Swivutiso Swa Vahlayi

Hikwalaho ka yini Pawulo a tsale leswi malunghana ni wansati wa Mukreste: “U ta tshama a hlayisekile hi ku tswala vana”?—1 Timotiya 2:15.

Xana mongo wa ndzimana leyi wu paluxa yini malunghana ni nhlamuselo ya Pawulo? Hi ku kongomisiwa hi moya lowo kwetsima a a nyikela ndzayo malunghana ni ntirho lowu wansati la nga Mukreste a wu endlaka evandlheni. U tsarile: “Ndzi navela leswaku vavasati va tisasekisa hi swiambalo leswi langutekaka, hi xichavo ni mianakanyo yo hluteka, ku nga ri hi tindlela to horha misisi ni nsuku kumbe tiperela kumbe swiambalo leswi durhaka ngopfu, kambe hi ndlela leyi fanelaka vavasati lava vulaka leswaku va chava Xikwembu, hi mintirho leyinene.” (1 Timotiya 2:9, 10) Pawulo a a khutaza Vakreste-kulobye va xisati leswaku va va ni xichavo, va ringanisela loko va hlawula ku tisasekisa, naswona va ‘tisasekisa’ hi mintirho leyinene.

Ku engetela kwalaho, Pawulo u hlamusele lunghiselelo ra vunhloko evandlheni, a ku: “A ndzi n’wi pfumeleli wansati leswaku a dyondzisa, kumbe ku lawula wanuna, kambe a a miyele.” (1 Timotiya 2:12; 1 Vakorinto 11:3) U hlamusele xisekelo xa lunghiselelo leri hi ku kombisa leswaku hambileswi Adamu a nga xisiwangiki hi Sathana, Evha “hi yena la xisiweke hi ku helela kutani a tlula nawu.” Xana wansati la nga Mukreste a nga sirheleleka njhani leswaku a papalata xidyoho xa Evha? Pawulo u hlamule a ku: “Hambiswiritano, u ta tshama a hlayisekile hi ku tswala vana, ntsena loko vavasati va tshama eripfumelweni ni le rirhandzwini ni le ku kwetsimeni naswona va hlutekile emianakanyweni.” (1 Timotiya 2:14, 15) Xana Pawulo a a vula yini hi marito lawa?

Vahundzuluxeri van’wana va ringanyeta leswaku wansati a nga ponisiwa loko a tswala vana. Hi xikombiso, Today’s English Version yi ri: “Wansati u ta ponisiwa hi ku va ni vana.” Hikwalaho, ku hundzuluxela marito ya Pawulo hi ndlela leyi swi hoxile. Matsalwa yo tala ma kombisa leswaku loko munhu a ta ponisiwa, u fanele a tiva Yehovha, a pfumela eka Yesu, naswona a kombisa ripfumelo rero hi mintirho. (Yohane 17:3; Mintirho 16:30, 31; Varhoma 10:10; Yakobo 2:26) Ku tlula kwalaho, Pawulo a a nga vuli swona leswaku vavasati lava nga vapfumeri va ta tswala vana kahle. Vavasati van’wana va kote ku tswala vana kahle ku nga khathariseki leswaku i vapfumeri kumbe e-e. Naswona khombo ra kona, van’wana va file loko va tswala, ku nga khathariseki leswaku i vapfumeri kumbe a hi vapfumeri.—Genesa 35:16-18.

Ndzayo yin’wana ya Pawulo malunghana ni vavasati epapileni leri fanaka yi hi pfuna ku twisisa leswi a a vula swona. U tsundzuxe tinoni tin’wana letitsongo leti a ti “tshama hi mavoko, ti famba-famba hi tindlu; ina, a ti tshami hi mavoko ntsena, kambe ti tlhela ti va vahlevi ni ku nghenelela etimhakeni ta vanhu van’wana, ti vulavula hi swilo leswi ti nga fanelangiki ku vulavula ha swona.” Xana Pawulo a a va khutaza yini laha? U ye mahlweni a ku: “Hikokwalaho ndzi navela leswaku tinoni letitsongo ti tekiwa, ti tswala vana, ti langutela ndyangu, ti nga nyiki mukaneti xivangelo xo rhukana.”—1 Timotiya 5:13, 14.

Pawulo u kandziyise ntirho lowunene wa vavasati endyangwini. Loko a khomeke hi swilo swo tanihi ‘ku tswala vana ni ku langutela ndyangu,’ wansati loyi a hambetaka a famba “eripfumelweni ni le rirhandzwini ni le ku kwetsimeni naswona [a] hlutekile emianakanyweni” a a nga ta voyamela emikhuveni yo biha. Vumoya bya yena a byi ta londzovotiwa kumbe ‘byi hlayisiwa.’ (1 Timotiya 2:15) Ku endla sweswo a swi ta pfuna vavasati vo tala lavatsongo leswaku va papalata swirimbana swa Sathana.

Marito ya Pawulo lawa a ma tsaleleke Timotiya ma hi tsundzuxa hinkwerhu, vavanuna ni vavasati, leswaku hi tirhisa nkarhi wa hina hi ndlela leyinene. Rito ra Xikwembu ri khutaza Vakreste hinkwavo ri ku: “Tshamani mi ri karhi mi languta leswaku ndlela leyi mi fambaka ha yona a yi fani ni ya lava nga tlharihangiki kambe yi fana ni ya vanhu vo tlhariha.”—Vaefesa 5:15.