Swivutiso Swa Vahlayi

Loko va twe leswaku Petro loyi a khotsiweke a a ri enyangweni, ha yini vadyondzisiwa va te: “I ntsumi yakwe”?—Mintirho 12:15.

Vadyondzisiwa va nga ha va va endle xihoxo va ehleketa leswaku ntsumi leyi yimelaka Petro hi yona a yi yime enyangweni. Xiya mongo wa ndzimana leyi.

Petro a a khomiwe hi Heroda, loyi a dlayeke Yakobo. Kutani vadyondzisiwa a va ri ni xivangelo lexi twalaka xo kholwa leswaku Petro a a ta dlayiwa na yena. Petro loyi a pfaleriweke a bohiwe hi tinketana, a a rindziwa hi masocha lawa a ma cincana ka mune esikwini, ma tirha ma ri mune-mune. Kutani eka vusiku byin’wana, u ntshunxiwile hi singita ivi a humesiwa hi ntsumi ekhotsweni. Loko Petro eku heteleleni a vone leswi humeleleke, u te: “Sweswi ndzi swi tiva kahle leswaku Yehovha u rhume ntsumi yakwe kutani yi ndzi kutsurile evokweni ra Heroda.”—Mintirho 12:1-11.

Hi ku hatlisa Petro u ye endlwini ya Mariya mana wa Yohane Marka, laha vadyondzisiwa vo hlayanyana a va hlengeletane kona. Loko a gongondza enyangweni, nandza wa xisati loyi a vuriwaka Rhoda u yile a ya hlamula. Loko a twa rito ra Petro, u tsutsume a ya byela lavan’wana a nga si n’wi pfulela a nghena! Eku sunguleni vadyondzisiwa a va nga kholwi leswaku Petro hi yena a yimeke enyangweni. Ematshan’weni ya sweswo, hi xihoxo va te: “I ntsumi yakwe.”—Mintirho 12:12-15.

Xana vadyondzisiwa a va kholwa leswaku ana se Petro u dlayiwile kutani a ku yime xipuku xakwe enyangweni? A swi nga ta va tano, hikuva valandzeri va Yesu a va tiva ntiyiso wa Matsalwa hi xiyimo xa vafi—leswaku “a va tivi nchumu nikatsongo.” (Eklesiasta 9:5, 10) Kutani, xana vadyondzisiwa a va vula yini loko va ku: “I ntsumi yakwe”?

Vadyondzisiwa va Yesu a va swi tiva leswaku ematin’wini hinkwawo, tintsumi a ti pfuna vanhu va Xikwembu hi ku kongoma. Hi xikombiso, Yakobe u vulavule hi “ntsumi leyi a yi ndzi ponisa emakhombyeni hinkwawo.” (Genesa 48:16) Naswona malunghana ni n’wana loyi a a ri exikarhi ka vona, Yesu u byele valandzeri vakwe a ku: “Tivoneleni leswaku mi nga n’wi languteli ehansi un’wana wa lava lavatsongo; hikuva ndza mi byela leswaku tintsumi ta vona etilweni minkarhi hinkwayo ti vona xikandza xa Tatana la nge tilweni.”—Matewu 18:10.

Lexi tsakisaka, Young’s Literal Translation of the Holy Bible yi hundzuluxela rito leri nge agʹge·los (“ntsumi”) tanihi “murhumiwa.” Swi tikomba onge Vayuda van’wana a va pfumela leswaku nandza un’wana ni un’wana wa Xikwembu u ni ntsumi yakwe—“ntsumi leyi n’wi rindzaka.” Kahle-kahle, dyondzo leyi a yi dyondzisiwi hi ku kongoma eRitweni ra Xikwembu. Hambiswiritano, swi nga endleka leswaku loko vadyondzisiwa va ku, “I ntsumi yakwe,” a va ehleketa leswaku murhumiwa loyi a nga ntsumi leyi yimelaka Petro hi yena a a yime enyangweni.