Ku Pfuxiwa Ka Lava Feke—Dyondzo Leyi Ku Khumbaka
Ku Pfuxiwa Ka Lava Feke—Dyondzo Leyi Ku Khumbaka
“Ndzi ni ntshembo eka Xikwembu . . . leswaku ku ta va ni ku pfuxiwa ka lava lulameke ni ka lava nga lulamangiki.”—MINTIRHO 24:15.
1. Ku pfuxiwa ka lava feke ku yi pfuxe njhani mphikamakaneta emahlweni ka Sanedri?
MUAPOSTOLA PAWULO u gimete riendzo rakwe ra vunharhu ra vurhumiwa hi 56 C.E., a ri eYerusalema. Endzhaku ko khomiwa hi Varhoma, u pfumeleriwe ku ya yima emahlweni ka huvo leyi tlakukeke ya Vayuda, ku nga Sanedri. (Mintirho 22:29, 30) Loko Pawulo a kambisise swirho swa huvo yoleyo, u xiye leswaku van’wana a ku ri Vasaduki kasi van’wana a ku ri Vafarisi. Mintlawa leyi yimbirhi a yi nga twanani eka nchumu wun’wana wa nkoka. Vasaduki a va nga pfumeli leswaku lava feke va ta pfuka; Vafarisi a va pfumela. Leswaku a kombisa laha a yimeke kona emhakeni leyi, Pawulo u te: “Vavanuna, vamakwerhu, ndzi Mufarisi, n’wana wa Vafarisi. Ndzi avanyisiwa hikwalaho ka ntshembo wa ku pfuxiwa ka lava feke.” Marito wolawo ma nambe ma lumeka mholovo exikarhi ka huvo!—Mintirho 23:6-9.
2. Ha yini Pawulo a a lunghekele ku lwela ku pfumela ka yena eku pfukeni ka lava feke?
2 Malembe emahlweni ka kwalaho, loko a ri karhi a ya eDamaska, Pawulo u twe rito ra Yesu exivonweni. Pawulo u kale a vutisa Yesu a ku: “Xana ndzi ta endla yini, Hosi?” Yesu u n’wi hlamule a ku: “Tlakuka, u ya eDamaska, u ta fika u byeriwa hinkwaswo leswi u nga ta swi endla.” Loko a fika eDamaska, Pawulo u kumiwe hi mudyondzisiwa la pfunaka la nga Mukreste la vuriwaka Ananiya, loyi a hlamuseleke a ku: “Xikwembu xa vatata wa hina xi ku hlawurile leswaku u tiva ku rhandza ka xona ni ku vona Loyi a lulameke [Yesu la pfuxiweke] ni ku twa rito ra nomu wakwe.” (Mintirho 22:6-16) Kutani a swi hlamarisi leswi Pawulo a a lunghekele ku lwela ku pfumela ka yena eku pfukeni ka lava feke.—1 Petro 3:15.
Ku Twarisa Ntshembo Wa Ku Pfuxiwa Ka Lava Feke
3, 4. Pawulo u tikombise njhani leswaku a a ri mulweri lonkulu wa dyondzo ya ku pfuxiwa ka lava feke, naswona hi nga dyondza yini eka xikombiso xa yena?
3 Endzhaku Pawulo u yisiwe emahlweni ka Ndhuna-nkulu Felikisi. Hi siku rero, Tertulo, “xivulavuri xa le rivaleni,” loyi a hlamuseleke nandzu lowu Vayuda va hehlaka Pawulo ha wona, u n’wi hehle hi leswaku i murhangeri wa mpambukwa ni muvangi wa hasahasa etikweni. Pawulo u hlamule a nga jikajiki a ku: “Ndza swi pfumela leswi eka wena, leswaku, hi ku ya hi ndlela leyi va vitanaka ‘mpambukwa’ ha yona, hi mukhuva wolowo ndzi endlela Xikwembu xa vatata wa mina ntirho wo kwetsima.” Kutani, malunghana ni mhaka-nkulu, u ye emahlweni a ku: “Ndzi ni ntshembo eka Xikwembu, ku nga ntshembo lowu vanhu lava na vona va nga na wona, leswaku ku ta va ni ku pfuxiwa ka lava lulameke ni ka lava nga lulamangiki.”—Mintirho 23:23, 24; 24:1-8, 14, 15.
4 Kwalomu ka malembe mambirhi endzhaku, mutlhandlami wa Felikisi, ku nga Porkiyo Festo, u rhambe Hosi Heroda Agripa leswaku a pfunana na yena eku konaniseni ka mubohiwa Pawulo. Festo u hlamusele leswaku vahehli va kanete marito ya Pawulo ya leswaku “Yesu loyi a ku vuriwa leswaku a a file . . . wa hanya.” Loko a tihlamulela, Pawulo u vutisile a ku: “Ha yini mi swi teka swi nga khorwisi eka n’wina leswaku Xikwembu xi pfuxa lava feke?” Hiloko a ku: “Hikwalaho ka leswi ndzi kumeke mpfuno lowu humaka eka Xikwembu ndzi ya emahlweni ku fikela namuntlha ndzi nyikela vumbhoni eka lavatsongo swin’we ni le ka lavakulu, kambe a ndzi vuli swin’wana handle ka swilo leswi Vaprofeta swin’we na Muxe va vuleke leswaku swi ta endleka, leswaku Kreste a a ta xaniseka, naswona leswi a nga wo sungula ku pfuxiwa eka lava feke, a a ta twarisa ku vonakala eka vanhu lava ni le matikweni.” (Mintirho 24:27; 25:13-22; 26:8, 22, 23) Pawulo a a ri mulweri lonkulu wa dyondzo ya ku pfuxiwa ka lava feke! Ku fana na Pawulo, na hina hi nga chumayela hi ku tiyiseka leswaku lava feke va ta pfuxiwa. Kambe hi wihi n’wangulo lowu hi nga wu langutelaka? Hi nga langutela n’wangulo wo fana ni lowu Pawulo a langutaneke na wona.
5, 6. (a) Vanhu va angurise ku yini loko vaapostola va chumayela hi ta ku pfuxiwa ka lava feke? (b) I yini lexi nga xa nkoka loko hi ri karhi hi phofula ntshembo wa hina wa ku pfuxiwa ka lava feke?
5 Xiya leswi humeleleke eku sunguleni hi nkarhi wa riendzo ra vumbirhi ra vurhumiwa ra Pawulo (kwalomu ka 49-52 C.E.) loko a fika le Atena. U vulavurisane ni vanhu lava a va pfumela eka swikwembu swo tala kutani a va khutaza leswaku va lemuka xikongomelo xa Xikwembu xa ku avanyisa misava hi ku lulama hi ku tirhisa munhu loyi xi n’wi vekeke. Munhu wa kona i Yesu. Pawulo u vule leswaku Xikwembu xi tiyisekise mhaka leyi hi ku pfuxa Yesu. Xana va angurise ku yini? Ha hlaya: “Kutani, loko va twa hi ta ku pfuka ka lava feke, van’wana va sungula ku vungunya, kasi van’wanyana a va ku: ‘Hi ta ku yingisa malunghana ni leswi ni hi nkarhi wun’wana.’”—Mintirho 17:29-32.
6 N’wangulo wolowo a wu fana ni lowu Petro na Yohane va langutaneke na wona endzhakunyana ka Pentekosta ya 33 C.E. Ni le ka njhekanjhekisano wolowo a ku katseka ngopfu Vasaduki. Mintirho 4:1-4 yi hlamusela leswi humeleleke: “Loko lava vambirhi va ha vulavula ni vanhu, vaprista lavakulu ni mufambisi wa tempele ni Vasaduki va va tela, va siringekile hileswi a va dyondzisa vanhu ni ku vulavula erivaleni hi ta ku pfuxiwa ka Yesu eka lava feke.” Kambe van’wana va angule kahle. “Vo tala lava va yingiseke mhaka yoleyo va kholwa, kutani nhlayo ya vavanuna yi fika kwalomu ka 5 000.” Kunene, hi fanele hi langutela leswaku vanhu va ta angula hi tindlela to hambana loko hi vulavula na vona hi ntshembo wa ku pfuxiwa ka lava feke. Hikwalaho, i swa nkoka leswaku hi tiyisa ripfumelo ra hina malunghana ni dyondzo leyi.
Ripfumelo Ni Ku Pfuxiwa Ka Lava Feke
7, 8. (a) Hilaha swi kombisiweke hakona epapileni leri yaka evandlheni ra Korinto eka lembe-xidzana ro sungula, ripfumelo ri nga va ra hava loko swi te yini? (b) Matwisiselo lama pakanisaka malunghana ni ntshembo wa ku pfuxiwa ka lava feke ma va hlawulekisa njhani Vakreste va ntiyiso?
7 Van’wana lava veke Vakreste eka lembe-xidzana ro sungula C.E. a swi va olovelanga ku amukela ntshembo wa ku pfuxiwa ka lava feke. Van’wana lava swi va tikeleke a va hlanganyela ni vandlha ra le Korinto. Pawulo u va tsalele a ku: “Exikarhi ka swilo swo sungula leswi na mina ndzi swi amukeleke, ndzi hundzisele eka n’wina leswaku Kreste u fele swidyoho swa hina hi ku ya hi Matsalwa; ni leswaku u lahliwile, ina, leswaku u pfuxiwile esikwini ra vunharhu hi ku ya hi Matsalwa.” Kutani Pawulo u tiyisekise mhaka leyi hi ku vula leswaku Kreste la pfuxiweke eku feni “u humelele eka vamakwerhu vo tlula 500” lava Pawulo a yeke emahlweni a vula leswaku vunyingi bya vona a va ha hanya hi nkarhi wolowo. (1 Vakorinto 15:3-8) Nakambe u te: “Loko ku chumayeriwa Kreste leswaku u pfuxiwile eka lava feke, swi endlekisa ku yini leswaku van’wana exikarhi ka n’wina va vula leswaku ku pfuka ka vafi a ku kona? Loko hakunene ku pfuka ka vafi ku nga ri kona, na Kreste a nga pfuxiwanga. Kambe loko Kreste a nga pfuxiwanga, ku chumayela ka hina i ka hava hakunene, ni ripfumelo ra hina i ra hava.”—1 Vakorinto 15:12-14.
8 Ina, dyondzo ya ku pfuxiwa ka lava feke i ya nkoka swinene lerova ripfumelo ra Vakreste a ri nge pfuni nchumu loko ku ri leswaku lava feke a va nge pfuxiwi. Phela, matwisiselo lama pakanisaka malunghana ni ku pfuxiwa ka lava feke hi wona ma hambanisaka Vakreste va ntiyiso ni va mavunwa. (Genesa 3:4; Ezekiyele 18:4) Xisweswo, eka “dyondzo ya masungulo” ya Vukreste, Pawulo u katsa ni ku pfuxiwa ka lava feke. Onge hi nga tiyimisela ku “[chivirikela] eku wupfeni.” Pawulo wa khutaza a ku: “Naswona leswi hi ta swi endla, loko kunene Xikwembu xi swi pfumelela.”—Vaheveru 6:1-3.
Ntshembo Wa Ku Pfuxiwa Ka Lava Feke
9, 10. Bibele yi ri i yini ku pfuxiwa ka lava feke?
9 Leswaku hi tiyisa ripfumelo ra hina swinene eku pfuxiweni ka lava feke, a hi kambisiseni swivutiso swo tanihi leswi nge: Xana Bibele yi ri i yini ku pfuxiwa ka lava feke? Dyondzo ya ku pfuxiwa ka lava feke yi ri kombisa njhani rirhandzu ra Yehovha? Tinhlamulo ta swivutiso leswi ti ta hi tshineta ekusuhi ni Xikwembu ti tlhela ti hi pfuna ku dyondzisa van’wana.—2 Timotiya 2:2; Yakobo 4:8.
10 “Ku pfuxiwa ka lava feke” i marito lama hundzuluxeriweke ma suka eritweni ra Xigriki leri hi ku kongoma ri vulaka “ku yima nakambe.” Xana sweswo swi vula yini? Hi ku ya hi Bibele, ntshembo wa ku pfuxiwa ka lava feke i ku pfumela leswaku munhu la feke a nga tlhela a hanya. Nakambe Bibele yi kombisa leswaku munhu u ta pfuxiwa a ri ni miri wa nyama kumbe wa moya, swi titshege hi loko a ri ni ntshembo wa ku hanya emisaveni kumbe ematilweni. Ntshembo lowu tsakisaka swonghasi wa ku pfuxiwa ka lava feke wu endla leswaku hi tlangela rirhandzu, vutlhari ni matimba ya Yehovha.
11. Hi wihi ntshembo wa ku pfuxiwa ka lava feke lowu malandza lama totiweke ya Xikwembu ma nyikiwaka wona?
11 Ku pfuxiwa ka Yesu ni vamakwavo lava totiweke swi endla leswaku va va ni miri wa moya lowu nga ta endla leswaku va kota ku ya tirha va ri etilweni. (1 Vakorinto 15:35-38, 42-53) Va ta tirha swin’we tanihi vafumi eMfun’weni wa Mesiya, lowu nga ta tisa Paradeyisi laha misaveni. Vatotiwa va tirha tanihi vaprista lava fumaka ehansi ka Yesu loyi a nga Muprista Lonkulu. Va ta tirhisa vuyelo bya gandzelo ra nkutsulo ra Kreste eka vanhu emisaveni leyintshwa leyi lulameke. (Vaheveru 7:25, 26; 9:24; 1 Petro 2:9; Nhlavutelo 22:1, 2) Hi nkarhi lowu fanaka, vatotiwa lava ha hanyaka emisaveni va tsakela ku tshama va ri lava amukelekaka eka Xikwembu. Loko va fa va ta kuma “hakelo” ya vona hi ku pfuxiwa va ya hanya hilaha ku nga heriki ematilweni tanihi vanhu va moya. (2 Vakorinto 5:1-3, 6-8, 10; 1 Vakorinto 15:51, 52; Nhlavutelo 14:13) Pawulo u tsale a ku: “Loko hi hlanganile na yena hi rifu leri fanaka ni ra yena, hakunene hi ta tlhela hi hlanganisiwa na yena hi ku pfuka loku fanaka ni ka yena.” (Varhoma 6:5) Kambe ku vuriwa yini hi lava va nga ta pfuxeriwa ku hanya emisaveni va ri vanhu va nyama? Xana ntshembo wa ku pfuxiwa ka lava feke wu nga va tshineta eka Xikwembu hi ndlela yihi? Hi nga dyondza swo tala eka xikombiso xa Abrahama.
Ku Pfuxiwa Ka Lava Feke Ni Ku Va Munghana Wa Xikwembu
12, 13. Hi xihi xisekelo lexi tiyeke xa ku pfumela eku pfuxiweni ka lava feke lexi Abrahama a veke na xona?
12 Abrahama loyi a hlamuseriwaka tanihi “munghana wa Yehovha,” a a ri wanuna wa ripfumelo lerikulu. (Yakobo 2:23) Pawulo u vulavule hi ripfumelo ra Abrahama kanharhu loko a xaxameta vavanuna ni vavasati va ripfumelo lava nga eka Vaheveru ndzima 11. (Vaheveru 11:8, 9, 17) Eka yinhla ya vunharhu u kandziyise ripfumelo leri Abrahama a ri kombiseke loko a lave ku nyikela n’wana wakwe Isaka a va gandzelo. Abrahama a a tiyiseka leswaku Yehovha u ta hetisisa xitshembiso xakwe xa mbewu leyi a yi ta huma eka Isaka. Hambiloko ku ri leswaku Isaka a a ta fa a va gandzelo, Abrahama “a a anakanya leswaku Xikwembu a xi ta swi kota ku n’wi pfuxa hambi ku ri eka lava feke.”
13 Endzhaku, loko Yehovha a vone ku tiya ka ripfumelo ra Abrahama, u lunghiselele xifuwo lexi a ku ta tirhisiwa xona egandzelweni ematshan’weni ya n’wana wakwe. Hambiswiritano, mhaka ya Isaka a yi fanekisela ku pfuxiwa ka vafi, hilaha Pawulo a hlamuseleke hakona a ku: “Ku sukela kwalaho [Abrahama] u tlhele a [amukela Isaka] hi ndlela yo fanekisela.” (Vaheveru 11:19) Ku tlula kwalaho, Abrahama ana se a a ri ni xisekelo lexi tiyeke xa ku pfumela eku pfuxiweni ka lava feke. Phela Yehovha u kondletele matimba ya Abrahama ya ku tswala loko yena ni nsati wakwe Sara va hlangana va dyuharile kutani va kuma Isaka n’wana wa vona.—Genesa 18:10-14; 21:1-3; Varhoma 4:19-21.
14. (a) Hi ku ya hi Vaheveru 11:9, 10, xana Abrahama a a rindzele yini? (b) Ku fanele ku endleka yini hi Abrahama enkarhini lowu taka leswaku a ta kuma mikateko ya Mfumo emisaveni leyintshwa? (c) Hi nga yi kuma njhani mikateko ya Mfumo?
14 Pawulo u hlamusele Abrahama a ri muluveri la tshamaka emitsongeni, loyi “a a rindzele muti lowu nga ni masungulo lama tiyeke, muti lowu muaki ni muendli wa wona ku nga Xikwembu.” (Vaheveru 11:9, 10) Lowu a wu nga ri muti wa xiviri wo tanihi Yerusalema, laha tempele ya Xikwembu a yi ri kona. Ku ri na sweswo, a wu ri muti wo fanekisela. A wu ri Mfumo wa Xikwembu wa le matilweni lowu vumbiweke hi Kreste Yesu ni vafumi-kulobye va 144 000. Lava 144 000 lava nga eku vangameni ka le tilweni nakambe va vuriwa “muti wo kwetsima, Yerusalema Lowuntshwa,” “mutekiwa” wa Kreste. (Nhlavutelo 21:2) Hi 1914, Yehovha u veke Yesu exiluvelweni tanihi Hosi leyi nga Mesiya ya Mfumo wa le tilweni ivi a n’wi lerisa leswaku a fuma exikarhi ka valala va yena. (Pisalema 110:1, 2; Nhlavutelo 11:15) Leswaku a kuma mikateko ya vulawuri bya Mfumo, Abrahama, “nakulobye wa Yehovha,” u fanele a hanya nakambe. Hilaha ku fanaka, leswaku hi kuma mikateko ya Mfumo, hi fanele hi hanya emisaveni leyintshwa ya Xikwembu tanihi swirho swa ntshungu lowukulu lowu poneke Armagedoni kumbe tanihi swirho swa lava pfuxiweke eku feni. (Nhlavutelo 7:9, 14) Kambe ke, hi xihi xisekelo xa ntshembo wa ku pfuxiwa ka lava feke?
Rirhandzu Ra Xikwembu—Xisekelo Xa Ntshembo Wa Ku Pfuxiwa Ka Lava Feke
15, 16. (a) Vuprofeta byo sungula eBibeleni byi xi veka njhani xisekelo xa ntshembo wa hina wa ku pfuxiwa ka lava feke? (b) Ku pfumela eku pfuxiweni ka lava feke swi nga hi tshineta njhani eka Yehovha?
15 Vuxaka bya hina bya le kusuhi ni Tata wa hina wa le tilweni la nga ni rirhandzu, ripfumelo ra hina leri tiyeke ku fana ni ra Abrahama ni ku yingisa ka hina swileriso swa Xikwembu swi endla leswaku Yehovha a hi vula lava lulameke a tlhela a hi languta hi ri vanghana va yena. Sweswo swi endla leswaku hi fanelekela ku kuma vuyelo bya vulawuri bya Mfumo. Kunene, vuprofeta byo sungula-sungula lebyi nga eRitweni ra Xikwembu eka Genesa 3:15, byi veka xisekelo xa ku pfuxiwa ka lava feke ni ku va vanghana va Xikwembu. Byi profete leswaku Sathana a a ta pfotlosiwa nhloko naswona Mbewu ya wansati wa Xikwembu a yi ta lumiwa xirhendze. Ku fa ka Yesu emhandzini a swi fanekisela ku lumiwa ka yena xirhendze. Ku pfuxiwa ka yena hi siku ra vunharhu swi horise mbanga yoleyo kutani swi pfula ndlela ya leswaku ku tekiwa goza ra ku lwisana ni “la nga ni tindlela to vanga rifu, ku nga Diyavulosi.”—Vaheveru 2:14.
16 Pawulo u hi tsundzuxa leswaku “Xikwembu xi tiyisekisa rirhandzu ra xona n’wini eka hina, hileswi Kreste a hi feleke, loko ha ha ri vadyohi.” (Varhoma 5:8) Ku tlangela musa wolowo lowukulu ngopfu swi hi tshineta eka Yesu ni le ka Tata wa hina wa le tilweni la nga ni rirhandzu hakunene.—2 Vakorinto 5:14, 15.
17. (a) Hi wihi ntshembo lowu Yobo a wu phofuleke? (b) Yobo 14:15 yi paluxa yini malunghana na Yehovha, naswona sweswo swi endla leswaku u titwisa ku yini?
17 Yobo, wanuna wo tshembeka la hanyeke emahlweni ka nkarhi wa Vukreste, na yena a a langutele ku pfuxiwa ka lava feke. Sathana u n’wi kombe maxangu yo tala. Ku hambana ni vachaveleri vakwe va mavunwa, lava nga kalangiki va vulavula hi ta ku pfuxiwa ka lava feke, Yobo u chaveleriwe ngopfu hi ntshembo wolowo kutani a vutisa a ku: “Xana loko munhu la tiyeke emirini a fa a nga tlhela a hanya?” Loko a hlamula, Yobo u te: “Ndzi ta rindza emasikwini hinkwawo ya ntirho wa mina wo sindzisiwa, kukondza ku fika ntshunxeko wa mina.” Loko a vulavula na Yehovha Xikwembu xa yena, u te: “U ta vitana, mina ndzi ta ku hlamula.” Malunghana ni mintlhaveko ya Muvumbi wa hina wa rirhandzu, Yobo u te: “U ta navela ntirho wa mavoko ya wena.” (Yobo 14:14, 15) Ina, Yehovha u wu langutele hi mahlo-ngati nkarhi lowu vanhu hinkwavo lava tshembekaka va nga ta pfuxiwa eku feni va tlhela va hanya. Sweswo swi endla leswaku hi tshinela eka yena hakunene loko hi anakanyisisa hi rirhandzu ni musa lowukulu ngopfu lowu a hi kombisaka wona, hambileswi hi nga hetisekangiki!—Varhoma 5:21; Yakobo 4:8.
18, 19. (a) Hi wihi ntshembo wa ku hanya nakambe lowu Daniyele a nga na wona? (b) I yini leswi hi nga ta swi kambisisa eka xihloko lexi landzelaka?
18 Muprofeta Daniyele, loyi ntsumi ya Xikwembu yi n’wi vuleke “munhu la navelekaka swinene,” u tirhe hi ku tshembeka evuton’wini bya yena. (Daniyele 10:11, 19) U tshame a tshembekile eka Yehovha ku sukela loko a ri evuhlongeni hi 617 B.C.E. ku fikela loko a fa endzhaku ka ku vona xivono hi 536 B.C.E., hi lembe ra vunharhu ra Korexe, hosi ya Peresiya. (Daniyele 1:1; 10:1) Hi lembe ra vunharhu ra ku fuma ka Korexe, Daniyele u vone xivono xa ntlhandlamano wa mimfumo ya misava, lowu nga ta chaputa eka nhlomulo lowukulu lowu taka. (Daniyele 11:1–12:13) Tanihi leswi a a nga xi twisisi kahle xivono xexo, Daniyele u vutise ntsumi leyi n’wi kombeke xona a ku: “Wena hosi yanga, xiphemu xo hetelela xa swilo leswi xi ta va xihi?” Ntsumi yi hlamule hi ku kombetela “enkarhini wa makumu,” laha “lava va nga ni vutlhari va [nga] ta twisisa.” Loko ku ri Daniyele hi byakwe, xana ntshembo wa yena a wu ri wihi? Ntsumi yi te: “U ta wisa, kambe u ta yima u kuma xiavelo xa wena eku heleni ka masiku.” (Daniyele 12:8-10, 13) Daniyele u ta vuya “eku pfuxiweni ka lava lulameke,” hi nkarhi wa Mfumo wa Kreste wa Gidi ra Malembe.—Luka 14:14.
19 Hi hanya exiphen’wini xo hetelela xa nkarhi wa makumu naswona sweswi Mfumo wa Kreste wa Gidi ra Malembe wu tshinele ku tlula leswi a wu tshinerise xiswona loko hi va vapfumeri. Hikwalaho, hi fanele hi tivutisa, ‘Xana ndzi ta va kona emisaveni leyintshwa swin’we na Abrahama, Yobo, Daniyele kun’we ni vavanuna ni vavasati van’wana vo tshembeka?’ Hi ta va kona, ntsendze loko hi tshama ekusuhi na Yehovha, hi hlayisa milawu ya yena. Eka xihloko xa hina lexi landzelaka, hi ta kambisisa ntshembo wa ku pfuxiwa ka lava feke hi vuxokoxoko, hi kumisisa leswaku i vamani lava nga ta pfuxiwa.
Wa Tsundzuka Xana?
• Xana vanhu va angurise ku yini loko Pawulo a vulavula hi ntshembo lowu a nga na wona wa ku pfuxiwa ka lava feke?
• Ha yini ntshembo wa ku pfuxiwa ka lava feke wu hambanisa Vakreste va ntiyiso eka va mavunwa?
• Xana hi swi tivisa ku yini leswaku Abrahama, Yobo na Daniyele a va ri ni ripfumelo eku pfuxiweni ka lava feke?
[Swivutiso Swa Dyondzo]
[Xifaniso lexi nga eka tluka 8]
Loko a yisiwa emahlweni ka Ndhuna-nkulu Felikisi, Pawulo u chumayele hi ku tiyiseka hi ntshembo wa ku pfuxiwa ka lava feke
[Xifaniso lexi nga eka tluka 10]
Ha yini Abrahama a a ri ni ripfumelo eku pfuxiweni ka lava feke?
[Xifaniso lexi nga eka tluka 12]
Yobo u kume nchavelelo eka ntshembo wa ku pfuxiwa ka lava feke
[Xifaniso lexi nga eka tluka 12]
Daniyele u ta vuya loko ku pfuxiwa lavo lulama