Mahanyelo Lamanene ‘Ma Sasekisa Dyondzo Ya Xikwembu’

NHWANYANA la vuriwaka Maria wa le Kransnoyarsk eRhaxiya, i xiyimbeleri lexikulu lerova mudyondzisi wakwe u kale a n’wi nghenisa ekhwayereni ya xikolo. Endzhakunyana, Maria u ye eka un’wana wa vadyondzisi vakwe a fika a n’wi hlamusela hi xichavo leswaku a nge swi koti ku yimbelela tinsimu tin’wana. Ha yini? Hikuva ku yimbelela tinsimu leti fambisanaka ni vukhongeri a swi lwisana ni tidyondzo takwe leti sekeriweke eBibeleni. Hi ku hlamala, mudyondzisi u vutisile a ku, ‘Swi hoxe kwihi ku dzunisa Xikwembu hi ku yimbelela?’

Leswaku a kombisa xivangelo xakwe xa ku ala ku yimbelela risimu leri vulavulaka hi Xikwembu xa Vunharhu-un’we, Maria u pfule Bibele yakwe a hlamusela leswaku Xikwembu na Yesu Kreste a va endli Xikwembu xin’we, naswona moya lowo kwetsima i matimba lawa Xikwembu xi ma tirhisaka. (Matewu 26:39; Yohane 14:28; Mintirho 4:31) Maria u ri: “Vuxaka bya mina na mudyondzisi loyi a byi onhakanga. Phela hi ni vadyondzisi vo twisisa swinene exikolweni xa hina. Va lava leswaku hi tikombisa leswi hi nga swona.”

Elembeni rero hinkwaro, xiyimo xa Maria xi endle leswaku a xiximiwa hi vadyondzisi ni hi vana lava a dyondzaka na vona. Maria u ri: “Misinya ya milawu ya Bibele ya ndzi pfuna swinene evuton’wini. Loko lembe ri hela, ndzi kume sagwadi ra ku tshembeka ni ku hleleka, kasi vatswari va mina va kume papila ra ximfumo ro huma exikolweni leri a ri va nkhensa hileswi va ndzi kuriseke hi ndlela leyinene.”

Maria u khuvuriwile hi August 18, 2001. U ri: “Ndza tsaka leswi ndzi tirhelaka Yehovha Xikwembu xo hlawuleka swonghasi!” Vana lava nga Timbhoni ta Yehovha emisaveni hinkwayo va hetisisa marito ya Tito 2:10, leyi nge: “Sasekisa dyondzo ya Muponisi wa hina, Xikwembu, eka swilo hinkwaswo.”

[Xifaniso lexi nga eka tluka 32]

Papila ro tlangela ni xitifiketi xa mahanyelo lamanene

[Xifaniso lexi nga eka tluka 32]

Maria ni vatswari vakwe loko a heta ku khuvuriwa