Ndlela Yo Tirhisa Siku Rin’wana Ni Rin’wana Hi Vutlhari

“HI DYONDZISE ku hlaya masiku ya hina hi ndlela leyi hi nga tisaka mbilu ya vutlhari ha yona.” (Pisalema 90:12) Lexi a ku ri xikhongelo xo titsongahata xa mutsari wa Bibele, Muxe. Kahle-kahle, a a kombela yini? Xana na hina hi fanele hi khongela hi ndlela leyi fanaka?

Eka ndzimana 10, Muxe u phofule ku karhateka kakwe hikwalaho ka ku koma ka vutomi bya vanhu. Eka xiendlakalo xin’wana, u tsale nhlamuselo ya Yobo, loyi a nga te: “Munhu la velekiweke hi wansati, u hanya nkarhi wo koma naswona u taleriwe hi ku karhateka.” (Yobo 14:1) Swi lo dlaa, leswaku Muxe a a karhatekile hi ku koma ka vutomi bya vanhu lebyi nga hetisekangiki. Hikwalaho, a a teka siku rin’wana ni rin’wana ri ri nyiko ya risima. Loko a endla xikombelo lexi eka Xikwembu, Muxe a a phofula ku navela ka yena ku hanya masiku yakwe lama saleke hi vutlhari, hi ndlela leyi nga ta tsakisa Muvumbi wa yena. Hakunene, na hina hi fanele hi lwela ku tirhisa masiku ya hina hi vutlhari! Loko hi lava ku amukeriwa hi Xikwembu sweswi hi fanele hi endla matshalatshala wolawo.

Ku ni nchumu wun’wana lowu khutazeke Muxe na Yobo, lowu nga hi khutazaka na hina. Vavanuna lava havambirhi a va yi langutele hi mahlo-ngati hakelo ya nkarhi lowu taka—ku nga ku hanya emisaveni ehansi ka swiyimo leswinene. (Yobo 14:14, 15; Vaheveru 11:26) Enkarhini wolowo mintirho leyinene ya munhu a yi nge kavanyetiwi hi rifu. Muvumbi wa hina u tshembisa leswaku vanhu lavo tshembeka va ta hanya hilaha ku nga heriki eparadeyisini emisaveni. (Esaya 65:21-24; Nhlavutelo 21:3, 4) Na wena u nga va ni ntshembo wolowo loko ‘u hlaya masiku ya wena hi ndlela leyi u nga tisaka mbilu ya vutlhari ha yona.’