Xiendlakalo Lexi Faneleke Xi Tsundzukiwa

I XIENDLAKALO xihi? I rifu ra wanuna loyi a feke kwalomu ka malembe ya 2 000 lama hundzeke. U te: “Ndzi nyiketa moya-xiviri wa mina, leswaku ndzi tlhela ndzi wu kuma. A ku na munhu loyi a wu tekeke eka mina, kambe ndzi wu nyiketa hi ku swi rhandza.” (Yohane 10:17, 18) Wanuna yoloye a ku ri Yesu Kreste.

Yesu u lerise valandzeri vakwe ku tlangela Xitsundzuxo xa rifu ra yena ra gandzelo. Nakambe xiendlakalo lexi xi vitaniwa “xilalelo xa Hosi.” (1 Vakorinto 11:20) Xitsundzuxo lexi Yesu a xi sunguleke xo tlangela rifu rakwe xi ta tlangeriwa hi Timbhoni ta Yehovha ni vanghana va tona hi Ravumune, March 24, 2005, endzhaku ka ku pela ka dyambu.

Nkulumo leyi sekeriweke eBibeleni yi ta hlamusela leswi xinkwa xo pfumala comela ni vhinyo yo tshwuka leswi tirhisiwaka hi nkarhi wolowo swi vulaka swona. (Matewu 26:26-28) Nkulumo leyi yi ta tlhela yi hlamula swivutiso swo tanihi leswi: Vakreste va fanele va xi tlangela kangani xiendlakalo lexi? I vamani lava faneleke va dya swifanekiselo swa xinkwa ni vhinyo hi ndlela leyi faneleke? I vamani lava vuyeriwaka eka rifu ra Yesu? Nkhuvo lowu wa nkoka wu ta pfuna hinkwavo ku twisisa xikongomelo xa vutomi ni rifu ra Yesu.

U ta amukeriwa hi mandla mambirhi eXitsundzuxweni xa rifu ra Yesu. Hi kombela u vutisa Timbhoni ta Yehovha ta le ndhawini ya ka n’wina malunghana ni ndhawu leyi ti nga ta hlangana eka yona swin’we ni nkarhi wa kona.