Swivutiso Swa Vahlayi

Ha yini Davhida na Bati-xeba va nga dlayiwanga hikwalaho ka leswi va endleke vuoswi, kambe ku fa n’wana wa vona loyi a a ha ku tswariwa?

Nawu wa Muxe wu te: “Loko wanuna o tshuka a kumiwa a etlele ni wansati la nga ni n’wini, havambirhi va fanele va fa swin’we, wanuna la etleleke ni wansati swin’we ni wansati wa kona. Hikwalaho u fanele u susa swo biha eIsrayele.” (Deteronoma 22:22) Loko Yehovha Xikwembu a a lo pfumelela nandzu wa xidyoho xa Davhida na Bati-xeba wu tameriwa hi vaavanyisi lava nga vanhu ehansi ka Nawu, mpatswa lowu, lowu endleke vuoswi a wu ta va wu dlayiwile. Tanihi leswi vaavanyisi lava nga vanhu a va nga swi koti ku vona timbilu, a va fanele va avanyisa hi ku ya hi ku tikhoma ka mudyohi. Loko munhu a endle vuoswi a a fanele a dlayiwa. Vaavanyisi va Vaisrayele a va nga pfumeleriwanga ku rivalela xidyoho xexo.

Hi hala tlhelo, Xikwembu xa ntiyiso xa swi kota ku vona timbilu xi tlhela xi rivalela swidyoho loko xi vona ku ri na xivangelo xo endla tano. Yehovha u hlawule ku tamela mhaka leyi hi yexe hileswi nandzu lowu a wu katsa Davhida, loyi A endle ntwanano wa Mfumo na yena. (2 Samuwele 7:12-16) “Muavanyisi wa misava hinkwayo” u ni mfanelo yo endla nhlawulo wolowo.—Genesa 18:25.

Xana Yehovha u vone yini loko a ri karhi a kambela mbilu ya Davhida? Rito ro rhanga eka Pisalema 51 ri vula leswaku pisalema leyi yi paluxa mintlhaveko ya Davhida “loko Natani lowa muprofeta a ta eka yena endzhaku ka loko a tivane na Bati-xeba.” Pisalema 51:1-4 yi ri: “Oho Xikwembu, ndzi kombe tintswalo hi ku ya hi musa wa wena wa rirhandzu. Hlangula ku tlula ka mina nawu hi ku ya hi tintswalo ta wena to tala. Ndzi hlantswe xihoxo xa mina swinene, naswona ndzi basise eka xidyoho xa mina. Hikuva ndza ku tiva ku tlula ka mina nawu, naswona xidyoho xa mina xi le mahlweni ka mina nkarhi hinkwawo. Ndzi dyohele wena, wena ntsena, naswona ndzi endle swo biha ematihlweni ya wena.” Yehovha u fanele a teke ku tisola swinene loku ka mbilu ya Davhida tanihi vumbhoni bya ku hundzuka loku humaka embilwini kutani a endla xiboho xa leswaku a ku ri ni xisekelo xo kombisa vadyohi lava tintswalo. Ku tlula kwalaho, Davhida hi yexe a a ri munhu la nga ni tintswalo, naswona Yehovha u kombisa tintswalo eka lava nga ni tintswalo. (1 Samuwele 24:4-7; Matewu 5:7; Yakobo 2:13) Hikwalaho, loko Davhida a pfumele xidyoho xa yena, Natani u te: “Yehovha na yena u tshika xidyoho xa wena xi hundza. A wu nge fi.”—2 Samuwele 12:13.

Davhida na Bati-xeba a va ta kuma byin’wana bya vuyelo bya xidyoho xa vona. Natani u byele Davhida a ku: “Hikwalaho ka leswi handle ko kanakana u khomeke Yehovha hi ndlela leyi nga kombisiki xichavo, hi nchumu lowu, na yena n’wana loyi u nga ta velekeriwa yena, entiyisweni u ta fa.” N’wana wa vona u vabyile kutani a fa hambileswi Davhida a titsoneke swakudya a tlhela a va nhlomulweni ku ringana masiku ya nkombo.—2 Samuwele 12:14-18.

Van’wana swa va tikela ku twisisa leswaku ha yini n’wana a boheke ku fa, kasi Deteronoma 24:16 yi ri: “Vana va nga tshuki va dlayiwa hikwalaho ka vatatana.” Kambe hi fanele hi tsundzuka leswaku loko nandzu lowu a wu lo tengiwa hi vaavanyisi lava nga vanhu va nyama, vatswari swin’we ni n’wana la nga si tswariwaka loyi a a ri embelekweni a va ta va va file. Ku fa ka n’wana ku nga ha va ku pfune Davhida leswaku a yi xiya kahle ndlela leyi Yehovha a a karhateke ha yona hi xidyoho xa yena na Bati-xeba. Hi nga tiyiseka leswaku Yehovha u yi tamele hi ndlela leyi lulameke mhaka leyi, hikuva “ndlela ya [ye]na yi hetisekile.”—2 Samuwele 22:31.

[Xifaniso lexi nga eka tluka 31]

Davhida u kombise ku hundzuka ka ntiyiso