Ku Hlula Hi Ndlela Yo Hlawuleka

XANA u pfa u kanetiwa hikwalaho ka vupfumeri bya wena—kumbexana entirhweni, exikolweni, endyangwini, kumbe hikwalaho ka swipimelo swa Tiko? Kutani u nga heli matimba. Timbhoni ta Yehovha to tala ti langutane ni miringo leyi fanaka, kambe ti yi hlurile. Anakanya hi xikombiso xa Erna Ludolph.

Erna u velekiwe eLübeck, le Jarimani hi 1908. Eka vona a ku ri yena ntsena loyi a tirhelaka Yehovha. Loko Hitler a sungula ku fuma hi 1933, Timbhoni ta Yehovha ti sungule ku koka exilogweni. Vatirhi-kulobye va Erna va n’wi sorile entirhweni hikwalaho ka leswi a aleke ku losa Hitler, naswona sweswo swi endle leswaku a khomiwa hi Manazi. U hete malembe ya nhungu emakhotsweni yo hambana-hambana ni le tikampeni ta vakhotsiwa eHamburg-Fuhlsbüttel, eMoringen, eLichtenburg ni le Ravensbrück. Loko Erna a ri eRavensbrück, ku humelele nchumu wun’wana lowu endleke leswaku a hlula ndzingo lowu a a langutane na wona.

Mutirhi Wa Le Ndlwini Loyi A Hlawulekeke

Profesa Friedrich Holtz ni nghamu yakwe Alice a va tshama eBerlin. Vona a va nga ri Manazi naswona a va nga swi seketeli swiendlo swa wona. Hambiswiritano, a va ri maxaka ya ndhuna ya maphorisa ya SS leyi a yi langutela kampa yin’wana ya vabohiwa. Kutani loko profesa loyi ni nsati wakwe va ri karhi va lava munhu loyi a nga ta langutela yindlu ya vona, ndhuna leyi ya maphorisa ya SS yi va pfumelele ku hlawula mubohiwa wa xisati. Kutani, hi March 1943, Alice u ye eRavensbrück a ya hlawula wansati loyi a nga ta langutela yindlu yakwe. Xana u hlawule mani? U hlawule Erna Ludolph. Erna u ye a ya tshama ni vandyangu wa ka Holtz lava n’wi khomeke kahle. Loko nyimpi yi herile, u rhurhe ni ndyangu lowu va ya eHalle le Saale. Kwalaho, Erna u tlhele a langutana ni nkaneto, sweswi a kanetiwa hi valawuri va Vusoxalisi va le Jarimani Vuxa. Hi 1957, ndyangu lowu wu hlongoleriwe eJarimani Vupela-dyambu naswona Erna u fambe na wona. Eku heteleleni, Erna u kume ntshunxeko wo endla timhaka ta vupfumeri byakwe a nga kavanyetiwi.

Xana Erna u hlule njhani hi ndlela yo hlawuleka? Hikwalaho ka mahanyelo lamanene ya Erna ni vutshila bya yena byo chumayela rungula ra Bibele, Alice Holtz ni vana vakwe va ntlhanu va ve Timbhoni ta Yehovha leti khuvuriweke. Ku engetela kwalaho, vatukulu va Alice va 11 na vona i Timbhoni. Vambirhi eka vona va tirha erhavini ra Timbhoni ta Yehovha eSelters, le Jarimani. Susanne, un’wana wa vana va xisati va Alice u ri: “Ndyangu wa ka hina wu le ntiyisweni ngopfu-ngopfu hikwalaho ka xikombiso lexinene xa Erna.” Ku tiyisela ka Erna ku ve ni hakelo leyinene. Ku vuriwa yini hi xiyimo xa wena? Ku tiyisela ka wena ehansi ka swiyimo swo tika swi nga ha va ni vuyelo lebyi fanaka. Ina, mahanyelo lamanene ni vutshila byo chumayela swi nga ku pfuna leswaku u hlula hi ndlela yo hlawuleka. *

[Nhlamuselo ya le hansi]

[Xifaniso lexi nga eka tluka 31]

Erna Ludolph (la tshameke exitulwini) a ri ni swirho swa ndyangu wa ka Holtz