“Mpfuno Wa Mina Wu Huma Eka Yehovha”

Vantshwa Lava Dzunisaka Yehovha Va Antswisa Vutomi Bya Vona

“NDZI lava ku va ni swilo leswinene ngopfu evuton’wini!” Yoleyo i ndlela leyi mufana un’wana la nga le malembeni ya kondlo-a-ndzi-dyi a swi hlamuseleke ha yona leswi a swi languteleke. Kambe xana muntshwa a nga kuma swilo leswinene ngopfu evuton’wini hi ndlela yihi? Bibele yi nyikela nhlamulo leyi kongomeke: “Tsundzuka Muvumbi wa wena loko wa ha ri ntsongo!”—Eklesiasta 12:1, Contemporary English Version.

A hi vanhu lavakulu ntsena lava nga dzunisaka va tlhela va tirhela Yehovha. Samuwele, n’wana wa Elkana na Hana, a ha ri ntsongo ngopfu loko a sungula ku tirhela Yehovha etabernakeleni. (1 Samuwele 1:19, 20, 24; 2:11) Xinhwanyatana xa Muheveru xi kombise ripfumelo leri tiyeke eka Yehovha loko xi ringanyete leswaku Namani ndhuna ya vuthu ra Vasiriya a ya eka muprofeta Elixa leswaku a ya tshunguriwa nhlokonho. (2 Tihosi 5:2, 3) Eka Pisalema 148:7, 12, vafana ni vanhwanyana va lerisiwa leswaku va dzunisa Yehovha. * Loko a ri ni malembe ya 12 ntsena, Yesu u swi tsakele swinene ku tirhela Tata wakwe. (Luka 2:41-49) Hikwalaho ka ku leteriwa hi ku landza Matsalwa, vafana van’wana lava voneke Yesu etempeleni va huwelerile va ku: “Ha khongela, a ku ponisiwe N’wana wa Davhida”!—Matewu 21:15, 16.

Ku Dzunisa Yehovha Namuntlha

Namuntlha, vantshwa vo tala lava nga Timbhoni ta Yehovha va tibuma hi tidyondzo ta vona naswona hi xivindzi va byela van’wana malunghana na tona exikolweni ni le tindhawini tin’wana. Xiya swikombiso leswimbirhi.

Le Britain, swichudeni-kulobye swa Stephanie wa malembe ya 18 hi vukhale a swi bula hi ku susa khwiri ni timhaka tin’wana ta mahanyelo. Mudyondzisi wa swona u vule leswaku vanhu vo tala se va ku amukela ku susiwa ka khwiri ni leswaku a ku na nhwanyana la nga vaka ni xivangelo xo lwisana ni mukhuva lowu. Loko swichudeni hinkwaswo swi pfumelelane ni vonelo leri, Stephanie u susumeteleke ku lwela langutelo ra yena leri sekeriweke eBibeleni. Nkarhi wolowo wu pfuleke loko mudyondzisi a lave ku tiva vonelo ra Stephanie. Hambileswi a a chava eku sunguleni, Stephanie u tirhise nkarhi lowu leswaku a hlamusela vonelo rakwe ra Matsalwa. U vulavule hi Eksoda 21:22-24 kutani a vula leswaku loko a swi hoxile ku vavisa n’wana la nga si tswariwaka, kutani swi le rivaleni leswaku ku susa khwiri a ku fambisani ni ku rhandza ka Xikwembu.

Mudyondzisi loyi, loyi a nga mufundhisi a a nga si tshama a ti hlaya tindzimana leti. Ku nyikela vumbhoni hi xivindzi ka Stephanie ku endle leswaku a bula ni vadyondzi-kulobye hi ndlela leyi tsakisaka hi timhaka to hambana-hambana. Nhwanyana un’wana se u kuma tikopi ta Xihondzo xo Rindza na Xalamuka! nkarhi na nkarhi, kasi van’wana vambirhi a va tile entsombanweni wa muganga wa Timbhoni ta Yehovha va ta vona Stephanie loko a khuvuriwa a kombisa ku tinyiketela ka yena eka Xikwembu.

Vareta wa malembe ya tsevu hi vukhale, loyi a tshamaka eSuriname, le Amerika Dzonga, u tirhise nkarhi lowu n’wi pfulekeleke leswaku a dzunisa Xikwembu loko mudyondzisi wakwe a lava nchavelelo lowu humaka eMatsalweni. Endzhaku ko xwa masiku manharhu, mudyondzisi u vutise swichudeni loko swi swi tiva leswaku ha yini a a nga ri kona. Swi te: “A wu vabya, a hi swona ke?” Mudyondzisi  u te: “A ndzi nga vabyi. Ndzi feriwe hi sesi wa mina, kutani ndzi ni gome lerikulu. Hikwalaho mi nga ndzi beli huwa.”

Hi ndzhenga wolowo loko mana wa yena a ha khudzeherile, Vareta u phendla-phendle timagazini ta khale, a hlaya tinhloko-mhaka ta kona. Hiloko a kuma Xihondzo xo Rindza xa July 15, 2001, lexi a xi ri ni nhloko-mhaka leyi nge “Xana Ku Ni Vutomi eNdzhaku Ka Rifu?” Leswi a a tsake ngopfu, u pfuxe mana wakwe kutani a ku, “Mhani, Mhani, vona! Ndzi kume magazini lowu vulavulaka hi rifu lowu ndzi nga ta wu nyika mudyondzisi wa mina!” Magazini lowu wu rhumeriwe eka mudyondzisi wu ri ni papila leri humaka eka Vareta. U tsarile: “Magazini lowu i wa wena. U ta tlhela u vona sesi wa wena eParadeyisini hikuva Yehovha a nga hembi. U tshembisile leswaku u ta tisa paradeyisi, emisaveni ku nga ri etilweni.” Mudyondzisi loyi u wu tlangele swinene nchavelelo lowu, lowu sekeriweke eBibeleni lowu a wu kumeke eswihlokweni leswi.

Ku Akela Vumundzuku

Yehovha i “Xikwembu lexi tsakeke,” naswona u lava leswaku vantshwa va tsaka. (1 Timotiya 1:11) Rito ra yena ri ri: “Tsakela vuntshwa bya wena. Tsaka loko wa ha ri muntshwa.” (Eklesiasta 11:9, Today’s English Version) Yehovha a nga voni swilo swa sweswi ntsena naswona u tiva vuyelo bya nkarhi lowu taka bya mahanyelo lamanene ni layo biha. Hi yona mhaka Rito rakwe ri tsundzuxaka vantshwa: “Sweswi tsundzuka Mutumbuluxi wa wena Lonkulu emasikwini ya vujaha bya wena, masiku ya khombo ma nga si ta, kumbe ma nga si fika malembe lawa u nga ta vula ha wona u ku: ‘A ma ndzi tsakisi.’”—Eklesiasta 12:1.

Ina, Yehovha u navela leswaku vantshwa va tiphina hi ku hetiseka hi nyiko ya risima ya vutomi. Vantshwa va nga hanya vutomi lebyi enerisaka ni lebyi vuyerisaka hi ku tsundzuka ni ku dzunisa Xikwembu. Hambiloko va langutane ni swiphiqo va nga vula hi ku tiyiseka va ku: “Mpfuno wa mina wu huma eka Yehovha.”—Pisalema 121:2.

[Nhlamuselo ya le hansi]

[Marito lama tshahiweke exihlokweni lama nga eka tluka 9]

“Dzunisani Yehovha mi ri emisaveni, . . . n’wina majaha na n’wina vanhwana.”—PISALEMA 148:7, 12

[Bokisi leri nga eka tluka 8]

YEHOVHA WA VA SEKETELA VANTSHWA

“U ntshembo wa mina, Wena Yehovha, Hosi leyi Lawulaka, ntshembo wa mina ku sukela evuntshweni bya mina.”—Pisalema 71:5.

“[Xikwembu xi] eneris[a] nkarhi wa ku hanya ka wena hi leswinene; vuntshwa bya wena byi tshamela ku tipfuxeta ku fana ni bya gama.”—Pisalema 103:5.