“Mpfuno Wa Mina Wu Huma Eka Yehovha”

Mindyangu Leyi Tiyisiwaka Hi Ku Tiva Xikwembu

“RIRHANGU RA LE BERLIN.” Leyi i ndlela leyi mpatswa wun’wana wa le Argentina a wu ri vitana ha yona rirhangu ra xiviri leri wu ri akeke leswaku wu avanyisa yindlu ya wona yi va swiphemu swimbirhi! A wu tshama wu ri eku holoveni; a wu vengana.

Khombo ra kona, xiyimo xa mpatswa wolowo xi tolovelekile. Mindyangu yo tala yi ni timholovo, a yi tshembeki evukatini naswona yi vengana hi ku helela. Leswi swi khomisa gome, hikuva ndyangu wu sunguriwe hi Xikwembu hi xoxe. (Genesa 1:27, 28; 2:23, 24) Nyiko leyi yi humaka eka Xikwembu i ndhawu leyinene yo kombisa rirhandzu leri enteke. (Rhuti 1:9) Loko swirho swa ndyangu swi hetisisa vutihlamuleri bya swona lebyi humaka eka Xikwembu, swi nga dzunisa Yehovha swi tlhela swi tisa ntsako endyangwini. *

Leswi ku nga Xikwembu lexi sunguleke lunghiselelo ra ndyangu, hi fanele hi pfumelela langutelo ra xona ri kucetela ku twisisa ka hina ndlela leyi mindyangu yi faneleke yi va ha yona. Rito ra xona ri ni switsundzuxo swo tala leswi endleriweke ku pfuna mindyangu leswaku yi humelela, ngopfu-ngopfu loko ku va ni mintlhontlho. Bibele yi vula leswi landzelaka malunghana ni vutihlamuleri bya wanuna: “Vavanuna va fanele ku rhandza vasati va vona ku fana ni mimiri ya vona.” Loko wanuna a hetisisa xilaveko lexi, nsati wa yena u ta swi tsakela ku va ni “xichavo xo enta eka nuna wakwe.”—Vaefesa 5:25-29, 33.

Muapostola Pawulo u tsarile malunghana ni vuxaka lebyi faneleke byi va kona exikarhi ka vatswari ni vana va vona: “Vatatana, mi nga karhati vana va n’wina, kambe hambetani mi va kurisa hi ku tshinya ni nkongomiso wa mianakanyo wa Yehovha.” (Vaefesa 6:4) Leswi na swona swi ta endla leswaku ku va ni moya wa rirhandzu, leswi nga ta olovisela vana ku yingisa vatswari va vona.—Vaefesa 6:1.

Tinhla leti hi vulavuleke ha tona i xikombiso xa ndzayo leyi twalaka ya le Bibeleni ya vutomi bya ndyangu. Vo tala va tiphina hi ntsako endyangwini hileswi va tirhisaka misinya ya milawu ya Xikwembu. Hi xikombiso, anakanya hi mpatswa wa le Argentina lowu ku vulavuriweke ha wona eku sunguleni. Endzhaku ka ku dyondza Bibele ni Timbhoni ta Yehovha tin’hweti tinharhu, havumbirhi bya vona va sungule ku tirhisa ndzayo ya yona ya vutlhari leyi vulavulaka hi vukati. Va tirhe hi matimba leswaku va antswisa ku vulavurisana ka vona, va twelana va tlhela va rivalelana. (Swivuriso 15:22; 1 Petro 3:7; 4:8) Va dyondze ku lawula ku hlundzuka ka vona ni ku ya lava mpfuno eka Xikwembu loko swilo swi tikomba swi nga ha lawuleki. (Vakolosa 3:19) Hi ku hatlisa “Rirhangu ra le Berlin” ri wile!

Xikwembu Xi Nga Wu Tiyisa Ndyangu

Vutivi ni ku tirhisa mimpimanyeto ya Xikwembu swi nga tiyisa ndyangu leswaku wu tiyisela mintshikilelo. Leswi i swa nkoka, hikuva ku vuriwe ka ha ri emahlweni leswaku lunghiselelo ra ndyangu a ri ta hlaseriwa hi tihanyi enkarhini wa hina. Pawulo u vule ka ha ri emahlweni malunghana ni ku hohloka loku nga kona sweswi ka mahanyelo ya vanhu. U vule leswaku “emasikwini yo hetelela” vanhu a va nga ha ta tshembeka, “xinakulobye xa ntumbuluko” a xi nga ha ta va kona, vatswari a va nga ha ta yingisiwa, hambi ku ri exikarhi ka lava nga “ni xivumbeko xa ku tinyiketela loku nga ni vukwembu.”—2 Timotiya 3:1-5.

Ku ringeta ku tsakisa Xikwembu ku nga pfuna  ku lwisana ni vuyelo byo tano lebyi nga ni khombo endyangwini. Mindyangu yo tala yi kume leswaku ku laveka ntlhantlho wa moya lowu nga yi pfunaka ku hlangavetana ni mintlhontlho yo tala leyi yi langutanaka na yona. Loko swirho swa ndyangu swi navela ku tshama swi ri ni vuxaka lebyinene na Xikwembu, xa nkoka swinene swi fanele swi tirhisa misinya ya milawu ya le Bibeleni kutani swi xiya leswaku “loko Yehovha a nga yi aki yindlu, i swa hava leswi vaaki va yona va tirheke hi matimba eka yona.” (Pisalema 127:1) Nchumu lowu pfunaka swinene eku kondleteleni ka ntsako endyangwini i ku rhangisa Xikwembu evuton’wini bya ndyangu.—Vaefesa 3:14, 15.

Le Hawaii wanuna la vuriwaka Dennis u swi xiyile leswaku sweswo i ntiyiso. Hambileswi a a tivula Mukreste, a a rhandza nhlambha ni tinyimpi. Endzhaku ko va socha, a a rhandza nyimpi a tlhela a va ni rivengo. U ri: “A ndzi tshama ndzi ri ku lweni. A ndzi nga ri na mhaka leswaku ku endleka yini ha mina, naswona a ndzi nga chavi ku fa. Ndzi hambete ndzi va munhu wa nhlambha ni la rhandzaka nyimpi. Nsati wa mina, loyi a a ri Mbhoni ya Yehovha u ndzi khutaze ku dyondza Bibele.”

Dennis u lwisane ni matshalatshala ya nsati wakwe. Hambiswiritano, ku tikhoma ka yena ka Vukreste ku verhamise langutelo ra yena ro biha. Dennis u hetelele a yile eminhlanganweni ya Vukreste ni nsati wakwe ni vana. Endzhaku ka sweswo, ku sunguriwe dyondzo ya Bibele na Dennis, naswona u endle nhluvuko lowunene. U tshike ku dzaha laha a a ri na malembe ya 28 a ri karhi a dzaha a tlhela a tshika ku tihlanganisa ni vanghana lava a va endla swilo hinkwaswo leswi a a ringeta ku swi tshika. Dennis loko a nkhensa Yehovha u te: “Vutomi bya ndyangu wa mina byi antswile. A hi ya eminhlanganweni ni le nsin’wini hi ri ndyangu. Vana va mina vambirhi a va nga ha ndzi chavi, hikuva ndzi dyondze ku lawula ku hlundzuka ka mina kutani ndzi tshika nhlambha. A hi vulavula hi tlhela hi tiphina hi mabulo ya le Bibeleni. Loko a ku nga ri ntiyiso wa Bibele, a ndzi ta va ndzi nga ri kona namuntlha; a ndzi ri ni ximbilwambilwana swinene.”

Mindyangu yi nga tsaka loko yi tirha hi matimba leswaku yi endla ku rhandza ka Yehovha. Leswi tshameke swi humelela swi kombise leswaku loko xirho xin’we xa ndyangu xi tirhisa misinya ya milawu ya Bibele, swilo swa antswa ku tlula loko ku nga ri na loyi a yi tirhisaka. Leswaku u aka ndyangu wa Vukreste swi lava u tirha hi matimba, swi lava vutshila ni nkarhi. Kambe swirho swa mindyangu yoleyo swa tiyiseka leswaku Yehovha u ta hakela matshalatshala ya swona yo aka. Swi nga phindha marito ya mupisalema lama nge: “Mpfuno wa mina wu huma eka Yehovha.”—Pisalema 121:2.

[Nhlamuselo ya le hansi]

[Marito lama tshahiweke exihlokweni lama nga eka tluka 9]

“Vito ra ndyangu wun’wana ni wun’wana etilweni ni le misaveni ri hum[a] eka [Xikwembu].”—VAEFESA 3:15

[Bokisi leri nga eka tluka 8]

YEHOVHA U RI TEKA RI RI RA RISIMA LUNGHISELELO RA NDYANGU

“Xikwembu xi va katekisa, kutani Xikwembu xi ku eka vona: ‘Tswalanani mi andza, mi tata misava.’”—Genesa 1:28.

“Wa tsaka un’wana ni un’wana la chavaka Yehovha . . . Nsati wa wena u ta fana ni murhi wa vhinya lowu vekaka mihandzu eswiphen’wini swa le ndzeni-ndzeni swa yindlu ya wena.”—Pisalema 128:1, 3.