Swivutiso Swa Vahlayi

Xana Mukreste u fanele ku nyika mutirhela-mfumo mali yo nkhensa kumbe nyiko leswaku a pfuniwa, kumbe xana sweswo swi ta tekiwa ku ri ku fumbarherisa?

Ku nga khathariseki laha va tshamaka kona, Vakreste va lwela ku tirhisa vutlhari loko va langutane ni swiyimo swa le ndhawini ya ka vona, va tsundzuka leswaku leswi swi amukelekaka ni leswi nga enawini etikweni rin’wana swi nga ha endleka swi nga amukeleki nikatsongo kumbe swi nga ri enawini etikweni rin’wana. (Swivuriso 2:6-9) Entiyisweni, minkarhi hinkwayo Mukreste u fanele ku tsundzuka leswaku un’wana ni un’wana loyi a lavaka ku “va muendzi entsongeni wa [Yehovha]” u fanele ku papalata ku fumbarherisa.—Pisalema 15:1, 5; Swivuriso 17:23.

Ku fumbarherisa i yini? Hi ku ya hi The World Book Encyclopedia, “ku fumbarherisa swi vula ku nyika kumbe ku tshembisa . . . munhu loyi a tiviwaka nchumu wa nkoka, loyi hi hala tlhelo a tlulaka nawu leswaku a pfuna loyi a n’wi nyikaka nchumu wolowo.” Kutani, ku nga khathariseki leswaku u tshama kwihi, u ta va u fumbarherisa loko u nyika muavanyisi kumbe phorisa mali kumbe nyiko leswaku ri tlula nawu kumbe u nyika mukamberi leswaku a honisa xihoxo xo karhi. Nakambe u ta va u fumbarherisa loko u humesa nyiko leswaku u rhangisiwa emahlweni ka vanhu lava tsariseke kumbe ku yima enxaxamelweni wo karhi. Nakambe xiendlo xo tano xi ta va xi kombisa ku pfumala rirhandzu.—Matewu 7:12; 22:39.

Kambe, xana i ku fumbarherisa loko munhu a humesa nyiko kumbe mali yo nkhensa eka mutirhela-mfumo leswaku a pfuniwa hi xihatla kumbe a papalata ku khomiwa hi ndlela yo biha? Hi xikombiso, ematikweni man’wana vatirhela-mfumo va nga ha ala ku tsarisa vana exikolweni, ku amukela munhu exibedlhele kumbe ku ba xitempe xa pasi ro endza kukondza va nyikiwa mali yo karhi. Kumbexana va nga hlwela ku tata fomo yo pfuxeta layisense ni ya mpfumelelo.

Ku humesa mali yo nkhensa ntirho wa munhu swi langutiwa hi tindlela leti nga faniki etindhawini to hambana-hambana. Laha ku nga mukhuva ku humesa timali to tano kumbe swi languteriwile leswaku u swi endla, Vakreste van’wana va nga titwa va nga tluli misinya ya milawu ya Bibele loko va nyika vatirhela-mfumo mali leswaku va va endlela ntirho lowu va faneleke va va endlela wona. Ematikweni man’wana vanhu vo tala va teka mali yo tano tanihi nyiko yo engetela muholo wa muthoriwa loko a nga holi mali yo tala. Tsundzuka leswaku ku ni ku hambana exikarhi ka ku nyika munhu mali leswaku a ku endlela leswi a faneleke a ku endlela swona ni ku n’wi fumbarherisa leswaku a tlula nawu, a ku endlela leswi nga faneriki leswaku a ku endlela swona.

Hi hala tlhelo, Timbhoni ta Yehovha tin’wana loko ti endla swikombelo swa le nawini, ti arile ku humesa mali yo nkhensa maphorisa, vatirhela-mfumo, kumbe van’wana hambi ku ri laha tinyiko to tano ku nga mukhuva ku ti humesa. Hikwalaho ka leswi Timbhoni ti tivekaka endhawini leswaku ti ni vuxiyaxiya naswona ta tshembeka loko swi ta emhakeni yoleyo, minkarhi yin’wana ti pfuniwa mahala eka swilo leswi van’wana va swi humeselaka mali.—Swivuriso 10:9; Matewu 5:16.

Hi ku komisa, nandza un’wana ni un’wana wa Yehovha u fanele a tiendlela xiboho xa loko a ta humesa mali yo nkhensa leswaku a endleriwa nchumu lowu a nga ni mfanelo ya ku endleriwa wona hi ku ya hi nawu kumbe leswaku a nga bakanyeriwi etlhelo swi nga fanelanga. Ku tlula kwalaho, u fanele a endla xiendlo lexi nga ta n’wi siya a ri ni ripfalo lerinene, lexi nga tisiki xisandzu evitweni ra Yehovha, ni lexi nga khunguvanyisiki van’wana.—Matewu 6:9; 1 Vakorinto 10:31-33; 2 Vakorinto 6:3; 1 Timotiya 1:5.