa swiviko swimbirhi swa le Bibeleni leswi van’wana swi nga va tikelaka ku swi twisisa.

Ha Yini Hi Fanele Hi Amukela Vuavanyisi Bya Yehovha?

4. Ha yini hi fanele hi kambisisa swiendlo swa Xikwembu hi moya wa ku titsongahata? Kombisa.

⁴ Xo sungula, tanihi leswi Yehovha a tivaka ntiyiso hinkwawo wa mhaka lowu hina hi nga wu tiviki, hi fanele hi kambisisa swiendlo swa Xikwembu hi moya wa ku titsongahata. Hi xikombiso: Anakanya hi xiboho xa le hubyeni xa muavanyisi loyi a nga ni ndhuma leyinene ya ku tsema timhaka a nga yi hi nghohe. A wu ta anakanya yini hi munhu loyi a solaka xiboho xin’wana xa muavanyisi wo tano kasi a nga tivi ntiyiso hinkwawo wa mhaka kumbe milawu leyi tirhisiweke? Ku ta va vuhunguki loko a sola mhaka leyi ni ku yi tiva a nga yi tiviki. (Swivuriso 18:13) Kutani ku ta va vuhunguki lebyikulu loko vanhu ntsena va sola “Muavanyisi wa misava hinkwayo”!—Genesa 18:25.

5. I yini lexi hi nga fanelangiki hi xi rivala loko hi hlaya swiviko swa le Bibeleni swa ndlela leyi Xikwembu xi avanyiseke vanhu vo karhi ha yona?

⁵ Xivangelo xa vumbirhi xa ku amukela vuavanyisi bya Xikwembu hileswi xi kotaka ku tiva timbilu ta vanhu, kasi hina a hi swi koti. (1 Samuwele 16:7) Rito ra xona ri ri: “Mina Yehovha, ndzi kambisisa mbilu, ndzi kambela tinso, leswaku ndzi nyika un’wana ni un’wana hi ku ya hi tindlela ta yena, hi ku landza mihandzu ya swiendlo swakwe.” (Yeremiya 17:10) Hikwalaho, loko hi hlaya swiviko swa le Bibeleni swa ndlela leyi Xikwembu xi avanyiseke vanhu vo karhi ha yona, hi nga rivali leswaku mahlo ya xona lama kotaka ku vona hinkwaswo, ma vone miehleketo leyi tumbeleke, minsusumeto ni mimboyamelo leyi nga tsariwangiki eRitweni ra xona.—1 Tikronika 28:9.

6, 7. (a) Yehovha u swi kombise njhani leswaku u namarhela mimpimanyeto yakwe leyi lulameke hambiloko swi n’wi koxa swo tala? (b) Hi fanele hi tsundzuka yini loko hi hlaya hi mhaka yo karhi eBibeleni leyi endlaka leswaku hi tivutisa loko Xikwembu xi endle leswi lulameke kumbe leswi faneleke?

⁶ Xiya xivangelo xa vunharhu xa ku amukela  vuavanyisi bya Yehovha: U namarhela mimpimanyeto yakwe yo lulama hambiloko sweswo swi n’wi koxa swo tala. Xiya xikombiso. Loko a nyikela N’wana wakwe leswaku a va gandzelo ro kutsula vanhu lava endlaka ku rhandza kakwe exidyohweni ni le ku feni, Yehovha u endle leswi mimpimanyeto yakwe yo lulama yi lavaka swona. (Varhoma 5:18, 19) Kambe Yehovha u fanele a twe ku vava swinene loko a vona N’wana wa yena la rhandzekaka a xaniseka ivi a fa emhandzini ya nxaniso. Xana leswi swi hi byela yini malunghana ni Xikwembu? Malunghana ni “nkutsulo lowu hakeriweke hi Kreste Yesu,” Bibele yi ri: “Leswi [Xikwembu] xi swi endlele ku kombisa ku lulama ka xona n’wini.” (Varhoma 3:24-26) Vuhundzuluxeri byin’wana eka Varhoma 3:25 byi ri: “Sweswo swi kombisa leswaku Xikwembu xi endla leswi faneleke ni leswi lulameke minkarhi hinkwayo.” (New Century Version) Ina, goza leri Yehovha a tiyimiseleke ku ri teka leswaku a endla lunghiselelo ra nkutsulo ri kombisa leswaku u namarhela “leswi faneleke ni leswi lulameke.”

⁷ Kutani ke, loko hi hlaya swo karhi eBibeleni leswi endlaka leswaku hi sala hi tivutisa loko Xikwembu xi endle leswi lulameke kumbe leswi faneleke, hi fanele hi tsundzuka leswi: Hikwalaho ka ku namarhela ka yena mimpimanyeto yakwe leyi lulameke, Yehovha a nga n’wi tsetselelanga N’wana wakwe leswaku a nga dlayiwi hi ndlela yo vava. Kutani ke, xana a a ta tlula mimpimanyeto yoleyo etimhakeni tin’wana? Ntiyiso hileswaku ni kan’we Yehovha a nga yi tluli mimpimanyeto yakwe yo lulama. Hikwalaho hi ni xivangelo lexi twalaka xa ku tiyiseka leswaku minkarhi hinkwayo u endla leswi faneleke ni leswi lulameke.—Yobo 37:23.

8. Ha yini swi nga fanelanga ku va vanhu va anakanya leswaku Yehovha u kayivela vululami hi ndlela yo karhi?

⁸ Xiya xivangelo xa vumune xa ku va hi fanele hi amukela vuavanyisi bya Yehovha: Yehovha u endle munhu hi xifaniso xa Yena. (Genesa 1:27) Kutani vanhu va nyikiwe timfanelo to fana ni ta Xikwembu, ku katsa ni mboyamelo wa ku lava ku endla leswi lulameke. Swi ta va swi hoxile loko hina hi voyamele eku endleni ka leswo lulama kambe hi anakanya leswaku mfanelo yoleyo yi tikomba yi kayivela hi ndlela yo karhi eka Yehovha. Loko hi karhatiwa hi xiviko xo karhi xa le Bibeleni, hi fanele hi tsundzuka leswaku matwisiselo ya hina hi leswi lulameke ma kayivela, tanihi leswi hi tswariweke hi ri ni xidyoho. Yehovha Xikwembu, loyi hi endliweke hi xifaniso xakwe, u ni vululami lebyi hetisekeke. (Deteronoma 32:4) A swi twali nikatsongo ku anakanya leswaku vanhu va lulame ku tlula Xikwembu!—Varhoma 3:4, 5; 9:14.

9, 10. Ha yini Yehovha a nga boheki ku hlamusela kumbe ku yimelela swiendlo swa yena eka vanhu?

⁹ Xivangelo xa vuntlhanu xa ku amukela vuavanyisi bya Yehovha hileswi a nga “La nge Henhla-henhla emisaveni hinkwayo.” (Pisalema 83:18) Hikwalaho, a nga boheki ku hlamusela kumbe ku yimelela swiendlo swa yena eka vanhu. I Muvumbi Lonkulu, naswona hina hi fana ni vumba lebyi a endleke swibye ha byona, leswaku a endla leswi a swi lavaka hi hina. (Varhoma 9:19-21) Leswi hi nga swibye swa vumba leswi a swi endleke, xana hi vamani leswaku hi kanakana swiboho kumbe swiendlo swa yena? Loko kokwa wa hina Yobo a ve ni vonelo leri hoxeke hi leswi Xikwembu xi swi endleke eka vanhu, Yehovha u n’wi ololoxile, a n’wi vutisa a ku: “Xana u nga endla leswaku vululami bya mina byi nga tirhi? Xana u nga ndzi vula wo homboloka leswaku wena u ta va wo lulama?” Endzhaku Yobo u tisorile loko a vone leswaku u vulavule a nga titwi. (Yobo 40:8; 42:6) Hi nga tshuki hi endla xihoxo xa ku lumbeta Xikwembu hi nchumu wo karhi!

¹⁰ Swi le rivaleni leswaku hi ni swivangelo leswi twalaka swo pfumela leswaku Yehovha u endla leswi faneleke minkarhi hinkwayo. Hi xisekelo xexo xa ku twisisa tindlela ta Yehovha, a hi kambisiseni swiviko swimbirhi swa le Bibeleni leswi van’wana swi nga va tikelaka ku swi twisisa. Xo sungula xi katsa swiendlo swa un’wana wa vagandzeri va Xikwembu, kasi lexin’wana xi katsa vuavanyisi lebyi Xikwembu xi byi hetisiseke hi xoxe.

Ha Yini Lota A A Lave Ku Nyiketa Vana Vakwe Va Xisati Eka Ntshungu Lowu Kariheke?

11, 12. (a) Hlamusela leswi endlekeke loko Xikwembu xi rhumela tintsumi leti tiambexeke mimiri ya vanhu va nyama le Sodoma. (b) Xana xiviko lexi xi pfuxe swivutiso swihi emianakanyweni ya van’wana?

¹¹ Eka Genesa ndzima 19, hi kuma xiviko xa leswi endlekeke loko Xikwembu xi rhume tintsumi timbirhi leti tiambexeke mimiri ya vanhu va nyama le Sodoma. Lota u sindzise vaendzi lava leswaku  va etlela ekaya ra yena. Kambe hi vusiku byebyo ntshungu wa vavanuna va muti wu fike wu rhendzela yindlu wu koxa leswaku ku humesiwa vaendzi lava wu ta va endla swilo swa manyala. Lota u te hi yena hi yena a vulavurisana ni ntshungu lowu kambe ko fana ni kwala. Hi ku ringeta ku sirhelela vaendzi vakwe, Lota u te: “Vamakwerhu, ndza mi kombela, mi nga endli swo biha. Ndza mi kombela, ndzi ni vana vambirhi va vanhwanyana lava nga si tshamaka va tivana ni wanuna. Ndzi kombela ku mi humesela vona. Kutani mi va endla hilaha swi vonakaka swi ri swinene hakona ematihlweni ya n’wina. Ntsena mi nga endli nchumu eka vavanuna lava, hikuva hi swona swi endleke leswaku va ta ehansi ka ndzhuti wa lwangu ra mina.” Ntshungu lowu a wu lavanga ku twa nchumu naswona a ku sale katsongo wu tshova ni rivanti. Eku heteleleni, tintsumi teto ta vaendzi ti be ntshungu wolowo wo tihlanganisa nhloko hi riphume.—Genesa 19:1-11.

¹² Kunene, xiviko lexi xi pfuxe swivutiso emianakanyweni ya van’wana. Va tivutisa: ‘Xana swi tise ku yini leswaku Lota a ringeta ku sirhelela vaendzi vakwe hi ku lava ku nyiketa vana va yena eka ntshungu lowu tsandzekaka ku tikhoma? Xana a nga endlanga xihoxo, naswona xana leswi a swi endleke a swi kombisi vutoya ke?’ Malunghana ni mhaka leyi, ha yini Xikwembu xi huhutele Petro a vula leswaku Lota i ‘munhu wo lulama’? Xana Xikwembu xi swi amukerile leswi Lota a swi endleke? (2 Petro 2:7, 8) A hi anakanyisiseni hi mhaka leyi leswaku hi nga gimeti hi swilo leswi hoxeke.

13, 14. (a) Hi fanele hi lemuka yini malunghana ni xiviko xa le Bibeleni xa swiendlo swa Lota? (b) I yini lexi kombaka leswaku Lota a nga vanga na vutoya?

¹³ Xo sungula, hi fanele hi xiya leswaku Bibele yi vika ntsena leswi endlekeke, ematshan’weni yo bumabumela kumbe ku sola leswi Lota a swi endleke. Nakambe Bibele a yi hi byeli leswi Lota a a anakanya swona kumbe leswi n’wi susumeteleke ku endla leswi a swi endleke. Loko a pfuka hi nkarhi wa “ku pfuxiwa ka lava lulameke,” kumbexana u ta hlamusela vuxokoxoko bya kona.—Mintirho 24:15.

¹⁴ Lota a a nga ri toya. A a langutane ni xiyimo xo tika. Loko a vula leswaku vaendzi lava va te “ehansi ka ndzhuti” wa lwangu ra yena, Lota a a kombisa leswaku a a titwa a bohekile ku va sirhelela ni ku va nyika vutumbelo. Kambe sweswo a swi nga ta olova. Josephus loyi a nga n’wamatimu wa Muyuda u vika leswaku Vasodoma a “va endla swo homboloka eka vanhu van’wana, naswona a va nga xi chavi Xikwembu . . . A va venga switaswifamba, naswona a va mbombomele va twelela emikhuveni ya Vusodoma.” Kambe Lota a nga chavanga ku kongomana ni ntshungu wolowo wa nsele. Ku hambana ni sweswo, u humile a ya vulavurisana ni vavanuna volavo lava kariheke. Nakambe u “[pfale] nyangwa a ri ehandle.”—Genesa 19:6.

15. Ha yini ku nga vuriwaka leswaku Lota a nga va a endle xiendlo xakwe hikwalaho ka ripfumelo?

¹⁵ Van’wana va nga ha vutisa va ku, ‘Hambiswiritano,  ha yini Lota a a lave ku nyiketa vana vakwe eka ntshungu lowu?’ Ematshan’weni yo tibyela leswaku u swi endle hi minsusumeto yo biha, anakanya hi swilo swin’wana leswi nga ha vaka swi n’wi vangele ku endla tano. Xo sungula, swi nga endleka Lota a endle sweswo hikwalaho ka ripfumelo. Njhani? A swi kanakanisi leswaku Lota a a yi tiva ndlela leyi Yehovha a n’wi sirheleleke ha yona Sara nkata Abrahama, loyi a a ri makwavo wa tata wa Lota. Tsundzuka leswaku tanihi leswi Sara a a saseke ngopfu, Abrahama u n’wi kombele leswaku a n’wi vula makwavo, hi ku chava leswaku van’wana va nga n’wi dlaya leswaku va teka nsati wakwe. * Hikwalaho, Sara u yisiwe endlwini ya Faro. Kambe Yehovha u nghenelerile, a sivela Faro leswaku a nga endli Sara nsele. (Genesa 12:11-20) Swi nga endleka Lota a a tshemba leswaku vana vakwe va ta sirheleriwa hi ndlela leyi fanaka. Phela Yehovha u nghenelerile hi ku tirhisa tintsumi takwe, kutani vanhwanyana lava va sale va hlayisekile.

16, 17. (a) Lota a nga va a ringete ku tirhisa ndlela yihi leswaku a pfilunganya vavanuna va Sodoma? (b) Ku nga khathariseki xivangelo lexi Lota a a ri na xona, i yini lexi hi nga tiyisekaka ha xona?

¹⁶ Xiya ni swin’wana leswi nga ha vaka swi ve xivangelo xa leswi a swi endleke. Swi nga endleka leswaku Lota a a ringeta ku pfindlusa mianakanyo ya vavanuna lava. Kumbexana a a tiyiseka leswaku ntshungu lowu a wu nga ta va na mhaka na vana va yena va xisati tanihi leswi Vasodoma a va rhandza ku endla manyala ni vavanuna-kulobye. (Yudha 7) Tlhandlakambirhi, vanhwanyana lava a va vutiwe hi majaha ya le mutini wolowo, kutani swi nga endleka leswaku entshungwini wolowo a ku ri ni maxaka, vanghana kumbe vatirhi-kulobye va majaha lawa. (Genesa 19:14) Kumbexana Lota a a tshemba leswaku vuxaka byebyo a byi ta endla leswaku vavanuna van’wana entshungwini wolowo va sirhelela vana vakwe. Kutani loko ntshungu wu avanile a wu nga ta va ni khombo ngopfu. *

¹⁷ Ku nga khathariseki leswaku mianakanyo ni minsusumeto ya Lota a yi ri yihi, hi nga tiyiseka hi mhaka leyi: Tanihi leswi Yehovha a endlaka leswi faneleke minkarhi hinkwayo, u fanele a ve ni xivangelo lexinene xa ku teka Lota a ri ‘munhu wo lulama.’ Naswona loko hi anakanya hi swiendlo swa ntshungu wa Vasodoma lowu pfindlukeke mianakanyo, hi namba hi swi vona xikan’we leswaku a swi fanerile hakunene leswaku Yehovha a avanyisa vaaki va muti wolowo wo homboloka.—Genesa 19:23-25.

Ha Yini Yehovha A Dlaye Uzza?

18. (a) Ku endleke yini loko Davhida a ringeta ku yisa Areka eYerusalema? (b) Xana xiviko lexi xi pfuxa xivutiso xihi?

¹⁸ Xiviko xin’wana lexi nga pfilunganyaka van’wana i xa malunghana ni matshalatshala ya Davhida ya ku yisa areka ya ntwanano eYerusalema. Areka yi tlhandlekiwe ehenhla ka golonyi leyi nga kongomisiwa hi Uzza na makwavo. Bibele yi ri: “Hakatsongo-tsongo va fika exivuyeni xa Nakona, kutani Uzza a tshambulutela voko eka areka ya Xikwembu xa ntiyiso, a yi khoma, hikuva a ku sele katsongo tihomu ti yi wisa. Hiloko ku hlundzuka ka Yehovha ku pfurhela Uzza, Xikwembu xa ntiyiso xi n’wi dlayela kwalaho, hikwalaho ka xiendlo lexi pfumalaka xichavo, kutani a fela kwalaho ekusuhi ni areka ya Xikwembu xa ntiyiso.” Endzhaku ka tin’hweti swilo swi fambe kahle loko Areka yi fambisiwa hi ndlela leyi Xikwembu a xi lava yona, loko Valevhi lava nga vana va Kohata va yi rhwala emakatleni. (2 Samuwele 6:6, 7; Tinhlayo 4:15; 7:9; 1 Tikronika 15:1-14) Van’wana va nga ha vutisa: ‘Ha yini Yehovha a teke goza ra vukarhi swonghasi? Phela Uzza a a ringeta ku ponisa Areka.’ Leswaku hi nga gimeti hi ndlela leyi hoxeke, ku ni timhaka ta nkoka leti hi faneleke hi ti kambisisa.

19. Ha yini swi nga koteki leswaku Yehovha a endla swilo leswi hombolokeke?

¹⁹ Hi nga rivali leswaku Yehovha a nge pfuki a endle swilo swo homboloka. (Yobo 34:10) Phela a swi ta vula leswaku a nga na rirhandzu, kasi hi ku ya hi leswi hi swi dyondzeke eBibeleni ha swi tiva leswaku “Xikwembu i rirhandzu.” (1 Yohane 4:8) Tlhandlakambirhi, Matsalwa ma hi byela leswaku “ku lulama ni vuavanyisi i ndhawu ya xiluvelo xa  [Xikwembu].” (Pisalema 89:14) Kutani xana Yehovha a nga swi kotisa ku yini ku endla swo homboloka? Loko a endla tano a a ta tsekatsekisa xisekelo xa vuhosi byakwe.

20. Ha yini Uzza a a fanele a tive milawu ya malunghana ni Areka?

²⁰ Tsundzuka leswaku Uzza a a fanele a tiva ku antswa. Areka a yi fanekisela vukona bya Yehovha. Nawu a wu swi veke erivaleni leswaku vanhu lava nga pfumeleriwangiki a va nga fanelanga va yi khumba, naswona a wu swi veke hi ku kongoma leswaku lava nga ta yi khumba a va ta xupuriwa hi rifu. (Tinhlayo 4:18-20; 7:89) Hikwalaho, ku rhurhisiwa ka bokisi rero ro kwetsima a ku nga ri mhaka yitsongo. Swi le rivaleni leswaku Uzza a a ri Mulevhi (hambileswi a a nga ri muprista), kutani a a fanele a wu tiva kahle Nawu. Nakambe, Areka yi hete malembe yi hlayisiwe endlwini ya tata wakwe. (1 Samuwele 6:20–7:1) Yi tshame kona malembe ya kwalomu ka 70, ku fikela loko Davhida a endla xiboho xa ku yi rhurhisa. Kutani swi le rivaleni leswaku Uzza u tive milawu ya malunghana ni Areka yoleyo ku sukela evuhlangini.

21. Emhakeni ya Uzza, ha yini swi ri swa nkoka ku tsundzuka leswaku Yehovha u vona minsusumeto ya mbilu?

²¹ Hilaha swi boxiweke hakona eku sunguleni, Yehovha u kota ku tiva timbilu ta vanhu. Tanihi leswi Rito rakwe ri vulaka leswaku leswi Uzza a swi endleke i “xiendlo lexi pfumalaka xichavo,” Yehovha a nga va a vone nsusumeto wa vutianakanyi lowu nga hlamuseriwiki hi ku kongoma eka xiviko lexi. Xana swi nga endleka leswaku Uzza a a ri wanuna la tivonaka, loyi a nga ni mboyamelo wa ku tlula mindzilikana leyi vekiweke? (Swivuriso 11:2) Xana a nga va a sungule ku mila makatla hi ku vona mahlo ya vanhu loko a rhangele Areka, kasi ndyangu wa ka vona a wu yi hlayise nkarhi wo leha wu nga voniwi hi munhu? (Swivuriso 8:13) Xana Uzza a a pfumala ripfumelo lerova a anakanya leswaku Yehovha a nga tsandzeka ku khoma bokisi ro kwetsima leri a ri fanekisela vukona bya Yena? Ku nga khathariseki xivangelo xa kona, hi nga tiyiseka leswaku leswi Yehovha a swi endleke a swi fanerile. U fanele a vone swo karhi embilwini ya Uzza leswi N’wi susumeteleke ku teka goza ra xihatla.—Swivuriso 21:2.

Xivangelo Lexinene Xa Ku Tiyiseka

22. Ku va Rito ra Yehovha ri pfa ri siya timhaka tin’wana swi kombisa vutlhari bya yena hi ndlela yihi?

²² Ku va Rito ra Yehovha ri pfa ri siya timhaka tin’wana swi kombisa vutlhari bya yena lebyi nga ringanisiwiki na nchumu. Hi ndlela yoleyo Yehovha u hi nyika nkarhi wa ku kombisa leswaku ha n’wi tshemba. Timhaka leti hi ti kambisiseke ti swi veka erivaleni leswaku hi ni swivangelo leswi twalaka swa ku amukela vuavanyisi bya Yehovha. Phela, loko hi kambisisa Rito ra Xikwembu hi mbilu leyinene ni mianakanyo leyi naveke, hi dyondza swo tala swinene hi Yehovha, kutani hi kholwa leswaku minkarhi hinkwayo u endla leswi lulameke ni leswi faneleke. Hikwalaho, loko swiviko swin’wana swa le Bibeleni swi hi siya ni swivutiso swo karhi leswi hi nga kotiki ku kuma tinhlamulo ta swona hi xihatla, a hi tiyisekeni leswaku leswi Yehovha a swi endleke a swi fanerile.

23. Hi kwihi ku tiyiseka loku hi nga vaka na kona malunghana ni swiendlo swa Yehovha swa le nkarhini lowu taka?

²³ Hi nga va ni vonelo leri fanaka hi swiendlo swa Yehovha swa le nkarhini lowu taka. Hikwalaho, hi nga tiyiseka leswaku loko a hetisisa vuavanyisi byakwe hi nkarhi wa nhlomulo lowukulu lowu tshinelaka, a nge “[kukuli] wo lulama swin’we ni wo homboloka.” (Genesa 18:23) Ku rhandza ka yena vululami a ku nge n’wi pfumeleli leswaku a endla sweswo. Nakambe hi nga tiyiseka hi ku helela leswaku emisaveni leyintshwa leyi taka, u ta enerisa swilaveko swa hina hinkwaswo hi ndlela ya kona.—Pisalema 145:16.

[Tinhlamuselo ta le hansi]

Wa Tsundzuka Xana?

• Hikwalaho ka yini hi fanele hi amukela vuavanyisi bya Yehovha?

• I yini lexi nga hi pfunaka ku papalata ku gimeta hi ndlela leyi hoxeke malunghana ni ku va Lota a lave ku nyiketa vana vakwe eka ntshungu lowu kariheke?

• I timhaka tihi leti nga hi pfunaka ku twisisa xivangelo xa ku va Yehovha a dlaye Uzza?

• Hi kwihi ku tiyiseka loku hi nga vaka na kona malunghana ni swiendlo swa Yehovha swa le nkarhini lowu taka?

[Swivutiso Swa Dyondzo]