Wa Tsundzuka Xana?

Xana u swi tlangerile ku hlaya minkandziyiso ya sweswinyana ya Xihondzo xo Rindza? A hi vone loko u nga hlamula swivutiso leswi landzelaka:

• I yini lexi vangeleke leswaku ku hlawuriwa December 25 tanihi siku ra ku tlangela ku velekiwa ka Yesu?

Rito ra Xikwembu a ri vuli leswaku Yesu u velekiwe hi siku rihi. Enciclopedia Hispánica yi ri: “Siku ra December 25 ra ku tlangeriwa ka Khisimusi a ri sekeriwanga eka siku leri Yesu a velekiweke ha rona, kambe ematshan’weni ya sweswo, ri ve siku ro hundzula minkhuvo ya ku tsema nguva ya vuxika ya le Rhoma yi endliwa ya Vukreste.” Varhoma va khale va tlangele ku xa ka dyambu ra vuxika hi ku endla minkhuvo ya huwa na hi ku nyikana tinyiko.—12/15, matluka 4-5.

• Xana Mintirho 7:59 yi vula leswaku Stefano u khongele eka Yesu?

Doo! Bibele yi kombisa leswaku xikhongelo xi fanele xi kongomisiwa eka Yehovha Xikwembu ntsena. Loko Stefano a vona Yesu exivonweni, handle ko kanakana u titwe a ntshunxekile ku n’wi kombela hi ku kongoma, a ku: “Hosi Yesu, amukela moya wa mina.” Stefano a a swi tiva leswaku Yesu u nyikiwe matimba ya ku pfuxa lava feke. (Yohane 5:27-29) Hikwalaho Stefano u kombele Yesu leswaku a hlayisa matimba ya vutomi byakwe ku kondza a pfuxiwa.—1/1, tluka 31.

• Hi swi tivisa ku yini leswaku vumundzuku bya munhu a byi kunguhatiwanga?

Xikwembu xi nyike vanhu ntshunxeko wo tihlawulela, leswi nga hlanganiki helo ni ku kunguhateriwa. Yehovha a a ta va a nga kombisi rirhandzu ni vululami loko a a lo hi kunguhatela ndlela leyi hi nga ta yi teka kutani a lava hi tihlamulela hi swiendlo swa hina. (Deteronoma 32:4; 1 Yohane 4:8)—1/15, matluka 4-5.

• Ha yini ku ta va ku ri ku tikukumuxa ku vula leswaku masingita a ma endleki?

Leswi se va swi xiyaka leswaku a va tivi swo tala hi sayense ya ntumbuluko wa Xikwembu, van’wasayense van’wana va pfumela leswaku a va nge he vuli hi ku tiyiseka leswaku nchumu wo karhi a wu nge endleki. Loko swi tikile, va nga ha vula ntsena leswaku swi nga ha endleka swi nga koteki.—2/15, matluka 5-6.

• Ha yini Muavanyisi Samsoni a byele vatswari vakwe leswaku a a lava ku teka nhwana wa Mufilista leswaku a va nsati wakwe? (Vaavanyisi 14:2)

Ku teka mugandzeri wa mavunwa a swi lwisana ni nawu wa Xikwembu. (Eksoda 34:11-16) Kambe, wansati wa Mufilista ‘hi yena ntsena la lulamile’ ematihlweni ya Samsoni. Samsoni “a a lava ndlela yo hlasela Vafilisita,” kutani wansati loyi a a lulamile hi xikongomelo xexo. Xikwembu xi seketele Samsoni hi ku tirhisa moya wa xona. (Vaavanyisi 13:25; 14:3, 4, 6)—3/15, tluka 26.

• Xana Mukreste u fanele a nyika mutirhela-mfumo mali yo nkhensa kumbe nyiko yo karhi hikwalaho ka mintirho leyi a yi endleke?

Swi hoxile ku fumbarherisa mutirhela-mfumo, ku n’wi nyika nchumu wa nkoka leswaku a ta ku endlela nchumu wo karhi lowu nga riki enawini, a soholota vululami, kumbe leswaku u ta khomiwa hi ndlela yo hlawuleka. Kambe ku nyika nandza wa tiko mali yo nkhensa kumbe nyiko loko a endla ntirho wa yena kumbe a ku endlela ntirho lowu nga enawini kumbe u papalata ku khomiwa hi ndlela leyi nga fanelangiki, a hi ku fumbarherisa.—4/1, tluka 29.