Swivutiso Swa Vahlayi
Swivutiso Swa Vahlayi
Xana leswi Davhida ni vavanuna vakwe va dyeke xinkwa xa nkombiso swi kombisa leswaku loko munhu a ri ehansi ka swiyimo swo tika a nga tlula nawu wa Xikwembu ivi a nga xupuriwi?—1 Samuwele 21:1-6.
Hi ku ya hi Levhitika 24:5-9, swinkwa swa nkombiso leswi a swi vekiwa hi Savata yin’wana ni yin’wana a swi vekeriwa vaprista leswaku va swi dya. Nsinya wa nawu wa ku tirhisiwa ka swona hi ndlela leyi hileswaku swinkwa leswi a swi kwetsima naswona a swi fanele swi dyiwa hi vavanuna lava endlaka ntirho wa Xikwembu—ku nga vaprista. A swi ta va swi hoxile swinene loko a swo nyikiwa mutirhi la tolovelekeke kumbe swi dyeriwa ku titsakisa. Hambiswiritano, muprista Ahimeleke a nga dyohanga loko a nyike Davhida ni vavanuna vakwe xinkwa xa nkombiso.
Davhida a a tikomba onge u rhumiwe ku ya endla ntirho wo hlawuleka hi Hosi Sawulo. Davhida ni vavanuna vakwe a va twa ndlala. Ahimeleke u lave ku tiva loko va tengile. Hambileswi ku dya ka vona xinkwa xa nkombiso a swi tekiwa swi nga ri enawini, a swi pfumelelana ni ku tirhisiwa ka xisekelo ka xinkwa xa nkombiso. Mhaka yoleyo yi endle Ahimeleke a nga wu landzeleli nawu lowu. Yesu Kreste hi yexe u tirhise xiendlakalo lexi ku kombisa leswaku ndlela leyi Vafarisi va tirhisaka nawu wa Savata ha yona hi ndlela leyi nga hundzukiki yi hoxile.—Matewu 12:1-8.
Hambiswiritano, mhaka leyi nga laha henhla a yi vuli swona leswaku nawu wa Xikwembu wu nga tluriwa loko swiyimo swi tika. Hi xikombiso, ku ve ni xiyimo lexi a xi tikomba xi tika loko masocha ya Vaisrayele ma lwa ni Vafilisita. Hosi Sawulo u te: “A ku rhukaniwe munhu la dyaka xinkwa ku nga si va madyambu kukondza ndzi tirihisela eka valala va mina!” Bibele yi ri: “Esikwini rero va hambeta va dlaya Vafilisita.” Masocha a ma karhele hikwalaho ko lwa naswona a ma twa ndlala, ‘hiloko vanhu va sungula ku dlaya swifuwo emisaveni kutani va swi dya swi ri ni ngati.’ (1 Samuwele 14:24, 31-33) Va dyohele Yehovha hi ku tlula nawu wakwe malunghana ni ngati. Swiendlo swa vona a swi nga fambisani ni ndlela yin’we ntsena leyi Xikwembu xi lavaka ngati yi tirhisiwa ha yona, ku nga ku “kombela ku rivaleriwa” swidyoho. (Levhitika 17:10-12; Genesa 9:3, 4) Nkateko wa kona, Yehovha u amukele magandzelo yo hlawuleka lama endleriweke lava dyoheke.—1 Samuwele 14:34, 35.
Ina, Yehovha u langutele leswaku hi yingisa milawu yakwe ehansi ka swiyimo hinkwaswo. Muapostola Yohane u ri: “Ku rhandza Xikwembu, hi kona ku hlayisa swileriso swa xona.”—1 Yohane 5:3.
[Xifaniso lexi nga eka tluka 30]
Hi Savata yin’wana ni yin’wana a ku vekiwa swinkwa leswintshwa endzeni ka tabernakela