Ku Hlayisa Mfungho Wa Hina Wa Vukreste
Ku Hlayisa Mfungho Wa Hina Wa Vukreste
“‘N’wina mi timbhoni ta mina,’ ku vula Yehovha.”—ESAYA 43:10.
1. Yehovha u koka vanhu va muxaka muni leswaku va ta eka yena?
LOKO u ri eHolweni ya Mfumo, halahala etlhelo ka wena hi vukheta. Xana i vamani lava u va vonaka endhawini leyi ya vugandzeri? U nga ha vona vantshwa va ri karhi va tswonga vutlhari bya le Matsalweni hi ku tiyimisela. (Pisalema 148:12, 13) Kumbexana u ta tlhela u vona tinhloko ta mindyangu ti tikarhatela ku tsakisa Xikwembu loko ti ri karhi ti hanya emisaveni leyi nga xiximiki vutomi bya ndyangu. Swi nga ha endleka u tlhela u vona ni vadyuhari lava rhandzekaka, lava lwelaka ku hanya hi ku pfumelelana ni ku tinyiketela ka vona eka Yehovha ku nga khathariseki swiphiqo swa vudyuhari. (Swivuriso 16:31) Hinkwavo ka vona va n’wi rhandza swinene Yehovha. Naswona u vone swi fanerile ku va ni vuxaka na vona. N’wana wa Xikwembu u te: “Ku hava munhu loyi a nga taka eka mina handle ka loko Tatana, loyi a ndzi rhumeke, a n’wi koka.”—Yohane 6:37, 44, 65.
2, 3. Ha yini swi nga vaka ntlhontlho ku hlayisa mfungho lowu tiyeke wa Vukreste?
2 Ha tsaka ku va xiphemu xa vanhu lava tsakeriwaka va tlhela va katekisiwa hi Yehovha. Kambe, swa tika ku hlayisa mfungho wa hina wa Vukreste ‘eminkarhini leyi ya mangava leyi swi nonon’hwaka ku langutana na yona.’ (2 Timotiya 3:1) Sweswo swi tano ngopfu-ngopfu eka vantshwa lava kurisiwaka emindyangwini ya Vukreste. Muntshwa un’wana wo tano u pfumerile: “Hambileswi a ndzi ya eminhlanganweni ya Vukreste, a ndzi nga ri na tipakani ta moya naswona ku vula ntiyiso, a ndzi nga swi naveli ku tirhela Yehovha.”
3 Van’wana hambileswi va swi navelaka hi mbilu hinkwayo ku tirhela Yehovha, va nga ha kavanyetiwa hi ntshikilelo lowukulu wa tintangha, minkucetelo ya misava ni mboyamelo wa vudyoho. Loko hi ri ni ntshikilelo lowukulu, sweswo swi nga ha endla leswaku hi lahlekeriwa hi mfungho wa hina wa Vukreste hakatsongo-tsongo. Hi xikombiso, vo tala emisaveni namuntlha va teka minkongomiso ya mahanyelo ya le Bibeleni tanihi leyi hundzeriweke hi nkarhi kumbe leyi nga fikelelekiki emisaveni ya hina ya namuntlha. (1 Petro 4:4) Van’wana va vona onge a hi swa nkoka ku gandzela Xikwembu hi ndlela leyi xi lavaka hi xi gandzela ha yona. (Yohane 4:24) Eka papila ra yena leri yaka eka Vaefesa, Pawulo u vule leswaku misava yi ni “moya,” kumbe langutelo leri ri yi lawulaka. (Vaefesa 2:2) Moya wolowo wu tshikilela vanhu leswaku va pfumelelanisa mianakanyo ya vona ni ya vanhu lava nga tiviki Yehovha.
4. Yesu u xi kandziyise njhani xilaveko xo hlayisa mfungho wa hina lowu vonakaka kahle wa Vukreste?
4 Hambiswiritano, tanihi malandza lama tinyiketeleke ya Yehovha, ha swi xiya leswaku swi nga va ni khombo eka un’wana ni un’wana wa hina—lontsongo kumbe lonkulu—ku lahlekeriwa hi mfungho wa hina wa Vukreste. Langutelo leri faneleke ra mfungho wa Vukreste ri nga sekeriwa ntsena eka minkongomiso ya Yehovha ni leswi a swi languteleke eka hina. Phela, hi vumbiwe hi xifaniso xa yena. (Genesa 1:26; Mikiya 6:8) Bibele yi fanisa mfungho wa hina lowu vonakaka kahle wa Vukreste ni tinguvu ta le handle, leti voniwaka hi vanhu hinkwavo. Malunghana ni minkarhi ya hina, Yesu u tsundzuxile: “Maswivo! Ndzi ta ku fana ni khamba. Wa tsaka loyi a tshamaka a hitekile, a hlayisa tinguvu takwe ta le handle, leswaku a nga fambi a nga ambalanga kutani vanhu va hlalela tingana takwe.” * (Nhlavutelo 16:15) A hi lavi ku hluvula timfanelo ni minkongomiso ya hina ya mahanyelo ya Vukreste kutani hi pfumelela misava ya Sathana yi hi cinca. Loko sweswo swo humelela, hi ta hluvuriwa ‘tinguvu leti ta le handle.’ Xiyimo xo tano xi nga terisa vusiwana xi tlhela xi nyumisa.
5, 6. Ha yini ku tiya hi tlhelo ra moya ku ri ka nkoka?
5 Mfungho lowu tiyeke wa Vukreste wu yi khumba swinene ndlela leyi munhu a nga ta hanya vutomi bya yena ha yona. Njhani? Loko mugandzeri wa Yehovha o lahlekeriwa hi mfungho wa yena, a nga ha hetelela a kavanyetiwile, a nga ha ri na nkongomiso kumbe tipakani letinene. Bibele yi tshamela ku tsundzuxa malunghana ni xiyimo xo tano xa ku kanakana. Mudyondzisiwa Yakobo u tsundzuxile: “Loyi a kanakanaka u fana ni gandlati ra lwandle leri fambisiwaka hi mheho ri hungeriwa hala ni hala. Entiyisweni, munhu yoloye a nga tshuki a ehleketa leswaku u ta amukela nchumu hambi wu ri wihi eka Yehovha; i munhu la nga tiyisekiki, loyi a nga yimangiki a tiya etindleleni ta yena hinkwato.”—Yakobo 1:6-8; Vaefesa 4:14; Vaheveru 13:9.
6 Hi nga wu hlayisa njhani mfungho wa hina wa Vukreste? I yini lexi nga hi pfunaka ku antswisa ku twisisa ka hina lunghelo ra hina lerikulu ro va vagandzeri va La nge Henhla-henhla? Hi kombela u xiya tindlela leti landzelaka.
Tiyisa Mfungho Wa Wena Wa Vukreste
7. Ha yini swi vuyerisa ku kombela Yehovha leswaku a hi kambela?
7 Hambeta u tiyisa vuxaka bya wena na Yehovha. Nchumu wa risima swinene lowu Mukreste a nga na wona i vuxaka bya yena na Xikwembu. (Pisalema 25:14; Swivuriso 3:32) Loko hi sungula ku va ni ku kanakana malunghana ni mfungho wa hina wa Vukreste, hi fanele hi kambisisa swinene ntikelo ni ku enta ka vuxaka lebyi. Mupisalema u kombele hilaha ku faneleke a ku: “Oho Yehovha, ndzi kambele, u ndzi ringa; tengisa tinso ta mina ni mbilu ya mina.” (Pisalema 26:2) Ha yini ku kamberiwa ko tano ku ri ka nkoka? Hikuva hina hi hexe a hi nge swi koti ku kambisisa minsusumeto ya hina leyi enteke ni mimboyamelo leyi dzikeke hi ndlela leyi tshembekaka. I Yehovha ntsena la kotaka ku twisisa munhu wa hina wa le ndzeni—minsusumeto, mianakanyo ni mintlhaveko ya hina.—Yeremiya 17:9, 10.
8. (a) Ku ringiwa hi Yehovha swi nga hi vuyerisa njhani? (b) U pfuniwe njhani leswaku u endla nhluvuko tanihi Mukreste?
8 Loko hi kombela Yehovha leswaku a hi kambela, hi n’wi rhamba leswaku a hi ringa. A nga ha pfumelela leswaku hi humeleriwa hi swiyimo swo karhi leswi paluxaka minsusumeto ya hina ya ntiyiso ni xiyimo xa mbilu ya hina. (Vaheveru 4:12, 13; Yakobo 1:22-25) Hi fanele hi yi amukela miringo yo tano hikuva yi hi nyika nkarhi wo kombisa ku enta ka ku tshembeka ka hina eka Yehovha. Miringo yoleyo yi nga kombisa loko hi “[helerile] ni ku va lava hanyeke etimhakeni hinkwato, [hi] nga kayiveli nchumu.” (Yakobo 1:2-4) Naswona loko hi ri karhi hi ringiwa, hi nga kula hi tlhelo ra moya.—Vaefesa 4:22-24.
9. Xana swa boha ku khorwiseka leswaku leswi Bibele yi swi dyondzisaka i ntiyiso? Hlamusela.
9 Khorwiseka leswaku leswi Bibele yi swi dyondzisaka i ntiyiso. Mfungho wa hina wa ku va malandza ya Yehovha wu nga tsana loko wu nga sekeriwanga hilaha ku tiyeke eka vutivi bya Matsalwa. (Vafilipiya 1:9, 10) Mukreste un’wana ni un’wana—lontsongo kumbe lonkulu—u fanele a tikhorwisa hilaha ku enerisaka leswaku leswi a swi pfumelaka hakunene i ntiyiso hilaha wu nga hakona eBibeleni. Pawulo u khutaze vapfumeri-kulobye a ku: “Tiyisekani hi swilo hinkwaswo; khomelelani swi tiya eka leswinene.” (1 Vatesalonika 5:21) Vakreste lava ha riki vantshwa lava tshamaka emindyangwini leyi chavaka Xikwembu va fanele va swi xiya leswaku a va nge vi Vakreste va ntiyiso hikwalaho ka ripfumelo ra vatswari va vona. Davhida, tata wa Solomoni u n’wi khutaze ku “tiva Xikwembu xa tata wa [yena a] xi tirhela hi mbilu leyi heleleke.” (1 Tikronika 28:9) A swi ta va swi nga enelanga leswaku Solomoni loyi a a ha ri ntsongo a hlalela tata wakwe loko a tiyisa ripfumelo rakwe eka Yehovha. A a fanele a tiva Yehovha hi yexe, naswona u swi endlile sweswo. U kombele Xikwembu a ku: “Sweswi ndzi nyike vutlhari ni vutivi leswaku ndzi huma ni ku nghena emahlweni ka vanhu lava.”—2 Tikronika 1:10.
10. Ha yini swi nga bihanga ku vutisa swivutiso leswi humaka embilwini leswi vutisiwaka hi nsusumeto lowunene?
10 Ripfumelo leri tiyeke ri akiwa ehenhla ka vutivi. Pawulo u te: “Ripfumelo ri landzela leswi twiweke.” (Varhoma 10:17) Xana a a vula yini hi marito wolawo? A a vula leswaku loko hi tiwundla hi Rito ra Xikwembu, hi tiyisa ripfumelo ni ntshembo wa hina eka Yehovha, switshembiso swa yena ni nhlengeletano ya yena. Ku vutisa swivutiso leswi humaka embilwini malunghana ni Bibele swi nga endla leswaku hi kuma tinhlamulo leti khutazaka. Ku tlula kwalaho, eka Varhoma 12:2, hi kuma ndzayo ya Pawulo leyi nge: “Mi ta tiyiseka hi ku rhandza ka Xikwembu loku nga kunene ni loku amukelekaka ni loku hetisekeke.” Xana sweswo hi nga swi fikelela njhani? Hi ku kuma “vutivi lebyi kongomeke bya ntiyiso.” (Tito 1:1) Moya wa Yehovha wu nga hi pfuna leswaku hi twisisa ni timhaka leti tikaka. (1 Vakorinto 2:11, 12) Hi fanele hi khongelela mpfuno wa Xikwembu loko hi ri ni swiphiqo swo twisisa nchumu wo karhi. (Pisalema 119:10, 11, 27) Yehovha u lava leswaku hi twisisa Rito ra yena, hi ri tshemba hi tlhela hi ri yingisa. Wa swi tsakela swivutiso leswi humaka embilwini leswi vutisiwaka hi nsusumeto lowunene.
Tiyimisele Ku Tsakisa Xikwembu
11. (a) I ku navela kwihi ka ntumbuluko loku nga hi phasaka? (b) Hi nga xi kuma kwihi xivindzi xo lwisana ni ntshikilelo wa tintangha?
11 Tiyimisele ku tsakisa Xikwembu ku nga ri vanhu. I swa ntumbuluko ku tiyisa mfungho wa hina hi ku tihlanganisa ni ntlawa wo karhi. Munhu un’wana ni un’wana wa va lava vanghana, naswona ha tsaka loko hi amukeriwa hi van’wana. Emalembeni ya kondlo-a-ndzi-dyi—hambiloko se hi kurile—ntshikilelo wa tintangha wu nga va ni matimba, wu vanga ku navela lokukulu ko lava ku tekelela kumbe ku tsakisa van’wana. Kambe a hi minkarhi hinkwayo vanghana ni tintangha va khathalaka hi vuhlayiseki bya hina. Minkarhi yin’wana vo lava munhu la nga ta va joyina eku endleni ka swilo leswo biha. (Swivuriso 1:11-19) Loko Mukreste a hluriwa hi ntshikilelo lowo biha wa tintangha, hi ntolovelo u ringeta ku fihla leswi a nga swona. (Pisalema 26:4) Muapostola Pawulo u tsundzuxile: ‘Mi nga tshuki mi tifanisa ni misava leyi.’ (Varhoma 12:2, Bibele Ya Xitsonga) Yehovha u hi nyika matimba ya le ndzeni lawa hi ma lavaka leswaku hi lwisana ni ntshikilelo wihi na wihi wo endla leswo biha.—Vaheveru 13:6.
12. Hi wihi nsinya wa nawu ni xikombiso lexi nga hi tiyisaka leswaku hi tshama hi tiyile eripfumelweni loko ku tshemba ka hina Xikwembu ku katseka?
12 Loko ntshikilelo wa le handle wu xungeta ku onha mfungho wa hina wa Vukreste, hi fanele hi tsundzuka leswaku ku tshembeka ka hina eka Xikwembu i ka nkoka swinene ku tlula langutelo ra vanhu kumbe mboyamelo wa vunyingi bya vanhu. Marito ya Eksoda 23:2 i nsinya wa nawu lowu sirhelelaka: “U nga tshuki u landzelela ntshungu lowu nga ni swikongomelo swo biha.” Loko Vaisrayele-kulobye vo tala va kanakane vuswikoti bya Yehovha byo hetisisa switshembiso Swakwe, Kalebe u ale ku landzelela ntshungu. A a tiyiseka leswaku switshembiso swa Xikwembu a swi tshembeka, naswona u hakeriwe hi ndlela leyikulu hikwalaho ka langutelo ra yena. (Tinhlayo 13:30; Yoxuwa 14:6-11) Xana na wena u tiyimiserile ku lwisana ni ntshikilelo wa langutelo leri andzeke leswaku u ta hlayisa vuxaka bya wena na Xikwembu?
13. Ha yini ku ri vutlhari ku tivisa van’wana leswaku u Mukreste?
13 Tivisa van’wana leswaku u Mukreste. Loko swi ta eku lweleni ka mfungho wa hina wa Vukreste, xi tiyisile xivuriso lexi nge, xitsema-nkanu i ku lwa. Loko Vaisrayele vo tshembeka va langutane ni nkaneto wo lwisana ni matshalatshala ya vona yo endla ku rhandza ka Yehovha enkarhini wa Ezra, va te: “Hina hi malandza ya Xikwembu xa matilo ni misava.” (Ezra 5:11) Loko hi khumbiwa hi n’wangulo ni ku sandziwa hi vanhu va tihanyi, hi nga ha khomiwa hi ku chava. Loko minkarhi hinkwayo hi ringeta ku tsakisa vanhu hinkwavo, sweswo swi ta tsanisa ku humelela ka hina. Hikwalaho u nga chavisiwi. I swinene leswaku minkarhi hinkwayo u tivisa van’wana leswaku u Mbhoni ya Yehovha. U nga va hlamusela van’wana hi ndlela ya xichavo kambe leyi tiyeke malunghana ni mimpimanyeto ya wena, leswi u swi pfumelaka ni xiyimo xa wena tanihi Mukreste. Tivisa van’wana leswaku u tiyimisele ku hlayisa mimpimanyeto leyi tlakukeke ya Yehovha etimhakeni leti khumbaka ku tikhoma. Swi veke erivaleni leswaku a wu nge ku landzuli ku tshembeka ka wena ka Vukreste. Swi kombise leswaku wa tibuma hi mimpimanyeto ya wena ya mahanyelo. (Pisalema 64:10) Ku va la hambaneke tanihi Mukreste la tiyeke swi nga ku tiyisa, swi ku sirhelela swi tlhela swi susumetela van’wana ku lava ku tiva malunghana na Yehovha ni vanhu vakwe.
14. Xana ku hlekuriwa ni ku kanetiwa swi fanele swi hi heta matimba? Hlamusela.
14 Ina, van’wana va nga ha ku hlekula kumbe va ku kaneta. (Yudha 18) Loko van’wana va nga yingisi loko u va hlamusela mimpimanyeto ya wena, u nga heli matimba. (Ezekiyele 3:7, 8) Ku nga khathariseki leswaku u tiyimisele ku fikela kwihi, a wu nge va khorwisi vanhu lava nga swi naveliki ku khorwisiwa. Tsundzuka Faro. Ku hava khombo kumbe singita—hambiloko a feriwe hi mativula yakwe—leri koteke ku khorwisa Faro leswaku Muxe a a ri muvulavuleri wa Yehovha. Hikwalaho, u nga pfumeli ku hetiwa matimba hi ku chava vanhu. Ku tshemba ni ku va ni ripfumelo eka Xikwembu swi nga hi pfuna leswaku hi hlula ku chava.—Swivuriso 3:5, 6; 29:25.
Dyondza Eka Swilo Swa Nkarhi Lowu Hundzeke, Akela Vumundzuku
15, 16. (a) I yini ndzhaka ya hina ya moya? (b) Hi nga vuyeriwa njhani hi ku anakanyisisa hi ndzhaka ya hina ya moya hi ku pfuniwa hi Rito ra Xikwembu?
15 Tlangela ndzhaka ya wena ya moya. Hi ku tirhisa Rito ra Xikwembu, Vakreste va ta vuyeriwa loko va anakanyisisa hi ndzhaka ya vona ya moya leyi fuweke. Ndzhaka leyi yi katsa ntiyiso wa Rito ra Yehovha, ntshembo wa vutomi lebyi nga heriki ni lunghelo ra ku yimela Xikwembu tanihi vahuweleri va mahungu lamanene. Xana wa xi vona xiphemu lexi u nga na xona exikarhi ka Timbhoni ta xona, eka ntlawa wa vanhu lava katekeke lowu lerisiweke ku endla ntirho lowu ponisaka vutomi wa ku chumayela hi Mfumo? Tsundzuka, i Yehovha loyi a nge: “N’wina mi timbhoni ta mina.”—Esaya 43:10.
16 U nga tivutisa swivutiso swo tanihi leswi nge: ‘Xana ndzhaka leyi ya moya i ya risima ku fikela kwihi eka mina? Xana ndzi yi teka yi ri ya nkoka hi ndlela leyi faneleke lerova ndzi teka ku endla ku rhandza ka Xikwembu ku ri ka nkoka swinene evuton’wini bya mina? Xana ku yi tlangela ka mina ku tiye swinene lerova ku nga ndzi tiyisa leswaku ndzi lwisana ni ndzingo wihi ni wihi lowu nga endlaka leswaku yi ndzi lahlekela?’ Ndzhaka ya hina ya moya yi nga tlhela yi endla hi titwa hi sirhelelekile swinene hi tlhelo ra moya, ku nga nsirhelelo lowu wu kumekaka ntsena enhlengeletanweni ya Yehovha. (Pisalema 91:1, 2) Ku kambisisa swiendlakalo leswi xiyekaka swa matimu ya manguva lawa ya nhlengeletano ya Yehovha swi nga hi tiyisekisa leswaku a ku na munhu kumbe nchumu lexi nga herisaka vanhu va Yehovha emisaveni.—Esaya 54:17; Yeremiya 1:19.
17. I yini xin’wana lexi lavekaka handle ko titshega ntsena hi ndzhaka ya hina ya moya?
17 Ina, a hi nge titshegi ntsena hi ndzhaka ya hina ya moya. Un’wana ni un’wana wa hina u fanele a va ni vuxaka lebyikulu na Xikwembu. Endzhaku ka loko Pawulo a tirhe hi matimba leswaku a tiyisa ripfumelo ra Vakreste va le Filipiya, u va tsalerile a ku: “Hikwalaho, varhandziwa, hi ndlela leyi mi yingiseke ha yona nkarhi hinkwawo, ku nga ri hi nkarhi wa vukona bya mina ntsena, kambe ngopfu-ngopfu mi tiyimisele ku yingisa loko ndzi nga ri kona, hambetani mi tirhela ku ponisiwa ka n’wina hi ku chava ni ku rhurhumela.” (Vafilipiya 2:12) A hi nge titshegi hi munhu un’wana malunghana ni ku ponisiwa ka hina.
18. Mintirho ya Vukreste yi nga wu kurisa njhani mfungho wa hina wa Vukreste?
18 Tinyiketele swinene emintirhweni ya Vukreste. Swi xiyiwile leswaku “ntirho wu ni nkucetelo lowukulu eka mfungho wa munhu.” Vakreste namuntlha va lerisiwe ku endla ntirho wa nkoka wa ku chumayela mahungu lamanene ya Mfumo wa Xikwembu lowu simekiweke. Pawulo u te: “Hikuva tanihi leswi hakunene ndzi nga muapostola eka matiko, ndzi vangamisa vutirheli bya mina.” (Varhoma 11:13) Ntirho wa hina wo chumayela wu hi hambanisa ni misava, naswona ku hlanganyela ka hina eka wona swi kurisa mfungho wa hina wa Vukreste. Ku tinyiketela swinene eka mintirho yin’wana ya swa le tilweni, yo tanihi minhlangano ya Vukreste, minongonoko yo aka tindhawu to gandzela eka tona, matshalatshala yo pfuna lava pfumalaka ni swin’wana swo fana ni sweswo, swi nga kurisa mfungho wa hina wa Vukreste.—Vagalatiya 6:9, 10; Vaheveru 10:23, 24.
Mfungho Lowu Vonakaka Wu Tisa Mikateko Ya Xiviri
19, 20. (a) U vuyeriwe hi yini hi ku va Mukreste? (b) I yini lexi hi nyikaka xisekelo xa leswi hi nga swona hakunene?
19 Anakanya katsongo hi vuyelo byo tala lebyi hi byi kumaka hileswi hi nga Vakreste va ntiyiso. Hi ni lunghelo ro tiviwa hi ku kongoma hi Yehovha. Muprofeta Malakiya u te: “Lava va chavaka Yehovha va vulavurisanile, un’wana ni un’wana ni nakulobye, Yehovha a hambeta a rhiya ndleve, a yingisa. Kutani buku ya xitsundzuxo yi sungula ku tsariwa emahlweni ka yena yi tsaleriwa lava va chavaka Yehovha ni lava va anakanyaka hi vito ra yena.” (Malakiya 3:16) Xikwembu xi nga hi languta tanihi vanghana va xona. (Yakobo 2:23) Vutomi bya hina bya antswisiwa hi ku va ni xikongomelo lexi twalaka, hi nhlamuselo leyi enteke na hi tipakani letinene ta nkoka. Naswona hi nyikiwe ntshembo wa vumundzuku lebyi nga heriki.—Pisalema 37:9.
20 Tsundzuka leswaku i Xikwembu lexi kambisisaka leswi u nga swona ni nkoka wa wena, a xi kambisisi leswi vanhu van’wana va nga ha swi anakanyaka ha wena. Van’wana va nga ha hi kambela hi ku ya hi mimpimanyeto leyi nga fanelangiki ya vanhu. Kambe rirhandzu ra Xikwembu ni ku khathala ka xona hi hina swi hi nyika xisekelo xa xiviri xa nkoka wa hina—hi va xona. (Matewu 10:29-31) Kutani, ndlela leyi hi rhandzaka Xikwembu ha yona yi nga hi endla hi titiva kahle hi tlhela hi va ni nkongomiso lowu twalaka swinene evuton’wini bya hina. “Loko munhu a rhandza Xikwembu, u tiviwa hi xona.”—1 Vakorinto 8:3.
[Nhlamuselo ya le hansi]
^ par. 4 Marito lawa ma nga ha kombetela eka mintirho ya mulanguteri wa tempele ya le Yerusalema leyi a yi ri entshaveni. Hi nkarhi wo rindza wa nivusiku, a a famba-famba etempeleni ku vona loko varindzi va yona va Valevhi va xalamukile kumbe va etlele etindhawini leti a va rindza eka tona. Murindzi wihi na wihi loyi a a kumeka a etlele a a biwa hi nhonga, naswona a swi endleka leswaku swiambalo swa yena swa le handle swi hisiwa tanihi nxupulo lowu nyumisaka.
Wa Tsundzuka Xana?
• Ha yini swi ri swa nkoka leswaku Vakreste va hlayisa mfungho wa vona wa moya?
• Hi nga wu tiyisa njhani mfungho wa hina wa Vukreste?
• Loko hi langutane ni mhaka ya leswaku hi fanele hi tsakisa mani, hi swihi swilo leswi nga hi pfunaka ku endla xiboho lexi faneleke?
• Xana mfungho lowu tiyeke wu nga byi khumba njhani vumundzuku bya hina tanihi Vakreste?
[Swivutiso Swa Dyondzo]
[Swifaniso leswi nga eka tluka 21]
Ku tinyiketela swinene emintirhweni ya Vukreste swi nga kurisa mfungho wa hina wa Vukreste