Mhangu Ya Mangatsila

OWEN, xifanyetana xa malembe mambirhi na hafu, a a ri karhi a tlanga ekamareni ra ka vona ro hlambela eka rona. U khandziye swilo leswaku a kota ku fikelela vuhiri byo veka mirhi ya vutshunguri, lebyi vatswari vakwe a va anakanya leswaku a nge swi koti ku byi fikelela. Evuhirini byebyo u vone bodlhela leri n’wi kokeke rinoko. U pfule bodlhela ra kona ivi a nwa swilo leswi a swi ri endzeni ka rona. Hiloko swilo swi yima hi nhloko.

Bodlhela leri a ri ri ni asidi yo kariha, kutani, khombo ra kona, Owen u file. Vatswari vakwe a va tshoveke timbilu swinene. Tata wakwe Percy, u ye ekerekeni ya ka vona leswaku a ta kuma nchavelelo. U vutisile, “Ha yini hi humeleriwe hi khombo leri?” Mufundhisi u hlamule a ku, “Xikwembu a xi lava ntsumi yin’wana etilweni.” Hi ku hela matimba, mutswari yoloye la feriweke hi n’wana u vone sweswo ku ri nsele lowukulu. Xana Xikwembu hi xona hakunene xi kunguhateke mhangu yoleyo? Tanihi leswi a a nga ha xi tivi ni lexi a nga xi endlaka, Percy u nambe a chuveka rihlampfu ekerekeni ya ka vona.

Loko a anakanya hi leswi swi humeleleke, Percy u tivutisile: ‘Xana xifanyetana xa mina xi twa ku vava lomu xi nga kona? Xana ndzi ta tlhela ndzi xi vona nakambe?’

Na wena u nga ha va u tivutisa leswaku ku endleka yini loko munhu a fa, ni loko swi ta koteka enkarhini lowu taka leswaku u tlhela u hlangana ni varhandziwa lava feke. Rito ra Xikwembu, ku nga Bibele ra swi hlamula swivutiso sweswo. Ri ni tinhlamulo leti nga erivaleni ni leti chavelelaka eka hinkwavo lava weriweke hi timhangu leti fanaka ni leyi. Ku tlula kwalaho, ri paluxa ntshembo lowu tsakisaka lowu tshembisiweke hi Xikwembu—ku nga ku pfuxiwa ka lava feke.

Hi kombela u hlaya xihloko lexi landzelaka, u dyondza leswi engetelekeke malunghana ni ntshembo wolowo lowu tsakisaka.