I Mani La Nga Ta Phamela Misava?

HI KU ya hi mpimanyeto wa World Food Programme, ku nga ndzawulo ya Nhlangano wa Matiko leyi lwisanaka ni ndlala, vanhu va 800 wa timiliyoni—vo tala va vona ku nga vana—va le kusuhi ni ku sika. Nhlangano wolowo wa ha ku vula leswaku rifuwo ni nkhathalelo lowu matiko yo tala lama hluvukeke a ma ta va ma wu tirhisile exiyin’weni lexi swi koxiwe hi swiphiqo swin’wana, swo tanihi vutherorisi. Ku hangalaka ka mavabyi lama tlulelaka swi nyanyise xiphiqo lexi. Global School Feeding Report ya ndzawulo leyi yi vule leswi landzelaka malunghana ni matiko ya laha Afrika lama hlaseriweke swinene hi AIDS: “Vatswari va fa va ha ri vatsongo. Vana lava va va siyaka hakanyingi va fanele va sala va tivonela, lava vo tala va vona va nga swi kotiki na ku rima naswona a va na vutivi malunghana ni vutomi bya siku ni siku lebyi xitukulwana xin’wana xi byi dyondzisaka xin’wana.”

World Food Programme yi endla matshalatshala ya leswaku vana va nyikiwa swakudya hambi ko va kan’we hi siku exikolweni. Xikongomelo xa kona a hi ku hunguta ndlala ntsena kambe ni ku sungula minongonoko yin’wana leyi endleriweke ku sivela HIV/AIDS exikarhi ka vantshwa, hi ku va dyondzisa nkarhi na nkarhi.

Laha nongonoko wolowo se wu tirhaka, vana va nyikiwa swakudya, va leteriwa ndlela yo sivela mavabyi va tlhela va kuma mpfuno wun’wana. Ku tlhele ku xiyiwa leswaku laha vanhu va cincaka mahanyelo ya vona, nhlayo ya lava tluleriwaka hi HIV/AIDS ya hunguteka.

Khombo ra kona, matshalatshala ya vanhu ma tsandzeka eka swin’wana naswona a wu nge titshegi hi wona ngopfu. Kambe Bibele yi nyikela xitshembiso lexi chavelelaka malunghana ni ntlhantlho wo xi herisela makumu xiphiqo xa ndlala. Pisalema 72:16 yi ri: “Ku ta va ni mavele yo tala emisaveni.” Ehansi ka Mfumo wa Xikwembu, vanhu va ta swi kota ku vula leswi malunghana na Yehovha Xikwembu: “U hundzuluxele nyingiso wa wena emisaveni, leswaku u ta yi nyika hi vutalo . . . U lunghiselela tindzoho ta vona, hikuva hi yona ndlela leyi u lunghiselelaka misava ha yona.”—Pisalema 65:9.

[Laha Xifaniso Xi Humaka Kona eka tluka 32]

WFP/Y. Yuge