Muntima Wo Titsongahata Loyi A A Rhandza Rito Ra Xikwembu

VAENDZI lava taka eAfrika hakanyingi va hlamala loko va vona ndlela leyi swi olovaka ha yona ku sungula bulo hi tinhloko-mhaka ta Bibele ni vanhu va kwalaho. Swivutiso swo tanihi lexi nge, “Mfumo wa Xikwembu i yini?” kumbe “Xana wu kona ntlhantlho lowu nga ta tshama hi masiku wa swiphiqo swo fana ni ndlala, mavabyi, tinyimpi ni vugevenga?” swi hatla swi koka vanhu rinoko. Vo tala va n’wi pfumelela munhu loyi va nga n’wi tiviki leswaku a va komba tinhlamulo leti humaka eBibeleni. Hakanyingi sweswo swi endla leswaku ku sunguriwa dyondzo ya Bibele ya nkarhi hinkwawo. Kutani loko swichudeni swi endla nhluvuko wa moya, swi va Vakreste lava khuvuriweke.

Muntima wo sungula ku angula hi ndlela yoleyo hi loyi a boxiweke eBibeleni eka Mintirho 8:26-40. A a ri Muetiyopiya loyi a yeke eYerusalema a ya gandzela Xikwembu xa ntiyiso, ku nga Yehovha.

Hilaha a kombisiweke hakona exifanisweni lexi nga laha hansi, Muetiyopiya loyi a a tlhelela ekaya hi kalichi yakwe, a ri karhi a hlaya tsalwa-songwa. Munhu wumbe u n’wi tshinelerile kutani a n’wi vutisa a ku: “Xana wa swi tiva leswi u swi hlayaka hakunene?” Hi ku titsongahata, Muetiyopiya u pfumerile leswaku u lava mpfuno kutani a kombela munhu la nga n’wi tiviki, ku nga Mukreste la nga muevhangeli, Filipi, leswaku a khandziya ekalichini. Kutani u kombele Filipi leswaku a n’wi hlamusela Tsalwa leri a ri hlayeke. Filipi u vule leswaku i vuprofeta lebyi kombetelaka eka rifu lera ha ku humelelaka ra Mesiya, ku nga Yesu Kreste. Filipi u tlhele a hlamusela timhaka tin’wana malunghana ni “mahungu lamanene hi Yesu,” lawa handle ko kanakana a ma katsa ni ku pfuxiwa ka Yesu.

Loko a twe timhaka leti to hlamarisa, Muetiyopiya u lave ku va mudyondzisiwa wa Yesu, hiloko a vutisa a ku: “I yini lexi ndzi sivelaka ku khuvuriwa?” Endzhaku ko khuvuriwa, Muntima loyi wo titsongahata u tlhelele egondzweni ro ya ekaya a tsakile, naswona Bibele a ya ha vulanga nchumu ha yena.

Namuntlha, Timbhoni ta Yehovha ti pfuna vanhu va timiliyoni emisaveni hinkwayo leswaku va dyondza hi ta “mahungu [wolawo] lamanene.” Sweswi ku fambisiwa tidyondzo ta le kaya ta mahala ta Bibele ta kwalomu ka tsevu wa timiliyoni.