Swivutiso Swa Vahlayi

Xana muapostola Pawulo a nga landzulanga ripfumelo rakwe ra Vukreste loko a vule marito lama landzelaka emahlweni ka Sanedri: “Ndzi Mufarisi”?

Leswaku hi twisisa marito ya Pawulo, lama kumekaka eka Mintirho 23:6, hi fanele hi kambisisa xiyimo xa kona.

Endzhaku ko hlaseriwa hi Vayuda eYerusalema, Pawulo u vulavule ni ntshungu. U vule leswaku a a “dyondze [eYerusalema] emilengeni ya Gamaliyele, [a] leteriwa hi ku ya hi rilondzo ra Nawu wa vakokwana.” Hambileswi ntshungu wu n’wi yingiseke swa xinkarhana loko a tihlamulela, loko wu ya hetelela wu hlundzuke swinene, ndhuna ya nyimpi leyi a yi n’wi heleketa yi yise Pawulo egoveleni ra masocha. Loko va lava ku n’wi ba hi ximoko, Pawulo u te: “Xana swa pfumeleriwa leswaku mi ba munhu la nga Murhoma, a nga dyiwanga hi nandzu?”—Mintirho 21:27–22:29.

Hi siku leri tlhandlamaka, ndhuna yi yise Pawulo emahlweni ka Sanedri, ku nga huvo leyi tlakukeke ya Vayuda. Pawulo u langutisise Sanedri kutani a kuma leswaku yi vumbiwe hi Vasaduki ni Vafarisi. Hiloko a ku: “Vavanuna, vamakwerhu, ndzi Mufarisi, n’wana wa Vafarisi. Ndzi avanyisiwa hikwalaho ka ntshembo wa ku pfuxiwa ka lava feke.” Hikwalaho, ku pfuka mholovo exikarhi ka Vafarisi ni Vasaduki, “hikuva Vasaduki va vula leswaku ku hava ku pfuka ka lava feke hambi ku ri ntsumi ni moya, kambe Vafarisi va swi vula hinkwaswo erivaleni.” Van’wana lava a va ri va ntlawa wa Vafarisi va kanete hi vukarhi va ku: “A hi kumi nchumu lexi hoxeke eka munhu loyi.”—Mintirho 23:6-10.

Leswi a a tiviwa tanihi Mukreste la hisekaka swinene, Pawulo a a nga ta yi khorwisa Sanedri leswaku a a ri Mufarisi la hisekaka. Vafarisi lava a va ri kona a va nga ta amukela munhu loyi a nga pfumeriki etidyondzweni ta vona hinkwato. Hikwalaho marito ya Pawulo malunghana ni ku va Mufarisi a ma ri ni nhlamuselo leyi hikiweke, naswona Vafarisi lava a va ri kona va fanele va twisise marito ya Pawulo hi ndlela yoleyo.

Loko a vula leswaku u avanyisiwa hikwalaho ka ntshembo wa ku pfuxiwa ka vafi, kahle-kahle Pawulo a a vula leswaku emhakeni leyi a a fana ni Vafarisi. Eka njhekanjhekisano wihi na wihi emhakeni leyi, Pawulo a a ta hlanganisiwa ni Vafarisi ku nga ri Vasaduki, lava a va nga pfumeli eku pfuxiweni ka vafi.

Leswi Pawulo a a pfumela swona tanihi Mukreste a swi nga lwisani ni tidyondzo ta Vafarisi etimhakeni to tanihi ku pfuxiwa ka vafi, tintsumi ni timhaka tin’wana ta Nawu. (Vafilipiya 3:5) Kutani etimhakeni leti ntsena, Pawulo a a ta tihlanganisa ni Vafarisi, naswona lava a va ri kona eka Sanedri va twisise marito yakwe hi ndlela yoleyo ntsena. Hikwalaho a a tirhisa ndhavuko wakwe leswaku a kombisana ni huvo leyi tlakukeke ya Vayuda leyi a yi ri ni rivengo.

Hambiswiritano, vumbhoni lebyikulu bya leswaku Pawulo a nga landzulanga ripfumelo rakwe byi vonaka hi leswi a hambeteke a tsakeriwa hi Yehovha. Hi vusiku bya le ndzhaku ka lebyi Pawulo a vuleke mhaka leyi ku vulavuriwaka ha yona, Yesu u te: “Vana ni xivindzi lexi tiyeke! Hikuva leswi a wu nyikela vumbhoni bya rixaladza hi swilo leswi khumbaka mina eYerusalema, u fanele ku nyikela vumbhoni ni le Rhoma.” Leswi Pawulo a a tsakeriwa hi Xikwembu, hi fanele hi gimeta hileswaku Pawulo a nga landzulanga ripfumelo ra yena ra Vukreste.—Mintirho 23:11.