U Nga Tshiki Ku Endla Leswi Nga Swinene

MUAPOSTOLA PETRO u khutaze a ku: “Hlayisani ku tikhoma ka n’wina ku ri kunene exikarhi ka matiko.” (1 Petro 2:12) Rito ra Xigriki leri hundzuluxeriweke va ku “kunene” ri kombetela eka nchumu lowu “sasekeke, lowu hlawulekeke, lowu xiximekaka ni ku va exiyin’weni lexinene.” Enkarhini wa namuntlha, swi nga ha vonaka ku ri norho ku langutela leswaku vanhu lava tolovelekeke va va ni mahanyelo lamanene kumbe lama xiximekaka. Hambiswiritano, hi xitalo, vanhu va Yehovha namuntlha va humelerile loko va landzela xikhutazo xa Petro. Entiyisweni, va tiveka emisaveni hinkwayo hikwalaho ka mahanyelo ya vona lamanene.

Sweswo swi xiyeka ngopfu loko hi anakanya hi mintshikilelo ni maxangu lawa hi langutanaka na wona eka “minkarhi [leyi] ya mangava leyi swi nonon’hwaka ku langutana na yona.” (2 Timotiya 3:1) Siku ni siku hi vona maxangu naswona mahanyelo ya Vukreste ma tshamela ku kanetiwa. Ku tlhandlekela kwalaho, hambiloko miringo yin’wana yi nga heti nkarhi wo leha, yin’wana yi phikelela nkarhi wo leha yi tlhela yi nyanya ku kula. Nilokoswiritano, muapostola Pawulo u khutazile a ku: “Hi nga tshiki ku endla leswi nga swinene, hikuva hi nguva leyi faneleke hi ta tshovela loko hi nga karhali.” (Vagalatiya 6:9) Xana u nga swi kotisa ku yini ku hambeta u endla leswi nga swinene loko u langutane ni miringo ni rivengo leri phikelelaka?

Ku Pfuniwa Ku Endla Leswi Nga Swinene

Ku va ‘la hlawulekeke, la xiximekaka ni ku va exiyin’weni lexinene,’ swi kombisa xiyimo xa munhu wa le ndzeni, mfanelo ya mbilu. Hikwalaho, ku namarhela mahanyelo lamanene niloko u langutane ni miringo ni maxangu a swi tiendlekeli ntsena, kambe swi vangiwa hi ku landzela misinya ya milawu ya Bibele siku ni siku evuton’wini, u hanya ha yona. Hi swihi swilo swin’wana leswi nga pfunaka emhakeni leyi? Xiya leswi landzelaka.

Hlakulela langutelo ra mianakanyo ra Kreste. Ku tiyisela loko u vona u khomiwa hi ndlela leyi nga fanelangiki swi lava ku titsongahata. Munhu loyi a titlakusaka a nga swi koti ku tiyisela loko a khomiwa hi ndlela leyi nga fanelangiki. Hambiswiritano, Yesu u “titsongahatile kutani a yingisa ku ya fika eku feni.” (Vafilipiya 2:5, 8) Loko hi n’wi tekelela, a hi nge ‘karhali kumbe ku wa mapa’ entirhweni wa hina wo kwetsima. (Vaheveru 12:2, 3) Yingisa hi ku titsongahata u tirhisana kahle ni lava rhangelaka evandlheni ra ka n’wina. (Vaheveru 13:17) Dyondza ku languta van’wana tanihi lava “tlakukeke” eka wena, u rhangisa swilaveko swa vona eka swa wena.—Vafilipiya 2:3, 4.

Tsundzuka leswaku Yehovha wa ku rhandza. Hi fanele hi kholwa leswaku Yehovha ‘u kona naswona i muhakeri wa lava va n’wi lavaka hi mbilu hinkwayo.’ (Vaheveru 11:6) U hi khathalela swinene naswona u lava leswaku hi kuma vutomi lebyi nga heriki. (1 Timotiya 2:4; 1 Petro 5:7) Ku tsundzuka leswaku ku hava nchumu lowu nga hi hambanisaka ni rirhandzu ra Xikwembu swi ta hi pfuna leswaku hi nga karhali loko hi langutane ni miringo.—Varhoma 8:38, 39.

Tshemba Yehovha hilaha ku heleleke. Ku tshemba Yehovha i swa nkoka, ngopfu-ngopfu loko miringo yi vonaka yi phikelela kumbe yi xungeta vutomi. Hi fanele hi tshemba hi ku helela leswaku Yehovha a nge wu pfumeleli  ndzingo wihi ni wihi wu kula ku ‘tlula leswi hi nga swi tiyiselaka,’ kambe minkarhi hinkwayo u ta hi “nyika ndlela yo huma.” (1 Vakorinto 10:13) Hambiloko hi langutane ni nxungeto wa rifu a hi nge chavi nchumu loko hi tshembe Yehovha.—2 Vakorinto 1:8, 9.

Phikelela exikhongelweni. Xikhongelo lexi humaka embilwini i xa nkoka. (Varhoma 12:12) Ku khongela swi huma embilwini hi yin’wana ya tindlela leti hi tshinelaka eka Yehovha ha tona. (Yakobo 4:8) Loko hi humeleriwa hi swo karhi, hi dyondza leswaku “ku nga khathariseki leswaku i yini lexi hi xi kombelaka . . . , [wa] hi twa.” (1 Yohane 5:14) Loko Yehovha a pfumelela leswaku hi hambeta hi ringiwa leswaku hi kombisa vutshembeki bya hina, hi ta khongela leswaku a hi pfuna hi tiyisela. (Luka 22:41-43) Xikhongelo xi hi dyondzisa leswaku a hi hexe, naswona loko hi ri na Yehovha, minkarhi hinkwayo hi ta hlula.—Varhoma 8:31, 37.

Mintirho Leyinene—‘Xivangelo Xa Ku Vongiwa Ni Ku Xiximiwa’

Nkarhi ni nkarhi, Vakreste hinkwavo va vangeriwa “gome hi miringo leyi hambaneke.” Kambe, a hi fanelanga ‘hi tshika ku endla leswi nga swinene.’ Loko u tshikilelekile, vana ni matimba hi ku tiva leswaku vutshembeki bya wena eku heteleleni byi ta va “xivangelo xa ku vongiwa, ku vangamisiwa ni ku xiximiwa.” (1 Petro 1:6, 7) Swi tirhise hi ku helela swilo swa moya leswi humaka eka Yehovha leswaku a ku tiyisa. Loko u lava mpfuno eka swin’wana leswi ku karhataka, yana eka varisi, vadyondzisi ni vatsundzuxi lava nga evandlheni ra Vukreste. (Mintirho 20:28) Vana kona nkarhi ni nkarhi eminhlanganweni hinkwayo ya vandlha, leyi hi ‘khutazaka erirhandzwini ni le mintirhweni leyinene.’ (Vaheveru 10:24) Xiyimiso xa ku hlaya Bibele siku ni siku ni xa dyondzo ya munhu hi yexe swi ta ku pfuna leswaku u tshama u xalamukile ni ku tiya emoyeni; nakambe u ta tiya emoyeni loko u hlanganyela evutirhelini bya Vukreste.—Pisalema 1:1-3; Matewu 24:14.

Loko u hambeta u vona rirhandzu ni nkhathalelo wa Yehovha, u ta ya u navela ku ‘hisekela mintirho leyinene.’ (Tito 2:14) Tsundzuka, “loyi a tiyiseleke ku fika emakumu hi yena la nga ta ponisiwa.” (Matewu 24:13) Ina, tiyimisele ku ka ‘u nga tshiki ku endla leswi nga swinene’!

[Marito lama tshahiweke exihlokweni lama nga eka tluka 29]

Hi fanele hi tshemba hi ku helela leswaku Yehovha a nge hi tshiki hi ringiwa hi ‘ndlela leyi tlulaka leswi hi nga swi tiyiselaka,’ kambe minkarhi hinkwayo u ta hi “nyika ndlela yo huma”

[Swifaniso leswi nga eka tluka 30]

Ku tshama hi ri karhi hi gingiriteka emintirhweni ya Xikwembu swi nga hi pfuna leswaku hi lunghekela ku langutana ni miringo