Ku Tlhandlukela eXimutanini Lexi Vuriwaka The Bottom Xa Le Saba

XIHLALA xa Saba lexi lawuriwaka hi Madachi xi tshame xi va ntsindza wa tinsulavoya leti a ti tluta eLwandle ra Kharibiya ti lava leswi ti nga swi phangaka. Namuntlha, xihlala lexi lexitsongo, lexi nga mpfhuka wa 240 wa tikhilomitara evuxeni bya Puerto Rico, xi ni vaaki va kwalomu ka 1 600, laha ntlhanu wa vona va nga Timbhoni ta Yehovha. Hambiswiritano, vatirheli lava va nga ni xivindzi va lavisisa nchumu wun’wana lowu nga wa nkoka swinene ku tlula swilo leswi phangiwaka. Hi ku hiseka va lavisisa vanhu lava nga ni “mboyamelo lowunene eka vutomi lebyi nga heriki.”—Mintirho 13:48.

Mahungu lamanene ya Mfumo wa Xikwembu ma chumayeriwe ro sungula exihlaleni lexi hi June 22, 1952, loko xikepe lexi leheke 18 wa timitara lexi vuriwaka Sibia, lexi a xi fambisiwa hi Timbhoni ta Yehovha, xi fika xi yima eribuweni ra Saba. (Matewu 24:14) Gust Maki na Stanley Carter, ku nga varhumiwa va tlhandluke hi The Ladder, ku nga ndlela leyi endliweke hi switepisi swa maribye swo tlula 500 leswi tlhandlukelaka eximutanini lexi vuriwaka The Bottom, ntsindza wa Saba. * Xindledyana lexi xo lala a ku tirhisiwa xona ntsena hi malembe-xidzana yo tala leswaku ku ya fikeleriwa vaaki va xihlala lexi.

Xiviko xo sungula xa ximfumo lexi humesiweke xa ntirho wo chumayela wa Vukreste le Saba xi humelele eka Buku Ya Lembe Ya Timbhoni Ta Yehovha Ya 1966 (ya Xinghezi). Hi ku ya hi xiviko xexo, a ko va ni Mbhoni yin’we ntsena leyi hisekaka exihlaleni xexo. Endzhakunyana, ndyangu wun’wana lowu humaka eCanada wu hete malembe yo hlayanyana  wu chumayela mahungu lamanene kwalaho. Russel na Kathy, ku nga mpatswa lowu kuleke lowu humaka eUnited States, wa ha ku ya eSaba kutani wu pfuneta entirhweni wo chumayela kwalaho. Kambisisa mhaka ya vona.

Ku Endzela eSaba

Mina ni nsati wa mina hi fike hi xihaha-mpfhuka hi ri vaendzi va Ronald, loyi a a ri yena ntsena Mbhoni exihlaleni lexi exiphen’wini lexikulu xa va-1990. Hi fike hi n’wi kuma a hi rindzile erivaleni ra swihaha-mpfhuka. U tsakele nyiko ya xibokisana lexi hi teke na xona lexi nga ni matsavu, tanihi leswi ku nga rimiwiki exihlaleni lexi. Hi khandziye xibebe, hakatsongo-tsongo hi rhendzeleka ni Ntshava ya Scenery hi ya enhlohlorhini ya vholkheno yoleyo leyi tifeleke.

Hi yime eximutanini xa Hell’s Gate, laha Ronald a nga fika a kamba bodo ya switiviso a lava ku vona loko xirhambo xa nkulumo ya le rivaleni ya hi Sonto xa ha ri kona. A hi tsakile loko hi kuma leswaku xa ha ri kona. U tlulele exibebeni, kutani hi ya emahlweni ni ku tlhandluka ka hina hi ya eximutanini lexikulu xa laha xihlaleni, ku nga Windwardside. Hilaha vito ra kona ri vulaka hakona, ximutana lexi xo saseka xi le tlhelweni leri moya wu hungelaka eka rona exihlaleni lexi, eka mpfhuka wa 400 wa timitara ehenhla ka vuandlalo bya lwandle. Loko hi ri karhi hi famba exindledyanini lexi hi yisaka endlwini ya Ron, hi vone mfungho wo saseka emahlweni ka yindlu leyi, wu kombisa leswaku i Holo ya Mfumo ya Timbhoni ta Yehovha.

Hi nkarhi wa swakudya swa nhlikanhi ndzi vutise xivutiso lexi endleke leswaku hi endza laha, “Swi tise ku yini leswaku u tikuma u ri muhuweleri wa Mfumo eSaba?”

Ron u te: “Loko rhavi ra Timbhoni ta Yehovha ra le Puerto Rico ri heta ku akiwa hi 1993, mina na nsati wa mina a hi tsakela ku ya emahlweni hi tirha etikweni rimbe. A hi tshame hi endzela eSaba ni mpatswa wun’wana wa maphayona naswona a hi twe leswaku ku ni vaaki va 1 400 kambe a ku nga ri na Timbhoni. Hikwalaho hi vulavule na Komiti ya Rhavi ya le Puerto Rico malunghana ni ku navela ka hina ku rhurhela endhawini leyi.

“Swilo hinkwaswo swi fambe kahle, kukondza hi hetelela hi kume mpfumelelo wo rhurhela kona. Khombo ra kona, endzhaku ka malembe mambirhi nsati wa mina u vabye swinene, hiloko hi tlhelela eCalifornia. Endzhaku ka ku fa ka yena, ndzi tlhelele eSaba. Kahle-kahle a ndzi swi rhandzi ku sungula nchumu ndzi nga wu heti.”

Ku Chumayela Hi Yindlu Ni Yindlu eSaba

Kamara ro dzumbela eka rona ra yindlu ya Ron leyi nga ni dzana ra malembe ri tlhela ri tirha tanihi Holo ya Mfumo. * Loko ha ha dya swakudya swo fihlula naswona hi lunghiselela ku ya ensin’wini, mpfula leyi a yi hundza yi tsakamise khixi leri nga fuleriwangiki. Loko hi heta ku fihlula, a ku ri ni mapapa laha ni lahaya hiloko hi famba hi ya chumayela hi yindlu ni yindlu le The Bottom. Emutini wun’wana ni wun’wana, Ron a a xeweta vini va miti hi mavito ya vona. Bulo ra hina a ri sekeriwe emhakeni leyi a ya ha ku endleka etikweni. Vanhu vo tala va n’wi toloverile Ron ni vutirheli byakwe, naswona vo tala va hatla va amukela tibuku ta Bibele.

Swi nga ha tika ku hlayisa rhekhodo ya lava tsakelaka rungula ra Mfumo loko u nga va tolovelanga vaaka-tiko. Ha yini? Ron u ri, hikuva “nawu wu lava leswaku tiyindlu hinkwato ti pendiwa hi muvala wun’we.” Hakunene, ndzi langutile kutani ndzi swi xiya leswaku tiyindlu hinkwato le Saba i to basa naswona malwangu ya kona i yo tshwuka.

Loko hi heta bulo ra hina ra Bibele, a hi rhamba n’wini wa muti leswaku a ta enkulumeni ya le rivaleni ya Bibele leyi a yi ta va kona hi Sonto eHolweni ya Mfumo. Loko Ron a ri kona kwalaho exihlaleni, u nyikela nkulumo ya le rivaleni vhiki rin’wana ni rin’wana. Sweswi, ku fambisiwa tidyondzo ta Bibele ta 17 le Saba. Hi 2004 a ku ri na vanhu va 20 eXitsundzuxweni xa rifu ra Kreste. Hambileswi nhlayo yoleyo yi nga vonakaka yi ri yitsongo, yi yimela phesente yin’we ya vaaki hinkwavo va le Saba!

Hakunene, Timbhoni ta Yehovha ti tikarhate swinene leswaku ti fikelela vanhu vo tala hilaha ti nga kotaka hakona hi rungula ra Xikwembu ra ku ponisiwa. Ku nga khathariseki leswaku i xihlala lexitsongo ku fana na Saba kumbe i tiko-nkulu hinkwaro, Timbhoni ta Yehovha ti xi hetisisa hi ku tshembeka xileriso xo “endla vanhu va matiko hinkwawo va va vadyondzisiwa.”—Matewu 28:19.

Lexi vavisaka, riendzo ra hina ri fike emakumu. Loko hi ri karhi hi khandziya xihaha-mpfhuka xa hina, hi tlakuselane mavoko hi lelana. A hi nge ri rivali riendzo ra hina ro ya eSaba ni nkarhi lowu hi wu heteke hi tlhandlukela le The Bottom!

[Tinhlamuselo ta le hansi]

[Mimepe leyi nga eka tluka 10]

(Leswaku u vona rungula leri hleriweke hi ku helela, vona nkandziyiso wa kona)

PUERTO RICO

[Laha Xifaniso Xi Humaka Kona eka tluka 10]

Background: www.sabatourism.com