Ku Enerisa Xilaveko eMakedoniya

“PELELA eMakedoniya u ta hi pfuna.” (Mintirho 16:9) Marito lawa lama vuriweke hi wanuna la humeleleke exivonweni lexi voniweke hi muapostola Pawulo ma paluxe xilaveko xo twarisa mahungu lamanene ya Mfumo wa Xikwembu ensin’wini leyintshwa, emitini leyi sweswi yi nga le Greece.

Etikweni ra namuntlha ra Makedoniya, ku ni Mbhoni yin’we ya Yehovha eka vaaki van’wana ni van’wana va 1 840. Vanhu vo tala a va si tshama va twa hi ta Yehovha Xikwembu. Ina, ku ni xilaveko xa xihatla xa leswaku vanhu va le tikweni leri va twa rungula ra ku rhula.—Matewu 24:14.

Xikwembu xi pfule ndlela yo pfuna ku enerisa xilaveko xexo. Siku rin’wana hi November 2003, hofisi ya le Makedoniya ya Timbhoni ta Yehovha le Skopje yi kume riqingho leri a yi nga ri langutelanga. A ri huma eMacedonian Center for International Cooperation, ri rhamba Timbhoni leswaku ti endla nkombiso wa masiku manharhu lowu a wu ta sungula hi November 20, laha a ti ta hlamusela tidyondzo ta tona. Hakunene a ku ri lunghelo lerikulu ku fikelela magidi ya vanhu lava a va nga si tshama va twa mahungu lamanene ya Mfumo!

Vatirhi vo tirhandzela va tirhe hi ku hiseka va lunghiselela va tlhela va hlela nkombiso wa tibuku to hambana-hambana ta Timbhoni ta Yehovha hi ririmi ra le Makedoniya. Ku vekiwe minkandziyiso leyi leswaku vaendzi va titekela tikopi loko va ti lava. Nkombiso lowu wu nyike vo tala nkarhi wo kuma mati lama phyuphyisaka ya moya mahala.—Nhlavutelo 22:17.

Vaendzi ngopfu-ngopfu a va lava tibuku leti khumbaka vutomi bya vona, to tanihi leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka ni leyi nge Xihundla Xa Ntsako eNdyangwini. * Vanhu va 98 va siye tiadirese ta vona, va kombela leswaku Timbhoni ta Yehovha ti va endzela. Vo tala va vulavule kahle hi ntirho lowunene wa Timbhoni ta Yehovha ni ntikelo wa minkandziyiso ya tona.

Wanuna un’wana u tile eka nkombiso lowu a khome n’wana wa yena wa mufana hi voko. Tatana loyi u vutisile loko ti ri kona tibuku ta vana. Timbhoni ti n’wi kombe buku leyi nge Buku Yanga Ya Timhaka Ta Bibele. * U yi kambisisile kutani hi ntsako a vutisa leswaku i mali muni. Loko a twe leswaku ntirho wo dyondzisa wa Timbhoni ta Yehovha wu seketeriwa hi minyikelo ya  ku tirhandzela, u tsake no tlula mpimo. (Matewu 10:8) U kombe n’wana wa yena buku leyi kutani a ku: “Buku leyi yi kahle ngopfu! Papa u ta ku hlayela xitori xin’we siku ni siku!”

Profesa wa filosofi u ye enkombisweni lowu. A a byi tsakela swinene vukhongeri hi ku angarhela kambe ngopfu-ngopfu tidyondzo ta Timbhoni ta Yehovha. Loko a ri karhi a kambisisa buku leyi nge Ku Lavisisa Ka Vanhu Xikwembu, * profesa loyi u te: “Rungula leri ri hlamuseriwe hi ndlela leyi twalaka hakunene! Ri vekiwe hi ku kongoma hi ndlela leyi a ndzi anakanya leswaku timhaka ti fanele ti vekiwa ha yona.” Endzhakunyana swichudeni swin’wana swa le xikolweni xa yena swi te enkombisweni lowu kutani swi kombela tikopi ta swona ta buku leyi kumiweke hi profesa. A swi lava ku dyondza buku leyi fanaka. A swi anakanya leswaku u ta tirhisa rungula leri nga eka yona loko a dyondzisa.

Nkombiso lowu wu pfune vanhu van’wana leswaku va sungula ku twa ni ku hlaya ntiyiso wa le Matsalweni. Ntlawa wa vana va kondlo-a-ndzi-dyi lava feke tindleve na wona wu tile wu ta vona loko wu nga kuma xo karhi. Mbhoni yin’wana yi burisane na vona katsongo, yi pfuniwa hi nhwanyana un’wana loyi a a hundzuluxela a yisa eka ririmi ra mavoko. U tirhise swifaniso leswi nga eka buku leyi nge Nghwazi Leyi Tshameke Yi Hanya, * a hlamusela leswaku Yesu u hanyise vavabyi, ku katsa ni lava feke tindleve. Va tsakele ku “twa” xitshembiso xa le Bibeleni xa leswaku ku nga ri khale Yesu u ta va endlela leswi fanaka vanhu lava hanyaka emisaveni namuntlha. Vo tala va vona va ti amukele hi ntsako tibuku leti sekeriweke eBibeleni, naswona ku endliwe malunghiselelo ya leswaku va endzeriwa hi Mbhoni leyi tivaka ririmi ra mavoko.

Handle ka Ximakedoniya, tibuku a ti ri kona na hi Xialbaniya, Xinghezi ni Xiturk. Wanuna un’wana loyi a a nga xi tivi Ximakedoniya u kombele tibuku ta Xinghezi. Endzhaku ka ku nyikiwa minkandziyiso ya timagazini ta Xihondzo xo Rindza na Xalamuka!, u vule leswaku u vulavula Xiturk. Loko a kombiwe minkandziyiso ya ririmi ra yena, a a hlamale swinene! U swi xiyile leswaku Timbhoni ta Yehovha ti lava ku pfuna vanhu hinkwavo.

Hakunene ku nyikeriwe vumbhoni lebyinene hi nkarhi wolowo, naswona a swi khutaza swinene ku vona vanhu vo tala swinene va tsakela ntiyiso wa Bibele! Ina, Yehovha u pfule ndlela ya leswaku vanhu vo tala va twa mahungu lamanene ya Mfumo eMakedoniya.

[Tinhlamuselo ta le hansi]

[Bokisi/Swifaniso leswi nga eka tluka 9]

KU BOXIWA KA NDZIMA LEYIKULU!

Hi May 17, 2003, ku endleke nchumu lowu kombisaka nhluvuko lowukulu eku twariseni ka mahungu lamanene ya Mfumo wa Xikwembu. Hofisi ya Timbhoni ta Yehovha yi nyiketeriwile le Skopje. Ntirho wo aka wu teke malembe mambirhi, naswona sweswi miako ya hofisi i yikulu ku tlula leyo sungula ka mune.

Ku ni miako yinharhu leyi hambaneke laha ku nga tihofisi ta lava vukongomisi ni ta vuhundzuluxeri swin’we ni ndhawu yo tshama eka yona, khixi ni ndhawu yo hlantswela eka yona. Guy Pierce, loyi a nga xirho xa Huvo leyi Fumaka ya Timbhoni ta Yehovha hi yena a nyikeleke nkulumo yo nyiketela. A ku ri ni vaendzi lava humaka ematikweni ya khume lava teke va ta yingisela nongonoko wo nyiketela. Hinkwavo a va tsakile ku vona miako yo saseka leyintshwa.

[Mepe lowu nga eka tluka 8, 9]

(Leswaku u vona rungula leri hleriweke hi ku helela, vona nkandziyiso wa kona)

BULGARIA

MAKEDONIYA

Skopje

ALBANIA

GREECE

[Xifaniso lexi nga eka tluka 8]

Skopje, Makedoniya